BUALTHLENG MAWITU BUNG 26-30

Zing ni chhuak eng mawi tak karah hram thiam va tin rengte'n leilung an aw rawl tawpin an awi a, Bualthleng khua pawh ni dang ang bawka mahni țul naa thawk mawp mawpin nutling vawk chaw pek paha bai chhuan vil mekte'n an fate infiamna ațanga hnap tla pur a an rawn țah haw leh zel hi chuan pasal an neih kha an va inchhir dawn lua em. Mahse an ni hmangaihna zawng a mawia a rinawm em em bawk si a.

Țialthangi pawh a fanu tleirawl ve țan ik ek tawh Thangliani nen an inchhungah chuan an buai buaiin an lo buai ve mawp mawp a. A fanu buh deng a den zawnga a sam lo uaithla thaw hlawi hlawi chunga a beng chung lama a va zep phei țhinte a thlan tuiin a hmai a chiah hneh em avanga mawm hluam anga langte chu a lainat ruin hmeithai fanu a ni ta mai chu na a ti em em a. Mahse a fanu hi nakin lawkah chuan khawi lam lal fapa emaw khawi lam khawnbawl upa fa emawte lu la ti hai tu a ni dawn tih a hre chiangin a fanu nulat pawh la hre țha țhum lo an khaw tlangval leh pathlawi te chil ti puttu chu a chhuang ve em em mai a ni.

Chu tih rualin Thansanga leh Chawiliana a ngaihtuahna chu a nasa zual tawh em em bawk a. Chu tia thil eng eng emaw ngaihtuaha a en ngai a en ngut ngut lai chuan an kawngka bianga Lalpa lo ding reng chu hmu thutin rang takin a tho nghal vata "Lalpa enge ni ta keini in lam lamte a i lo chuan kai ve tak mai, pawipang a awm ta em ni?" a han ti a Lalpa Dohranga lah chuan chhang lem hlei loin inchhung dungah chuan a tei chhen leh nghala a hlauthawng hle mai. Lalpa Dohranga chuan a vaibel pak khuk tual tual pah chuan" Upa Chawnga ho a kan vanglaia ka lawi luhna ber inah hian ka duh hunah ka lawi thei lo em ni? "a han ti nui sung a. Țialthangi pawh chuan hrethiam vatin" e Lalpa he in hi i in ve tho a lawm "a ti ve bawk a. Lalpa chuan" Khawnbawl upate an lo chuangkai lem lo em țhin a zing lamah hi chuan ka rawn vak chhuak mai mai a ni e, Sangtea te unau hi an thang rei tawh riau mai a ka ngaih a țha thei tlat lo maia. Vawin hi kan nghak leh i la naktuk lamah chuan chanchin hre turin tlangval țhenkhat ka tir ange ka ti deuh a ni"a rawn ti leh a chu thu chuan Țialthangi chu ti lawm hle mah se "Lalpa mipa an ni ve alawm an rawn haw ve mai ang" a ti ve tak na a a thinlung chhung ațanga chhuak anih loh zia chu an hre chiang hle thung.

Lalpa Dohranga chu tlangaupain a rawn koh takah chuan rei rial tawh lovin a chhuak ta vat a. Țialthangi chu a rilru a hah tawhin a fapa te pahnih a ngaihtuahna chu a nasa hle mai a. Thansanga phei chu naupangte anih ata mi awm thei chhungkua ațanga seilian a ni a tunah hmeithai fa a ni ta mai si a, a lainat hle mai. Chawiliana erawh hmeithai fa a nih avangin a tuar thiamin a ring a mahse hun rei lo te chhunga a pasal nen an innel hman zia pafa dik tak ang chiaha an khawsak dun hman avang khan pa a han nei lo leh thut chu a khawngaih ve hle mai mahse thihna hian tumah min kal kan ngai si lo.

Runthanga te pawh Zehtet khua chu nau rilțam hunah an luh hman an beisei tawh bawk nen an kal chak hle mai. Mahse tlangval sawmthum chuang chhuaka sawm panga awrh an haw tur chu an rilru a dam lo tlang hle mai. Muang chang lem lo a kal zelin nau rilțam anih meuh chuab Zehtet kawtchhuahah chuan an awm ta. Chawl thlandai zuaiin bawhhla pawh chham loin khaw chhung lam an pan leh ta a khaw chhungah chuan lo lam hna avangin mi an lo tlem hle maia a awm chhunte chuan lo chibai sap sapin an zui zela țhenkhatin lal inlamah thu an lo thlen bawk nen Lalpa Puithanga chu a rang a ranga tlan chhuakin Runthanga te tawk zawng chuan a tlan nghal a chu tia Lalpa meuhin a rawn hmuah takah chuan anni pawh Lalpa tawk zawngin an kal chak zual sawt bawka an han indinchilh chu Lal Puithanga chu a thaw hlawi hlawi a țawng a han tum ngiala a hah lutuk chu khup dawm meuhin a thaw hlawi hlawi mai a ni.

Ti chuan zawi awiin lalin lam panin an kal leh ta a. Lalpa Puithanga chuan a chibai kual veka hahzu te zukin an chet dante an lo hriat nual tho avangin a zawt tam lo hle. Chu mi ni nileng chuan Bualthleng lamte chu lalin lamah awm khawm vekin titi khawchangte sawiin an hlim dar dar hle mai. Zan riah pawh lalinah kil nghalin tlangaupa chu Lalpa thu angin mipuite ko khawmin a au lauh lauh mai a. Mi pui lal tuala pungkhawm phun mur mur chu lal in ațanga an hriat takah chuan Lalpa Puithanga chu chhuak vatin thu a va sawi ta a "Vawinniah hian lusei fate hnehna ropui kan chan hi inhnenah hian ka puang duh a ni. Kan pasalțhate rammu chu an hlawhtlingin tunah chuan Hmar hnamte țihkhai kan ni ta. Lusei fate hi kan dawihzep lo hle tih hi an hre tawh a ni. Tunah hian kan pasalțha te kha lo chhuak se la nopui ka hlan duh e"a ti chiah chu mipui sahawk chu an au dur dur a lal tual chu a khu rum rum bawka. Runthanga te chu inzui chhuak dam damin Lalpa Puithanga nopui chu an dawm ta vek a.

Chu zan chu lusei pasalțhate tana zan hriat reng tlak a ni tawh dawn a ni. Rengliana pawh Lianmawia kokichhuan chungin khawlaiah chuan a tei thauh thauh reng maia. Thansanga te țhianthum pawh khawi lamah nge an len hriat ni suh. Chu zan chu rammu a hawngte tan chuan a hahdam thlakin an pang a dam sawng sawng ngei ang.

A tuk zing varțianah chuan Bualthleng lama haw turte chu an inbuatsaih sap sap a. Lalpa Puithanga pawhin rawn thlahin zin leh vat tura intiam chungin an kal ta a. Bualthleng lal tualah pawh tlangval sawmte chu ding țhapin Lalpa Dohranga chuan a pasalțha chhuakte chanchin hre haw ngei tura chahin a tir chhuak ve bawka. Ram ri lui a an chawlh lai mek chuan Chawiliana chuan midangte chu țawng lo tura ti vatin a beng a han chhi vang vanga Bualthleng lama țanga thawm lo awm chu midangte pawh chuan lo hre vein eng pawh tawk thei turin an lo inring țhapa thawm pawh lo hnai zelin an khaw tlangval te nen chuan an inhmu ta.In chibai sap sapin an kal tlang ta a.

Unau hmelhai velah an khua chu an thleng ta. An hmangaih berte lenna an neih zawng zawngte awmna khua an thleng chu an hah a dam zual ngei mai. An haw thu chu kar loah khuaah chuan a khat nghal vek maia mipuite chuan lo lawm puiin a haw ve thei lo chhungte erawh an țap keuh keuh hlawm bawk a. Lalpa Dohranga chuan Lalpa Puithanga tih ang chiahin chawimawina nopui chu dawm tir ve lehin zan lama leng ngei tura inchahin an haw ta hlawma.

Țialthangi chuan a fapa te pahnih rawn haw chu nui hmel nen mittui nen a lo lawm bawka Thansanga te unau pawh an hlimin a nu an han hmu chu nuam an ti hle mai a, zan riah eikhamah chuan an nu leh an nau te nen titi hoin Thangliani pawh a u te pahnih inkarah chuan țhuin a lo nui ve her her bawk a. Lal in lama len an intiam avangin leng len ar khuan rual chuan chhuak vatin Lal in an han thlen chuan Rengliana te nupa chauh leh lal chhungkua chauh lo awmin Lalpa Dohranga chuan a lo chiau au thuaia. Nakinah chuan midangte pawh rawn thleng ve zelin upa ho an rawn thlen kim ve takah chuan hmeichhe ho chu inthiarfihlim vatin Lalpa chu a ding chhuak ta a "hei kan pasalțha te hnehna ropui tak nen in rawn haw hi ka lawma ka pasalțha te inni hi ka inchhuangin ka hlim hle mai. Mahse in va chet dan erawh Thanhranga thihna vang ni lo se zawng ka hnawt chhuak duh ngei ang che u. Mahse Thanhranga kha ka fapa ang tho a ni a, a pa Chawnghranga pasalțha ropui kianga seilian ka ni bawka chu vangin ka dem hauh lo che u a ni. Mahse tun hnuah erawh thleng nawn tawh suh se"a han ti charh charh a Rengliana chu rawn ding ve lehin "ni e Lalpa i thu ang ngeiin a thleng nawn tawh hauh lo ang" a rawn tih ve takah chuan titi hoin Rengliana chuan a nupui chu haw pui vatin Runthanga chuan a zui chhuak nghal bawka Lalpa Dohranga chuan Chawiliana chu en vung vungin "Chawia nupui neih i hun ve țep tawh a ni a, i pa thihna avang khan hmeichhe lam reng rengte hi i lo awn lo palh ang tih ka hlau hlel love i naute hi zawng an la nau a mahse nang erawh i nu innghahna i ni tawh tih hre reng la ka duh a ni" a han ti charh charh a Chawiliana pawh chuan "Lalpa i sawi ang ngei khan ka nu leh ka unaute tan hian innghahna tlak ka ni ngei ang tih ka sawi duh a ni" tih pah chuan a ding ta hluaia an inlam panin a kal leh ta a.

Thansanga te chhuak tur chu Lalpa chuan ko letin "Ute nula rimnaah zui tur a ni ngai lo e, leihkapui lamah saw Chemtei te unau an awm kha va kawm tawh u" a tih takah chuan leihkapui lamah chuan phei ve in lalfanu te kiangah chuan țhuthmun an va rem ve ta a. Biakmawii leh Herliani te chuan an lo be nghal char char a Dammawia leh Liansangate pawh nuam an ti nghal hle mai. Thansanga erawh Parmawii hmel a en chuan nuam lo tihna a nei a, Parmawii nen hmana Lal in leihkapui ngeia an titi dun hnua Parmawii a hmuh leh tak miah loh te chu hre chhuak uai uaiin Parmawii hian a ning hleah a ngai ta tlata. An sirah chuan lo țhu vein a ngawi ngala Dammawia thusawi chu a khat tawkin a lo nuih pui ve suk suk bawk a. Parmawii ve thung chuan chu tia hnaih loh a duh em em mihring a bul hnai maia a awm leh takah chuan thlamuanthlak a tih em em rualin Lianthangi a hre chhuak leh a Thansanga hnaih loh a duhna chu a nasa zualin hrehawm a ti hle mai. An nuih dar dar lai chuan a langa nui chhungrila nui si lo pahnihte mitmeng chu a intawng leh nawlh țhin bawka. Lalpa Dohranga te pawh rorel an zawh takah chuan lal inchhungah chuan zu khawnin an ri le lu bawka.

Biakmawii chuan Thansanga chu rawn enin "Sangtea hi i ngawi ngul bik ziah maia min ning a ni em lo maw?" a han ti a Herliani pawh chuan "Ni e, khawi lam nula vannei tak ni ang chu maw?" a han ti ve leha Thansanga erawh chuan lo nuih let sungin "Heri nang ngat kha le" a han ti let ve a, chu tia a sawi lai taka Parmawii lo ner nang hmel a hmuh chuan a nui lai chu a tawp rang teh e. Ti chuan titi hoin inpawh takin an hlim dar dar hle bawka lêng hawn ar a khuan takah chuan kal zai rel turin an han tho ta sang sang a. Biakmawii te pawh chuan lal tual thleng rawn thlah vein an let san leh dawn lai chuan Parmawii chuan Thansanga chu auin "In hlawhtling ta bawka tunah chuan i nunrawnna hi a bo ngei ka beisei" tiin a inhersan hmaka Thansanga pawh chuan a țhiante chu zui nghal vatin Zawlbuk an zu luh chuan tlangval dangte pawh lo awm venual tawhin an titi ho mam mam a, ti chuan mut zai relin tawnmang rama an lawmnute kakpui lawn ngei tumin an chhing ta siai siai hlawm a.

Thansanga erawh muhil lawk thei loin Parmawiin a rin dan chhe lutuk avang hian a rilru a nain hrehawm a ti hle a,a rilru tetein "ngawi tak rawh i rin ang em em hi chu ka ni bik lo a sin" a ti nauh nauh bawka. A tuk zing ni chhuak chuan Bualthleng khua chu rawn chhun no nghulhin khawlai chu naupang tual chai ri nak nakin a khata Lalfanu Parmawii erawh zan lama a mumang chu mak a tiin a hrethiam lo hle mai. "Mawite Thansanga aia țha hi i tan an awm ngai lo ang. Engkim theihnghilh a hun tawh e, kei chu pialralah nuam takin ka awm tawh a Thansangate pawh ka ngaidam vek tawh a nia" tia a u Lianthangin a lo sawi kha a tak tak ang a tiin mak a ti hle maia. Thansanga hian a mipa duhzawngin nei tura a beisei leha suangtuah zawng zawng chu a nei vek tih hre mah se, a nunrawnna leh a u chunga a khawsak dan avangin hnaih a duh loa mahse loh theih lohin zankhat chu hlim takin a kiangah a titi ve anih kha. Mahse a u thlarau vanga hnaih a duhlohna chuan a hneh zela a hlat leh a an thangbonaa hmeichhe chunga an va chet dan an hriat leh ațang phei kha chuan hmuh pawh a duh tawh lo a ni a mahse pasalțha naupangte, hmar hnam ho ti thlabartu a ni a, ram lamah lah a kut a hmuiin sa a la thei si a, a la hmu fo dawn tih chu hre chiang ber tu a ni. Mahse Lianthangi sawi ang khan Thansanga hi a tana țha ber tur angah ngai ringawt mahse Thansanga hian a duh ve em tih a hre chuang si lo "Eng pawh chu ni se hnaih loh hi ka tan a him rih a ni" ti rilru nauh nauh chungin a laizawnte chu a pui ve ta vat vat a.

Hun a kal zela chapchar awllen pawh an hma lawkah a awm ta Lalpa Dohranga leh a upate rel ang ngei chuan ropui thei ang bera kut hman tumin tlangaupa chuan an kut hman dan tur chungchang chu puang dap dapin mipuite chu an phur kher mai. Thansanga pawhin he awllen lai ngei hian Parmawiin a chungchang a ngaih dan țha lo tak chu siam țhat theih beiseiin a phur ve sarh sarh hle mai. Mahse a rilrua Parmawii riak nasa tulh tulu erawh hrehawn a ti hle mai. Țum khat chu a u hnenah chuan a sawi ta veka Chawiliana chuan "Sangte lalfanu chu hmeithai fate tan cho rual an ni lo asin. Mahse i duh anih phawt chuan i u ka awm ve hi hre reng rawh" a lo ti sam et aThansanga chuan "Ka duh tih ka sawi loh kha" a ti let ve tak naa Chawiliana chuan a nau tlangval tuaitirte chuan a rilrua duhna awm chu a hrethiam lo a, hmeichhe dang chu nise a hrethiam ngei ang Parmawii nena an intawn dan erawh a țhat lem loh avangin a hrethiam thei lo tih chu a hre vek si a a nuih liam vel mai mai a.

Kut sa tur zawngin ram lamah an liam sap sap a Chawiliana erawh a nuin a duh phawt chuan kal ve turin ti mah se Thansanga a awm dawn si loa a nu leh a nau ringawt ina han dah leh chu ni theia a hriat loh avangin chak tak chungin inah a awm thung a. Zan hnih zan thum a liam meuh chuan kawtchhuah lamah hlado chham ri inchhawk zut zut chuan Bualthleng khaw mipuite chu a chawk phurin Chapchar kut hman chu an nghakhlel tawh hle mai. Thangliani pawhin an inlam pana naupang hoin Sanghal lu an rawn zawn a hmuh chuan phur takin inchhungah lut sawk sawkin zu fang chu mautheiah suak chhuakin a u Thansanga lamah chuan tlan phei in a va tulh ve bawrh bawrh a tlangval ram chhuakte an hlawhtling hlawm hle mai. Mahse Sawbual ngaw lama kalte tlangvalte thu rawn hawn chuan mipuite beng a verh hle maia Sawbual ngaw chhunga sa hnu tam zia leh pakhat mah an kah theih si loh avanga beidawnga an rawn haw lamah sakhi pahnih an rawn kah ve hram thu chuan mipuite titi a ti tam hle mai. Chawiliana pawh chuan chu thu chu lo hre vein a pa Thanhrangan Sawbual ngaw ram chhengchhe tak leh sahnu tlemna tak ni țhin chungchang a hrilh te hre chhuakin tlawh ve a chak hle maia kut an hman zawh hnu hna lam an la khawih tak tak hmaa zu riah chilh ve chu a tum ta a.

Chapchar kut an hman țanna ni tur chu lo thlengin lal tualah chuan mipuite chu rawn pungkhawmin lal leh upate thu chu an ngaichang țhap a kar loah lal leh upate pawh leihkapuiah rawn chuang chhuakin Lalpa Dohranga chuan thu a rawn sawi ta a "Vawin ni hian ka khua leh tuite nang ni vanga lal la ni ve ka ni tih ka inhriat hian ka lawmin ka hlim hle mai. He kut kan hman tur hi mipuite kan inpawh tlan nan leh khua leh tui kan inlungrual zualna tur ani tih hre țheuhin thianghlim takin kan hmang tur a ni, tunah tlangaupa'in kan hun hman dan tur a rawn sawi ang"a han ti a mipuite chuan kut lo beng dar darin tlangaupa a rawn din chhuah takah chuan an ngawi leh ta diak a. Tlangaupa chu ring leng lawnga rawn auin "A hmasa ber atan infiamna hun kan hmang anga, mipa naupang sairawkherh inperh siakna hunin bul kan țan ang. A dawt leha tlangvalte'n inbuanna hun an hmang leh anga , a dawt lehah silai inkahsiak kan nei leh ang. Ti chuan chhun chaw fakna hun kan neih zawhah tlangvalte insuknawr leh chawilung inchawi siakna hun kan hmang leh dawn a ni. Tin he intihsiaknaa pakhatna te țheuh hi kan Lalpa'n lawmman țha tawk tak a pe vek dawn a ni" a rawn tih chuan mipui ho chu lo au dur durin ti chuan lal tuala infiamna hlimawm thlir tur chuan an tawlh kiang ta a.

Mipa naupang rual lo chhuakin sairawkherh chu an han inperh siak ta a. Khaw mawng lama awm Pu Dailova fapa Zanema chuan pakhatna hauhin mipuite chuan kut an lo beng dar dar a. Lalpa Dohranga chuan țhi fang pein mipuite chuan a lawmna'n an lo au leh dur dur bawk a. A dawt leh atan rawlthar te chuan favai rawn pu zuf zutin tualcharah chuan an rawn chhung a. Inbuan chu an țan dawn ta. He tia inbuan an han tih hmasak tir chhan hi tlangvalte'n infiamna danga tha an hman hah hma a an inbuan hmuh an chak vang a ni. An han țan ta a le Thansanga te țhianthum chu rin lawk ang ngeiin an tumpuite'n an khan lo thei hle. Chawiliana pawhin a tumpuite chu phawi zung zung bawkin kil khata țanga lo thlir reng tu Rengliana chuan Runthanga bulah chuan "Nupui lo la neih malek tur a nia kan tel ve mai tur. Kan lalpa pui hian tlangval chauh a ti bawk si" a tih sur sur ri chu a bula a nupui lo ding reng Sangzuali chuan a lo hre pha ngei ni tur a ni a tum nghal bar bawk a.

Tlangval pali chiah an bang ta. Tu dang ni loin Chawiliana bakah Thansanga te țhian thum an ni. Mi tam tak hmuh chak ber chu Dammawia leh Chawiliana te inbuan a ni. Dammawia te zawlbuk kai zan an inbuan hmutute tan chuan ennawn leh chak awm khawpa hmuhnawm a ni tlat. Inbuan tur an han inpawt a Liansanga leh Chawiliana an inbuan ang tia tlangaupa'n a rawn puan takah chuan mipui tam tak chuan an lo ui hle mai. Mahse hmuhnawm tak tur a ni tho a ni. An han inmana tlangaupa'n "Țan ru le" a rawn tih fiak țhak takah chuan an inchai ta ngat ngat a. Liansanga chak zia hre chiang tu Chawiliana chuan a țuan ranna hmangin a tal pit zung zunga Liansanga pawhin a chawi thei meuh lo rei fe an inbeih hnu chuan Chawiliana lungte rap hrual chu a pawi ta Liansanga chuan chawi vawkin dimtein a han nghat leha mipui hmuhnawm ti lutuk chu an lo phu luih luih bawka. A thawhhnihna an han țan leh a, a hma ang bawkin pakhatin a tha hrui hmang a chawi ngei a tum laiin pakhatin a țuanranna leh thiamna hmangin chawi ve ngei a tum bawka rei fe an inbeih hnu chuan Liansanga'n chawi vawk tuma a awphniam tur tha thlah zeuh chu Chawiliana chuan a chawi ve ta vawk mai. Mipui chu an lo au nasain Liansanga, Chawiliana tih a ni nuk bawk a. A thawh thumna an han țan leh chu Liansanga chuan a hma zawng aiin a hneh lo zawk emaw tih tur a ni ta. Chawiliana chawi a tum apiangin a lo indaikhalh hman zel si amah chu a kang leh uk uk hial țhin. Chawiliana'n a kap kara a ke a rawn rawlh lai chiah chu atan vanneihna a ni ve ta thung. Runthanga te țhian dun hnuaia seilian tih takah Chawiliana chu hnaihchilh thutin tha hrui ngah tak tan lo a tih mai mai theih loh turin a chawi ta vawk mai. Mipuite chu an lo au nasain a hma zawng aiin an thawm a țha emaw tih mai tur a ni. Leihkapuia lal leh upa țhute pawhin mit tla lo lekin an lo thlir ve bawka. Chawiliana pawh chuan a naute țhian thum chu nakin lawka amah rawn khum tu turte an ni tih hre chiang hle mahse an rawn khum țan der tih a hmuh chuan a lawmin a pa Thanhranga hmuhah a awt ve em em bawk a.

Ti chuan Thansanga leh Dammawia chu buan tualah an lo chhuak leh ta. Dammawia chu te deuh hlek zawk mahse a taksa phiar sek fip țang te chuan tha hrui a ngah ve thawkhat tih chu a lan tir chiang hle mai. A mitmeng fimkak leh a vun nung sarh te chuan nula te mitmeng a la țan tawh hle. Pasalțha tuai tir te mah ni se pasalțha ralhrat lu a khai ve tawh tlat. Thansanga erawh pasalțha ni lo pawh ni se nula te laka tla na hle tur khawpa hmelțha a naupan laia a hmelah a nu a chhuna a rilru leh taksaah a pa a chhun an la tih țhin kha a rawn dik chho viau niin a lang. An han inbuan chu mipuite chu an sahawk nasain an lo au dur dur renga. Thansanga chuan Dammawia țuan ran zia a hriat avangin a inveng nasa hle mai. Dammawia pawhin Thansanga inbuan thiam zia a hriat avangin a phawi theih loh turin a che zung zunga, thiam thil hran hran hmanga an inbeih kual fe hnuah chuan Dammawia'n bin tuma a khup a tawm lai tak chu Thansanga chuan a sang zawk anihna hmang țangkaiin a ke chu hma lama pen pawk pahin Dammawia chu a chawi ta lawpa. Dammawia lah nui vur vur chungin "Ka rin dan vel chiah a ni" a ti sun sun a. A thawh hnihnaah pawh a ngai te bawka Dammawia a kan ve leh takah chuan Thansanga leh Liansanga te chuan a hmawr an bawk dawn ta. Mipuite chuan an nghakhlel tawh hle mai.

Buan tuala koh chhuah an nih takah phei chuan an sahawk nasa hle mai. Thansanga hawi kual vel chuan lal inbul a lalfanu te pathum lo nui har har chu a va hmu a a ve en lai tak chuan Parmawii chuan a lo en ve chiah bawk nen a lai ru ang reng hle. Parmawii erawh hawi sawn vatin a nui ru vur vur thung a. Tlangaupa'n țan tura thu a pek takah chuan an inchai leh ta ngat ngat mai. Naupan tet ata inzui reng ni bawk chu an inhre chiang dun bawka an inphawi thei lo chu a ni ber mai. Liansanga'n keuh thluk tawp tuma a ke a pen phei lai tak chuan Thansanga chuan rang lutuka hnaih chilh thutin a phawi ta vawk maia. Mipuite chu lo au nghal dar darin Thansanga hming leh Liansanga hming chu a ri nasa ngei mai. A thawhhnihnaah erawh Thansanga chu kang ve thungin Dammawia chauh lo chuan a kang lui tih hre hek lo Dammawia run tawk a tling ngei mai "kan inbuan lai pawha kang ve duh hlei lo" a ti hnu hnu a. A thawh thumna erawh mipui mit a tlai leh hle mai rei fe an inchai hnu pawh chuan inphawi thei an awm tlat lo. Liansanga hah tawh lutuk inthlah zawi zeuh chu Thansanga chuan a hrethiam hman tlat pawm lawpin a sir tluk pui ta dur maia. Mipuite chu an lo au nasain kut an lo beng dar dar bawka. Lalpa chuan lawmman a ta sepui a pe ta a.

Infiamna dawt leh atan silai inkahsiak a ni ta tlangvalte chu lo chhuak leh țham țhamin kah tura an tih chu an rawn kap ta diat diat a, fuh lo pahnih chiah awmin an han sawn hla leh chutah pawh chuan fuh lo sawm vel an awm leha hla deuh takah an han sawn nawn leh takah chuan Chawiliana leh Thansangate țhianthum bakah tlangval pali chiah an awm ta. An kah tura an tar seki chu kel ki in an thlak ta a, chutah an la sawn hla leh zel bawk nen mit țha lo tan phei chuan hmuh a har tawh hle mai. An han kah leh sang sang hnu chuan Dammawia leh Chawiliana chiahin an fuh ta tlat mai. An thil tarna chu pen sawm vela hlain an han sawi leh ta. Chawiliana chuan tin vang vangin a silai chu a puak țhuaia mahse a tum a fuh ta tlat lo. Dammawia chu phur fahrana rawn chhuakin a rawn kap ve leh ta. Kelki chu tla thla tawpin mipui chu an au nasa hle mai. Dammawia pawh lalpa chuan sepui a pe ve bawk a. Chaw fak hunte hmangin an han țan leh a insuknawr leh chawilung inchawi siak chiah a awm ta. Insuknawrah erawh Liansanga tha ter pha zo an awm eih lo Thansanga meuh pawhin Liansanga ban bul lian tlet tlawt leh dar pharh hlai hlep hlawp ațanga chakna rawn chhuak chu a dawl zo bik tlat lo. Chawilung inchawi siakah chuan mipa tawh phawt tel an phal bawka Rengliana leh Runthanga pawh an phur tawh hle. An han inchawi chhawk zar zara a tawpa Rengliana el phak an awm tak loah chuan infiamna chu an zo ta. Tlangaupa chu lo ding lehin a tuk nilenga zai leh lamna'na hun an hman tur thu leh tlai lama ruai ropui an kil tur thu chu a rawn puang ta a.

Ni thar duhawm lo inher chhuak chuan Bualthleng mipuite chu a ti phurin nutlingte pawh an buai a zualin tlai bik nih hlau reng rengin an che vat vat a tukțhuan an han kil zo a lal tual lam panin an thuam țha ber ber inbelin an kal khawm a, lam chi hrang hrangte entir anih hnuah an chai ta mup mup maia Bualthleng lei lung chu a suk hian a su dup dup bawk a. Ruai kil a lo hun meuh chuan lalpa chu lo ding chhuakin "Vawin ni hian ka kianga kil tur ka lo thlan fel diam tawh te ka kianga lo kal tur hian ka ngen che u a" a han ti tete a mipuite pawhin Lalpa Dohranga'n ka pasalțha te a tih ruala kut lo beng turin an lo inring țhap tawha Lalpa Dohranga chu lo țawng lehin "chung mite chu kan nu leh pa kan pi leh pu, kum lama upate he khua min uap sak tute an ni e" a han ti chiah chu mipuite rin loh daih mah ni se an Lalpa rilru țhatna chuan a hnehin an ri hulh hulh maia, pitar leh putarte an kum upat lama chutiang chawimawina an dawng tur lawm lutuk chu hnuk ulh țunin Lalpa kiangah chuan an va kala ti chuan Lal leh upate kiangah hlui khat kil hoin puar el euhin an ei a.

Thansanga chuan a hma zawna țhu Parmawii chu a melh leh zauh zauh țhin. Parmawii erawh a chaw ei lai chiah ngaihtuahin a ei mawlh mawlh a tam pawh a ei hmain a kham thuai a. Parmawii kham hnu lawkah chuan Thansanga pawh kham ve vatin Parmawii daikal tur chu a va hmu thuaia chu veleh hmawlh remchang zawngin Parmawii liamna lamah chuan a liam ve ta vat a. Dai a va thlen chuan Parmawii chu a laklawh anih ringin a nghak vang vanga a hnu deuh chuan a thlang lam pang hnim buk kar ațangin Parmawii chu a rawn kal ta ngei mai. Nghak anga lan a duh loh avangin a puan te chu a han siam țha der sawk sawk a Parmawii pawhin Thansanga a rawn hmuh chuan a hlim nge a lungngai tih pawh hriat theih loin a hmel lan dan a inthlak hauh lo a Thansanga bul a han thlen chhoh chuan "Min zui ru em?" a han ti chang faka Thansanga chuan "Teuh lo ka daikal ve mawle" a han ti a Parmawii pawh chu inherin khaw lam pana kal mai a han tum a thui a pen hman lo "Mawii i ngaih ang ngawt kha ka ni bik lo a sin" tia Thansanga țawng chuan ti ding chatin "I ngaih ang ngawt ti turin ka ngaihdan i hre thei em ni" a han ti let ve a Thansanga chuan "Hria e mi nunrawng leh pawisak nei lo angah min ngai a ni ti raw?" a han ti ve a Parmawii chuan "Chutiang zawnga ngaih i ngai hleinem. i mize dik tak a lawm" a ti let ve saka

Thansanga chu va kal hnaiin Parmawii hmaah tak chuan a va ding a "Ni lo e, ka duh vang renga ti ka ni ngai bik lo a sin. Ka insum zawh loh țhin vang a ni e, tun hnuah a thleng tawh hauh lo ang tih ka tiam e" a han ti a Parmawii chuan a ring hle nain "Miin min hmu ange ka kal mai ang" tiin inher a han tuma mahse Thansanga chuan a banah lo chelhin "I puar meuh maw? I ei tlem si a" a han tih leh takah chuan ding pangai lehin "Aw ka ei tui khawp mai" tih chauha a chhan takah chuan an han ngawi dun vang vanga "Ka u khan a ngaidam ngei tawh chein ka ring, inthiamlohna nei tawh suh" a ti a Thansanga chuan "Anih min la haw reng em?" a han tih chuan Parmawii chuan "Ka haw ngai lo che" a ti uka mahse a sawi tum loh tâk a sawi chu pawi a ti ngei mai Thansanga lah chuan sawi tur a hre mai tawh si lo a en leh zeuh zeuh ringawt țhin a, Parmawii lah țawng tum tawh si lo Thansanga lam a va hawi lai tak chu an mit a intawng ta siah mai. Mit la sawn lo a inen vang vangin "ka let mai ange" Parmawiin a tih takah chuan Thansanga pawhin kal tirin a hnung lamah chuan a zui ve bek bek a. Khua an thlen dawnah Thansanga'n "naktukah thing phur i la kawtchhuahah ka lo nghak ang che" a tih chu Parmawii pawh chuan "Ni e ka lo tum dawn nia, ka u te nen kan lo kal ang" ti a chhangin khaw lamah chuan an let leh ta a. Ruai an kil zo ta bawka mahni inlamah te hawin rei loteah lal mualah chuan lam thai turin an rawn kal khawm leha chu zan chu an tan zan hlimawm a niin nula leh tlangval țhenkhatte tan phei chuan hriat reng tlak a ni. Zing khawvar anih chuan an tawp san ta. Chapchar kut hlimawm tak chu a țiak ta.

Thansanga haw chu a phur surh surh kher mai. Rang taka insiam sawk sawkin a nu leh a nau ei relnaah chuan a hnawk thei ang bera țhuin a inla patling hle. A nau phur surh surh lutuk chu zan lama Parmawii lo letna lam ațanga Thansanga lo let ve a lo hmu ru khiau bawk nen "eng tak sawi che u ni maw?" ti rilru vawng vawngin vaibel pak khuk tual tual pah chuan Thansanga ke chu a keartuiin an rawt sak tawk a, nuih vur vur chunga a bula țhuin Thansanga na ti meng rum ul chu "khawi lamah nge?" a han ti chiah chu a u chuan a hre vek tih hrethiam nghalin "A chi loh min zui ru palh ang" tih ringawta chhangin a khi suk suk a. Thangliani'n a u te titi a hre chiah chu a u auin "ka nu U Sangtea hi nula thingphurh pui a tum a ni ngei ang" a han tih chuan Thansanga chuan lo man betin a hmui chu a hupa Chu veleh Chawiliana chuan Thansanga chu bawh thlu pawpin "Thangi dek rawh dek rawh" a han ti a Thangliani lah chuan phur fahranin a u chu rawn dek nghalin an unau thum chuan an thawm a ring hle mai. Țialthangi paw'n mittui tla phunga lo nuih vein a pasal hmuh a tan a it rualin a fate'n hlimna an pek chu a lawmin a hlim em em bawka.

Tukțhuan kil lai thleng chuan Chawiliana leh Thangliani chu an nui phuh leh țhawt țhin Thansanga lah a titau bur bur bawka a nu chuan afate hmuh hlau reng rengin a mittui chu a hru ru sap sap a. Chawiliana pawh chuan hmu thiam vatin engmah hre lo angin a nu hmaah chuan sa țha lai te chu a theh phei zung zunga pa chan chang anih tawh miau avangin fiamthu tawh loin "Sangte i tlangval ve țan tawh a, nula lakah i to telh telh dawn a hengte hi chapona'n a hman tlak loha nula thei tam nih te hi a țha ngai lo tih hriat reng tur. A hun laiin hlimawm mahse khua reiah a nghawng let a na duh a nia, hmun hran hrana fa i neih phei chuan i nupui mitmei veng reng rengin i khawsa dawn tihna zu nia. Thangte nang pawh zawlbuk titi lailum luahtu i ni ve ta fo hi ka lawmin ka chhuang em em che a mahse tu dangnalah mah i tawlhthlu tur a ni lo. Ka nu nang pawh lungngaia indawm kun reng a hun tawh lo e ka pa pawhin hlim taka awm turin a duh ang che"a han tih charh charh lai chuan an lo ngawi țhiap a Țialthangi pawhin chutianga a fapa dik tak pawh niloin amah a nu dik tak leh a unau diktak anga a fate a en chu a lawmin "U Hrang Chawiliana hian i mizia tam tak kha a kawl meka a nu leh a unaute tan hian fapa, unaupa leh pa nih a va tling tak em. Han hmu ve ni la i chhuang viauin ka ring" ti rilruin a pasal thlarau chu a be mawlh mawlh a.

Thansanga'n kawtchhuah a thlen hnu rei loteah chuan Herliani leh Parmawii rawn inzui nak nak a hmuh chuan nui sakin a lo be zung zunga ti chuan ram lam panin khua ațanga tuibur hmuamda vela hla Thansangate țhian thumin an naupan laia an sava vehna țhin leh an nunchan zir țhinna hmun berah chuan kalin Thansanga chuan thing a fawm khawm zung zunga Parmawii te pahnih pawh chuan lo ek zung zungin kar loah an peih ta mai reng a. Thansanga'n lo țhu thlan dai rawh u tui ka zuk chawi ange in chhawl a hal palh ang tia a liam nghal vat takah chuan Herliani te pawh țhu vein Thansanga chu an lo nghaka. Thansanga'n kawrte a zu thlen chuan a naupan laia an țhianthuma chakai an khawrh te. An chakai man khawm ak haw țun chunga in a va thlen laia apain lawm taka a lo en pui vat vat țhinte chu hre chhuakin a lung a leng hle a. Tui chu thalin chho leh ta mai lo chuan vaibel a han pak a, a pa hlim hmelte ngaihtuah chhuak zelin a pa ngaia a inngaihtuah lai tak chuan hmeichhe rak thawm a hre ta, a han ngaithla chianga Parmawii te awmna lam ngei a ni tih a hriat takah chuan a tui lak pawh ngaihtuah loin rang takin a han tlan chho nghala a han thlen chhoh meuh chuan Parmawii te unau chuan hrepui nen an hmaa savawm no hruai chu hlau tih hriat takin an lo en khur dar dar a.

Thansanga chu rang taka a chempui phawrhin an inkarah chuan a va ding chat a. Chu savawm no hruai lah chuan hlau lo tih hriat takin a ding ur ur a a rawn bei phei ta mai. Thansanga chuan a chem vai chu a thlawn lo a ni tih hre chiang hle mahse a biang vei lam thip zawk chu hriain a han dapa thisen nal puat chu khawih fuhin a thina rim kher mai. Savawm pawh a ke hmalam veilam zawk Thansanga sahna avanga uaihnawp chu na a ti tih hriat takin a rak ruai ruaia Thansanga chu a rawn pan leh ta. Thansanga pawh chuan inring taka lo nghakin Savawm in a rawn bawh hma chiah chuan savawm lamah chuan pen phei thutin savawm chu a rem laiah a sat siah siah maia a awm thip zawk chu hre mahse inthlahdul theih a ni hauh lo. A hmai chu veng pah char char chungin savawm chu a bei zela savawm na tuar leia tal kual lai chu hah takin a thlir tlawk tlawka mahse a thi mai dawn lo tih chu a hre chiang hle. Parmawii te unau lo inpawm chial lam chu panin "haw rawh u ka u han ko vat ang che u hmanhmawh takin" a han ti a.

Herliani chu rang taka tlan nghalin Parmawii ding reng chu Thansanga chuan "kal vat rawh ka u hnenah khan ka țha tih lo hrilh la" a han ti tuara Parmawii ve thung chuan "Ni lo ka kalsan thei lo che" a han ti khur dar dar a Thansanga chu lawm hle mah se biahthu sawina hun a la ni tlat lo "Mawii kal rawh hmanhmawh a ngai" a tih leh pawh chuan Parmawii chuan khur dar dar chung leh țap țuau chungin "I bulah ka awm thei lo a mi?" naupang chhia takin a han ti leh hrama Thansanga chuan "Ka lo let leh dawn alawm dam takin, kal rawh" tiin a nawr kal ta zawt zawta Savawm pawh rawn ding chhuakin a taksa kak dei duai vang chuan thinrim tih hriat takin Thansanga chu a melh chhur chhur a a no hruai lah chu lo rak ve chhenin Thansanga chuan Parmawii kal liam tur lo hawi let chu en zawkin "Mawii ka thi anih chuan min ngaidam dawn nia" ti sapin savawm chu a bei zui leh ta. Chawiliana an leihkapuia Dammawia leh Liansangate nena titi mekin Herliani rawn tlan hmawk hmawk an hmuh chuan ding meuhin an lo nghaka Herliani pawh rawn thleng thuaiin thei leh thei loin chanchin chu a han sawi zung zung a. Chu veleh rang taka inchhunga tlanlutin Chawiliana chuan silai a la vata"Heri i pa hnenah chanchin lo hrilh mai rawh aw, Dama Liana hmanhmawh a ngai" a han tih meuh chuan hla taka Liansanga leh Dammawia tlan liam lek lek tawh chu va hmuin a silai lak hlan khan an lo tlan nghal daih tih a va hmu a rang taka umzui nghalin Herliani'n "ka nau pawh ka hnungah a rawn tlanin ka hria" a tih pawh chu hre awm pawha awm loin a sawina lamah chuan an kal ta vat vata.

Khawchhunga mite'n Herliani rawn luh hnu lawka Dammawia leh Liansangate rawn tlan leh a hnung lawka Chawiliana silai nena rawn tlan an hmuh takah chuan an ngaih a țha loin tlangval țhenkhatte pawh hmanrua chuh sap sapin an umzui ve nghal vata. Dammawia leh Liansanga'n Herliani sawina hmun an zu thlen chuan Savawm puitling tawh lo let reng leh a kianga Parmawii Thansanga kuah chunga a lo țap chu zu hmuin hlauthawng takin an han pana Thansanga nikhaw hreloa awm a àwm leh a biang bakah a malpui thler duai te an hmuh chuan thinrim takin Savawm chu an sat chawrh chawrh a Chawiliana rawn thleng pawh chuan a nau a hmuh chuan nghilh dupin a inhriaa mahse inngaihtuah fîm vatin a nau marphu chu a han zawnga a mar a phu țha viau tih a hriat takah chuan thaw huaiin "Thisen a hloh tam deuh vang anih hi, savawm puitling țhankin tawh hi chu eng anga pasalțha tan pawh hian beihfe tham a ni ve miau a ni. Mawite tlangval dang an rawn thleng dawn hnai tawh ang khatianga awm kha a mawi lo a nia" a tih takah chuan Parmawii pawh inhru hul sawk sawkin Thansanga kiangah chuan a țhu a.

Tlangval dang lo thlengte'n Thansanga let reng leh a kianga savawm an hmuh chuan mak an ti hle. Mahni chauha hetiang han thah theih chuh tiin Thansanga chu huaisen an ti hle a a zawnna tur hlang an han siam vat vata Savawm ruang leh Thansanga chu zawnin khaw chhung lam an pan ta a. Dammawia hawi kual chuan hnim che hrut hrut a hmuh chu pan vain Savawm note lo awm reng mai chu a hmu ta vata "U Chawi hei a no a ni reng mai ka ti. Engtia han tih chi nge niang?" a han tih chuan Chawiliana chuan ramhnuaia a awm reng chuan a thi thuai dawn tih hriain a man tira an hawn ta a. Lal tualah Savawm ruang chu nghatin Thansanga pawh an inlamah an zawn lut nghala bawlpu pawh rawh thleng vatin savawm ruang a kal pelh pah chuan "Chawnghrang i tupa hian a zui zo dawn khawp mai che" a ti supa. chu savawm țhankin tawh lian zet mai chu an han teha sum riat zet a lo ni reng mai. Mipuite chuan Thansanga chu huaisen an ti hle mai. Lal leh Upate pawhin Thansanga chu huaisen an ti hle maia. Parmawii lahin a unaute leh a nu leh apa a hmu chiah chu a hnuk rawn no thar lehin a nu awmah chuan a bei thlawpa, a țap hawm hawm a.

Lal tuala thawm ri nawk nawk an hriat chuan zu enin savawm ruang bawha a no Dammawia man lo awm chu an zu hmua Savawm no chuan a pui chu kaih harh tumin a bawh kuala a chang leh leiah chhukin a rum khum chher chher a, mipuite chuan mittui tla zawih zawihin an lo thlir a. Savawm no chu a pui hmuh tir reng duh loin Dammawia chuan la vatin an inlamah a hawn a nakinah a puitlin hunah ram lamah a la awm ve ang ti chungin a kawl ta a.

Thansanga pawh bawlpuin a thiam tin reng hmanga a enkawl hnuah chuan bawlpu pawh haw vatin Thansanga pawh reilote hnuah chuan a harh ve ta maia. A kianga a nu leh a unaute lo țhu reng a hmuh chuan nui lui sakin a maimitchhing leha rawn meng leh kawkin "Parmawii a țha em?" a rawn ti phuta Chawiliana chuan awm hahdam tura lo hrilhin a chhuahsan daiha Thansanga lah chuan Parmawii chu a thi ta angah ngaiin a nau chu a han melh hrawka a nau pawh chuan lo nuih tet tet chungin a kalsan leh daih bawka a nu chuan nui vur vur chunga a țhat thu a lo hrilh takah chuan a hahdam suai suaia. Khatia savawm nen an inbeih lai khan savawmin a mal a rawn ham thler chiah tihah a theihtawpa nain a hrawkah a sat ta nghek nghek a a tlu nghal thlawrh bawka savawmin amah en reng chunga zawi muanga a tlu chu hmu mahse ral khat ațanga Parmawii rawn tlan thla leh lawp lawp a hmu a Savawm a thi tawh nge la thi lo tih a hrechiang hman si lo Parmawii rawn thlen pawh hre mumal tawh loin nikhaw hre loin a awm zui nghal daih kha a ni a. Chutia Parmawii a na lem lo chu a lawm hle mai. Haw tura a nawr luih laia Parmawii țawngkam te hre chhuakin a nui vur vura Țialthangi lah chuan 'A eng chu hria che ni maw i nuih tak vur vur mai, i na derte hi a ni lo maw' tih pahin inlengte kawm turin a thawh san ve ta vata. Zan lamah pawh inleng la awm nak nakin Thansanga rawn kantu chu an awm awl lo hle a Parmawii leh Herliani pawh Lalpa phalna ngeiin Thansanga chu an rawn vil chawt bawka. A tuk ațang phei chuan an vil uluk zualin Parmawii phei chu a kal zingin Thansanga nen chuan hlim taka inkawmin an nui dun a, tu dang an ngai bik lo hle mai.

Lo lam hna te an thawh țan leh tak avangin Liansanga leh Dammawia pawh zan lamah lo chuan Thansanga te nen inkawmna hun an nei meuh tawh lo Thansanga chuan chhunlamah a țhiante chu ngai hle țhin mahse a țhiante theihnghilh tir hmak thei Parmawii kiangah chuan a ni telin a hlim telh telh a dam chak riaute hian a inhre țhin nghe nghe. Lal chhungkua lahin Parmawii awmdan chu hai bik hek suh an nuih pui dar dar țhin bawka. Tlai khat chu Chawiliana zukchal kah chu an puah mawp mawp a khum lamah Parmawii chuan Thansanga chu a lo vil chawt bawka. Dammawia leh Liansanga lah chuan ei lo tih hriat zetin Parmawii hmuh loh lamah chuan Thansanga chu an ner khum sawng sawnga Runthanga leh Rengliana te pawh chuan hrethiam ve vekin Thansanga chu an zu nuih leh tut tut țhin bawka. Parmawii pawh eirel hun anih tawh avanga haw vatin. Țialthangi leh Thangliani chuan Renglianate chu lo pui ve char char bawkin an puah zawh meuh chuan zanriah kil a hun reng ta mai. In lama haw loin zanriah an kil tlanga an hlim dar dar hle mai.

Haw kawngah chuan Runthanga chuan "Renga u Hranga leh Liana la awm chu nise zaninte kha a va nuam zual dawn em" a han ti a Rengliana pawh chuan "Ni e ka nau leh U Hranga an awm ta si lo a, Midangte lah khaw țhenawm lamah an awm vek bawk si. Nang hi a hun lo loah hian i thi ve reu reu ange" a han ti a Runthanga lah chuan "thihnaah hian a tuar ber i ni ziaha nangmah chauh hi dam sen tul la a țha ang" a han ti ve bawka ti chuan an nupuite chanchinte leh an lolam hnate sawi dunin an ințhen ta a.

Zan lamah chuan Dammawia chu Thansanga bulah chuan awmin Liansanga erawh a u Zakapi te inlamah a leng thunga leng hawn ar khuan hma deuh chuan Liansanga chu rawn lut hlawlin Thansanga leh Dammawia bulah chuan a va țhu vata "Zehtet lama ka u Biakliani khan fanu a nei tawh a ni awm a, naktuk hian U Ruma nen va kal kan tum deuh a" a han tia a awkiah chuan a phur lutuk lo tih a hriat hle a. Liansanga chuan an țhian thum a va kal chu a chak hle maia mahse Thansanga a nat tlat si avangin an makpa Ruma nen an kal mai chu a ngai dawn a ni. Thansanga te pawh chuan hmu ve chak hle mahse kal thei zia zang anih si loh avangin zinna hun țha a la awm leh mai ang tiin an inhnem chawp ta vel ringawt a.

Rei loteah leng hawn ar rawn khuangin zawlbuk lama Dammawia leh Liansanga kal an han tum lai tak chuan Chawiliana chu rawn lang thutin Țialthangi chuan mak ti takin a lo ena Chawiliana hmel chu a hlim loh hmel hle mai. Chhungkaw thil anih ringin Dammawia leh Liansanga te chuan chhuahsan an han tuma mahse Chawiliana'n țhu tura a tih takah chuan țhu lehin Chawiliana chuan tap lama a farnu inleng nei rual la ni lo mahse an khaw nula zinga a țha ber pawl ni mek Thangliani chu en vang vangin "Thangte vawin thing inphurhna lamah Chalngenga zawl puan i phah pui em ni?" a han tih chuan Thangliani chu lo meng kawkin "ka u, a teuh lo min zui tlat takah chuan tiin țha takin ka chhawm ve a, thing te kan fawm ngah hnuin kan han chawl khawmuang kha min duhzia te min fah ta hrep a, kei chuan țha taka lo hnar zelin a tawpah phei chuan a thinrim ta maia min sual ang tih ka hlau hle tawha min ankhum a, a pa hausakna hmangte'n min thlem leha ka thinrim chuan a hmaiah ka benga, chu veleh min rek betin min thah a tuma mahse ka tal ve nasat em avangin min thlaha engmah pawh sawi loin min haw san anih kha" a tia hnuai lam bihin a mittui a sur nghal zung zung a.

Chawiliana chuan a nau a ngainat em em hmeichhiate dinhmun hahthlak zia a hriat avang leh hna hram thawk tura em a a la upat tawk loh avanga feh ve pawh phal mang lo a in lama a nu kianga a tal tir țhin Thangliani mittui tla a hmuh meuh chuan a thinrim lutuk chuan "Mi chapo chuan mi chapo bawk a hring anih khu, a pa pawh khawnbawl ni pha tur khawpa neinung ni mahse kan lalpa hian khawnbawlah a rinluh duh hauh loh khu, ka that dawn khawp mai, tih pahin a tho lawka chempui nen chhuah a tum ta mai. Liansanga pawh chuan Thansanga intepui inbang chu zen rawk rawkin chempui chu a la ve nghal bawka Dammawia chu rang taka an hmaa va dingin "Hetianga inchet chuan thudik hailanin a awm dawn lo tih hre ta che u. Zaninah zawlbukah kan lawi vek ang. Zan reiah a hmui hupin emaw engtin emaw kan hruai chhuak anga kan dawp anga thudik kan hriat hunah chauh kut kan thlak thei ang, zu that ringawt u la thudik puang thei tu chu amah chauh a ni tih hre reng rawh u"a tih takah chuan inthlah dul lehin khum lama Thansanga thinrim insehruh țun chuan "A dik Thangte U Runthanga leh U Rengliana va ko vat rawh, ka u nangni pawh Dama sawi ang khan che u la zan reiah lalin lam rawn pan pui rawh u" a tih takah chuan Thangliani chu chhuak vatin Chawiliana te pawh zawlbuk lam an pan a.

Zawlbuk chhunga Chalngenga țawng lar lar ri an hriat chuan an thinrimnna chu an hup bet seng lo teuh hle mai. Mahse engmah sawi loa ngawi renga lutin Dammawia chuan phakar chhuahin fiamthu te a thawha an nuih pui dar dar bawka Chalngenga țhianpa a beng buang, bawl theih deuh Kawltea hnenah chuan "Kawlte zanin chu i bulah ka lo mu dawn a nia chuan ram vah velah ka hruai ve ang che" ahan tih chuan Kawltea pawh chuan lo aw vatin "Kan vah ve hian kan hlawhchham ziaha inbula vah hian hlawhtlin a awl deuh ang'te chu a la ti zawk zamaha. Rengliana leh Runthanga te pawh an thu hriat chuan a ti lungawi lo hle mai. Mahse Thansanga duh ang ngei chuan Lal inlamah Thansanga chu zawn chhoin Țialthangi leh Thanglianite pawhin an zui bawka. Lal in an han luh chuan mak ti takin an lo en he hawa lal chhungkua chauh an lo awm tawh bawk nen Rengliana chuan chanchin a han sawi zar zar hnu chuan Lal Dohranga chuan khawnbawl upate chu ko khawm leh thuai thuaiin Chawiliana te chet hun an nghak ta țhap a.

Zawlbukah chuan Chalngenga leh Kawltea te kiangah chuan Dammawia chu a mu ve kuk a. Kawltea khanna a ke chu a mu chuah chuah bawka. Chalngenga chu a mut ngheh mai lohna'n a va khan sek bawka rei loteah Chalngenga chuan ning tih hriat zeta dah thlak sakin a dim lo thei hle. Dammawia erawh a muhil der char char thunga a hnar der nasa bawk si Chalngenga tan chuan mut har tur tak a ni. A ning lutuk chu tho țuih țuihin bawhbel lam chu a pan ta. Bawhbel a bawh liam fel awrh tihah chuan Chawiliana chuan a ka va hup nghal phutin Liansanga chuan a lo chelhbeh pui nghal bawka mak ti taka a awm reng lai chuan Dammawia chu rawn chhuakin hnai set sawta a rawn ena a la rawn nuih vur vur lehnghal ti chuan eng khaw sawi set set loin lal inlamah an hnuk chho ta. An kal lai tak chuan Chawiliana chu ding chutin "Liana nang zawng zin vah i ngai si a mut i kham lo palh hlauh ange zuk mu zawk rawh" a rawn ti a Dammawia pawh chuan "ni e" lo ti vatin let leh turin an han ti a Liansanga pawh chuan dik ti viau mahse țhiante tan chuan tiin "Ka farnu ve tho alawm" tih pahin Chalngenga chu a phih sawka "Mut ka kham loh chuan i lu ka la ang" a ti saka. Chawiliana chuan Chalngenga ring ruh chu țhuai tliah hmawk a chak kher mai, hun rei tak hnuah a awh ve em em țhin chhungkaw pangai tak a neia a hlim țan dawn chauha a pa a thi leh bawk nen a neih chhunte rilru tihhah leh rilru naa an awm hi a hmu thei bau lo a ni.

Chalngenga chuan Thangliani chungchanga Kawltea hnena a dawt sawi Kawltea'n a lo sawi chhuak kher kher chu pawi a ti hle mai a mahse a rilru chapona erawh a la lian hle "ngawi tak rawh u thi chu inawm ve tho ang" ti rilru nauh nauh chungin lal in chu an thleng ta. Lal in chhungah chuan upate bakah Thansanga hliamtuar Runthanga leh Rengliana te bula lo mu reng chu a han hmu a, an lo melh rum hlawm teh e. Lalpa Dohranga chuan Chalngenga chu hnai taka melhin thu dik sawi turin a ti ta a. Khawnbawl upate chu Chawiliana thudik puan lai chuan thinrim takin an lo chek tlak tlak hlawm bawka. Thangliani rilru na lutuk chu a nu awmah beiin a țap char char bawka. Lalpa Dohranga'n "Thangliani nu khan enge sawi duh i neih he dawt sawi ching hi engtia tih tur nge" a han tih chuan Țialthangi chuan "Lalpa i rorelna hnuaia intulut kan ni e, thutlukna chu keini nufa aia fing zawkte in awma inkutah ka dah e" a rawn tih takah chuan Upa Zangaia chu lo dingin "Lalpa Upa Chawnghranga dam lai he khua kan lo luh tirh a ta tawh anni nen hian chhungkhat ang maia khawsa reng kan ni a, Țialthangin khatia a tih tak roroah chuan chhungkaw pa ang leh upa ka nih ve na angin hei hi ka sawi duh a ni. Chalngenga te chhungkaw chapona hi kan hre tam ta malh malh e, a pa mizia lah khawtlangin kan ning hlei hlui mi pawi sawi zawnga khawsak chiam ching mah suh se a neih rosum chapo puia a titi tam lutuk hi tumah a bula han tap peih pawh an awm tawh lo chu anih ber khu. Chu tichunga zahna nei map loa a la khawsa hi ka thin a khei riau mai a tin a fapa lah hei kan hriat angin mi pawi a sawi a, mipat hmeichhiatna thilah leh nghal. Ngaihdam mai mai chi a niin ka hre lo a ka duh dan phei chuan Chawiliana emaw Thansanga nen ngei hian inmalbeihin thih thlengin inhmachhawn rawh se anih loh chuan chawi tur tuk i la khawtlang hriatah he a dawt sawi hi puan zar mai a țha ka ti. He tiang dawt sawi ching chu nula tan a hlauhawma kan nulate paw'n an țih phah mah na"a rawn ti charh charh a.

Lalpa Dohranga leh a upate, rorel thiam tia an sawi țhin meuh pawh Chalngenga te chhungkaw mizia chu Bualthleng khuaa chengte mize put atan an it loh tlan thu an lo sawi fo tawh a ni bawk nen Lalpa Dohranga chuan "Upa Zangaia sawi ang kha i pawm em?" tiin Chalngenga chu a bih runa Chalngenga chuan ruahmanna fing tak a lo nei lawk tawh bawk nen a pawm thu a sawi ta saka. Chawiliana leh Thansanga erawh an ngawi ngul thunga an mitmengah chuan thisen chhuah chakna a lang tlat. Zing khawvar ruala tlangaupa'n lalmuala kal khawm tur thu a rawn puan chuan a ngaihna hre lo takin lal mual chu an pana lal muala Chawiliana chempui nen inring taka lo ding kak hah an hmuh chuan mak an ti tlang hle mai. Mipuite an rawn thlen khawm takah chuan Lalpa Dohranga chuan zan lama thil thleng leh an rorelna zawng zawng chu a sawi chhuak ta veka Chalngenga chu mipui zing ațang chuan a ko chhuak ta bawka. Chawiliana chuan "I thih hmain enge sawi duh i neih?" a han ti a Chalngenga chuan nui vur vur chungin "Pasalțha chuan kei chauh ni loin ka chhungkua pawh min hneh ngei ang mawle hnehtur chiang sa han khin chuh" a han ti a Chawiliana lah chuan hlau lo takin "Mi chapo chhungkua te hian ka nunna in la hlei lawnge i duh leh i pa leh i unaupa pawh kha ko chhuak la ti nia" a han ti saka mahse Chalngenga chuan Lalpa Dohranga chu en vang vangin "lalpa he inbeihnaa ka chak anih chuan i lal țhutthleng min luah tir phal angem" a han ti saka Lal Dohranga chuan a chak rinna chhete mah a nei lo bawk a, "teh reng mai han tum chhin ta che" a ti ve saka. Chu tih lai tak chuan silai vawi hnih lo puak țhuaiin Chalngenga pa leh Chalngenga nau silai keng chunga let reng chu an hmu ta. Chalngenga chuan a chhungte hminin Lalpa thu tiam tir phawta chumi hnua Chawiliana thah chu an lo tum a lo ni, an hlawhtling hman teuh hle. Zan lama Chalngenga'n inmalbeih a ngam thu a sawi ațanga ngaih țha tawh lo Runthanga'n Dammawia leh Liansanga hnena Chalngenga chhungte chauh ngaihtuah tur leh silai pawh mi hmuh theih loh tur ang bera keng chhuak tura a chah chu a ti sual lo teh e. Chu veleh mipuite chu rawn thum hukin lal tualah chu a khuk hian a khu luih luiha an han ințhelh fel meuh chuan Chalngenga te pafa za chu an lo bung nuai tawh maia Val upa Ruma chuan "Mi chapo te hian finna an tla chham hle a ni. An thil tum kha lo hlawhtling pawh ni se an thi dawn tho tho si a" ti sapin a inher a "Liana ti rawh le hmuhnawm thlir tur a zo ta bawka i chhuak vat teh ang" a ti a Liansanga pawh chuan zui ve nghalin Zehtet lam chu an pan ve ta thung a.

Mipuite chuan Chalngenga nu țap hawm hawm chu khawngaih awm pawha awm loin an kal pel a a tam zawn an kal liam tawh tihah mipui chu an rawn rak tuar tuar maia an thil va hmuh chu an rap kher mai. Chalngenga chempui hmang ngei chuan Chalngenga nu chu a hrawkah amah leh amah a lo inzai hrawih hrawih maia mipuite chuan rapthlak an tiin naupang deuhte chu an nuten an mit an hup sak chung chung a. Lal leh upate meuh paw'n a rapthlak an ti kher mai. Lalpa Dohranga chuan "an ruang tal hi chu kan khaw mi leh sate an nih angin kan phum sak tur a ni. An in a ro thilte erawh tumahin lak loh tur a ni. Kan hal ral vek ang"a rawn tih chuan Chawiliana chu meichher kengin a liam zui vata Dammawia pawh chuan zui ve nghalin Chalngenga te in leh ro an lo chapo pui em em țhin chu an zu hal ral ta veka.

Tlangvalte pawhin an Lalpa rilru țhatna chu a ropui an ti hle a phur takin thlan an lai leh ham ham thei tlat a ni. Thansanga an leihkapuia țhu mu chuan a lam pana Parmawii lo kal a hmuh chuan lo nuih vur vurin "vawin chu ka sawi chiang tawh khawp ang" a ti sapa Parmawii pawh lo thleng thuaiin "I u kha na zawk se i ti" a rawn ti ringawta Thansanga chuan "Eng vangin maw?" a han ti a Parmawii chuan "Chalngenga hi i huatna a rei tawh tih U Renga'n a sawi vek alawm i u aia din kha i chak viau ka ring a ni. Mahse i u pawhin a bei hman meuh lo anih kha" a han ti a Thansanga pawh chuan "Ni e mahse mi chapo chhungkua chuan an chan tawk an hmu anih kha, ka nau va ko teh inchhung lama insawn ka duh riau" a han ti a Parmawii chuan "Ka awm ve reng hi ka lo pui ang che" a han ti a Thansanga chu a lawm kher mai chhan dan tur a hre si lo chuan "Min zo dawn a mi" tih pahin Parmawii kuah chung chuan a ding ta a. Zawi muanga penin inchhung lamah chuan an lut duna Thangliani chuan a lo hmuh veleh "Aw haw U Mawite min lo koh mai tur alawm" tih pahin a va pui ve ta vata. Chutia a nauin a rawn dawm ve takah chuan Thansanga paw'n a na tihna chu dam deuh hlekin khum lam pan chuan a kal chhet chhet a. Ni, hun dangah mi pahnihin an kuah chung pawhin na a ti viau zela Parmawii chauh chutah hmeichhia lehnghalin an han kal pui chu na a ti si, na ti anga lan a duh si lo chu inchhung an luh hma hmain a thlan deuh hluam hman a nih kha. A hliam hi a nain a biang veilam phei chu savawm hamna thla kha inrin kalhin a ham thuk hman lutuk lo hlauh chu a vannei hle. A awm erawh a thuk ve deuh hlek a, amah ti țhuanawp tu ber erawh a mal hliam a ni thung. Nilengin Parmawii chuan a vil leh deuh chawta Țialthangi leh Thangliani chu thing phur tura chhuakin Chawiliana erawh Runthanga te inlamah a awm thunga inah an pahnih chauha an awm takah chuan Parmawii pawh a tlângnelin a hlim ve hle mai. Thansanga chuan sawi a duh si sawi țan ngaihna a hre si lo chu a inngaihtuah buai nasa teh e a tawp atawpah chuan "Mawite i lo leng fo maia mi pawite hi ka sawi ang tih a nia ka hlauh ni" a han ti a Parmawii lah chuan "Chu tiang an awm lo tih i hre chiang lutuk, bakah ka la naupan em hi" a lo ti sam et a, Parmawii chuan ngaihzawng neih a la inpeih lo angah a ngai nghet ta hmiaha țhulh tur nge țhulh loh tur ni ang aw a han ti vang vanga mahse mipain kan tum tawha tiin "Chuti chu lo leng reng la ni mai, nakin lawkah khaw dangah pasal i la nei anga min theihngilh mai awm si a" a han ti a Parmawii chuan "Nang pawh i rawn dam anga rawn lenna chang hre ve lo lekin ram lamah i tal leh anga, pasalțha i ni si a khawi lam nula hmelṭha tak zunah emaw i la uai anga min theihnghilh hmak awm si a" a han ti let ve zata Thansanga chuan chhan ngaihna a hre tawh lo kher mai mahse sawi tlang tawp chu țhain a hre ta, a pehhel kualna a piangah Parmawiin a lo hnial dang țhak țhak zel bawk si. "Khawi lam nula hmelṭha zunah mah uai ka tum lo e, nang i awm reng alawm" tih pahin a han nui lui vur vur a Parmawii chuan "Keite chu falak, vanneih vang mai maia a hminga lalfanu ni ve mai ka nia pasalțha tan meuh chuan ka hniam lua a ni" a han ti a Thansanga chuan fiamthu tawh hauh loin "Ka bulah awm min dil kha ka hre reng a sin" a han ti a Parmawii chuan Thansanga hmelah chuan a ti takzeta ni tih a lang bawka a lawm hle mai "Ni e i bula awm hi ka duh a ni, ka thla a muang em em țhin a, mahse tunah hi chuan ral lo kal ta se chu U Rengate inah ka tlan nal nal ang i thlamuan thlak loh rih emai" tih pahin a han nuih seih a Thansanga chuan Parmawii kut chu vawn sakin "Khawi lam lalfapa mahin an nei dawn lo che, Țialthangi famo i ni dawn" tih pahin a han nuih saka Parmawii pawh chuan "I ta nih tluka duh ka nei hleinem rinawm takin aw" tia a chhan takah chuan hmangaih biahthu di thlung dunin rinawm tura intiamna nen thu an chhilh ta a.

Thansanga chu a hlimin han inneih nghal mai te a duh a mahse a u han hmakhalh em chu tih chia a ngaih loh bakah nula tlangval chhuak hlim awrh an la ni bawk si,rinawm taka Parmawii tana awm intiam chungin ni chu an hmang liam ve ta a.

"Min țan pui ru" tih thawm an hriat rual chuan tlan vatin "tun ang hunah te, tu tak ni ang chu maw Liana fimkhur takin aw" Ruma(Val upa Ruma, Ruma tiin kan sawi zel tawh ang) chuan a han ti a thawm pawh hnaih zelin an va thlen phei chuan kawr kama buk lian tak kianga mipa pakhatin a nula pawngsual chunga a lo su tlauh tlauh lai chu an va hmu ta.Unau hmelhai hun anih tawh avangin an han pan hnai leh hleka an han chhiara mi pathum an ni a silai an tung vek tih an hmu bawk. Liansanga chuan" U Rum min lo veng rawh aw, mi tenawmpa sawn chi a thlah hman tur a ni lo" tih pahin khap rual loin a chhuak phei a silai tin kawh va chungin "Ka tem ve tawha a nuam khawp mai, mahse tem nawn ka tum hauh lo ka hmuh atan pawh ka duh tawh hek lo, tawp la i nun ka zuah ang" a han ti a. Chu pa nula pawngsual mek tu chu thinrim hmel takin a rum nghuta "naupang kal kiang mai teh thih i duh loh chuan" tih pahin a han su leha, vawi khat a su hman awrh tihah chuan silai rawn puak țhuaiin an zinga pakhat chu a rawn deng thal nghal tawpa. Chu veleh hnim pik kar ațang chuan "Hual beh vek in ni tawh e, nawmchenna tak tak inhmachhawn duh anih chuan in hmaa mi kha in bei thei ang, nula kha kan hruai haw dawn a ni" a rawn tih takah chuan chu pa pawh chu tho vatin a mipatna khawng lah chu Liansanga lam kawh tir vun chungin a ipte puia a chem chu a la sawk sawk a "Tuma'n Kawnzau pasalțha Hnemthanga thil ti lai an khap ngai lo a sin, ka nau thisen hi i rul ngei ang" tih pahin Liansanga chu a bawh ta silai lo puak leh țhuaiin a țhianpa la dam zawk chu a thal leh nghal thlawrh bawka thinrim takin Liansanga chu a bawh buan buan a Liansanga lah chuan lo bum zelin a taksa chu a thai ran sak ta nuk maia. Hnemthanga taksa chu a na țhem țhum tawh maia a mipatna pawh a hnual rawih tawh mai a ni. An han inveh leh thauh thauha Hnemthanga rawn tlan phei lai tak chuan Liansanga pawh tlan phei ve nghalin an han inpel fel chiah chu Liansanga ban bul chu thi nghal zawih zawihin Hnemthanga lu pawh a lir thla tawp bawka. Liansanga chuan puanhlap la vatin nula saruaka lo țhu reng chu a han pe a. Chu nula lah chuan a hlauh hmelin a lo ip chawih chawih bawka. Val upa Ruma chuan meite rawn chhawm nung țhain mei engin Liansanga hmel a tihlan meuh chuan nula chuan "Liansanga maw?" a han ti a Liansanga pawh chuan "Ni e, nula khawi khua nge i nih a, ka hmingte i hriat le" a han ti a chu nula pawh chuan "Darchhep khuaa awm țhin kan nia, tunah chuan Zehtet lamah kan awm thung. Kan lalpa zarah ka pa hian khawnbawl upa anihna chu a chelh leh thei hlauh maia min pawngsual tute hian kan khuaa ranngo rawn zawngin kan inah pawh an rawn lawi lut ve ngei a nimin piah khan an khaw lam pan turin an haw nghe nghe a ni. Mahse rin loh takin ka thing phur min man beta he lam hi min pan pui ta char char a ni"tiin a chanchin chu țap chungin a sawi ta a. Liansangate chuan an khawngaih hle maia han hnem vak ngaihna awm si lo Ruma chuan "Hei khua kan hlat tawh lo hle a, kan kal bek bek chuan leng hawn ar khuan lai vela kan luh hman ka ring a ni. Nula chau viau mah la i chhungte ngaih tih țhat loh rei a țha lo ve haw i la i chanchin lal hnenah kan thlen anga ti chuan phuba kan la ngei ang" a han ti charh charh a. Chu nula pawh chuan lo pawmin Liansanga ban hliam an tuam zawh hnu chuan khaw lam panin an kal leh ta a.

Zehtet Lalpa'n a khaw nula, a khawnbawl upa fa ni bawk, thingphur haw thei lo, Liansanga te ruala khua rawn lawi lutin a chanchin a sawi a hriat meuh chuan thinrim takin a inseh ruh ngut ngut a. "Tlangaupa Chhuahchawnga leh Hrilkunga zu ko la Liana nangin i u te ina i kal pahin i U Thangkunga rawn tir nghal mai ta che" a tih chuan Liansanga leh Ruma pawh chuan rorelna an nei dawn tih hriain tlangaupa rual chuan an chhuak ta vata.

Lal ina khawnbawl upate leh pasalțha te rorel chu an thu a mum thei hauh lo. A țhenin va rawt chimih țhak an duh laiin a țhenin palai nghah phawt emaw va tirh phawt an rawt ve thunga chutia an thu a mum theih tak loah chuan pawngsual tawktu nula pa chu lo ding chhuakin "Lalpa ka fanu chunga thil thleng hi pawm zam mai mai chi aniin ka hre hauh lo. Mahse, lusei kan nihna avangin leh ka fanu hian mi tenawm chi em a pai hman loh bawk avangin palai va tirh phawt ka rawt e". A rawn tih takah chuan ngawi țhiapin a fanu chunga thil thleng mah nise a rilru ngaihtuahna fim kak avang chuan an ngaisang hle a. Upa Chhuanthanga chu lo ding ve lehin "Lalpa ka thusawi tur hi inpawm em ka hre lo na a. Tlangval zahnih chhuak i la khaw daiah inkulhin palai atan ka rualin Pasalțha Chhuahchawnga leh Pasalțha Thangkunga khuaah kan lut anga kan thu hawn a zirin khua chu kan chimih mai ta lawng. Kar a hla thamin palai thu ken inhrilhhriat mai mai ai chuan a siruk la teh meuha va thawh chhuaha palai atana a hminga va luh ve chauh kha a țha ka ti a ni"
a han ti a țha an ti tlang hle maia Lalpa Puithanga chuan "Anih leh kan unaute hnenah chanchin kan hrilh hre dawn nge, hei chu kan khaw buaina anih angin kan khaw kutah kan dah mai dawn" a han ti a Chhuahchawnga chuan "Lalpa kan va hrilh chuan min tlanchhiatsan hauh lo ang. Mahse, kan va kalna tur hi a hla thamin kan unaute han pun em chu a inthlahrun awm ka ti a ni. Chu bakah Zehtet khua hi kan dawihzep hauh lo tih lusei khua mai bakah țiau ral leh hmar lam thlengin an hre tawha min zuam dan en hian kan unau khuate avanga huaisen chan chang ni angah min ngai mai mai niin a lang tlat. Kan huaisenna kan ti lang tur a ni"a rawn tih takah chuan an pawm tlang hle mai a Lalpa Puithanga chuan "Anih chuan kan khual țha te khuan an haw hun hunah kan thu hi hawn ta mai se. Inhrilh hriat loh ngawt erawh a țha lo e, anni khuan an haw hun hunah an lal hnenah chanchin hrilh se a tawk mai ang. Anni pawhin min hrethiam khawpin ka ring a ni." a tih takah chuan tlangaupa chuan lal thu chhuak chu khawlai fan puiin tlangvalte beng chu a verhin kal ve ngei an tum ruh hle a. Liansanga chuan" U Rum min li nghah kher ka phut lo a nia ka țhat thu lo va hrilh la kan rawn let hunah a rang thei ang berin ka lo haw ang"a tih chuan Ruma chuan a rilru tetein "Liana nang ni țhian thum zawng pasalțha khual kai inni tawh miau a, puih ngaite hi intlanchhiatsan ngai dawn lo anih hi, hnehna chang ngeiin rawn let leh rawh u" a ti rilru vawng vawnga.

A tuk zingah chuan lalmualah chuan Zehtet tlangval zathum rual zetchu an tlim hmur maia Chhuahchawnga chuan kal turte chu thlang chhuak vekin midang zawng chu khua lo nghak tur an nih thu hrilhin lungloha lak loh tur anih loh thu leh khaw lam ven ve tho angaih thute sawiin a thlem sap sap hlawma. Chu tih lai tak chuan Lalpa Puithanga chu lo auin "Chawnga Liana kha kal turah i thlang em ni" a rawn tih chuan Liansanga kal tur zinga a thlan tel ve loh mahse a kal tur zinga tuna lo nui țhențhu a hmuh chuan "Lalpa kan naua hi kan dan theih ka ring lo" tih pahin a nui vur vura Lalpa Puithanga chuan "Liana kal ve lo mai la ka duh a ni, eng emaw va tawk ta la Lal Dohranga leh i pa ka hmu ngam nang" a han ti a Liansanga chuan "Lalpa he khua hi ka pianna khua a ni tih i theihnghilh ta em ni?" a han tih let takah chuan "Zangaia siar" ti supin kum tam tak liamtaa Pu Zangaia te chhungkua a hnawh chhuah laite chu mitthla vang vangin "Zangai nangni chhungkua tluka rilru țha hi an awm thei dawn em ni, i fapa hian amah duh lotu te tan rammut a tum a nia, ka thil tih sual kha a va han pawi tak em" a ti rilru vawng vawng a.

Rammu turte chu kawtchhuah lam panin an kal ta. Chhuanthanga chuan hma hruaiin Chhuahchawnga Thangkunga leh Hrilkunga te'n an zui bawka Liansanga pawh an hnung lawkah tlangval dangte nen kal vein an ri ham ham a. Karah zan ruk zet an riah hnu chuan lo sul haw hun laiin Kawnzau khaw ram chin chu an lut ta. Thui pawh kal tawh loin khua ațanga thawm hriat phak lohna velah chuan inkulhin kawng laka Liansanga zukchal kah leh Thangkunga Sanghal kah an rep chu thuk phumin a țhenin ei an rela a țhenin buk an sa mup mup bawka. An han inpeih fel meuh chuan leng len ar khuan a hun der maia zanriah chu kil sawk sawkin an eina bang nawite chu thianfai leh vat vatin Chhuanthanga chu a ding chhuak ta a "Hei khua kan hnaih tawha tumah kan inhmuh tir tur a ni lo. Tin, silai hmeh puah loh hram kan tum ang ram vak ten kan thawm an hriat lohna'n kan fimkhur a ngai hle a, naktukah nilengin tuma'n buk kan chhuahsan tur a ni lo. Lu sul haw hmain khuaa lut turte kan lut anga zanriah kil hun laiin midang zawng khaw lam panin inrawn kal thung ang. Pasalțha Hrilkunga zai ngai zelin inawm tur a ni. Leng hawn ar khuan hmaa silai a rik loh chuan khuaah kan riak dawn tih hriain buk lamah inlet leh anga kan rawn let velah khaw lamah kan haw ang. Silai a rik emaw kan rawn let leh nghal vat anih chuan khua kan bei nghal ang"a ti a. Ti chuan tumah meng rei awm loin hma takah an mu ta diaka, a tuk chawhma țhak an nghah leh hnu chuan chawhnu herah Chhuanthanga rualin Thangkunga leh Chhuahchawnga chu an kal chhuak ta a.

Khua an va luh chuan mihring vei vak an tlemin a lo hmutu te chuan an en duh hle maia. Lal in an han luh chuan Kawnzau lalpa chuan țha taka lo chhawnin hah zu te a lo zuka, enge maw tak lo thleng tur chu a hre lawk nge ni engmah zawt duh loin thil dang a sawi kual pui char char a. Buk lamah erawh Liansanga tawm reng ning chuan "U Hril khua ka han chuan ange, beih thut hunah chet lak dan tur pawh hriat a awl ngei ang." a tih chuan Hrilkunga chuan Liansanga chu rin ngam a nih zia a hriat avangin a phal sak ta a. Liansanga pawh kal chhuak vatin Kawnzau khua chu a hel ta ngat ngata khaw lu lamah kalin khaw chhung lan chian theihna laiah chuan a țhu ta vanga. Lo sul haw te chu hmuin naupang inumkawi zawr zawrte pawh chu a hmu a, khua chu a han bel chianga in zathum nufa zet chu an ni ve a an zawlbuk pawh a lian ve hle. A khaw thleng a remin a pharh zau țha hle maia, han chenna'n a it hle mai. A duh tawk a thlir hnu chuan a țhiante lo nghak turin khaw dai lam a pan thla ta a.

Kawnzau lalinah erawh pasalțha Hnemthanga u Pasalțhate Keimana chu a inhrosa kuk kuk a, "Ka nau lu inlak hman hi inhmu dawn tih hria ang che u, Zehtet khua chu ka lo lawi lut ngei ang" a han ti a Chhuanthanga'n zawl dawh tura a tih tlat avanga lo inhmuam up char char tawh Chhuahchawnga chuan "Ni e i duh ang ngei chuan tih han tun chhin ta pauh che Pasalțha Chhuahchawnga hi i tawn tlang thei meuh angemaw chu" a han tih sak takah chuan Chhuahchawnga hming chu an hre chiang hle mai, Keimana pawh chuan hre hle mahse pasalțha ve tawk tak ani bawk nen dawih aw a chhuah duh bîk hauh lo "Anih leh ka nau lu khai tu chu min han hrilh teh" a han ti leh a Thangkunga chuan "Dawih aw riaua ka hriat chu, i nau lu khaitu chu kei Pasalțha Thangkunga hian ka hrilh ang che, ka nau, Bualthleng pasalțha nunrawng Liansanga a ni e" a han ti saka Liansanga, Thansanga leh Dammawia hming chu an hre nameuh mai. Thansanga phei chu hmeichhe chungah pawh nunrawnna lan tir duh tiin an hre tlat. Kawnzau lalpa chu a zam tawh hle. Zehtet khua chauh pawh hmachhawn an hautak dan tur zia chu a hre chiang tawh hle maia Zehtet aia Bualthleng lam dah chungnunna a rik fo avangin pasalțha te hi Bualthleng lam mi deuh vek niturah angaia mahse an lo ni hauh lo tih chu a hre chiang ta. Mahse a pasalțha thihna chuan a nghawng nain rilru fim a pu thei tlat lo "Ka pasalțha lu inlak man min rulh hma chu leido kan ni tih in hre reng dawn nia, chhuak vat rawh u" a han ti a Chhuahchawnga chu ding chhuak vatin lal in chhung a awm te chu a en kual dan dan a tap lama lalfanu la naupan hmel tak tleirawl chhuak awrh lo țhu ve chu en vang vangin "Lalpa i duh ang ngei chuan le, i fanu chunga thlengah hian han chan la kan farnu chunga thleng hi, palai kan lo la kal zel zawk hi kan in phah hniam zia i hmu ngei ang. Mahse engkim hian tawp chin a nei ngai i pasalțha lu kan lak man kan rulh let i duh anih chuan kan farnu thianghlimna kha min pe let leh rawh u, anih loh chuan leido chu kan ni mawlh ang, mahse lusei kan nih angin in leh lo bakah nunaute tal kan inzah sak aniang chu"tih pahin a chhuak nghala Keimana chuan "Nunrawnna a khat ho, dawih aw chhuaha nunau chunga zahngaihna chungchangte insawi tak mai le,Keimana hi mi namai ka ni lo reng asin chhuak vat rawh u, leido kan ni tawh e, a bak induh ang erawh a thleng lo ang Zehtet khua ka chimih hunah Bualthleng khua chu ka rawn chimih leh bawk ang"a ti ta phiar phiar a Thangkunga chuan rek chawtin a kut khing khatin a chawi kang ta mai "Inchhir suh ang che i thusawiah khan" tih pahin lal in chhuatah chuan a paih thlawp a, a chhuahsan ta nghala Chhuanthanga pawh chuan zui ve nghalin an țhiante lam pan chuan an kal hlawk hlawk a.

Kawnzau lalpa chuan Thangkunga hming chu hre ve mahse Chhuahchawnga Runthanga leh Rengliana bakah Thansanga te țhian thum leh Chawiliana vang chauha lang ve ni a an lo hriat țhin chu mi namai a ni lo tih an hmu chiang hle. Thangkunga ang bawka a duap ber tura an lo rin Hrilkunga pawh engti fakaua pasalțha nge anih ang tih chu an rilru luah tu a ni. Chhuahchawnga phei chu a ral hrat zia an hre chiang hle a Liansanga a la awm cheu lehnghal. Zehtet khua chauh pawh hi khaw ropui leh do mai mai chi an ni lo tih chu an hre chiang ta kher mai le. Mahse tihngaihna a awm tawh tlat lo phur lo takin ral rel an han țana Keimana lah chu a ngawi ngul tawh mai si. Tui bur hmuam da vel an han sawi ho hnu chuan sawi zawm pawh an phur tawh lo nge an ngawi tlang ta diaka.

Chu tih lai tak chuan khaw mawng lamah silai a rawn puak ta. Kawnzau lalpa chuan "A va pawi tak em ngam loh chalah chil kan hnawm a ni" a ti supa Keimana chuan lal inbang laia silai leh chempui chu lain "Ka nau ka lo kal ve dawn e pialralah mal takin i awm bik tawh law'ng" tih pahin a chhuaka a thil va hmuh chu rapthlak a ti hle mai. Khaw mawng lama inte chu an lo alh hluah hluah tawha nunau mangang chu an tlan kawi zawr zawr bawka mipa te chuan hriam nen an hmelma te chu pan ve mahse an lo sai thlu nghauh nghauh zel mai si.

Chhuanthanga chuan a naute chu bawh turin thu a pe ta. Chu veleh chempui nen Kawnzau mipa ho lamah chuan tlan nghalin Chhuahchawnga Thangkunga leh Hrilkunga te inkawp chu tawn tlang thei an awm meuh lo, ral khat ațangin Liansanga'n "Min lo en dik rawh rawn tel ve angai lo" atih avanga Liansanga che vel lo thlir reng tu Chhuanthanga pawh chuan Liansanga, a taksa insiam puitling chho mek thaza tak chunga a che kual leh a hma a vai kaw duai duai a hmuh chuan nui sukin 'BUALTHLENG MAWITU' a ti sap a.

"Kawnzau tlangvalte u, theihpatawpin i bei ang u aw" ti a Zehtet tlangval pakhat lu sat lir tawltu, Keimana chu Liansanga chuan pan vatin, "Zehtet tlangval te u, an pasalțha lu ka khai dawn e. Lo chawl rawh u" a tih chuan inbei laite chu chawl țhapin, Liansanga'n Keimana a hmachhawn lai chu an en țhap a.

Chhuahchawnga chuan, "Liana lo chawl tawh rawh. A nau lu i la tawh a, hei chu ka chan pual a ni tlat" tih pahin a hma khalh a. Liansanga pawh thuawih takin a tawlh kiang a, mahse Thangkunga'n beih a rawn chuh ve leh tlat bawk si. Hrilkunga, an bula ding ngawi reng chuan, "Kawnzau pasalțha, lo inring rawh" tih pahin Keimana lam chu a pan ta a. Chhuahchawnga leh Thangkunga pawhin nui suk chungin an lo thlir reng a.

Keimana chu a hnungtawlh zel a, Hrilkunga lah a phur tawlh tawlh bawk si. "Zehtet pasalțha nupui hmu zo lo Hrilkunga chem hi a bil ngai love" tih pahin Keimana dul chu a sat thler ta duai mai a. Keimana chu țhingțhi hnawkin Hrilkunga chu a rawn en țawk țawk a, Hrilkunga chuan natuar reng tura duh lovin, "Pasalțha, pialralah ka rawng bawl turin min lo nghak dawn nia" tih pahin a lu chu a laksak ta a.

Kawnzau tlangval ho chuan inthurual ang hrimin Hrilkunga chu an rawn bawh rawn phut mai a, mahse eng lai maha hlat ngai lo tu Chhuahchawnga leh Thangkunga chuan hmelma lam chu tlangval ho nen bawh phei nghalin an han insam leh a. Kawnzau lam chu tawlh zelin lal tual an thlen meuh chuan dam pawh an tlem tawh hle mai. Mahse thi dawn tho tho va an inngaihna chuan a tawp thleng țan tir tumin a deh an khirh ta zek mai.

"In Lalpa nunna hi inhlut anih chuan inpe rawh u" ti tu Liansanga lam chu an hawi țhap a. Liansanga kha eng tik laiin nge Lal in lam a a kal tih tuma'n an lo hre hauh lo mai a. Kawnzau tlangval te chuan an hmanrua theh thla sap sapin Chhuanthanga, lal in pana rawn kal bek bek chu an lo en țhup a. Chhuanthanga chu leihkapuiah lawn chhovin "Kawnzau khuate u, Lusei leh Lusei inkara inhmelmakna awm hi kan duh ngai lo va, keini chang nilo vin, kan unau Bualthleng khuate pawhin an duh ngai hek lo. Mahse zaninah hian duh thlan tur in pasalțha leh in Lal hian min siam lo a ni" tiin Pasalțha Hnemthanga'n an nula a pawngsual avanga he inrunna hi irhchhuak anih thu chu a sawi ta vek a. Tlangval thinrim lutuk chu an phun mur mur a, "Pasalțha pakhat hurherh vanga thisen luang zat hi kan Lal hian a hmu lo vem ni?" tiin an Lal chunga an lungawi lohna chu an au chhuah pui ta piap piap mai.

Mahse an Lalpa chu rawn auvin, "Ka khua leh tuite u, kan pasalțha Hnemthanga thihna khan min deng na em a ni. Khawngaih takin min ngaidam ula bul i țan thar leh ang u. Min ngaidam thei lo anih pawhin khuaa ka chhungkua te nena kan awm ve tal min phalsak hram rawh u" a rawn tih chuan tlangvalte chu an ngawi țhap a. Chhuanthanga chuan, "In Lalpa hian a tih sualah ngaihdam a dil a ni. He in Lal ngei hian a ni lawm ni he khuaah hian nuamsa taka chentir țhin tu che u. In lal hi awm lo se kha leh chen kha Kawnzau khua hi a dingin in ring em? Tihsual nei thei vek kan ni, kan lal nise ka ngaidam ngei ang. In kutah engkim a awm e" a han tih chuan Kawnzau tlangvalte chuan dik an ti hle mai. An val upa chu rawn țawng chhuakin, "Lalpa, vawi khat tih sual vangin kan huat phah lo che. Nang tluka Lal țha an awm lo ve" a rawn tih takah chuan Liansanga chuan Lalpa chu thlahin Kawnzau Lalpa chu a tlangvalte zingah chuan zu chhukin mittui nen ngaihdam a dil ta a.

Chhuanthanga leh Chhuahchawnga bakah Thangkunga leh Hrilkunga te chu Kawnzau lal inah chuan lutin, Kawnzau lal leh upate nen chuan an titi a. Chhuanthanga chuan, "Lalpa, zanin chu i khuaa kan riah mai a ngai dawn a ni. Naktuk nilengin khuaa ruangte hi thenfai hna thawk ho ila" a han tih chuan Kawnzau Lalpa paw'n lo pawm sakin, a khua a in tam zawk kang chhe zo ta te chu Chhuanthanga chuan sak țhat pui vek a intiam a, inrem taka inkawmin an inngaidam tawn ta a.

A tuk zingkar ațang chuan Kawnzau leh Zehtet tlangvalte chu khaw chhung a ruang thenfai hna thawkin an buai mup mup hle mai a. Zehtet lam pawh mi sawm thum dawn an inchan ve a, Kawnzau lam phei chu sawm ruk chuang an inchan hman a ni. Liansanga pawh a mawngzang berah țangin a che ve char char a, nulate'n tui an lo tulh zing bik hle mai. Tlangvalte chuan fiamin an nui ho ta dar dar a.

Behliang mun hun velah chuan Liansanga chu Lal in lama koh anih avangin a han kal a, a han thlen chuan Chhuanthanga leh Chhuahchawnga pawh lo awm vein, Chhuanthanga chuan a lo hui vat a. Kawnzau Lalpa chuan, "Pasalțha Liansanga maw i nih a. I hmel en chuan Chemtei te aiin i u awrh ang ka ti" tih pahin tap lama a fanu a nu kianga ei rel mek chu a thlek zauh va.

Liansanga paw'n va en phei ve in a pa in "Chemtei" a tih rik avanga lo hawi chhuak ve mek Lalfanu nen chuan an mit a intawng ta chat mai. Liansanga chu nghilh dup hian a inhria a. Nula lam ngaihsak lem lo tak a ni a, an khaw lamah pawh lalfanu te zinga mi Biakmawii hi a kawmnel ve ber a ni a, mahse Biakmawii nen an inkarah erawh induhna a awm lo ve ve bawk si. Kawnzau lalfanu hmelțha tak Thansanga nau Thangliani nen an inrual vel ang tih tur chuan a thinlung chhung chu a luahkhat nghal ni ngei tur a ni. Kawnzau Lalpa'n, "Pasalțha Zangaia fapa maw i niha?" a han tih chuan harh chhuak zawkin, "Aw Lalpa, i sawi ang kha a ni e" a ti chhuak hram a. Chhuanthanga'n Pasalțha Zangaia fapa anih thu a lo sawi lai pawh hre chang lovin Kawnzau lalfanu chu a lo suangtuah a ni.

Lal inlama zanriah kil tura an duh avanga an koh thute an hrilh hnu chuan an titi na kiangah chuan țhu vein a lo ngawi kar thung a. Chhuahchawnga chuan Liansanga mizia chu a hai lo kher mai. "I ru ve ringawt ange, kan buai phah nasa tawh a nia" ti ru supin a nui vur vur a. Liansanga paw'n an naupan laia Chhuahchawnga nupui ruk an buai hrep thute kha a hre chhuak ve zawk a, a nuih let vur vur bawk a.

Zanriah eikhamah chuan Thangkunga leh Hrilkunga pawh Lal in lamah lo chuang kaiin, Lalpa chuan, "Chemte, kan tlangvalte nen hian va inkawm ho tawh u" a tih takah chuan leihkapui lamah Liansanga chu chhuak vat Chu enin Hrilkunga chuan nui suk suk pahin, "Ka la nei ve thuai dawn" a han ti ringawt a. Chhuahchawnga leh Thangkunga chuan, "Patling kan titi dawn e, i awm ve na chi a ni lo" tih pahin an lo nuih tlawrh tlawrh bawk a. Lalpa chuan, "Tak takah Hrila, țhu la, i titi ho teh ang u. I naua te nen kha chuan in titi a inrual tawh lo vang" a ti a.

Mahse țhut a tum lai taka Chhuahchawnga mitmei chu man thiam vatin "Lalpa, ka lo la lut leh zawk ange, i fanu han kawm ve te pawh ka chak alawm" tih pahin a chhuak ta vat zawk a.

Leihkapuia Liansanga, lalfanu țhutna piah lawka lo hawi kual vak vak a hmuh chuan nui sukin a va titi phei ta bawrh bawrh a. Liansanga pawh Hrilkunga a rawn kal takah chuan va țhu phei vein an titi ho ta char char a. An innel tawk ta maw tihah Hrilkunga chuan chhuanlam siamin a luhsan leh ta a.

Hrilkunga awm leh tak lovah chuan Liansanga chuan sawi tur a van kher mai. A bul lawkah a thinlung luahtu a țhu kar bawk si. "Lalfanu, inkhua hi a nuamin a boruak pawh a thiang țha kher mai" a han ti ve tawp a. Kawnzau lalfanu chuan, "Ramte tiin min ko thei lo vem ni?" a rawn ti let ve a. Liansanga chuan rang zetin, "A nih, Ramte" a han ti leh a, Ramtei pawh chuan, "Nia, kan khua hi a nuam asin. Mahse a kang chhe nasa hman khawp mai" a han ti a.

Liansanga chuan sawi fuh lo inti tak chungin ngawih a chuh ta tlat a, Ramtei chuan, "I nuam lo tihna'n a sawi ka ni lo a nia" a rawn tih leh takah chuan Liansanga pawh rawn pangngai ve lehin an titi kual ta a, rei lote hnuah innel nghalin Liansanga chuan, "Nakin lawkah kan haw anga, nang pawh rei loteah khual thang hat khawpin i la lar ve ang a, khawi lam lalfapa emawin a rawn nei che nga, khawi khua emaw lal nu hmeltha tak i la ni anga" a han tih lai tak chuan Ramtei chuan, "Khual te zawng kan kai ve hlei lawng e. Nang zawng in khaw hnih pasalțha te hming bakah i hming leh Thansanga leh Dammawia hming hi kan hre bel khawp asin. Palian pui, hlauhawm tak tak niturah ka ruat țhin che u a, mahse i lian a, i hlauhawm hmel chuang hauh loh" tih pahin a nui her her a. Liansanga chuan, "Kan chanchin mite hriat dan hi dik mah se, kan duh vanga khatianga che kha kan ni ngai bik lo asin. Kan thinrimna avanga khua kan hmuh loh vang chauh a ni" a han ti sap a.

Ramtei pawh chuan, "Thinrim laite chuan khua kan hmu lo fo alawm, inthiamlo duh suh" a rawn ti ve a. Liansanga chuan, "Thinrim thei hmel pawh i pu hauh lo" a han ti a, Ramtein, "Engvangin maw?" a han tih chuan, "Khuavang note i ang em a" a han ti a.

Ramtei chuan nuih ar ar pahin "Min fiam kual vel mai mai suh aw, ka nula ve tawh a nia" a han ti a. Liansanga chuan a aia thutak zawkin "Ramte, kan haw hunah pawh min lo hre ve reng țhin dawn nia. Kan la inhmu leh te anih ngai chuan tun aia duhawm zawk hian kan inhmuh tawh ka beisei" a han ti charh charh a.

Ramtei pawh chuan haw lo tih hriat takin, "Nang pawhin min lo hre ve reng țhin dawn nia. Ni e, kan inhmuh leh hunah chuan kan inhmuh dan a țha lam pang anih beisei ila" a ti ve a.

Leng hawn ar a khuan takah chuan Liansanga chuan, "Ka țin phawt ange, mang țha tak i mang dawn nia" tih pahin thawh tumin a han innem a, mahse a thil nem chu Ramtei kut a ni tih a hre tlat. Laksawn leh mai tum mah se a lasawn zak tawh si. Ramtei lam a va hawi Ramtein a lo en ve chiah bawk si chu a lai ru tak zet.

Tho sawk sawkin, "A na em" a han ti a, a nem nat loh zia hre chiang ber tu a ni si. Ramtei chuan, "Na love, mang țha tak i zu mang dawn nia" a han ti ve a. Liansanga chuan, "Ka rawn hmu ngei ang che" a ti a Ramtein, "Eng hunah maw?" a rawn tih chuan, "E le, ka tawn mang ramah mawle. Mang țha tak mang tura min duhte chuan ka hmu ve bawk ang che chu mawle" tih pahin Ramtei biang chu a piai sak zeuh va, Zawlbuk lam panin a kal ta a.

Zawkbuk a thlen dawn hnaihah chuan an hawi let a, Ramtei ban lo vai lauh lauh chu vai let vein bawhbel chu a bawh liam ta a. A tuk nileng Kawnzau khuaa hna țul ang ang an thawh leh takah chuan Chhuanthanga chuan, "Hna bang zawng hi Kawnzau khuate kutah i dah tawh zawk ang u. Kan awm chhung hi chuan khaw mipuite ralțitna hi a bo thei dawn lo a ni" a tih takah chuan a dik an ti tlangin an lo pawm vek a.

Zanriah eikhama lal inlam pan tura Thangkunga a chhuah hnu lawk chuan Hrilkunga chu kal ve tumin a han tho a, "Liana, mi han kalpui teh" tih pahin a han siai zeuh va. Liansanga pawh phur taka tho vin Lal in lam chu an pan ta a.

Lal in an han thlen chuan an lo titi mam mam tawha Liansanga pawh a ngai te bawkin Ramtei nen leihkapui lamah țhuin an titi a kal lamah Hrilkunga'n a fuih nasa tawh bawk a, Liansanga chuan Ramtei kut chu vawnsak chungin Liansanga chuan, "Ramte, ka thinlung hian a hre reng tawh ang che. Ka tan chuan cho rual i ni lo tih chu ka hria, mahse khual khaw nula i nihna bakah kar a hla tham em a, sawi lo va haw mai ka duh lo a ni. Ka hmeichhe tawn tawha ka thinlung luah tu awm chhun i la ni tih hi min lo hriatsak ve reng la. Khiangawia mual i liam ni thlengin min lo hre chhuak ve țhin rawh aw" a han ti sap a.

Ramtei chu a ngawih vang vang hnu chuan, "U Lian, nula pangngai ang em a chhiar pawh ka la ni lo tih i hai lo. Mahse i thusawi kha a tak tak anih chuanin rinawm takin ka lo nghak ang che" a ti let ta kauh mai si. Liansanga lawm lutuk chu zuan vak vak maite pawh a chak hial awm e. Mahse lalfanu a ni a, Lalpain a tirhna lamah chuan a duh hunah a tir thei tih a hre chiang hle. "Ramte, kei pawh rinawm takin ka awm ang tih ka tiam a che. Mahse lal fanu i ni a, i pa hian khawi lam Lalfapa emaw nei tura a duh hun che a lo la thleng ngei ang" a han tih chuan Ramtei chu nui her herin, "U Lian, ka pa hian Lal fapa eng anga hausa pawh ni se min neih tir ka ring lo. Ka nu hi lal chhungkaw mi a ni hleinem, ka u pawh a duh ang takin lal chhungkaw mi leh sa pawh nilo neih tirin tunah hian kan khaw țhenawm lawkah sawn an awm nghe nghe asin," a tih takah chuan Liansanga chuan thaw deuh huaiin, "Anih leh Ramte, remchang hmasa berah lo zin leh vat ka tum dawn nia" a tih takah chuan an haw hun turte an sawi dun a, an inngaih tur zia sawina'n chuan a la hma mah mah a ni.

Chu zan chu an tan zan hlu leh hlimawm nimah se a tuk zing ni chhuak chuan lungngaihna a keng tel tlat si. Zehtet tlangvalte chu an khaw lam panin an kal leh ta. Liansanga chu a ngui bar reng a, Chhuahchawnga te chuan an fiam nasa hle mai. Chhuanthanga chuan "Liana i ti țha hle mai. I u te ang ngawt chuan i ru awlsam lo a, i ngaihsan awm teh e. I u Chawnga ve hi zawng, a ru ve ngawt a, tun hnuah a ngam leh si lo va, ram lamah pawh a chhuak meuh lo an tih hi" a tih chuan Hrilkunga chuan rawn tuihnih vatin, "Ni, kei pawh Chawnga vang hian alawm hmeichhe lam reng reng hi ka awn theih tak loh. Țhasangi lah hian nem duai hian 'U Chawng,' hi an ti a, Chawnga lahin lawmah a lo la zel a. Țhasangi sawina lam apiangah a phe vut vut zel tawh anih hi" a tih chuan Chhuahchawnga chuan, "Intih dan mai mai chuh. Hrila, han nei ve chiah la e, i hrethiam mai ang"a rawn tih rual chuan Thangkunga chuan, "Hrila, nuam tak a ni ringawt, nei ve tawh rawh" a rawn ti ve leh bawk a.

Tlangval te chu an nui dar dar a, Chhuanthanga pawh nui ve suk sukin Hrilkunga leh Thangkungate pahnih nen a Darchhep lama an inzui hnak hnak țhin laite a han mitthla a. An naupan laia an insual tlangvalte țhelh ngai hial khawpa an awm hnuah țhian atan a suihzawm laite, tun thlenga inthlah lo va an la inkawp zelte a ngaihtuah a. Sawbual ngaw a nunchan zir tura a hruai te, Thanhranga nen an intawn dante thlengin. Kha mi ni khan Thanhranga kha tawng lo ta se Zehtet leh Bualthleng te nen hian inunauna an nei lo vang tih pawh a hre chiang hle mai. A naute titi pawh zawm ve lovin tun hma chanchin ngaihtuahin a mittui chu a tlak mai hlau tak chungin a khap per sak sak a.

Karah zan ruk zet an riah hnu chuan leng hawn ar khuan rualin khua an thleng ta, rammu mah nise silai leh milu aia remthu an hawn avangin bawhhla pawh chham loin khuaah an lut tlang nghala. Tlangval thita chhungte țap rawih rawih thawm avang chuan ram mu a kal chhuakte chu an ngui hle mai. Mahse, an lalpa chuan țha taka lo lawmin an va chet dante zawtin an titi ham ham a, an Lalpa chuan a tuka khawtlang ruaițheh a rawn rawt takah chuan tlangaupa chu chhuak vatin ruai țheh tur thu chu a au pui ta nghal a. Zehtet mipuite chu lal tualah chuan awm khawmin an ri hum hum a Lalpa Puithanga chuan a han zap dai tete a ti chuan thu a rawn sawi ta a "Kan tlangval ral rama kalte hlawhtlinna rawn hawn lawmna ni pah fawmin kan tlangval kan chan takte sunna pualin he hun hi kan buatsaih a ni, kan tlangval chan tak chhungte kha rawn kal teh u" a han tih chuan lo chhuak sap sapin Lalpa Puithanga chuan tlangaupa chu ko vatin Tlangaupa pawh puana thil tuam rawn keng bawr luah chungin a lo chhuak a. Lalpa chuan thihna kut vawtin a hmeh chhungkua te chu pakhat zel ko chhuakin țhi fang țha mi a pe ta țheuh a, mipuite chuan an Lalpa hmangaihna ngah zia an hmuhin an lawm em em a kut an lo beng ri dur dur bawk a.

Tichuan hlim taka hun hmangin ruai pawh puar el euh va kil lehin, zan lamah chuan Liansanga chuan a u Biakliani hnenah chuan a tuk a haw nghal mai a duh thute a han sawi a, mahse Biakliani chuan a lo phal teuh si lo. Ruma chuan, "Liana, ka cham rei tawk tawh a, in lam te pawh ka ngaihtuah tawh e. Ka lo va haw anga, nang zawng i u hian a ngai em mai che la awm rih la i u phal hunah i rawn haw ve mai ta lawng, hlawhtlinna inva chan chungchangte pawh kan Lal hnenah ka lo va thlen ve ange" a tih takah chuan Liansanga pawh chuan pawm ve leh maiin zawlbuk lam pan a tum ta a.

Lal tual a kal pelh dawn lai tak chuan thlang lama zawngțah kung lian tak ding lurh chu a han en vang vanga a bul ram awl zau țha tak maite chu a han en vang vanga, eng vanga a lunglen riau nge a nih a ngaihtuah vang vang hnu chuan a hre ta, an in awmna țhin ngei a ni tih chu. A naupan lai,a ute zawng zawng nen hlim leh nuam ti taka a nu leh pa hoa an chenna țhin ngei kha. Rei tawk fang thlirin an in awm țhin dante chu a han mitthla zut zuta a lung a leng thar hle. Chhuahchawnga'n a dar a rawn ben thak thak chuan harh zawkin "Liana hriat chhuah i nei a ni tiraw, i pa kha kan naupan lai khan kan ngaisang thei a sin, kan zui dul dul zel a, ka u kha a kai hruai hman nghe nghe" a ti a Liansanga chuan "U Chawng ka naupan lai ngang kha a ni a hriat chhuah ka nei tam lo khawp mai, kan lalpa min hnawh chhuah chhante kha ka la hria a mahse eng vanga khatiang ti duh kha nge anih ka hrethiam thei hauh lo" a han ti ve leh a Chhuahchawnga chuan "Kan lalpa hi lal sual a ni ngai hauh lo a mahse, a duh zawng leh it zawng a hmuh chuan mi duham tak a ni țhin thung a ni. Pasalțha Zangaia kha kan lalpa hian a chhuang thei teh a sin. Mahse kan lalfapa khan i u kha a ngaizawng em em a i u lahin a duh si lo, kan lalfapa khan kan lalpa kha thiam taka hminin i pa kha a hnawhchhuah tir ta anih kha. Mahse a hnua thil thleng rapthlak tak avang khan kan lalpa hi lal țha takah a rawn chhuah phah ta anih hi" a tih charh charh hnu chuan zawlbuk lam panin a kal ta a.

Lalpa Dohranga chuan "Kan Liansanga chu a va han che ropui tak em, Renga in naute hian an khum der tawh che u zuk nia" tih pahin a nui huau huau a Rengliana chuan hriat chian zual chakin "U Rum anih mi lu engzah nge kan naua chuan a khai a?" a han ti a Ruma chuan mi lu leh ro an hawn loh thute leh remna thu an hawn zawk thute a han sawi chuan Rengliana chuan "Kan naua chu aw Lalpa Liansanga pawh hetiang khawpa pasalțha a ni der tawha Thansanga rawn dam se la Dammawia te nen anni țhian thum hian lusei khua an la deng chhuak vek dawn tih hi ka chiang a ni" tih pah chuan a nui zui huau huau a Upa Zangaia chuan "Renga in naute hi in chhuang mah mah țhin a, chapo puina'nte hian in lo hmang reu reu ange a mal sawm hauh lo a nia" a rawn tih takah chuan Rengliana pawh chuan "Ni e kan naute hi ka lo chhuang mah mah țhin a ni. U Hranga la awm se ka ti țhin ngawt mai" a han ti ve charh charh a. Ti chuan Rengliana chu chhuak vatin chanchin hrilh hre turin Runthanga te in a pan ta vat a. Runthanga'n chanchin a hriat chuan "kan naua chu aw, a țhiante tello paw'n innghahna tlak a va ni em, Chawnga te kiangah a awm bawka a ngaihtuah awm hauh lo ang" a lo ti ve bawka. Thansanga pawhin Parmawii ka ațanga Liansanga chanchin a hriat chuan a chhuang ve hle mai, dam țha pangai chu nise an kal ho ngei anga tihte a ngaihtuaha dam vat vat chu a chak tawh hle mai. Mahse tunah erawh amahin bai deuh sulh sulh chungin a kal thei țawk chauh a la ni si a.

Ni enge maw zat a liam hnu chuan Liansanga pawh a lo haw ve ta. Zehtet Lalpa'n lawmman a tana pek a tum thil zawng zawng hnar fithla țhakin a rawn haw a, Lalpa Dohranga te chuan an lo lawm hle mai a chanchin te zawta an titi pui luam hnu chuan an haw tir ta. Liansanga chu insil sawk sawkin Thansanga te inlam a va pan ta nghala. Zan riah ei hun lai te a ni bawk nen rei pawh awm lovin a chhuak leh thuaia zan lama inhmuh intiam chungin zan riah kil turin a haw ve ta thunga. Leng len ar a khuan lai chuan Thansanga te leihkapuiah chuan țhu ho țhapin Ramtei nen an chungchang Liansanga'n a sawi chu an ngaithla țhiap a,Thansanga chuan "Chuti chu favang awllen velah zin khawthawng pahin kan va tlawh dawn em niang?" a han ti a Liansanga leh Dammawia pawh chuan lo pawm sakin favang awllen chu la hla deuh mahse nghah țauh țauh an ngai tlat si a.

Bualthleng mipuite ram bawh a țhain kumin chu khamkhawp aia tam țheuh an thar an inring tlâng hlawm hle mai, fur ruah tui a rawn tlak takah phei chuan an thlai leh buhte chu an ngaihven zualin an thar tlem bîk hlau reng rengin khaw hnawm charh hnuaiah pawh an thawk tlauh tlauh reng a. Zan khat chu Dammawiate țhenawm hmeithai ve tho a fanu nen chauha cheng chu an rawn haw thei tlat ta lo mai. Dammawia nu chuan a ngaihtuah hle maia zawlbuk lam panin a kal ta ringawt a mahse Runthanga leng chhuak turin a rawn biak takah chuan chanchin hrilh vat vatin Runthanga chu Zawlbuk lamah liam nghalin tlangvalte sawm thum vel hruaiin hmeithai lo neihna lamah chuan an kal ta nghal a. Lo an zu thlen chuan hnu hma an han chhui kuala zan thimah a ni a an meichher lah a eng țha duh lo phian si an hnuhma chhui chu a har hle mai. Mahse beidawng loa an chhui țang țang hnu chuan lo mawng lama kalte chuan hnuhma an hmu ta mai renga chhui zui nghal zar zarin tuibur hmuamda vel lek an chhui hman ang tih chuan ruang pakhat an va hmu ta. Nula nge a nu zawk tih pawh hriat hran theih loh khawpin a ruang chu a lo awm a an han bel chianga Sakei kut hnu ngei a ni tih an hriat takah chuan fimkhur taka chhui lehin tlangval pathum ruang lo hlawm turin an dah thunga. Tuibur hmuamda vel chauh an chhui leh hnu chuan țhang pik kara saruh khel ri bawp bawp an hre ta. Fimkhur takin an va pan hnai țham țhama sakei pawh chuan thawm chu a lo hre ve bawka a lo rum khum chher chher maia. Runthanga chuan Chawiliana chu "ka va luh chhuah ange, min lo veng dawn nia" a ti a mahse Dammawia'n rang taka Liansanga silai lak sak pahin "U Run keiman le" tih paha a kal tak siah chuan an lo nghak ta ringawta Dammawia chuan pan hnai zelin țhang pik karah chuan a lut zal zal a. Thui pawh a kal hma chuan a hma hlam thum vel leka hlaa keipui lo meng seng run chu a hmu ta. Pasalțha Thanhranga'n "i hawina lam apiangah i silai kaw hmawr a hawi tur a ni" tia a hrilh țhin chu a taka hmang chhuakin a silai zawk chuan a kap dur maia. Sakei chu huk tuarin a tal ta buan buan maia Dammawia silai a rik takah chuan tlangval dangte chuan rawn hnaih zual deuhin Dammawia chu an lo nghak a. Rei loteah silai rawn puak leh țhuaiin Dammawia chu a rawn chhuak ta a, sakei chu an zawn chhuaka a lian hle maia Sairal em tiat lo mah se a lian ve hle a ni.

Khatia Dammawia'n a kah rual chiah khan țhang pik hmun a ni bawk nen Sakei na tuar tal lai tak chu chuhin Liansanga silai chuan a kap leh kha a ni a, a lua ngen mu thun tling el awl luhna hmun hnih a awm takah chuan dawl zo loin mihringte ti ralți tawh ngai lo turin a fam ta a. Chu ti maia awlsama Sakei an that thei chu nuam an tiin an lawm hle mai. Mahse ruang pakhat zawk erawh hlawm tlak alawi pawh a awm lo thung. Khaw lamah hawin Sakei chu an zawna an ri hulh hulh maia. Leng hawn ar khuan ruala khua lutin lal tualah sakei ruang chu an nghat dup maia Lalpa Dohranga chu lo ding chhuakin Runthanga chu a ko chho vata 'Vawinnia kan unaunu te nufa min thah saktu nunna in la thei hi ka chhuang hle mai che u. In lal nih a nuamin ka hlimin ka lawm em em a ni. Tunge he sapui hi a nunna laksak tu le, chawimawina nopui ka hlan duh e"a han tih chuan Runthanga chuan "Lalpa tudang ni loin nakin lawka kan khaw daingul la ni mai tur kan pasalțha tuai tur Dammawia a ni e" a tih chuan mipuite chu lo au dur durin Thansanga pawh an leihkapuia țang chuan kut a lo beng ve a Dammawia Lalpa Dohranga'n chawimawina nopui a hlan lai te chuan lawm takin a ban a lo vai lauh lauh bawk a.

Fur lai niin lo lam hna an țhulh thei bawk si lo,ti ralți țhin bertu an tukdawl takah chuan Sakei lu pawh ai loin hna lamah an buai leh ngar ngar a. Thansanga pawh a dam țha tawhin khaw dai velah pawh a tei a tei ve peih tawha pasalțha anihna chuan amahah chhelna nasa tak a siama a enkawltu bawlpu meuh pawhin "Kan Thansanga zawng a chhel ema a dam thuai ang kei ni tawrh nise chu tun angah pawh hian khum betin kan la mut pui ngei ang mahse a ni zawng a tei a tei tawh mai anih khu" a ti ve hial a ni. Lo lama a nu leh a u puih chu duh viau mah se Chawiliana berin a phal rih tlat si lohah chuan a nau nen thing phura chhuakin hla pawh kal loin in an nghak chawt maia an in lama awm a nin deuh changin Ruma emaw Runthanga emaw Rengliana te inlamah kalin a va awm chawt mai țhin a, a țhiante ber kawm theiha an awm tak si lohah chuan hrehawm pawh a ti ve hle a, Parmawii rawn kal fo mah se amah a dam țhat tawh bakah mi zawng zawng rinhlelh an kai tawha mi mit ti khama an awm an hlau bawk si a lungleng takin hun a hmang chawt zel mai a. Mahse a nau nen an titi duh zawng a in angin an innel em ema hlim viau chang pawh a nei ve leh țhin.

Ni khat chu a nau Thangliani chuan ral rama a thil tawn hrang hrangte a zawt kuala Thansanga pawhin țha takin a chhang ve zela "anih leh ka u ka pa thattute khua khan an man hman che u khan an sawi si a, eng vanga la thi lo nge in nih?" a han tih chuan Thansanga chu a ngawi vang vanga "Puitu kan nei a lawm" a han ti a Thangliani chuan hriat chian zual chak takin "Tunge?" a lo ti vata Thansanga pawh chuan "An lalfanu mawle" tih chauhin a lo chhanga a mitthlaah erawh Rengbawk lalfanu hmelțha zet Chawngpuii kha a cham veng veng a. Thangliani'n "Eng vanga pui che u nge anih" ahan tih leh chuan "Ka hre bik lo le, rip chhunga min khung lai khan a thing seng tur nen kan inhmu a, min khawngaih deuh anih ka ring" tih ringawtin a chhanga Thangliani'n "A hmelțha viau a mi" a rawn tih takah chuan mak ti taka enin "Ka hmuh tawhah chuan a țha ber pawl. a la ni hial ang, a ni pawh khan min huat loh hmel kher mai. Mahse hmelma kan ni a, min puih vang chauha a nu leh pa pawh kha thah sak lo ka ni. Min pui lo se tlanchhuahna hun kha nei ngat i la chu a nu leh pate ka thah bakah amah kha salah ka man ang" a rawn ti ta daih a. Thangliani chuan "Ka u hmuh leh i chak em?" a rawn tih leh chuan nui vur vurin "Chak țhin khawp mai. Mahse kan hnam a inang lo a, kan țawng a inang hek lo, beisei tur a awm lo a ni kan inkarah hian" a ti charh charh a. Thangliani chuan "Anih U Mawitei ai hian i duh zawk em?" a rawn tih leh chuan Thansanga chuan ning hle tawh mah se a nau chu nulat rawn tem țan tir a ni tih hriain țha takin "Mawitei hi Rengbawk lalfanu aia a țhat lohna ka mitah chuan a awm hauh lo. Kan hnam a inanga kan inpawh em em bawka a țha ka ti zawk mah a ni" a rawn tih takah chuan Thangliani pawh chuan zawt zui zel tawh loin thing ek turin pawn lamah a chhuahsan ta a. Thansanga erawh chuan lalfanu Chawngpuii, lalfanu tih chauha a hriat, a hming pawh a hriat hauh loh hmel mitthla chungin, hmuh leh a chak rualin Parmawii laka a rinawmna thutiam ti bahlah tir tu tur atan erawh a phal hauh lo thung a ni.

Hun a liam ve bek bek a Dammawia khamkhawp thar loh hlauin hun a kal chak a tih em em laiin dam vat vat chak Thansanga leh a khual lung di sakhmel tawn chak Liansangate erawh chuan hun a kal muang an ti dun hle mai a. Mahse hun hian chawlh zai reng a rel ngai si lo an nghah tlauh tlauh favang awllen hun chu a lo thleng ta.

Thansanga chuan tukțhuan an kil lai chuan zin khawthawn mai mai an tum thu chu a sawi ta a, a chhungte chuan an chhang dawn ta lo emaw atih hnu chuan Chawiliana chuan "Ni e i dam țha tawha, awllen laite a ni bawka a pawi tihna ka nei lova, ka nu phalna erawh i lak a ngai thung" a rawn tih chuan a lawm rilru tawh hle a u berin a phal takah chuan a nu lam chu beisei nei tih hriat takin a va hawia a nu pawh chuan "Ni e tlangval inni ve tawha mahnia thutlukna siam rual in ni ve tawh alawm mahse fimkhur ula i țhiante hi i kutah an awm tih hre tlat ang che tin i dam țhatna a la rei loin la indim i ngai hle tih hre tlat ang che" a rawn tih ve takah chuan a lawm ngei mai. Liansanga te inlam a pan vata a nu leh a uten an remtih thu a sawi a Dammawia an han ngaichang leh deuha Dammawia pawh a nu remtihna la chungin a rawn nui lut vur vur bawka ti chuan chumi ni nileng chuan inbuatsaihna'na hmangin a tuka chhuah an tum nghal bawk nen an phur tlang hle mai.

Zanah chuan Thansanga sawi ang ngeiin Lal in lamah chuan an kal ta a, Lalpa Dohranga'n a lo hmuh chuan lo chiau au thuaiin "E khai kan pasalțhate lah ni rengin lo țhu rawh u eng thu nge inrawn ken a?" a han ti a Tlangaupa chu a thla thum zu chawithlak turin Thansangate chu a han leh tete bawka Thansanga chuan "Lalpa hei awllen laite anih angin zin vei vah kan tuma kan rawn hrilh hre ve che a ni e" a han ti tete a, an zin tumna te sawiin hmar lam lusei khuate tlawh kual an tum thute an sawi hnu chuan leihkapui lama lalfanu te kiangah chuan an va țhu phei ve ta a. Thansanga chuan an chungchang an hriat vek tawh avangin zak țitțet tawh loin "Mawite hei zin khawthawn mai mai kan tum deuha i pa kan lo hriat tir a ni" tih pah chuan Parmawii kut chu a vawn sak vawng vawng a Parmawii erawh chuan "Tluang takin in kal dawn nia" tih chauha chhangin a hmelah chuan a huphurh tih a lang chiang hle mai. Thansanga pawhin awm a tih pui hle maia ti chuan pehhel kual tawh loin an zin tum chhan dik tak chu a sawi ta phawng maia. Chu veleh Biakmawii leh Herliani chuan Liansanga chu chhaih zui nghal awr awrin Liansanga lahin thawm dim turin a lo hrilh ve bawka an hlim dar dar hle mai. Parmawii pawh a ngaih a ngam ta deuh nge ni " A rei lo thei ang ber va thang tum u la, ka lo nghak reng che tih hre reng la, nung damin i lo let leh ngei tur a ni" tiin Thansanga beng bulah chuan a sawi sep sep a Thansanga paw'n "I duh ang ngei chuan ka lo let mawlh ang Mawite" tih pahin a kuah vawng vawnga leng hawn ar a khuan takah chuan Zawlbuk lam panin Parmawii chu laltual thleng rawn chhuk vein Liansanga leh Dammawia pawhin Thansanga chu an kal san nghal bawka Thansanga chuan Parmawii mitah tak en chungin "Mawite ral rama kal tur ka ni hleinem țhianpa Liana tana kal tur ka ni alawm hlauthawng suh" a han ti a Parmawii chuan țah aw țuau chungin "Ka sawi ang ngei kha a thleng dik anih hi i dam tawha kei min ngaihsak lo lekin zinkhawthawn i tum tak hi" a han ti a Thansanga chuan țhulh leh rum rumte pawh a duh hial mai mahse mipa thil tum tawh hmeichhia vanga țhulh chu tlawm thlak a tih em avangin "rinawm takin ka awm reng dawn tih hria la, ka lo haw leh hun chuan țul loah ka chhuak mai mai tawh dawn hleinem in inlam pawh ka lo chuang kai fo tawh ngei ang. Chho tawh rawh a tlai tawh hi" a ti a Parmawii chuan rawn kuah thlawpin "Ka ngai ngawt ang che rawn haw thuai la kei pawh i tan chauh ka lo rinawm reng ang" tiin a thlah ve ta a.

Zing khawvar rual chuan an inlam țheuh pana hawin an insiam sawk sawka Thansanga insiam sawk sawk lai chu Chawiliana chuan khual khuaa awm dan mawite hrilhin a zilh malh malh renga a inpeih fel hnu chuan Liansanga te inlamah pheiin Dammawia sawm turin an chhuak leh ta a. Chu mi ni nileng chuan tluang taka kalin an kal chak tlang bawka behliang mun hun anih meuh chuan Zehtet kawt chhuah lamah an țhu far tawh hlawma, khua an va luh chuan lal in lam pan nghalin Lalpa Puithanga chuan lo chiau au thuaiin eng ti tura kal nge annih te a zawta an ni pawhin țha taka chhangin Lalpa chuan in duhna hmun hmunah in thleng thei e a tih takah chuan Liansanga u te inlam an pan ta diak a. Thangkunga te chhungkuaiin chu tia Liansanga te țhian thum an hmuh chuan mak ti takin an kal chhante an lo zawt sawk sawk a Thangkunga'n an zin chhan a hriat meuh chuan Liansanga chu en vung vungin "Biaki i nau pawt tu hi hmu ve la zawng mo atan i it khawp ang" a han tih chuan Biakliani chuan "E khai aw Taite tunge mi han hrilh teh" a tih chuan Thangkunga bawk chuan "Kawnzau lalfanu Ramtei mawle, a țha tak em a ni tlangval țhat leha han chhai ve te hi ka chak fo zu nia" a tih chuan Biakliani chuan "I chhe zet zut biak pawh ka be lo che" tih pahin a kal tau sawk sawk a. Midangte chuan lo nuih dar darin zan riah an kil zawh hnu chuan tei chhuakin Chhuahchawnga te inlam an va pan a, Chhuahchawnga fapa Lianmawia pawntoin Thansanga te a hmuh rual chuan an lam pana tlan nghalin "U Thansangate an lo zin" tiin a au zui nghal tuar tuar bawka Liansanga chuan Lianmawia chu koki chhuanin an inlam a pan puia inchhung an va luh chuan Chhuahchawnga leh Hrilkunga chu lo titi mekin Thansangate rawn inzui lut an hmuh chuan lo be nghal thuai thuaiin an kal chhan te an han hriat hnu chuan Chhuahchawnga chuan khual khuaa awm dan mawi zawng zawng chu a hrilh ve leh bawka leng hawn ar a khuan takah chuan inzui chhuakin Zawlbuka riah loh mai țha an ti tlang bawka Biakliani te inlam chu an pan leh ta a.

Zingah chhuakin an kal leh vang vanga Kawnzau khua an run țuma an hel tak, Kawnzau leh Zehtet inkara khaw awm, Bungtlang khaw ram chin chu zan li an riah hnuah thlengin kal kawnga Thansanga sakhi tuai kah chu an ak bawka khuaa zan khat riah tuma kal an ni bawka chawhnu her anih meuh chuan khua chu an hnaih tawh hle mai. Ral khat ațangin an han thlir vang vang a khaw chhunga mipuite lal tuala tlim hmur an hmuh meuh chuan buaina an tawk emaw ni le tiin ngaihțha lo tak chungin an pan ta hlawk hlawka khaw daiah an sakhi kah chu dah thukruin inring takin khaw chhung chu an lut ta a. Inzahnih nufa vel an ni ve a khua pawh a te chhe bîk lo hle mai. Lal tual lam pana an kal mek lai chuan nutling țap ri an hre ta mai. Hmanhmawh taka kal chhoin mi karah chuan an inzep chho ve naw naw a an thil va hmuh chu mak an ti tlâng hle mai. Pawih pasalțha tih hriat zetin lusei pa lu a lo khai far zawih zawih chu an va hmu a chu pawih pasalțha chuan "Lalpa i darbu i dah țhatna chu min hrilh mai rawh anih loh chuan i tlangval te hian an nunna an chan zel dawn a nia" a han ti a lal in leihkapuia pawih tlangval parukin an hual beh Bungtlang Lalpa erawh lungtum biak ang hlauh a la ni tlat mai. Chu pawih pasalțha thinrim chuan "Lalnu kha rawn hruai chhuak rawh u" a han ti tuara pawih tlangval pakhat chu lut nghal vatin Bungtlang Lalnu chu a rawn kek chhuak nghal bawka lal tualah chuan theh thla lawpin chu pawih pasalțha chuan dim lek loin an phih tho lawp a "Lalnu duh tak i lu zawng i chan em lovang mahse i pasal luhlul man chu i tel khawp ang" tih pahin a chem chu vai tumin a han lek kang a mahse silai lo puak țhuai chuan a chem chu hnawl leng lawpin chu pasalțha chuan a kut chu a hup nghal vawng vawng a, a kut pawrh tuam ațang chuan thisen a chhuak nasa hle mai. Silai vawi hnih lo puak leh țhuaiin Bungtlang lalpa bula pawih tlangval dingte zinga pahnih chu an thal leh nghal tawp bawka. Thansanga chu lo chhuakin "Hmeichhe chunga hriam lek hi Pasalțha tih atan a mawi hauh lo a sin, ka lek ve tawha lek nawn hi ka duh loh mai bakah ka inchhirna ber a ni a sin" tih pahin pawih pasalțha na tuar mêk chu a han kek tho lawpa "i naute khian Lalpa khi inthiarfihlim san rawh se, anih loh chuan i thi ang" a han ti a chu pawih pasalțha pawh chuan a naute chu kal sawn turin a ti nghal bawka chu veleh mipuite chu rawn tlan khawm thutin pawih tlangvalte lam chu an rawn pan ta Lal tual chu a khukin a khu luih luih a an han ințhelh fel meuh chuan pawih tlangval ho hmel chu hmuh tlak a lawi pawh a awm tawh lo a ni.

Bungtlang lalpa chuan Thansanga te chu en vang vangin "Ka khua leh tui min chhanhim sak a ni, in duh duh min dil rawh u" a han ti a Dammawia chuan "Lalpa Bualthleng tlangvalte hian phut neiin mi kan țan pui ngai lo e, zaninah i khuaa riah ve min phal sak turin ka ngen duh che a chu chu i hnena kan dil theih awm chhun a ni e" a han ti a chu veleh Bungtlang Lalpa chuan "Bualthleng pasalțha Thansanga te țhian thum in ni hial lo maw?" a han ti a Liansanga chuan "Lalpa i sawi chu a dik ngei e, mahse pasalțha tia han chhiar tlak em zawng kan ni bik lo e, Kei hi Liansanga ka ni a a ni hi Dammawia a ni a tin a ni hi Thansanga a ni e" a rawn tih takah chuan mipuite chuan an ngaisang hle maia an rawn chibai sap sap a Lalpa meuh pawhin biakna hun a chang lo a ni ber e.

Nula ho lahin an melh no nasa mai si Dammawia chu a khi vur vur reng maia Thansanga chuan a naknema piai hlawk pahin "A kakpui te kha i lo lawn reu reu ange " a han ti a Dammawia lah chuan "Sual luih ngai tumah an awm ka ring hauh lo ka tan chuan, nula lamah hi chuan min tluk ngai dawn lo anih hi nangni pahnih hian" a han ti let ve zat bawk a. Lalpa berin a in lama thleng tura a tih tlat takah chuan an sakhi kahte chu va la lehin Lal inah chuan an thleng khawm ta a.

Bungtlang Lalpa leh Lalnu te chuan lawmthu an hrilh mawlh mawlh renga Lal fapa an ni aia u hret tur pawh chuan kawmin a titi pui bawrh bawrh renga Bungtlang Lalfapa țawngkam fel fai tak, a țawng dan phung puitling em em bawk si chu an ngaisangin zahawm an ti hle maia lal țha tak a la nih ngei pawh an ring tlang hle mai. Zan riah eikhamah chuan zawlbuk lamah lalfapa ho chuan kal thlain Zawlbuk an zu thlen chuan tlangvalte chuan an lo ngaisang hle maia Thansangate chuan nuam lo an ti hle mai mahse Dammawia chuan titi khawchang vawrhin an zingah chuan a han tal ve ta a rei loteah Bungtlang tlangvalte paw'n Thansanga te chu an rin ang ngawt an nih loh zia hre tharin hlim takin an ti ti ho ta a leng len ar a khuan takah chuan tlangvalte chu nula rim tura chhuak sap sapin chutia an kal mek lai chuan Thansanga chuan "Khawnge kan Dameka pawh chu a awm leh tawh le a lo chhuak hman te hi a ni lo maw?" a han ti a Liansanga pawh chuan "A ni pek ang a ni hi zawng a buaithlak anih hi, kan chhuak ve dawn nge helamah kan awm dawn?" a tih lai tak chuan lal fapa chuan "Hawh teh u kan khaw nula hmelṭha ka rim pui ang che u" tiin a hruai chhuak ve ta zawk a.

Dammawia chhuak ta chuan khaw mawng lam pan thla vatin chhun lama chibai a dawn laia a hming a lo zawh hram hman nuthlawi Kapkungi te runah chuan tifuh inti zetin a kai ta a. Kapkungi pawh a fapa naupang pawnto a chhuah avangin a nu leh pate nen chauh an lo awm a, rei tawk fang an titi ho hnu chuan Dammawia chuan Kapkungi chu mit mei zauh zauhvin haw turin a chhuak leh ta daiha. Tuibur hmuamda vel hnuah Kapkungi pawh kawtchhuah lam pan chuan daikal chhuanlamin a kal ve bawk a. Kawtchhuah an thlen dun hnu chuan kal fal leh hlekin mi hmuh mai mai lohna tura hmun biru deuh lai an zawn hmuh takah chuan Dammawia chuan rei tak ruah tui a lo khawl khawm tawh chu sur chhuah tir tumin a su ta tlauh tlauh maia hnuai lamah Kapkungi pawh rei tak ruah tui dawng tawh lo a lo ni bawk nen a ruah tui dawng chak chu a lo țang ve hle bawk a an tum bawka ruah tui chu a far ta ngei mai nuthlawi Kapkungi pawh a hnawm chap bawk a. Khaw lama let leh vatin Dammawia'n zawlbuk a han luh chuan leng hawn ar khuang chiahin a țhiante rawn thlen hma chuan a mu ta vat a. Thansanga bawhbel bawh liamin Dammawia lo mu a hmu chu ngei takin a ngal hmul chu an pawh țil sak țhawta "tenawm lutuk" a ti sapa Dammawia muhil der na ti ner deuh sak hmel kha a hmu chiang em a ni. Liansanga pawh chuan Dammawia hnar chu pen sak lawlhin "Kakpui lawnpa" a han ti ru sapa Dammawia pawh insum zo tawh bik loin a lo nui chhuak vur vur a Thansanga leh Liansanga ngei lutuk chuan han buan hrep an chak hial ta ve ang. Mahse khual khuaa awm an ni miaua an insum hram hram a.

Bungtlang tlangvalte chuan an mikhualte chu an ni ang mai mai buan chi an ni lo tih hriain khual buan pawh neih pui loin an mu ta diak a. Zingah hma takah thoin Lal in lam an pan vata Lal inah chhuah leh nghal mai an tum thute an hriat tir hnu chuan Kawnzau khaw lam panin an kal leh ta a. Kawng laka zan hnih an riah hnu chuan Kawnzau khaw kawt chhuah chu behliang mun hunah an thleng ta. Khuaa an va luh chuan Liansanga chu an lo hriat tawh avangin a țhen chuan an lo hlau ru nghal hle maia. Pa ho chuan Liansanga te țhian thum chanchin an hriat tawh avang leh Dammawia nui vur vur reng an hmuh chuan pakhat leh chu Thansanga a ni tih an chiang tlang nghal hle maia. Eng ti tura kal nge an nih ang tih chu an inzawt sap sap hlawma mahse a chhanna erawh an inzawt chhuak hauh si lo.

Lal in an va luh chuan Kawnzau lalpa chuan Liansanga chu lo be lumlam vatin Thansanga te pawh chu a lo chibai ve bawka. Liansanga'n an khuaa rei lo te chhung cham ve a dil takah chuan an Lalpa pawh chuan phal sakin a hlim hmel surh surh hle mai. Mahse lo chik reng tu Thansanga chuan Dammawia chu hrilh ru sapin "Lalpa hmel hi a dik tlat lo, kan tana pawi thei anih loh vek paw'n thil țha lo tak an chungah a thleng a ni ngat mai" a han ti sap sap a Dammawia pawh chu lo bu nghat nghatin Lalpa chu chik takin an en dun ta renga.

Tap lama lalfanu eirel mek chuan a hmangaih Liansanga chu a rawn nuih leh vur vur țhin Liansanga tan lah han nuih letna chi a ni bawk si lo. Lalpa chu titi zelin a tawpah chuan Thansanga te beng verh zawng tak a rawn sawi ta. "Hei kan țhenawm khua Chhumring lal fapa sawn ka khawnbawl upa fanu hi a rawn hel a, a ni lahin a lo duh si lo chu tunah hian an Lalpa hoin rawn hruai luih an tum mek a ni naktuk lamah chuan an lo thleng tawh ngei ang. Han beilet ve dawn i la ka fanu lawina khua ngei a ni si a. Lehlamah ka khawnbawl upa fanu a duhlohna a khiang awi tura han tirh liam mai chu țhain ka hre si lo a rilru a hah khawp mai"a han ti charh charh a Thansanga chu lo țawng chhuakin "Lalpa i khawnbawl inah chuan ka thleng ang e, mahni lusei puite rikrap hi a țul tawpkhawkah lo chuan tih mai mai loh tur a ni a sin" a han ti a Lalpa chuan "Eng ruahmanna nge i neih? a han ti a Thansanga chuan "Lemchan a ngaih changte hi a awm ve alawm Lalpa i fanu lawiluhna khua mah ni se hetianga chet an rawn thawh hian an zahloh zia che an ti lang a ni. I khua leh tuite hi an him ang tih ka tiam a che, i duh anih phawt chuan i fanu te chhungkua pawh i khuaah hian ka hruai sak ang che. Farnu ka nei a ka farnu hi ka dam chhung chu a duhlohnaah ka tir lui dawn lo a a duhloh mipa in an nei ngai dawn hek lo. Chutiang chiahin ka lusei pui nula laka chutiang thil thleng chu ka hmu thei lo a ni"a han ti a Lalpa pawh chuan Thansanga chu tlangaupa nena inzui chhuah tirin Dammawia pawhin ka thleng ve zawk ange Liana hi he lamah awm se la a tih tlat avang chuan a zui chhuak ve bawka. Kawnzau khawnbawl upa in an thlen chuan tlangaupa chuan chanchin han hrilh sawk sawkin, chu mite chhungkua chuan an lo lawm hle mai a. Thansanga chuan khawnbawl upa fanu chu enin "Nula i hming min hrilh thei em? Ka hming chu Thansanga a ni a ka țhiana hi Dammawia a ni e" a han ti a Chu nula pawh chuan "Dengliani ka ni e" tiin a chhang ve bawka. Dengliani chu hmelṭha lua tia sawi tur ni lo mahse a hmel leh che zia chu ngaihzawn ve fe tham khawp a ni ve tlat. A vun ngo lam aia hang lam mah,mahse hang lutuk ni hran lo ngaihnobei tawk lek ang chi a ni a, a nu lian fu reuh bawk. Lal fapa nupui atan pawh a iaiawm em em bik hran hauh lo a ni. Inchhungkhura a che velte chu a zei thlarh maia, zanriah an han eikhama tlangval lo chuangkai sap sapte kawm pahin la a han deh a, a ngaizawng tu tan chuan a la deh thiamna ringawt pawh chu tuiralna tham a ni ngei ang. Tlangvalte chuan Dengliani chunga thil thleng chu an hre ve vek a mahse tuman sawi chhuak hauh loin an be bawrh bawrh zawka.

Liansanga pawh lo leng lut vein vawkchaw bel bula țhuin a ti ti char char a Dammawia nen an titi chu tlangvalte chuan an ngaichang țhap a ni ber e. Lêng hawn ar a khuan takah chuan tlangvalte chu tho sap sapin an chhuak fai ta diaka Thansanga chuan Dengliani chhungte chu ko khawmin thu a sawi ta a "Hei kan farnu chunga thil thleng hi nang ni a nu leh pate remtihna ngei chu nise infanu hian duh lo eng ang mahse inrawlh hauh loin kan lo thlir liam ngei ang. Mahse chutiang anih si loh avangin hetiang hian rem ka lo ruata inpawm tlan chuan a lawmawm hle ang. Naktukah hian Chhumring khaw lam panna kawngah infanu nen hian thing phur tur angin Chhumring mi leh sate tawk zawngin kan kal anga ka țhiante pahnih hian biru chungin silai nen min lo veng ang. Chhumring mikhualte'n min hmuh hunah an thinrim ngei anga inmalbeihah ka lo cho anga ka chak zawk hlauh anih chuan kan him tlan theih ka beisei"a han ti charh charh a Dengliani pa chuan "Chu zawng a hlauhawm em mai. Khuaah hian a sawi fel theih ngei ka ring a ni" a rawn ti ve a Dammawia chuan "Ka pu min hrethiam la ka țhiana hian Lalpa hnenah a khua leh tuite inhim tur thu a lo tiam tawh tlat maia khawchhunga chet lak chu a him lohna chen a awm a ni" a han ti charh charh a Dengliani pa chuan "Ka fanu vangin in nunna a derthawng hle dawn mai ka ti" a han ti leh tak naa thil dang sawi kai puiin chu zan chu an hmang tlang ta zawka.

Zawlbuk lamah riak loin Dengliani chu kawm tlangnelin Dammawia'n a biak tak char charah chuan a nui ve har har thei tawha an men rei phah phian leh nghal. A tuk tukțhuan eikhamah chuan Thansanga leh Dengliani chu an inzui ta hnak hnak a. Liansanga leh Dammawia pawhin silai nen zui ve nghalin kawtchhuah ațanga tuibur hmuamda vel an kal hnu chuan Liansanga leh Dammawia chu kal zelin Thansanga leh Dengliani erawh an lo awm hnu fual thunga. Thansanga chuan thingte fawm sawk sawkin Dengliani phurh tur chu a siam sak bawka. Rei tawk fang an nghah hnu chuan Dammawia rawn lang hlawlin inring turin a rawn hrilh ta. Thansanga leh Dengliani pawh țhu dunin an lam pana lo kal mekte chu an lo nghak a. Tuibur hmuamda vel an nghah leh hnu chuan thawm a rawn awm ta a lo hnai zela an han inhmuh meuh chuan Chhumring lalfapa chuan Thansanga chu kawk sawk sawkin "Ka nupui hual kha hlat nghal rawh" a han ti tuarh a. Thansanga lah chuan hreawm pawha awm loin Dengliani chu a kuah nghet sauh sauh thung a.

Chhumring lalfapa thinrim lutuk chuan an pasalțha hruai ve pakhat zawk silai chu laksakin Thansanga chu a tin ta mai. Mahse "Silai kha dahthla rawh hual beh vek inni tawh' tih thawm a awm takah chuan a silai chu a dah thla leh riai riai a Chhumring lalpa chuan thinrim tih hriat takin" In lalpa kha lo hrilh rawh u, a fanu saw ka sal a ni tawh e, a fanu tlan chhuahna'n ka fapa nupui tur hi min rawn pek a ngai ang"a han ti a Thansanga chu lo ding chhuakin "Kawnzau ramah in duh danin in rawn luta in duh dan bawka inchhuah leh ka remti hleinem, Kawnzau lalfanu chu i salah i siam ang maw? Kawnzau hmelma chu ka hmelma inni tih hria ang che u. Kawnzau lalfanu kha a chhungte nen ka rawn hruai dawn a, a ngam chuan Bualthleng pasalțha Thanhranga fapa Thansanga hi min lo dang thei ang"a ti ta siah siah mai. Chhumring lamte pawh chuan Thansanga chu an hlau hle maia. Mahse an lalpa chu inti paukhauh luiin "He buainaah hian tel ve nachhan tur in nei lo e" a han ti hrawk a Thansanga chuan Dengliani chu kuah bet thlawp in "Ka tel ve ngei a ngai zawk a ni" tih pahin Dengliani sam chu Chhumring Lalfapa en pah chuan a han chul sak a. Chhumring Lalpa thinrim lutuk chuan a pasalțha chhuanvawrte hruai loa a pasalțha tuaitirte a hruai chu a inchhir hle mai."He kan buaina hi kan chin fel vat a ngai a ni" tiin Thansanga chu a han melh kawk a Thansanga chuan " i duh ang ngei chuan le, Kawnzau lalfanu te chhungkuain i kut an tuar anih chuan Hmar hnam ho laka ka chet dan aia nasa zawk kha ka rawn che ang i lu kha ka la hmasa ber bawk ang. I lu ka lak hmain i tuar hle bawk ang" tiin a han sawi țhaih a. Chhumring Lalpa chuan "Ka pasalțha chhuanvawr i hneh leh hneh loh a zir a ni ang chu" tiin a inher hmaka a kal ta a. Chhumring lalfapa a hnung bera kal zawi hnek hnek chu Thansanga chuan lungin a han vawm zui țawka Chhumring lalpa thinrim lutuk chuan a fapa kaihthawh pahin "kan vangkhua chu i lo lawi lut vat dawn nia" a han ti hrawk bawka. An kal liam fel hnu chuan Dammawia leh Liansanga chu rawn chhuakin Thansanga chuan "Dama khaw lamah let phawt teh ang u, buhfai tlem a zawng tal kan lak a ngai a ni, kan zui vat anga khua an thlen hnu lawkah kan lut ve anga ti chuan he buaina hi a reh hma zawk ngei bawk ang" a tih chuan pawm tlang takin khaw lamah an let ve ta a. Dengliani te in an luh hnu chuan an chet dan chu Liansanga chuan a han sawi chhawng zung zung a Thansanga erawh Dengliani mitmei a hmu țha ta lutuk chu nuam lo a ti rilru hle mai. Dengliani tan lah Thansanga tluka hlu awm hek suh. An inpeih fel hnu chuan rang taka chhuak leh nghakin Chhumring ho chu an zui leh ta ngat ngat a. Chutia an kal mawp mawp lai chuan Dammawia chuan "Sanga a awmbawr in i taksa a han deh vang vang kha chuan nuam i tih hmel teh e" a han ti a Liansanga pawh chuan "I kuah dan kha Parmawii ka va hrilh chak em" a lo ti ve bawka. Thui pawh kal loin Chhumring ho chu an va hmu ta maia. An hnungah anmahni hmu phak lo tawk velin an zui renga a tuk tlailam zanriah kil hun lai chuan Chhumring Lalpa te chuan khua an lut ta a. A pasalțha te ko khawm nghal vatib Thansanga te lo kal tur thu chu a hrilh ta a. A pasalțha te zinga a chhuanvawr ber Aikhamliana chuan "Lalpa anni mi pathum lek kan khuaa lo lawiluh an tum chu an â a ni em lo maw le, Bualthleng pasalțha huaisen anih chu tun kan hai lo mah se min zah pah lo hle a ni an chet tum dan hi lo kal teh se lo kap thlu phiar i la a ni mai alawm" a han tih chuan Lalpa pawh chuan inmalbeihah chuan Thansangate chu a pasalțhate'n an khin phak a beisei loh avangin a lo pawm pui ta hmaka. An lo kap thlu thei ngut ange maw chu