BUALTHLENG MAWITU BUNG - 8, 9

Chungkeuva lu bung tenawm tawh tak an han hmu chu an Lalpa Siangthanga leh a upate chu a meng kawk kawk a, tap lama lo thu lalnu leh lalfanu chuan rap tih hriat takin inkuah chungin an lo en ve hrek hrek bawk a. Hmuh nuam an ti lovin an hlau hle tih a hriat a ni. Siangthanga rilru chu a na hle mai. Chhuahchawnga en pah chuan aw khur dar darin, "Ka pasaltha min thah sak man hi in va han seng dawn chiang em!! Nung damin ka khua hi in chhuahsan lo tawp ang" a han ti a. Chu veleh Hrilkunga chuan tap lama lalfanu, a nu kuah mektu chu a samah pawt tho nghalin a chempui chuan a nghawng a chuktuah nghal a,lalnu chu khawngaih dilin a lo tap nghal zawih zawih bawk a. Siangthanga chuan, "Ka fanu kha thlah nghal rawh" tih tuar pahin a bang laia a silai chu ban a han tum rawk a, Chhuahchawnga chuan a banah man sakin chhuatah chuan a phih thal nghal thuai a, "A lal meuh pawh bum duhtu pasaltha thlavang hi tunge la hauh ngam awm che u" tihpahin khawnbawl upate chu a en kual hrek hrek a, tumah tawng ngam an awmloh bakah chet pawh an che sawn ngam eih lo a ni.

Siangthanga mangang chuan, "Ka unaupain a hriat ve meuh hunah chuan in va han nuamsa dawn lo tak em" a han ti ve rawk a. Chhuahchawnga pawh chuan, "I unaupa chuan Lianuka lubung bula ka thiante a biak dan a zirin tuna i awm dan ang chiah hian a awm ve mek mahna. Buaina siam tuma rawn kal kan ni lo, i pasaltha in a bumna che hi i hriat ve ngei kan duh vang leh nangni unau khuaah hian tlangval tihtham a lawi an awm tawh loh thu kan rawn hriattir duh mai che u a ni" tih pahin an zinga tlangval kal ve te chu a han kawk a. "Anni hian silai vawi khat an hmeh puah vaih chuan i khua hi meivapah a chang nghal bawk ang. I unaupa khuaah pawh kan thiante silai a puak anih chuan i unaupa khua chu a ding chhuak leh tawh ngai lo bawk ang. Kan la hmeh puah loh chhan chu thihna a thleng nasa mah mah tawh a ni. Thlen belh tir lo va awm theih dan kawng kan rawn dap mai a ni e" a han ti a.

Siangthanga chuan, "Ka tlangvalte an thih vek chuan tunge ka khua hi venghim ta ang" a rawn ti a, Chhuahchawnga bawk chuan, "Lalpa, mi huaisen tak Hungliana i nei alawm, Chungkeuva leh Lianuka te khan an lalte chauh hi an bum hleinem che u, an ruala kal ve zawng zawng kha an bum bawk a sin. Mahse hlawhtlinna rei lo te an chan chhung khan i pasaltha bumna kha i tlangvalte khan malsawmnaah ngai nghet hmiahin kan nula tam tak zingah khuan pawih fa pai tur an awm nuk a sin. Chung naupangte chu fahrah ni tura piang an ni asin. An hringtunu te tak ngial pawn an fa neihna pa hming pawh an hre lo dawnlo asin" a han ti ve a.

Siangthanga chu a inngaihtuah fim tulh tulh a, a chek tlak tlak bawk a. "Hungliana chu khawnge indah?" a rawn ti ve leh ta a. Chhuahchawnga pawh chuan Hungliana chanchin chu a sawi ta vek a. Rei fe a inngaihtuah hnu chuan Siangthanga chu pawnah va chhuakin khaw mipui lo pungkhawmte hmaah chuan thudik a va sawi ta. A sawi zawh meuh chuan Chungkeuva leh Lianuka haw tu an tam hle mai. Nutling thenkhat an lo tap rawih rawih bawk nen, an Lalpa chuan duh a thlan tir ta a, tlangval nei tawh mang lo khuaa awm reng duhlote chu khua chhuahsan a phal thu te sawiin lalinah chuan a lo lut leh ta a. Chhuahchawnga pawh chuan chutia Lalpa thusawite a hriat hnu chuan Hrilkunga chu lalfanu chhuah turin a ti ve ta a. Hrilkunga chuan thlah nghalin a kalsan ve mai bawk a. Chhuahchawnga chuan lalfanu chu va panin lalfanu chuan a hlau hle tih a hmelah a hriat theih a, hawi pawh a hawi chhuak ngam hek lo. Chhuahchawnga chuan "Nula, kan tihpalh a ni e, khatiang tih tuma rawn kal kan ni lo ve, min ngaidam hram rawh" a ti a. Chu veleh lalfanu chu a nu lam pana kalin a nu awmah chuan a hmai phumin a tap ta hawm hawm a.

Tichuan lal leh upate nen tha taka an inbiak hnu chuan khua chhuahsan tur chuan an han intintuah ve ta a. Lalnu chuan buhfai leh sarep te a lo pai ve bawk a. An chhuah dawnah chuan Hrilkunga chuan en kual dan danin, "Lalpa, hnung lam atanga min hup barh intum anih vaih chuan intisual chhiava ang tih ka tiam a che. Fin kherek i chhuah vaih zawngin i lu ka rawn la ngei ang" a ti a. Chhuahchawnga pawh chuan, "Ni e, Lalpa. Ka thiana hian a thusawi kha a hlen ngei ka ring" tihpahin a chhuak ta nghal a. Siangthanga chuan Hrilkunga bulah chuan, "Chungkeuva hneh loh chu kan tan beih mi in ni lo ve. Ka tlangvalte zinga pakhat pawhin nunna an chan leh hi ka phal tawh lo a ni," a rawn ti a.

Tichuan khua chhuahsanin Rengliana te chu an va fin a, chutah chuan tuibur hmuamda vel chhung zet anmahni umzuitu an awm leh awm loh an han ngaichang a, an awm tak si lohah chuan an kal chhuak ta thuai a. An thiante bul an va thlen chuan zanlai a ni der tawh mai. Hrilkunga chuan mut hahdam phawt a, a tuka Runthangate kalna lama kal an tum a ni.

Tichuan lungmuang takin chu ramngaw dur khup hnuaiah chuan an mu ta bawrh bawrh hlawm a, zingah hma takah thovin ei an rel sap sap a. Tukthuan eikham hnuah chuan Runthanga te kalna lam chu an pan ta a, an va thlen chuan Runthanga te pawh an lo thleng ve mek bawk a. An kalna chanchinte an han sawi zung zung a, Runthanga hmai duk cher chur chu an thlek leh vung vung thin bawk a.

Khatia Runthanga te kal ta khan Hrianghmun an va luh chuan leng hawn har khuan a hun lek lek tawh a ni. Lal in an han thlen hnua an thukente an sawi zawh hnu chuan Lalpa chuan mipuite hnenah chanchin a han puang a, na an ti kher mai. Mahse bumin an awm miau si a, Lianuka leh Chungkeuva thla chu an tawng mawlh mawlh mai a ni.

Tichuan tha taka kir leh mai an tum a, mahse khaw nghaka Lianuka ten an dah pasaltha vantlang ve pangngai Mungliana chuan Inmalbeih ah a rawn cho lui ta tlat a, Runthanga pawh chuan a lo pawm ve mai bawk a. Mahse fin kherek chhuah an awm anih vaih chuan a naute chuan silai hmet puakin Lianmawia te puihna hmangin rei loteah Hrianghmun khua chu meivapah a chang mai dawn a ni.

An han inbei a, Runthanga chuan a chhaih hneh kher mai. Mahse a zuankualna lamah lung rap palhin a tlu thal ta thuai mai a, chu veleh Mungliana chuan rawn bawh zuiin a chem chu a rawn vai thla nghal puat a, Runthanga chuan a lo dang hman tawk tawk a ni ber e. Mungliana chem kenna lam chu a chelh sak tlat bawk a. Mungliana chuan a kut vei lamin Runthanga hmai chu a hnek siah siah bawk a. Runthanga chuan a chanchhiat zia hriain a kut veilam chuan Mungliana hmai chu han hupin a mit chu a theihpatawpa nain a kawm sak ta a, Mungliana na ti lutuk chu a te thawt nghe nghe.

Chu lai, Mungliana tha thlah lai tak chuan Runthanga chuan lehthal ve leh nghalin Mungliana hmai chu a han hnek ve siah siah a, Mungliana chu rei loteah nikhaw hre lovin a awm ta a, nunna em chu lak duh tawh lovin tha takin an rawn kalsan a lo ni.

Chanchin an han hriat chuan an nuih tlawrh tlawrh a, Lianmawia nui nasa fal lutuk chu Runthanga chuan a hnungzangah a kut thla lang chiang kelh kawlh khawpa na in a ben rik sak ta. Lianmawia na ti lah chuan a bul hnaia awm, amah nuihtu apiang hnungzangah a beng ve ta, hnungzanga ben hlauh vang ringawtin ko pangah an bet tai hlawm a.

Chutia hlim taka an rik bawrh bawrh lai chuan Runthanga chu rawn tawng chhuakin an tihtur an zo fel ta bawk nen, khaw lam panin an let leh ta a. Kawng laka zanhnih an riah hnuah chuan tiau lui pawh an hnaih tawh hle. Zingah chhuakin, muangchanga kalin an chawl deuh reng bawk a, tiau lui an kan rualin zanriahna tur an zawn a ngaih mai an ring a ni. Runthanga chuan tiau lui chhak lawka pawih khaw lian tak, an kal lama an hmuh chu tlawh a chak kher mai. Kawng tum pangngaia kal ngam anih loh avangin ramhnuaiah zel an kal avangin chu khua an luh meuh chuan chawhnu her a nih der tawh a ring a, an kal lamah khan tiau lui an kan hnu lawkah tlang thengthaw nuam tak pakhata an chawlh laiin he khua hi an hmu a, Chhuahchawnga pawh chuan tlawh a chak thu a sawi ve bawk a.

Muangchanga kal zelin chawhnu herah chuan chu khaw ram chin perh tarna hmun chu an thleng ta. An kal mek lai chuan Runthanga chuan ral hla taka silai puak ri thuai thuai ang chu a hria a, a bengchhe ri emaw tiin, a aia uluk in a han ngaithla a, a ri hriat a ngai reng si. A ngaihtha lo chuan a han sawi chhuak a, midang zingah pawh chuan lo hre ve an awm nual bawk a. An han sawikhawm nak nak hnu chuan han en thlithlai an chak tlang bawk a niang chu, an vai chuan chu khaw lam chu an pan ta.

Kawng peng atang chuan khua chu a lo la hla hle mai a lo ni a, mahse a khat tawka silai ri an hriat pawh tunah chuan an hrechiang tlang thei tawh hlawm hle.

Tlai ni tla turin kawl a rawn en sen phut a, ramngaw chhunga nungcha chengte pawhin thawm an chhuah nak nak bawk a. Chutia an kal zel lai chuan an lam pan a lo tlan ri an hre ta; inring takin an hmalam a silai tin chungin an lo nghak ta a, rei loteah chuan nunau leh naupang leh tarte chein mi za vel zet tur chu an rawn thleng ta. Runthanga te an han hmuh chiah chuan an hlau hle mai a, an rak nasa ngang mai.

Runthanga te chuan ral an nih loh thute an hrilh chamchi hnuah cbuan an awih ve ta hram a. Tichuan chanchin an han zawt chiang zung zung a, an khua chu Dapzeh khua anih thu leh, tunah hian khaw pathum tang rualin run an tum a lo ni a, Dapzeh khaw ho hian lo hre pha in khua atanga hla deuh hlekah an lo lambun a ni. Mahse khaw pathum infin an ni bawk nen, an tam hneh nasa mai si a, Dapzeh khawchhunga awm zawngzawngte chu ramhnuaia biru turin an chhuak vek a lo ni. An kal hran nasat em avangin nu thenkhatin an fate ngaihtuahin an tap a, a thenin an nu te an zawng bawk a.
Runthanga te chuan an han sawi khawm nak nak a, Runthanga chu lo tawng chhuakin, "Nunaute hi khawngaihthlak hle mah se, pawih leh pawih buaina a ni a, Lusei ho hi va inlan ta ila, kan vai hian a khawilam ve ve pawh hian min kap hlum daih duh ang. Chuvangin kiansan mai a thain ka hria a ni" a ti charh charh a. Chhuahchawnga ve thung chuan, "Ni lo ve, kan tanpui ngei tur a ni. Pawih ni mah se tanpui ka duh a ni. Nakin zelah pawh Lusei te leh Pawih zinga inlungrualna a thlen theih phahna thil a ni" a rawn ti ve bawk a. Dik an ti tlang hle bawk a, Runthanga chuan, “Anih leh an inkahna lam pan chuan kan kal anga, Dapzeh lam an chak zawk anih chuan thawm nei lovin kan let leh zawk mai dawn nia" a ti a. An pawm tlang bawk a, tlangval panga silai pahnih kawl tirin nunau ho chu an ventir a, tichuan inkahna lam pan chuan an kal ta.

An kal thui telh telh a, silai a ri khat tial tial a, a hnu deuhah phei chuan a reh ta hmak bawk a. Chutia an kal zel lai chuan an hmalamah chuan mihring tam tham tak thawm a lo awm ta. Rang takin chulam chu an va pan nghal a, pawih ho inkahna hmun hi luikawr kamah niin, Dapzeh tlangvalte hian an khaw run tumtu te buk hi an kah rawn a lo ni.

Mahse an zinga pakhat zan zungin anmahni hualbet tuten an silai khawm tum a an rawn kal lai chu a lo hmu hman a. A au chhuak hman hlauh bawk nen, an inralsai tawn ta siah siah mai a, a tawpah inralsai reng loin inmalbeih hmachhawn tur inthlang chhuakin chinfel an lo tum a ni.

Hnim buk leh thingkung remchang phenah thuin an thlang kawr ruama pawih ho ding ngir khup leh a lai taka pasaltha pahnih inveh mek chu an thlir a, rei fe an inbeih hnuah chuan Dapzeh pasaltha chu a chak ta zawk a. Chuveleh silai rawn puak thuaiin hmelma lam pasaltha pakhat, Dapzeh pasaltha kah tuma silai lek kang mek tu chu a thal nghal tawp bawk a. Chutah chhak lam atang chuan silai a rawn puak ta thuai thuai mai a, hmelma lam chu an tlu ta zawih zawih mai. Kar lovah mi sawmnga dawn an inchan ta a, Dapzeh lam pawh chuan puitu an nei tih hriain phur takin chem nen an hmelmate chi ai lai chu an va hmachhawn ta.

Runthanga te pawh chuan silai dahin an chem phawrhin an tlangvalte hnenah chuan, "Tumah thih loh tur" tih pahin an tlan chhuak ve ta nghal a. "Dapzeh tlangvalte u, zam suh u. Thianchhan thih ngam Lusei tlangval huaisente kan rawn kal e" tih pahin hmelma bitna lam chu a pan nghal a. A sirah Chhuahchawnga awm ve bawkin an che na dun nangiang mai. Thangkunga leh midangte pawh an che na hle bawk. Pasaltha vanglai hmang tan tir, an thaza tihrehna tur tawk hmu zo lo tan chuan pawih tlangvalte chu vanneihna a ni ringawt. Mahse an tam em avangin an insam rei kher mai.

Runthanga chuan kil khata Hmelma pasaltha lu latu, Dapzeh pasaltha leh hmelma lam pasaltha pahnih lo inbei lai chu a va hmu a, chu lam pan chuan a insiam rem zel a, a va thlen rual chuan hmelma pasaltha pakhat zawk chu a nak thler duai khawpin a vai nghal a, pakhat zawk pawh chu vai zui nghalin rei lo teah a that ve leh bawk a. Dapzeh pasaltha chuan chu lusei tlangval chu a ngaisang hle mai. Pasaltha pahnih a hneh awlsam dan a hmuh chuan lusei pasaltha te ral hrat tur zia te a ngaihtuah chhuak bawk a.

Hmelma lam te chu an pasalthaah pawh a ralhrat berberte an tlu zo tawh bawk si, an tawlh ta. Dapzeh lam lah chuan nawr zelin rei loteah an inpe ta a. Hnungkhirh mawlh mawlhin khaw lamah an kai ta a. Dapzeh pasaltha hawi kual chuan kil khata Runthanga leh lusei tlangval za rual vel lo ding reng chu va hmuin a va pan a, "Lusei tlangvalte u, nangni vang chauha la nungdam kan ni e. In chungah hian lawmthu sawi senloh kan ba a ni" a han ti a. Chhuahchawnga chuan lo chhang vatin, “Inthlahrunna tur a awm lo ve, puih ngai apiang pui tura inpeih reng thin mite kan ni e" a lo ti ve bawk a.

Hmelma inpe tawhte chu khaw chhunglam an pan pui ta, kawng laka an kal lai chuan khua chuan thim hnanin an kal zel a, Runthanga te chuan Dapzeh khaw lungdawh an thlen chuan let leh mai an han tum a, mahse Dapzeh pasaltha chuan a phal awzawng si lo. Tihngaihna awm ta lo chu an vai chuan khuaah chuan an lut ta. Khawchhungah chuan mihring an vang hle mai a, an lo tlanchhe hman vek tawh bawk nen. Lal inah chuan Dapzeh pasaltha chu lutin tei vak lo hnuah chuan Lalpa chu leihkapuiah rawn chuang chhuakin, 'Ka khaw tluchhe mai tur min humhim sak avangin nangni luseite chungah lawmthu ka sawi duh a ni" a han ti a. Runthanga te chu lal inchhungah ko lutin, an chanchin an hriat dante a han zawt a, Runthanga te pawn tha takin an chhang zel bawk a. An mi mante chungchang thuah erawh an inrawlh duh hauh lo thung a. An Lalpa pawn hrethiam takin thildang a sawi pui a, Dapzeh tlangvalte chuan an thian thi ta te ruang phumna thlan te chu an lai a, a thenin ramhnuaia lo biru te chu an hruai hawng ve bawk a. Runthanga te tlangval hruai ho pawhin a rem dan ang angin an lo puibawm ve zel bawk a.

Chutia lal ina thil chi hrang hrang sawia an titi lai chuan lal in chu rawn inhawngin, lalnu ni ngei tura rin chuan Lalpa lamah rawn tlanin a rawn kuah nghal thlawp a, a hnungah lalfanu chuan mittui luang zawih zawih in a lo zui ve bawk a. Runthanga te an han hmuh chuan mak ti takin Lalpa chu an en he haw a. Lalpa pawh chuan a nupui leh a fanu chu a lo hrilhfiah zung zung bawk a. Rei lote hnuah an awmdan te rawn pangngaiin, lalfanu pawh chu inchhung sekrek khawihin a che nghal sawk sawk a, Chhuahchawnga nen chuan an inmelh leh zauh thin.

Chhuahchawnga chuan lalfanu pian inkhaithli zaih mai leh vun nalh tak, a biang duhawm tawk leka tai tuk leh a mitmeng pawisawi lo tak chu hmuhnawm ti takin a lo thlir leh thin a, Rengliana chuan lo hrethiam vatin, Chhuahchawnga khabe chu tuai sak pahin, "Chilthli thlauh rual pawh i ni tawh lo a sin le, duah duah che chuan" a han ti a. Chhuahchawnga zak lutuk chuan rum fein a han melh a, Lalpa lah chuan an sawi awmzia chu manthiam thuaiin a nui vei suk suk bawk a, a rilruah erawh a fanu chu lusei tlangval tan a phal hauh lo thung.

He khaw lal Hrangthangmunga hi mi luhlul tak a ni a, khatia a tlangvalte hnen atanga khaw chhunga awm zawng zawng khaw pawn lama biru tura hriattirna an dawn khan a nupui leh a fanu chu chhuah tirin khuaah chuan amah leh khawnbawl upa pahnihin eng pawh tawh huamin an lo nghak a, hnehna an chang lo anih pawhin an tlangvalte thih laia dam bik chu lal Hrangthangmunga chuan a tum teuh lo a ni.

Mipui nawlpui an rawn thlen khawm hnu chuan Lalpa leh Runthanga te thian zaho chu Dapzeh pasaltha te nen chuan leihkapuiah chuan an va ding chhuak a, pawih ho chuan mak an ti kher mai, chutia lusei mi tam tak an khua a an lo awm ve chu. An Lalpa chuan mipuite chu chanchin kimchang a hrilh ta a, mipuite chuan an hmelma hnamte ni mahse an ngaisangin an zah hle mai.

Tlai lam zanriah an kil zawh hnu chuan Rengliana chuan lalfanu thingtuah seng chu va puiin eng eng emaw a va sawi pui hnuah chuan rawn lutin Chhuahchawnga beng bulah chuan, "Thasangi" a va ti sap a, Chhuahchawnga lah chu zak tih hriat takin a kun nghal daih bawk a. Lalpa Hrangthangmunga erawh a meng rum sawt khawp mai. Runthanga te pawhin hrethiam ve vekin Rengliana mawl leh lutuk chu an dem rilru hle a, mahse Chhuahchawnga tan chuan an khaw chhanchhuahte ngei hi hmachhawn an inhuam vek a ni. An Lalpa lah chu a thinrim hmel nasa bawk si a, chhun lama a tawngkam, Runthanga leh pasaltha dangte a ina riak tura a tihte kha a inchhir rum rum hialin a rinawm a ni. Mahse lal a ni hek lo a awmdan a danglam lem lo hle. Tha takin a titi pui zel a a aw phawi erawh a zang fahran tawh lo hle mai.

Mahse Rengliana bawk a rawn tangkai leh ta. Lalpa chu a tunhma chanchinte a han zawt a, upate lahin an rawn tuihnih bawk nen; tunhma chanchin sep chuan an nui thler ta duai duai a, Lalpa thlathum zu chu chawi lawpin, "Lalpa, zanin chu hnehna chan lawmna i inah hian nei ang aw" a han ti a. Lalpa pawh chuan lo phur pui hlein, a thenin hla te an hril a, an lam bawk nen; rei loteah chuan Lalpa leh khawnbawl upate chu an meng hleithei ta lo. Runthanga te chuan buaipui sap sapin khawnbawl upa thenkhatte chu an thlah haw a, Lalpa pawh chu an khum lamah sawn phei in Rengliana chatthla erawh zubel bulah a hnar kuk kuk reng a. Lianmawia zak lutuk chuan, "Ka pa'n hria se engtin tak ti ang maw!! Khual khaw lal ina chatthla ngam khawp chu" a ti charh charh a. Hrilkunga chuan, "Chhuahchawnga leh lalfanu hi inbiakna hun nei se a tih vang a ni ngei ang, khatiang zawng khan ngai tawh suh" a rawn ti a, midang pawh chuan an rawn tuihnih ve tliar tliar bawk a. Chhuahchawnga erawhin, "Ka be duh awzawng lo, kei a biak phak va ni suh" a han ti a, mahse a be chak hle tih chu a hmelah a hriat a ni.

Tichuan Runthanga chu zawlbukah an tlangvalte ngaihven turin a chhuak a, midang zawng chu lalinah lalnu leh lalfanu chu an lo titi pui ve ta bawk a. Lalnu chu rei loteah a mu ta thuai a, Lalfanu ho chuan leihkapui lamah an chhuak phei ve ta bawk a. Zan thla eng mawi tak hnuaiah chuan eng eng emaw an sawi kual hnuah Rengliana buaipui chhuanlamin an lut ta diak a. Chhuahchawnga leh lalfanu Thasangi chuan sawi tur an hre lo hle mai.

Rei fe an ngawih hnuah chuan Chhuahchawnga zawk chuan tan hmasain, eng engemaw an sawi dun hnuah chuan biahthu thlun zai an rel ve ta. Chu zan thla eng mawi tak chuan chu mi pahnih hmangaihna lama tawnhriat la nei lo ve ve, inhmuh tirh phat atanga an thinlung kawngkhar, an tan a hawng dun nghal a te chu vàn chung sang atangin a rawn en no ngulh mai a.Tthasangi chuan a pain Chhuahchawnga tan a phal loh tur zia te chu a han hrilh vek a, Chhuahchawnga pawh a rilru a buai kher mai. Nel lem lo mah se Chhuanthanga leh Thanhranga te han awm se a ti hle mai a, ruahmanna siamthiam har a ti hle a. An zingah hetiang lam ti thei deuh tumah an awm lo va, ngaihzawng nei Runthanga lahin a ngaihzawng chhungteah buaina a tawk dawn lo chiang a; chutiang bawkin Thangkunga pawn a tihngaihna hre lo chuan, "Min zui mai ta che" a han ti ringawt a. Lalfanu chuan duh mahse a hlauh thute, a a pa pasaltha ten an umzui ngei a rinthute a sawi ve bawk a.

Chutia a sawi zawh rual chuan thawm lo awmin Runthanga leh midang zawng chu an rawn kal a, Runthanga chuan, "Kan ruala i kal loh chuan hun a awm tawh kher lo vang. Hlau suh, kan thawk tek tek chhung chu tumahin an tina lo ang che" a rawn ti ve bawk a.

Tichuan rem te ruat zung zungin an han mu ren rawn a, zanlai ar a khuan rual chuan an chhuak ta. Rengliana erawh a in hnem bawk a, Thangkunga leh Hrilkunga chuan kuahin an kal pui a, rei loteah ani pawh rawn harhin thil awmzia an han hrilhfiah hnu chuan ner nung chungin, "Chawnglerha vanga ka lu a nat teh hrep chu le" a rawn ti a. Nuih rinna chi ni si lo chu an dir char char mai a. Zawlbuka Runthanga zu kal khan an tlangvalte chu bawhbel bulah mu vek turin a hrilh vek bakah an bungraw neih ang angte mutpui vek turin a hrilh bawk a ni.Runthanga zu kal khan an tlangvalte chu bawhbel bulah mu vek turin a hrilh vek bakah an bungraw neih ang angte mutpui vek turin a hrilh bawk a ni. Chuvangin awlsam tein thawm dim tak chung siin an tlangvalte chu an kaitho ta a an hmuiah hupin an han sawi det detah an beng bulah thawm dim takin midang kaitho tura hrilhin kawtchhuah lam pan vat tura chahin an ti bawka kar loah an inkaitho ta veka ti chuan thawm dim takin kawtchhuah lam pan chuan an kal ta a. Kawtchhuah an han thlen kim hnu chuan chanchin chu an han hrilh zung zunga tlangvalte pawh chuan Chhuahchawnga chu an lawmpui rualin muanchanna chi a ni lo tih an hria a chu vangin kan an han siam dawna Runthanga chuan Rengliana leh Lianmawia te unau hruaiin zawlbukah a han let leha thawm dim takin zawkbukah chuan letlehin silai engemaw zat chu an khawm sak ta a, avaia khawm sen erawh a ni lo a atam zawk chu an khawmin an hria a ni, an va let leh hnu chuan silai nei lo zawngte chu an han pe a a bang zawng chu ti chhe vekin kawtchhuahah ngei mai chuan an hnutchhiah bawka ti chuan a rang thei ang berin an kal ta .Runthanga te ho chuan a hnung dawlin an kal fal deuh nalha Chhuahchawnga erawh Țhasangi nen Hrilkunga te nen hma an hruai thung. An kal rei telh telha Țhasangi chu a chau telh telha mahse a inti chak lui hram hram zel a ni zankhua an kal hnuah chuan zing khawvar rualin țiau lui an kan thei ta, mahni ram chin thleng tawh mahse chawlh mai mai tih chi a ni lo tih an hriaa Țhasangi chu Hrilkunga leh Chhuahchawnga chuan an in puak chhawk renga Runthanga te pawn an va chhawk ve zeuh zeuh bawka. Rengliana erawh zan lama a thil in luna a la reh fel kim lo tih hriat takin a thaw hlawi hlawi a, a thlan zawih zawih reng bawka. Chutianga an kal zel hnu chuan tukțhuan eina tur hmun remchang an han melh pah zel bawka an duhang an hmuh hnu chuan an han ei sawk sawka an kal leh ta zela. Chawhnu her zet a ni ta,Runthanga te ho rilru erawh a nuam thei chiah lo pawih ho khan an rawn umzui ngei an rin rualin an rawn lan har zia an ngaihtuaha umzui tu tan chuan lan a hun tawh reng a ni. Mahse pawihho thawm pakhatmah hriatbtur awm lo chu an tlangvalte hlim phah hle mahse anni erawh an ngaih ațha thei hauh lo thung. Runthanga chuan rem a ruatta a, tlang leh tlang inkar kawr ruam an zawh lai chuan a han hawi kuala a chhak kham velah chuan puk remchang a awm ringin han kal a duhthu a sawi ta a, midang zawng chuan lo nghakin Runthanga chuan puk a han zawng ta ngar ngarba rei vaklo hnuah chuan mi sawm vel lenna puk chu a hmu ta. Tah chuan tlangval 5 leh Chhuahchawnga leh Hrilkunga leh Țhasangi te chu riak turin a hrilh a, midang zawng erawh an kalna ngaiah an let leh dawn a ni. Chhuahchawnga erawh a țawng tlem sawtin a inthlahrun zia a hmelah a lang chhuaka Țhasangi nen takngial pawh an inbe hauh lo a ni. Hrilkunga chuan hrethiam takin a hnem malh malha, an ziaawm ve ta deuh nen puka tlangval dangte nen chuan an nui ve ham ham bawka. Runthanga te pawh tuibur hmuamda vel zet an kalnaa an letleh hnu chuan an hnu chu theihpatawpin an han thup a ti chuan Chhuahchawnga te awm lohna lampangah chuan an hnu chu langsar thei ang ber tura hnutchhiahin an kal leh ta ngat ngat a. Thui fe an zawh hnu chuan an chhak lamah kal chhoin Chhuahchawnga te awmna lam chu han pawh an tum leh ta a ni. Pukah chuan an vaiin leng hek lo a bul velah te chuan an țhu ther fura ei te an han rela an eizawh hnu chuan Runthanga te chu mi sawm vel nen chhun lama an hnuhma hnutchhiahna lampangah khan an kal leh ta a midang zawng erawh puk bul velah chuan lo mu mai turin an ti a. Chhak lama an penna hmun an han thlen chuan tlema tawlh hla leh hretin an hnuhma chhilh lo zawngin an kal leh ta a thui lo te chiah an la kal tih chuan an pawih bum ho chu an rawn lang ta ngei mai. Dapzeh an țanpui laia an pasalțha Vungpawrha khan hma rawn hruaiin a hote chu a rawn fuih phei sauh sauh bawka Runthanga te awmna an pelh fel hnu chuan Runthanga te pawn an thawm hre phak vela hlaah kal tir tetein an zui ve leh ta a, an kal zel hnu chuan an hnuRunthanga te pawn an thawm hre phak vela hlaah kal tir tetein an zui ve leh ta a, an kal zel hnu chuan an hnuhma bo ta daih avang chuan pawihho chu an lo inhawrkhawm tuau tuau a, zan thilte a niin meichher nen ringawta han zawn leh chu a harsa bawk nen chulai hmuna riah chu an tithlu ta a. Pawih ho chetla chu an thlir reng a, "a kal fal a piang kan lo that mai dawn em niang" Runthanga'n a rawn tih chuan Thangkunga chuan "Zanlai arkhuan hun awm ang velah i kal chhuak leh nghal zawk teh ang u, naktukah kan hnuhma hi an rawn zawng ngei anga an hmuh meuh chuan khawi khaw chhung emaw kan lut hman tawh mai thei a, anih loh vek pawhin bumna hun țha tak kan nei leh zawk mahna, kan intam hleih si a min umphak hman vaih chuan kan chan a chau hle ang"a rawn ti ve bawka Thangkunga ruahmanna ang chuan an che dawn ta pawihho chu an mutthilh thleng an nghaka, zanlai arkhuan hun awm ang velah chuan Runthanga, Thangkunga leh Rengliana te unau chuan pawihho silai chu an zu khawm leh tete a mahse khawm vek sen ni hek lo sawmhnih vel an lak sak hnuah puk lam an pan chho leh ta a. Puk an han thlen hma deuh chuan silaite chu ti chhe leh sawk sawkin chulai hmunah chuan an dah khawma an țhiante chu an han kaitho nghal zung zunga ti chuan hmanhmawh takin kal an siam leh ta.
Pawih ho zing tho chu an han in engchianga silai sawmhnih lai awm lo ringawt chu tihngaihna an hre lo hle. Vungpawrha erawh chuan an mi umlai te hi an hruaitute naupang tete mah ni se an huaisen dan tur zia te a ngaihruat thiam phak avangin an hnu chhui hi thil awlai tak a ni dawn lem lo hle tih a hria a, a la har chho telh telh dawnin a ring bawk. Tin an lalfanu Țhasangi hi an laklet rinna pakhat mah a nei hek lo a ni. Ti chuan an riahna hmun thlang deuhah chuan mi panga ei rel turin an chhuk tira midang zawng vak darhin Runthanga te hnuhma chu an zawng leh ta Vungpawrha chu kal hrangin an kal tawhna lamah chuan a let leh vang vanga ti chuan chhak lamah pengin a kal leh nghal zar zar a, a tawpah chuan kawr ruam a thleng hlawl a a han enkuala a chhak kham velah chuan puk emaw a awm ngei a ringa Runthanga te chu an riah ngei a ring bawk. Ti chuan a han en kuala puk chu a han hmu ta ngei a an hnuhma pawh a hmu vat bawka, mahni chauha chhuizui chi ni hek suh an eirelna hmunah a let leh ta a, a zu thlen meuh chuan a naute chu beidawng takin an lo thleng kim vek tawha ti chuan chaw te chu an han bar sawk sawk a. Runthanga te hnuhma chu an chhui țan ta, an riahna thlang kawrteah chuan an silai pawh a chhe sa vekin an hmu bawka pawihho chu an thinrim kher mai. Vungpawrha erawh a inngaihtuah nasa hle maia. Runthanga te hian hetianga an silai an rawn khawm fo anih chuan lam bun pawh tawk thut thei an ni tih a hre chiang em em a silai fung ngah zawk nanana chuan chan țha awlsam takin an chang thei reng bawk a ni. Ti chuan hnuhma chu an han chhui zela, an mi umte hian Țhasangi hi an that anih te a ring rum ruma a chhan chu hmeichhia nen ram pil rila kal nisi an umpha har a inti hle a ni.
Tlai lam ni tla turin kawl a rawn eng sen phuta ramngaw pil ril hnuaia kal reng anni bawk nen an chau tawh hle Runthanga chu thingkungah lawnin khua a han chuana, a thlir vang vang hnu chuan ral khata khaw awm chu a hmu ta eng khua nge anih pawh hre lo mahse chu lam chu pan mai a țhain a hria a, an kal zel chuan leng hawn ar khuan hnu lawkah chu khaw ram chin chu an inchhir thlen hman a beisei a ni, a țhiante hnenah chuan sawiin țha an ti tlang bawka chu lam pan chuan an kal dawn a, chaw erawh țamhnem tal an bar loh chuan an chauh lutuk hlauin an bar sawk sawk a, hmanhmawh takin an kal a, Țhasangi erawh a taksa te a chauin a ke te chu a vung nasa tawh bawk nen kal thei zia zang a ni ta si lo a Chhuahchawnga leh Hrilkunga chuan hlang siamin an zawn char char a hma hruaiin an zawn hma tluk lo mahse pasalțha tih takah an kal chak pangai thei hle tho a ni. An khaw hmuh erawh rin aiin a lo la hla tehhrep maia leng hawn ar khuan hun angah pawh chuan an la thleng thei tlat lo Runthanga Thangkunga leh Lianmawia te mangang chuan mi sawm vel chu din puiin midang zawng chu an kal hmasak tira khua lut loa thlam remchang vela riak mai turin a chaha zing khawvar rualin an pawh tur thu a sawi bawka. An kal liam hnu chuan an hnuhma chu an han thup zung zunga chu khaw lam pan lo chuan khaw hel zawngin an kal ve leh dawn ta thung a ni.
Pawih ho erawh an buk sak kawtah țhu țhapin a țhen erawh an chau tawngkhawng hle tih hriat khawpin an muthlu char char bawka nilengin chawl mang loin a chak thei ang berin an um vang a ni. Lusei ram a ni si a an tan a ralmuan loh bakah an mi uma te hi an kal chak em em bawk si nen an mang a ang tak zet a. Vungpawrha chuan khua an hnaih tawh ringin a hote zinga pakhat chu khua chuan turin a han ti a, chu pa pawh chu rang takin thingah chuan lawn nghalin a rawn chhuk leh hnu chuan khua awm ang reng reng a hmuh loh thu leh hla deuh taka meikhu ang tak zam chiai chiai a hmuh thu chu a sawi ta a, Vungpawrha chu rang takin thingkungah chuan a lawn ve ta nghala, a ler a han thlen chuan a han hawi kuala an awmna hmun ațanga khaw thlang lam pang hla tawk taka meikhu rawn zam chho chu a hmu ta, a zana zana umzui duh viau mahse a naute chauh tawh zia hriain leh a tuk nilenga an um leh chuan an man hman ngei tawh a inrin avangin a naute chu a muttir ta veka.
Khawfing chah dawn hnaihah chuan Chhuahchawnga te chu kaitho tu an rawn awm ta a, khuaa luh chu pawih hoin an nan an hlauh avangin ram hnuaiah bawk an kal leh ta a, zing khawvar rualin an khaw hmuh ramchin an perh tarna pawh an pel thui vang vang tawh hle mai. Vungpawrha leh a naute erawh zingkhawvar ruala chhuakin an meikhu hmuhna lam chu an pan ta char chara nau rilțam hun awm velah chuan an zu hmu ta, Vungpawrha rilru chu a buai ta kher mai, an thil zu hmuh chu meipui lian tham tak chhehna hnu a ni a, a la lum vang vang leh nghal Runthanga te finzia a ngaihtuahin umzui tawh loh mai te pawh a duh rum rum a ni. Khatia Runthanga te kalta khan an kal thui tawka an inhriat hnu chuan thing an han fawm khawm zung zung a ti chuan meipui lian tak chu an chhep alh ta hluah hluah a, kal san nghalin,an hnu an thup pah mawlh mawlh bawka,an meipui chheh lah lian hle mahse Vungpawrha ta awmna ațang chuan a hla bawk nen a khu zam chiai chiai bak an hmu thei lo anih kha. Khawfing chah dawnah Chhuahchawngate awmna han thlengin an kai harha Runthanga leh Lianmawia erawh kal ve tawh loin pawih ho chu an thli thlai dawn a ni. Nilengin an lo nghaka an ning tawh hle mai, mahse dawh thei takin an nghak ngat ngata tlai lam thlenga an țhut hnu chuan thawm an hre ta an han biru a, an awmna khawi khua nge pawh an hriat loh ho loah chuan pawih ho chu an rawn lang țan ta mi za vel zet an ni a, thlam rengchangah chuan riah an tum a lo ni. Hmanhmawh taka insaseng nghalin an țhiante chu an um ta char chara khawfing chah dawn thleng an um hnu chuan an um pha ta tiharh lem loin an zingah chuan an han mu ve ta phawta zingah chuan an țhianten Runthanga te pahnih an han hmuh chuan mak an ti kher mai ei an han rel sawk sawka, chutih lai chuan Hrilkunga chu rawn harhin pawih ho chanchin chu a rawn sawi taa Runthanga pawh kaitho nghalin hmanhmawh takin an kal leh ta ngar ngar a chawhnu herah chuan luite pakhatah insil thladaiin chutih lai mek chuan an hnung dawla en thlatura an dah tlangval pahnihte chuan thawm an hre ta rang taka Runthanga te chanchin hrilhin an vai chuan an insaseng ta vata rawmngaw pil ril lamah chuan lut zelin lambunna remchang țha an hmuh hnu chuan rang takin an han insemdarh sang sang a Chhuahchawnga leh Țhasangi chu tlangval dang pahnih nen a rang thei ang bera kal turin an han ti a Chhuahchawnga lah chuan kal a lo tum teuh si lo Rengliana tihngaihna hre lo chuan silaia tinin kal turin a han nawra Chhuahchawnga lah chuan kal a la tum mai si lo Runthanga chuan aw dam dap in "Chawnga kan thih vek chuan tunge kan phuba la ta ang?" a rawn ti a Chhuahchawnga chuan chhan ngaihna a hre lo hle mai. Thangkunga chuan rawn sawi ve lehin "Țhasangi hi kan hlan let mai mai thei tawh hleinem kan ruk chhuahna hi a lothlawna chan tir chi anih loh hi i kal lo anih chuan keimah ngeiin ka kap ang che" a rawn ti ve ta bawk si, chutia an zinga a ngawichawi ber thlenga kal tura an tih tak vekah chuan a kal ta a, a hawi let zeuh zeuh bawka an liam dawn a rawn hawi let leh chu Runthanga hawi let ve nen chuan an han inhmu fuh chata Chhuahchawnga chu a mittui a rawn far ta zawih zawiha "Runa i thi tur a ni lo, midangte pawh kha an vaiin an dam a ngai a ni" a ti chhuak sapa ti chuan an kal liam ta. Runthanga chuan chutia a țhianpa, hmana a hmelma lian ber leh hmachhawn a chak ber țhin, an inkawm hnua a țhiandangte aia a thinlung taka a pawh zawk, a fahrah pui leh, a fahrahna avanga thinlunga khawharna amah ang bawka tuar ve țhintu kal liam ta chu ruak huaiin a inhria a.
Tuibur hmuamda hnu lekah chuan pawih ho chu an rawn thleng ta,an silai cheng kausa chu hma lamah chhuangin inring takin an lo chang ta pawih ho an thleng kim ta maw tihah chuan Rengliana leh Lianmawia silai chu rawn puak rual țhawtin pawih tlangval pahnih chu an thal chiang kher mai, silai dang rawn puah chhunzawm nghalin pawih ho chu an tlu ta zawih zawih maia, Runthanga chuan Vungpawrha tlangval dang ruang kara lo mu tawm kuk chu a zu hmu fuha a khat tawkina tih țhaihna'n a bula ruangte chu a zu kap leh zauh zauh țhin Vungpawrha hlau mengphar nasa lutuk chuan a nuih a ti za tlat peka, rei fe an inkah hnu chuan pawih ho chuan an rawn kap let ve taknaa an tum an țhelh bakah tum an nei si lo chu an tawlh ta Rengliana chuan pawih ho silai sawh mek chu a chempui phawrhin a bawh phei ta tlangval dangte pawh chuan an bawh pheia an insam ta, Runthanga erawh zawi muanga a silai keng chunga rawn kalin Vungpawrha zawn a thlen chuan Vungpawrha chu a silai chuan a han hawlha a che hauh lo, mahse a thi lo tih hre chiangtu a ni tlat a hawlh a hawlh a, Vungpawrha tan chuan a hrehawm duh khawp ang, a tawp a tawpah chuan "ka kah chilh dawn che nge mi hmachhawn dawn dawihzeppa" a ti ta a Vungpawrha mak ti chu a rawn meng rang kher mai. Runthanga chuan a silai dahin inring takin a chempui nen a lo nghaka. Vungpawrha pawh thatho lo tih hriat fahranin a chempui nen chuan a rawn pan ve bawka. Runthanga, a zan mut tlem leh taksa chauh tawh vanga thinchhe tuk tawh a țhiante zinga pasalțha anihna ang tak taka la insum chuana thin ti rimtu te zinga an pu ber a hmachhawn ta chhaihkual vel erawh a tum lem lo hle Vungpawrha chem rawn vai chhuak chu vur kual paha bumin a chem chu hnuai lamah a han vai thla puat a vung pawrha mal chu a ri no chawk maia, a țhingțhi nghal rawp bawka. "ka lu chu la rawh le ka hneh lo che" a han ti a Runthanga chuan "ni lo ve i tho leh a mi bei leh anih loh chuan ti hian ramtui lei lo ni turin ka dam ang che" tih pahin a han nuih zui a Vungpawrha chu a thinrim kher mai thei leh thei loa ding chhuakin "anih leh lo kal ta che" a rawn ti chhur chhur a a chilthli te chu a uai duah duah bawka Runthanga chu rang taka tlanpheiin Vungpawrha dul zawnah chuan achem a han vaia mahse pasalțha a lo ni ve tho bawk nen alo dang ve hman tlat mahse a chem erawh a thlauh nghal bawl thung chuveleh Runthanga chuan Vungpawrha malpui hliam lai chu an han tlawh sak chawrha a țhingțhi nghal rawpa, Runthanga chem chu rawn thlawk leh nghalin a lu chu a tla hrang chiang kher mai. Ti chuan Vungpawrha lu chu kengin a țhiante lam a va pana a țhiante hnen a va thlen chuan Rengliana chuan pawih tlangval inpebtawh mi pariatte chu a lo an khum char chara Runthanga hmel a han hmuh chuan "Nang lah hi i lo bikbo hmaka miin na kan tawrh laiin" a han tia Runthanga hnungchhawn zawng chuan a ding leh ta nghal hmaka Runthanga chuan Rengliana hnung kak duai a han hmuh chuan a nat a ring hle mai. Pawih tlangval la damte chuan ngaihdam an dil nasat em avangin an neih zawng2 an lak saka an puan ven lai tak ngial pawh Rengliana'n a chhuhsak vek a ni. Runthanga te chuan a em em lutuk e ti ve mahse "Khatia haw nge induh thih" a ti tlat bawk si pawih tlangvala pumpa engkim țhankin vek tawhte chu ramhnuaiah chuan saruak ngal ngatin an kal then ta hluau hluau hlawma. An liam dawnah chuan Thangkunga chuan 'Bualthleng savawm a kawlh tawk leka inhliam man anih kha' a rawn ti chhuak ve phawng bawka. An han in enkuala hliam tuarte chu sawmhnih dawn an lo awma Rengliana pawh na hle mahse a țhiante chu a buai pui char chara. Nunna chan pawh panga lai an lo awm ve bawk nen thlan te an han lai zung zung a. An inpeih fel meuh chuan ni a tla der tawh mai.
Chhuahchawnga te pawh kal zelin kawng lakah zan ruk zet an riah leh hnu chuan leng len ar a khuan mek lai chuan Darchhep lal inah chuan luh dil an rawn awma tlangaupa chuan va hruai lutin lal leh upaten Chhuahchawnga leh tlangval pahnih bakah an zinga nula pakhat awm ve chu mak an ti hle mai. Țha taka chhawnin chanchinte an han zawta lalnu chuan ei tur a lo siam mawlh mawlh bawka. Chaw kaw puar an ei lohna a rei tawh bawk a an duh tawka nasaa an chaw ei chu a hmuhnawm a niang an thlir dauh dauh hlawm maia, chutih mek lai chuan Chhuanthanga pawh tlangaupa nen an rawn inzui lut ve bawka. Chhuahchawnga bula nula hmelṭha tak lo ṭhu chu mak ti takin a en a, lalpa lam a va hawia zawhna mitmeng nen a han melha lalpa lah chuan Chhuahchawnga chu a lo melh leh daih bawk si. Chaw an bar zo an chanchin kimchang an han sawi hnu chuan Chhuanthanga chuan pawi a ti vawng vawng kher mai. Pawi a tih ber zawka erawh tlangvalte leh Runthanga te nunna derthawnga a awm aiin chutianga awlsama nula an lo hawn mai chu a ni. An naute hi tharumah chuan an khan tawh dawn hauh lo tih hre mahse Pasalțha nun dan kawngah zirtur tam tak an la neiin a hria a ni. Thanhranga'n hria se engtin tak ngai ang mas? A ti rilru vawng vawnga mahse an rawn hawn miau tawh avangin chuti maia hlan let tir a tum hauh lo. Lal in ațanga chhuakin tlangval awm ang ang a khawma ti chuan Runthanga awmna lam pan chuan an kal ta nghala.
Runthanga pawh chuan a țhiante chu chu lai hmuna riah pui phawt țhain a hria a an hliamte nena an kal chuan an chauh dawn lutuk bakah khua a thim tawh bawk nen a rem dan ang ang chuan tlangval la che thei deuhte nen chuan an han che sawk sawk a, tui chawi maina tur a awm si lo a Thangkunga hoin tlangval panga vel an liama Hrilkunga te pawh panga vel kal chhuak vein tumbu leh hruizik emaw an zawng dawn a ni. Chaw mumal an eilohna a rei tawh bawk si a, hliam nen an chau tlang hle mai. Ei rel an zawh hnu chuan an han ei sawk sawk a, rei loteah tlingtla zoin an mu ta diaka,an chau tlang bawka an mu rei kher mai, Runthanga leh Hrilkunga phei chu zan thum ngawt mu mumal tawh lo an ni bawk nen tukțhuan an peih hnu feah chuan an rawn harh ve chauha, tlangval dangte lah chuan ei san mai bik loin an lo nghak vek bawk si nuam lo an ti hle a, muang chang lovin an ei sawk sawk a an kal leh ta a, hliamnei an awm avangin an kal chak thei lo hle. Mahse chak lo lutuk chu an ni hauh chuang lo. A hliam na berte zinga mi Renglianan hma hruai chunga fiamthu a la thawh ham ham an hmuh chuan hliam nei dangte pawh an țhiante rualin an kal țhen chawk chawk mai a ni.
Ni thum zet an kal hnu chuan Chhuanthanga te nen an intawk ta an han inhmu chu an hlim hle mai. An tlangval thita chhungte erawh Runthangate chuan hmuh an va han hreh tak em. Chhuahchawnga avanga thil thleng vek angah an ngai ngei dawn si a. Ti chuan muang chang lovin khaw lam panin an kal leh ta a, tlai lam zan riah an han ei tur chu Runthanga te chu Chhuanthanga chuan thiam taka hminin a bar hmasak tir a, a chhan chu Chhuahchawngate chaw rawp lutuk kha a mitthlaah a cham reng vang a ni. An han ei fel hnu chuan "ka va puar tak em" ti a lo bawk phek mai mai awm loin an țhian hliamte chu an han buai pui leh sang sang a, Runthanga te lah an chau ve si nen han inbuaipui tur vak an awm bik si loa Chhuanthanga te lo thleng chu vanneihna nasa tak a ni. Zanah pawh meng rei loin an mu a zingah Chhuanthanga chu harh hmasa berin a han hawi kuala Runthanga te la muttui zia a hmuh chuan a khawngaih letling hle, Chhuahchawnga vanga hetianga an awm chung pawha Chhuahchawnga ber an rawn haw luih tir te chu pasalțha dik tak zia a tiin a ngaisang em em a, Hrilkunga leh Thangkunga ngat phei chu an naupan lai ata a hrual puitlin anni bawk nen a lawm kher mai.
Kawng laka zan hnih an riah hnuah khua chu an lut leh ta. Chhuahchawnga chu rang taka lal in ațanga rawn tlan thlain Runthanga te ho chu a rawn chibai a, nung dama a țhiante an han awm chu a lawm hle a ni. Țhasangi pawhin hlim takin a rawn chibai ve bawka. Hliam neite an nih bakah mahni khua thleng ang an ni bawka ni thum hnuah chuan Zehtet lam panin an chhuak leh ta. Kawng lakah zan hnih riakin a nithumna tlai lamah khua chu an lut a, Chhuahchawnga chuan lal inlam pan pui nghalin lalpa puithanga hnenah chuan chanchin zawng zawng chu a han sawia, Lalpuithanga chuan Țhasangi a han hmuh chuan "Chemte lungngai reng reng suh ka in ațang ngei hian pasal chu i nei ang, Chhuahchawnga hian a lo mak che paw'n hetah in i nei tih hria la rawn haw zel ang che" a han ti a, Țhasangi pawh chuan nuam a ti ve hle mai. Lalpa rem ruat ang chuan Țhasangi chu an inneih hma lal inah chuan a awm dawn a ni.