BUALTHLENG MAWITU BUNG - 6

Hun leh ni a liam zel a, Bualthleng khua chuan hnungtawlh a hnekin hmalam a pan chho zel a. Zawlbuka Val upa Ruma'n inunauna țha a hrilh țhinte chu zawm tlatin khaw inlungrual tak an ni zel a, Zawlbuk chhung inunauna chuan a riak țhin tlangvalte kar pawh a siam țha nasa hle a ni. Inbuan pawh zantin an nei emaw ni tih tur a ni ziah a, an thawm a țha thei hle. 

Runthanga leh an thirdeng fapa phir unau, Rengliana leh Lianmawia te han khing pha an awm ngai meuh lo va, Rengliana te unau leh Runthanga bawk hian a tawp an khar leh nghal țhin. Rengliana hian a u Lianmawia hi a buan duh ngai hauh lo va, Runthanga erawhin a buan ve ve tawh avangin Rengliana chu thaah a chak zawk tih a hrechiang a ni. Mahse Runthanga pawh mi chunga len tum renga khawsa ni hek lo, an inchak chhawk zantin ziah mai a, an inkawm nasat phahin an innel em em a, Thanhranga pawhin Rengliana te unau chu hruai ve fovin, Runthanga te nen an pathum chuan nun chante zirtirin a thiam thil chi hrang hrangte a hlanchhawng țhin a ni. Mahse Rengliana te unau chuan Runthanga chu an khan lo lam hlek nimah se, zuam sual awl tak tur an ni a, an chakna te hi an ti lang chhuak mai mai ngai lo na a, a vanglaia Saibung a pu zo an tih țhin khawpa mi chak, an khaw thirdeng fapa te an ni miau va, namnul mai mai chi chu an ni hauh lo.

Zathangi pawh Val upa Ruma fa tur paiin a puar ve luah tawh a, kum upat lama innei an ni bawk nen, lawm puitu pawh an ngah hle a ni. Tlai khat chu Bualthleng khua chuan mikhual sawm lai an thleng a, an zinga mi pahnih chu pasalțha vanglai hmang mêk an ni tih an hmel leh pianphungah chuan a langchiang hle mai. An hruaitu pa ber erawh pasalțha uai thla lam tawh hmel pu a ni a, mahse a lan dan ang aiin a la che thei fu ang tih pawh a che zia la zangkhai vah leh a mitmeng ațang chuan a hriat a ni. 

Chung pasalțha pathumte chu lal inah lutin an tlangval hruaite erawh lal in pawnah an awm bawk a. Bualthleng mi puite chuan chanchin hriat chian duhin laltualah chuan an lo pung khawm sap sap bawk a, tlangval ram kal lo ho pawh an rawn kal khawm ve bawk a, chutia an nghah vang vang lai chuan lal inchhung lam ațang chuan an mikhual pakhat chu rawn chhuak in, "Khual țha kan ni e, in lal leh upate biak kan duh a kan be zo ang a, an rem tih leh zanin riakin naktukah kan chhuak leh nghal dawn e" a rawn ti a, Tlangval ho pawh chu țha takin an let ve leh ta nghal a. 

Lal inah chuan Lalpa Dohranga thinrim chu a inngaihtuah nasa kher mai. Pasalțha Chhuanthanga chu enin "Chu, Pawih ho chuan in lalpa Saithanga chu thahah an vau reng a maw? Țum khat chu in lalpa Saithanga pa Saichhunga leh ka pa kha eng emaw thil vanga inbiakna neih an duh avangin Lal Saichhunga khua Chhekkawn khuaah khan ka pa rualin hei kan upa pasalțha ni țhin Chawnghranga te nen hian kan lo kal ve tawh a. Rawlthar mai ka la ni a, in Lalpa Saithanga pawh ka rawn hmu ve nghe nghe a, kan kum a inrual tlang bawk a, kan innel khawp a sin. Darchhep khuaa a rawn kai hlim a khuang a chawi țum khan ka kal hman lova, a pawi ka ti hle nghe nghe a sin. Intlawh pawh lovin kan awm chho ta zel a, tunah lungmuang takin in awm ang chu tih laiin pawih mawngbal hovin an rawn luhchilh ngam chu le. Tikhan ka pasalțha Thanhranga lo nghak ula, a lo thlen hunah ruahmanna siam ho teh u" a ti ta a. 

Tlangaupa pawh rang takin Thanhranga te inlamah a kal ve ta bawk a, Thanhranga leh Rengliana te unau leh Runthanga te unau ram kal hawin chutia Thanhranga te inchhunga Tlangaupa lut chu an va hmu hman a. Rang takin an phei sawk sawk a, an kawtkai an va thlen chuan tlangaupa chhuak leh tur nen chuan an intawng chiah chiah a. Tlangaupa chuan a kal chhante a sawi hnuin Rengliana chuan an sakhi patuai kah chu Thanhranga te sumhmunah chuan a va dah a, an pali chuan lal in lam panin an kal ta a. 

Lalin an han thlen chuan Chhuanthanga leh Thanhrangate chu an han inchibai lawp lawp a, Thanhranga chuan Chhuanthanga bula mi pahnih lo awm ve te chu ngun takin a en vung vung a, a tawpah, "Hrilkunga leh Thangkunga" a ti chhuak sap a. Anni pawn an ni tih entirnan an lu an lo bu nghut bawk a. Tichuan inchibai ve lehin, Thanhranga chuan Runthanga te pathum chu inhmelhriattirna te neiin, an rawn kal chhante chu Chhuanthanga chuan a sawi țan ta a.

"Sai ram chhuah lai anih avangin khaw chhungah tlangval tlemte chiah kan dah a, leido neilo kan ni bawk nen, thlamuang takin kan kal a. Ni nga kan thangbo hnuah kan vanneih a siamin sai pawh chu kan kap ta a, mahse kan tlangval pakhat chu a hliam hman tlat mai a, haw pui turin zawn ngam a nih si loh avangin ka hovin kan lo champui ang a, midang zawng kan Val upa te nen inhaw ang tiin rem ka ruat a. Tichuan sai sa nen chuan an hawng ta a, keini pawh ni hnih kan cham leh renrawn hnuah haw kan tum ta a. A chhan chu mihring kan inchan zo dawn a a lan loh avangin a chhungte ngeiin dawm hlum se ka duh vang a ni. Mahse kawng lakah a thi ta hlauh mai a, a ruang han zawn thlen duh viau mah ila, kawng lakah zan hnih kan riah a ngaih dawn avangin a rem laiah chuan kan phum ta ringawt a. Khua kan han thlen hma deuh chuan ngaihțhat lohna riau ka neih tlat avangin ka naute hi khua han en thlithlai turin pahnih ka tir a, an thil han hmuh chu kan lal leh upate pawihho kutah an awm bakah kan țhian, keini aia haw hmasate pawh an man vek a ni." 

"Pawih ho chu an tam hle mai a, mi za leh sawmnga aia tam mah an ni. Kan lalpa ro it a lo kal an nih ka ring ber a. Keini sawm lek tan chuan hneh ngaihna a awm si lo va, inkhaw lam kan rawn pan a, Zehtet khuaah pawh chanchin kan hrilh nghe nghe a, tlangval sawmhnih velin an lo tel ve tur thu min hrilh a. Mahse sawmthum tan pawh pawihho hneh chu thil theihloh a la nih tho avangin kan rawn pan leh ta che u a ni," a han ti charh charh a.

"Kan lal leh upate saw an kutah an awm tlat si a, rawlrala chet pawh a theih loh avangin puihna kan rawn dil tawp mai a ni" tiin Hrilkunga chuan a rawn sawi ve bawk a. Thanhranga chuan, "Inthlahrunna tur a awm reng reng lo a nia. Pawih ho hi an huangtau rei ta mah mah a ni. Lalpa, i thupek ka nghak e" tih pahin Lal Dohranga lam chu a va hawi phei a. Laldohranga pawh chuan "Tlangval sawmnga hruai la, naktuk zing var țianah chhuak nghal rawh u. Val upa Ruma erawh a kal ve ka rem ti lo tih hrilh ang che" a rawn ti ve bawk a. 

Chhuanthanga chu a lawm hle mai. Lalpa Dohranga hnenah chuan, "Lalpa, keini chuan kan țhian Thanhranga chauh hi kan beisei ngam a, mahse kan beisei aia leta tam min pek avangin kan va han lawm tak em!! Kan chunga i țhatna te hi kan theihnghilh ngai lo vang" a han ti a. Lalpa Dohranga lah chuan a phawk chhuahin, "Saithanga chu pawih hoin an chaih kual nasa tawh dawn hle mai maw? Va chhanchhuak ula, mamawh a neih apiangin rawn lam zel turin lo hrilh rawh u. Ka vanglai ni ngat se zawng, ka va kal ve dawn chiang em" tih pahin Upa Chawnghranga chu an melh zauh va, Chawnghranga lah chuan, "A tih chi dawn em ni, Saithanga farnu...." a ti hman chiah chu an lal Dohranga chuan rang takin, "Chhuanthang, i naute pahnih nen hian ka upa Chawnghranga inah hian thleng ula, tlangval dangte pawh kha pahnih te te a inkawpin khawnbawl upa dang inah thleng rawh se. Tlangaupa, nangin i lo va hruai dawn nia" a ti nghal ta zat zat mai a, mahse lalnu, a pasalte thusawi lo ngathla ru kar tu chuan Pu Chawnghranga thusawi chu a lo hre hman tlat, a pasalin a nuih tlawn rulh rulh lai chuan rum fein an melh kawk a.

Chhuanthanga te pawh chuan an hrethiam tih an nuih deuh put put danah chuan a chiang a ni. An lalpa farnu Sailothangi hi an lo hmu ve tawh a, Diakkawn khaw lalnu ni lai mek a ni nghe nghe. Han en mai pawhin a nulat lai chuan a va hmelṭha dawn em tih tur chi hi a ni hrim hrim bawk a. 

Pu Chawnghranga chuan Chhuanthanga te pathum chu hruai chhuakin an inah chuan a hruai ta a. Thanhranga nupui nen chuan inhmelhriattirna te a han nei zung zung a, an kal chhanah erawh ranngo zawng angin a sawi rih thung a, a chhan chu Țialthangi hian Thanhranga hi rammu turin a kal tir phallo ang tih a hre chiang a, Thanhranga a kal lui leh ngei bawk anga, a awm loh chhung chu chaw pawh ei mumal thei lovin a awm leh a hlau a ni. 

Thanhranga pawh chuan a nupui chu hrilh nge țha ang hrilh loh tiin a han inngaihtuah ngial hnu chuan hrilh ngei chu țha a ti ta a. Zanriah an kil lai chuan fel fai takin a sawi ta a, Țialthangi chu a hlauthawng nghal kher mai. Mahse Thansanga'n, "Ka nu, ka pa hi a kal ngei tur a ni. Midang chhan nana pen chhuak ngam lo pa neih ai chuan pa neih loh ka duh zawk a ni" a rawn tih takah chuan, Țialthangi pawn dik a ti hle a, "Fimkhur takin kal ula, hlawhtlinna va chang mawlh teh u" a rawn ti ve ta bawk a. 

Thanhranga chuan a fapa chu a chhuang kher mai, a nu rilru a hneh awlsam zia te a han hmu a, engtin tak țhanglian ang che maw a ti vawng vawng a. Pu Chawnghranga ve thung chuan a taksa chaklohna zual zel avang chuan a tupa tlangval hun tur chu a hmuh hman a inring thei tlat lo a ni.

Runthanga te țhianthum leh Hrilkunga leh Thangkunga te pawh Zawlbuk lam an pan a. Chhuanthanga leh Thanhranga pawn rei vak lo hnuah an zui thla ve leh a, Thanhranga chuan tlangval thlanna te a neih zawhah a hawsan leh ta a. A tuk zing varțianah chuan thovin, Thanhranga chu a insiam sawk sawk a, a nupui pawh chuan chaw te lo fun sakin a chhuah dawnah chuan an han inpawm vawng vawng a. Țialthangi chuan țap țuau chungin, "Dam takin i lo let leh ang tih min tiam rawh" a ti a Thanhranga pawh chuan "Nang leh ka fate tan ka nun ala ngai alawm, ka tiam a che" a ti a. Țialthangi chuan, "Tlanchhe lovin hmalam pan zel la, hlawhtlinna va chang ngei ang che" a ti ve ta bawk a. 

Kawtchhuah a va thlen chuan midang ho chu an lo awm kim vek tawh a, mak tak maiin Pu Zangaia leh an Lalpa pawh an lo awm ve bawk a. Thanhranga chuan a'n melh dun he haw a, chutah Lalpa Dohranga chuan, "Thanhrang, lo kal ve ngei ka ngai a ni, min hial lo ang che" a rawn tih takah chuan Thanhranga pawh chuan a kal lui dawn tho tih hriain, an lalpa chu hma hruai tirin an kal chhuak ta nghal a. 

Kalkawngah chuan Thangkunga chu a nui leh vur vur mau țhin a, Thanhranga mak ti chuan "Runthang, Thangkunga hi tu run nge maw in lawi pui le?" a rawn tih takah chuan tlangval ho pawh chu an rawn nui dar dar a, Runthanga lah chuan Thangkunga chu Pu Zangaia bula pawh phei rual nghal in, "Ka pu, hei i makpa hual"a va tih zawm nghal zat bawk a. Pu Zangaia leh lalpa Dohranga pawh an lo nui vur vur a, zan hmasa lama Pu Zangaia te in lama an lawi luh laia Runthanga ngaihzawng, Niliani u chiah Biakliani leh Thangkunga te inmelh dan chu Pu Zangaia paw'n a hrethiam hle mai. Sawi chhuak lem lo mah se, Thangkunga chu makpa țha tak a nih a ring nghe nghe a ni. Mahse a pawi ta ber erawh Dammawia awm ve kha a ni a, hnai setsawta melh pahin, "U Runthang, Thansanga te mikhualpa hnara khi hnap khir a uai" a tih chiah chu tumah insum thei an awm lo an ri tlawrh tlawrh mai a ni.

Nilenga an kal hnu chuan Zehtet khua chu thim hlimah an va thleng a, Lalpa Dohranga chu Thanhranga leh Chhuanthanga nen lal inah thlengin midang zawng chu hmun dangah an thleng kual a, an hmelma ni țhin mahse, Zehtet khaw ho chuan rammu tura kal tur leh anmahni pawn an puih ve dawn miau avangin khual buan pawh neih pui lem lovin zawlbukah chuan an ti ti pui ta mai mai bawk a. Runthanga chuan zawn bik nei ang taka rei tak a hawi kual hnuah kil khata Chhuahchawnga'n a lo nuih vur vur lai chu a va hmu ta. Inmelh ding nghal ngar ngarin, a tu-a-mahin mit laksawn an tum lo a ni. 

Lianmawia chuan lo hmu thiam vatin Runthanga chu thil chi hrang hrang sawi kual puiin Hrilkunga te nen chuan an ti ti ho ta daih a. A tuk zing varțianah chhuak leh turin tlangvalte chu Zehtet kawt chhuah lam chu an pan ta nghal a. Kawtchhuahah chuan Lalpa Dohranga leh Pu Zangaia kianga Chhuanthanga leh Thanhranga lo ding reng chu an va hmu a, tlangval ho chu an zak kher mai. Lalpa Dohranga chuan hrethiam takin, "Ekhai, thawhkhalh loh che u hlau reng rengin ka awm a, ka muhil țha thei hauh lo mai a. Kawng lakah ka mut a chhuah leh min pua a niang chu" tih pahin a han zimar kual vel a, a nui ang vur vur bawk a. 

A kal tur angte innghak khawma an din lai chuan Runthanga chuan a bula lo ding mek pa chu a va en a, Chhuahchawnga pawhin a lo en ve lai mek a ni bawk nen, hmun leh hmunah chuan an inmelh leh ta ngar ngar a. Thanhranga aw thian ri chuan ti harh in, Thanhranga lam chu an va hawi phei a, ani chuan nuisang chungin, "Tunah chuan țhian in ni rih e" a rawn ti a. Chhuahchawnga pawh chuan Runthanga lam hawi chuan, "A thleng thuai ang" a ti sap a. Runthanga pawh chuan, "Ka lo nghak reng ang" a ti ve bawk a. An kim takah chuan kal leh nghalin tunah chuan sawm riat chuang an ni ve ta. Kawng laka zan hnih an riah hnu chuan a nithum ni tlai thim hlimah Darchhep khaw lanchian theihna lai an thleng ta. Laltualah chuan mipui tam tak an lo awm a, a ngaihna an hre lo hle mai. Chuvangin Thanhranga chuan Runthanga leh Chhuahchawnga chu an inhuatna te a reh theih tak mial ah tiin enthla turin a ti ta a, an phurlo dun hle tih pawh a hriat a ni.

En thla tura an kal lai hian Thanhranga leh midangte'n buk sualna tur remchang an lo zawng ve dawn bawk a ni. Kawngah pawh inbe lem lo chuan an kal char char a, khaw chhung lan chian theih zualna lai an va thlen chuan Runthanga chuan khawdai a in fal deuh hleka lo awm chu hmuin, chu ina an luh ruk theih chuan an duh a hriat theih mai a ring a. Chhuahchawnga hnenah chuan hreh hle mahse a sawi ta a. Chhuahchawnga pawhin a lo rilruk, mahse a sawi chhuah duh si loh anih avangin a lo aw ve mai bawk a. 

Tichuan hawi kual ruai chungin chu in lam chu zawi muang in an pan ta a, harsatna tawk lem lovin chu inchhungah chuan an va lut ta a. Hmeichhe tleirawl pahnih leh pitar pakhat hi lo awmin, Runthanga te an hmuh chuan au an tum ta mai. Rang takin pakhat zawk hmui chu a va hup beh sak ta a, Chhuahchawnga pawn pakhat zawk chu a lo hup bet ve bawk a. Pitarte chuan, "Zahngai, Zahngai, anni kha zawng naupang mai an nih kha" a rawn ti țawk țawk a. Chhuahchawnga chuan, "Ka pi, hlauhawm kan ni lo ve. Zehtet khaw pasalțha Chhuahchawnga ka ni e," a han ti a, an lalpain pasalțha nihna a hlan hi vawi khat mah la sawi lo mah se, Runthanga a awm avangin a sawi a ni. 

Runthanga pawh chuan a hming chhal ngai lo mah se, chu pitar hnenah chuan, "Ka pi, rawn pui tur che u a lo kal kan ni e. Kei hi Bualthleng pasalțha Runthanga ka ni e," a ti ve sak a. Chhuahchawnga lam a va hawi chuan a lo ner nasa kher mai. Tleirawl pahnih chu thawm chhuah lo tura hrilhin, an hmui an hupna te chu an han thlah a, chu pitarte nena rei tak an inbiak hnu chuan zanriahte an han kil sawk sawk a.

An hriat duh an hre kim ta bawk a, an chhuahsan ve ta nghal a. Rang takin a thim chin zel chuhin Runthanga chu lal mual lam pan chuan a kal a, Chhuahchawnga chuan eng tak tih tum che ni maw tih pahin a hnung deuhah chuan a zui ve ta mai bawk a. Lal tual a han thlen chuan pawihho mi sawmhnih bawr velin Darchhep tlangval an phuarhlawm ho hnung lama silai keng chunga lo țhu chu an va hmu ta a, Darchhep ho silai an khawmte chu an inchhawp ruih bawk a.

Pawhho fimkhurna chhan em em hi Pasalțha Chhuanthanga leh a naute khuaah an awm lo tih an hria a, beih tawk thut thei an ni tih an inhriat ve vang a ni. A tam zawk chu khawdaiah an lo inkulh daih a, khawchhungah chuan tlangval sawm hnih vel leh lal inah an pasalțha te an awm a ni. Beih an tawh hunah Darchhep mipa an phuar hlawm ho chu chung ho chuan an kap hlum fai nghal vek phawt dawn a ni. 

Tichuan a thim lai zel chuhin lal in hnuaiah chuan an va lut leh a, an piah lawkah pawihho chu eng eng emaw sawiin an ri reng bawk a, a ralmuang lo kher mai. Lal in chhungah chuan pawih pa pakhat hi eng eng emaw sawiin a țawng lung lung a, chu aw chu Runthanga chuan a aw hriat hnu ang a ti hle mai. Engmah hriat belh tur a awm chuang lo bawk nen, an țhiante fin turin an kal ve ta a. 

Kawng lakah chuan Runthanga chuan Chhuahchawnga chu a be ve ta zeuh zeuh va, Chhuahchawnga pawn a chhang ve zel bawk a. An țhiante inkulhna an thlen hma deuh chuan Chhuahchawnga chu a ding ta a, Runthanga chuan eng ti zia nge tia a va zawh chuan, Chhuahchawnga chuan, "Nang nen hian buaina chinfel loh kan la nei tih kan hre ve ve a, ka u thattu ni lo mah la, i thah tak a kha ka țhian țha ber a ni a sin. Min chhuah khalh lo se kha mi ni khan i thi ve ngei ang" a rawn ti a. Runthanga pawh chuan zam hauh lovin "Ka lu hi a duh duh lak a tan ka phal teuh hleinem. Min hneh tu chauhin an la ang, nang ni lovin" a rawn ti let ve hmak bawk a. Chhuahchawnga chuan, "Ka unaupa leh ka țhianțha ber nunna in laksak a, ka pa lah in ngenmu avangin a thi a, ka nu lah in ngenmu avang bawkin kebai mai anih phah a sin" a han ti a.

A tuar na hle tih chu Runthanga chuan a hrethiam hle mai. "A pawi ka tih pui khawp mai che. I dinhmun angah hian ding ila, chu i tih ang hian ka tih ve ngei ka ring bawk a ni. I hmelma pa hi i aihnahphah pui ka nih rih mai a ngai ta si a, mahse i damna tur anih phawt chuan ka lu hi i la thei ang. Mahse ka nu hnen erawh a thleng tur a ni. Pa ka nei lo va, unau dang ka nei hek lo. Ka pa hmel hi ka hre ngai lo bawk. Ka nu neih chhun ka ni a, chuvangin ka nu hnenah ka lu hi a thleng tur a ni" tiin Chhuahchawnga hmaah chuan a va țhingțhi ta a. 

Chhuahchawnga chuan muttui khap per sak sak chungin a lo en ve a. A han inngaihtuah a, a pa leh a unaupa hmelte a han ngaihtuah a, tunah chuan a nu innghahna awm chhun a ni tawh a, chutiang bawkin Runthanga phei chu a pa hmel pawh hre lo anih avangin a saisen tet ata a nuin a țhanlen hun a lo nghahhleh em em a ni dawn tihte a han ngaihtuah a, a tawrhna avanga a lu lak mai chu a duh. Mahse Runthanga hian ama lu hi la zawk ta se a nu tawrh nat dan tur a han ngaihtuah a, Runthanga nu tawrh dan turte nen. A chem chu a vai thei ta ngang lo va. Runthanga chu kai thovin, "Ka aihnahphah pui lu ka la ngai lo ve" tih pahin a kut chu a phar chhuak a, Runthanga pawh chuan chibaiin, an țhiante lam pan chuan chu fahrah pahnih, rei lotea pasalțha khual kai ni mai tawh tur khawpa theihna nei sang ve ve, an fahrahna avanga an chhungrila tawrhna nasa tak awm ve ve, mahse an rilru tihnual duh hauh lo va hmalam pan zelte chu inlungrual taka kalin an titi phei ve ta bawrh bawrh a.

Thanhranga chuan chutia a lam a mi pahnih rawn titi pheite a hmuh chuan tute nge mawni le a ti rilru hman a. Mahse Runthanga hmel a hmuh chuan a lawm hle mai. Rang takin an buk sualna lam a pan pui nghal a, an va thlen chuan buk pathum lai an lo peih der mai a. Tlangval rualte chu an lo che sap sap a, khua a la hla deuh bawk nen, thawm dim ngai vak ta lo chu an lo nui dar dar bawk a. Runthanga te pawh chet ve an han tum a, mahse tlangvalte chuan an lo phal awzawng lo mai a. An thil tih tum ve apiang chu khawi maw tiin an rawn tihkhalh nghal zel si a, an tih ngaihna hre lo chu an in en a, an innuih leh ringawt țhin. 

"Helamah rawn kal mai teh u," tih ri an hriatna lam an han hawi chuan buk pakhat kawta Lalpa leh Pu Zangaia te kianga Thangkunga, Lianmawia, Hrilkunga leh Rengliana te lo țhu chu an va hmu a. Pasalțha Thanhranga leh Pasalțha Chhuanthanga pawh chuan an rawn hui lauh lauh bawk a, an va phei ve ta nghal a. Runthanga te pawh chuan an thil hmuh chu an han sawi sap sap a, an lu a hai tlang kher mai. An ruahmanna neih ang angte an sawi zawh hnu chuan an thu a mum thei ta. 

Runthanga, Chhuahchawnga, Rengliana, Lianmawia, Thangkunga leh Hrilkunga te chuan tlangval sawmthum hruaiin khaw chhung lam an pan ang a, pawih ho mutthilh lai takin Darchhep tlangvalte chhanchhuah hna an thawk ang. An chhanchhuah fel hnuah lal inah lut lehin, pawih pasalțhate chu engzat nge an nih tih an chian hnuah an muttui lai takin an lalte chhungkua chu khaw dai lamah an hruai chhuak ang a, khaw dai an thlen velah khawchhunga pawih ho chu an kap hlum vek ang. Silai ri an hriat velah Thanhranga leh Chhuanthanga hovin tlangval sawm li rual chuan khaw daia pawih inkulh ho chu an hei ve bawk ang a, Runthanga ten rang takin an rawn pui ve bawk dawn a ni. Lalpa leh Pu Zangaia erawh Thanhranga'n a ngen nasat em avangin tlangval pahnih nen buk nghakin an lo awm thung dawn a ni.

Zanlai ar khuan hun lai chuan an che chhuak ta sap sap a. Khaw chhungah chuan thawm dim thei ang bera lutin, lal mual chu an han thleng chho ta. Runthanga te chu chu insem darhin pahnih tetein an inkawp a, pawih ho, Darchhep tlangval ho kap tura khawchhunga awm ho muhil lai chu chempuiin an va that vek dawn a ni. Tumah chetsual a thiang lo a ni. 

Runthanga chuan hma hruaiin, chung pawih ho zinga mu fal deuh bulah chuan a ding ta chat a, midang ho pawh rawn kal ve zelin an bitumturte an thlang fel ta. Rang takin Runthanga chuan a chempui chu vaithla nghalin a mi thah pa thi tur chalchang chu a kuah bet tlat bawk a. Midang te pawh chuan ti ve nghal zelin an that fel deuh vek ta. Mahse thil pawi tak erawh a awm ta talat mai. 

Pakhat thi tur chalchang ban vai kual chuan silai a va khawih puak ta tlat mai. Pawi erawh khawih lem lo mah se, a ri a chhuah hman tlat. Runthanga chuan rang takin, "In mithahte bulah khan țhu vek rawh u," a ti a, an țhu fel hman awrh tihah chuan lal in chu rawn intheh hawng lawp in, pawih pasalțha pathum silai nen an rawn chhuak nghal a, leihkapui ațang chuan an hotupa chuan, "Eng thil nge thleng," a han ti a. Chhuahchawnga chuan pawih țawng hmangin, "Pakhat hi a ngeng fal deuh va, ka kap ta mai a ni e," tiin a chhang let ve a. Chu pawih pasalțha pawh chuan pawi tihna nei lem lovin a bu nghut nghut a. "Min rawn ti harh tawh suh u, a ngeng fal deuh kha chu chhinchhiah ula, naktuk lamah silai inkahsiak zirnan inhmang dawn nia," tih pahin a lut leh ta nghal a. 

Pakhat pawh chuan zui lut ve nghalin, pakhat erawh chuan Runthanga te lam chu a la rawn hawi reng a. Runthanga te lah engmah sawi ngam tawh si lovin an țhu ngawi kur ta reng a. A thim bawk a, hmel an inhmu thei lo chu an vanneihna a ni ve thung. Chu pa pawh chu a lu thing nar nar chungin a lut ve leh ta mai bawk a. Thanhranga te lam erawh silai a puah takah chuan pawih ho buk chu an kah rawn ta a. Runthanga chuan thawm dim takin tlangvalte chu sawm a thlang chhuak a, silai pahnih țheuh pein Thanhrangate kalna lamah a tir nghal bawk a.