BUALTHLENG MAWITU BUNG 36-40
Khua a rawn var meuh chuan Hrilkunga ruahmanna angin tlangvalte chu sawmhnih tete a insem darhin an khaw ram chin chu an fang kual dawn a ni. Hmar ho an hnaih tawh an rin avangin fimkhur taka kal tur leh Hmar ho an hmu anih pawhin thawm nei hauh lo a kir san leh nghala chanchin khuaa thlen vat turin a chah țheuh bawka. Pasalțha Chhuahchawnga leh Pasalțha Thangkunga te chuan khaw mipuite chu ral an hnai tih an hriat hun huna an insaseng theihna turin Bualthleng khaw lam panna kawnga in remchangah chuan riakkhawm mai turin an hrilh darh sap sap hlawm a.
Bualthleng khaw lama chanchin thlen tura an tirhte'n Bualthleng an thlen meuh chuan chawhnu her a ni der mai, mahse kal chak tak chu an ni tho a ni. Lal inah chanchin an han thlen nghal vata Lalpa Rengliana chu tho vutin "kan hmanhmawh a ngai anih chu. Tlangaupa rang takin Runa leh Chawiliana zu ko tawh" a han ti a Tlangaupa pawh chhuak vatin rei loteah Runthanga leh Chawiliana te pawh rawn thleng vein ro an han rel sap sap a. Lalpa Rengliana ber chu kal tur zinga a inchhiar tel tlat chu an buaina a ni ta. Runthanga leh Chawiliana bakah Lalpa Puithanga thuchah hmanga an thlem nasat tak emah chuan țhu tum vuau chungin "Runa i kutah ka dah ni mai teh se, Lal nih hi a lo buaithlak mah mah a ni" a han ti thum dut a Runthanga chuan "Ekhai Renga kan Lalpa kan chan zo chauha, nang leh zel ral rama i kal hi tunge rem ti thei ang. Lalpa Puithanga'n i tana thuchah a thawn hi i zawm ngei a ngai a ni, Chawia hian Thansangate țhianthum hruaiin tunah hian Zehtet chu pan nghal mai se. Ka hoin Tlangval zathumin kan zui bawk dawn nia"a han ti a Chawiliana pawh chhuak nghalin in lama an chanchin lo ngaichang reng tu Thansangate chu hruaiin Zehtet lam chu hmanhmawh takin an pan sawk sawk a. Runthanga te pawh a hnu rei vak loah chhuak ve nghalin Zehtet khua chu a rang thei ang bera thlen ngei an tum hle.
Zanriah an kil zawh hnu lawkah chuan Zehtet mi leh sa te chu lal tualah chuan an tlim hmur maia. Tlangval an khaw ram chin dang kual ho pawh an rawn haw sap sap a, a hnuhnung bera rawn hawte chuan Hmar ho chuan an khaw ramchin an rawn luh tawh thu leh zanlai arkhuan huna khua rawn beih an tum thu an rawn sawi ta. Chu veleh Lalpa Puithanga chuan a ruahmanna thlak lehin khaw mipuite chu Bualthleng lam panna kawng lamah kal tir vekin khuaah chuan tlangval hlang chauh an awm a, Lalpa Puithanga ruahmanna ang tak chuan tlangvalte chu chu zanah chuan lemchangin nula rim turin an kala inruakah bengchheng nasa thei ang bera siamin an ri hulh hulh bawka. Hmar tlangval enthla tura an tirhte pawhin Zehtet khua chu an ralmuang hle anga ngaiin phur takin an buk lamah an let leh ta a.
Chawiliana te chu chawlh pawh chawl mang loa kal an ni bawka leng hawn ar khuan hnu rei vak loah chuan Zehtet khaw mipui ramhnuaia biru te chu an pawh ta. Chanchin an han zawt chiang sawk sawka, an kal san leh ta a, khua an va luh chuan Lalin lamah an lut vata Chhuahchawnga, Thangkunga leh Hrilkunga hoin ro an rel ta. Chhuahchawnga chuan "Lalpa kan khaw ram chhungah ngei an awma, mahse an inkulhna hi zanlai ar khuan hma chuan kan thleng hman hauh lo ang. Chu vangin an inkulhna hmuna va hup tum chu a harsa hle dawn a, chu vangin khaw dai hnaiah lo lambun i la, a zia zawk ngei ang.
Nunaute khaw pawn lama awmte saw veng turin tlangval sawmnga tir bawk i la"a tih chuan an pawm tlang bawka Lal in ațanga chhuakin Zawlbuk lamah chuan an ro rel chu an puang zar ta a. Tlangval sawmnga rual chu silai sawm ken tirin nunaute veng turin an kal tir nghala. Mi dang zawng tlangval zathum rualte chu khaw dai lam an pan ve nghal bawka. Lam bunna a tana hmun rem an han zawn fe hnu chuan an hmu ta. Khua ațanga hla lo te kawr ruam awmna chhak khamah chuan lawn chhoin kham chung a țang chuan an silai leh fei nen inring takin an bawk ta țhap a. Zanlai ar khuan a rawn hun meuh chuan Zehtet tlangvalte chu an helhhawlh nasa tawh kher mai, an han nghah leh vang vang hnu chuan Hmar ho pawh an rawn lang ve ta.
Khua a hnaih lutuk loh bakah khaw mipuite chu tui taka an mut vek an rin avangin meichher nen an rawn kal ngamtlat. Kawr ruam an rawn lut chu kawr tui chu an han dawt khalh khalh hlawm a, chu tih lai tak chuan silai rawn puak țhuaii. Hmar tlangval pakhat chu a thal nghal thlawrh a. Chu veleh silai rawn puah chhunzawm zelin Hmar ho chu an tlu zawih zawi mai a. Rumzaliana chuan lambun an ni tih inhriain "tawlh let ang u" tiin a au lauh lauh a. Zungțiala a khup dawm chunga lo kun tlawk tlawk chu pu lawkin a kal pui nghala, a vanneih a siamin ngenmuin a deng fuh lo hlauha, Rumzaliana beidawng rilru na chuan lusei fate ngenmu chu ngaipawimawh duh hauhloin a huaisenna lan tirin an rawn kalna lamah chuan hawi ket hauh loin a kal sawk sawk a, Zungțiala chuan "Naua mi dah rawh, kei zawng rual banloa dam ka thlahlel lo e, nang zawng i dam a ngai a ni, haw vang vang ang che. Kan lo hnuaichhiah țhin che avangin ngaihdam ka dil a che" a han ti a Rumzaliana erawh chuan "Ni lo e, U Țial min kaihruai turin i dam a ngai a ni. Kan lo fimkhur tawk lo deuh a ni" a han ti a. Zehtet ho chuan Hmar ho tawlh let mek chu kap pah zel chungin an um zela Hmar ho pawhin silai an rawn hmet puak ve reng bawk nen Zehtet lam pawh an tlu ve nual ta mai. Thangkunga chuan a ban puam thi zawih zawih chu melh zeuhin a nui saka a bulah chuan "Hmar ho beih apianga hliam ka tuar bik ziah le aw" tih pahin a silai a daha "Zehtet tlangval zam ngai lo te u, bawh ang u le" tiin thingkung remchanga inphen pah zel chungin a tlan ta, chu veleh Zehtet tlangvalte chuan haw haw chungin an zui ve nghal bawka.
Hmar ho silai chu rawn puak leh nual mah se Zehtet hochu kah tluk vek sen ni hek suh chem sen phawrhin Zehtet ho chu an lo nghak ta a. Rumzaliana pawh Zungțiala hmun him lama a dah hnuah chuan a hnampuite kiangah chuan rawn dingin a hmasa bera rawn tlan mek Chhuahchawnga chu a tin vang vanga, a hmeh puah hma chiaha Chhuahchawnga thing zunga inchhuih thlu chawrh chu Chhuahchawnga vanneihna a nih rualin a hnung chiaha tlan tlangval pakhat chu a thal nghal tawp thung a. Chhuahchawnga chu tho sawk sawkin a vanneih zia a hriat meuh chuan a lawm kher mai. Chu tah hmar ho lam pan chuan a tlan ve leh ta. Chu lai hmun chu Hmar tlangval leh Lusei tlangvalte chem inkhak ri leh na tuar țe thawm chuan a luah hneh kher mai. Thansanga chuan Rumzaliana chu pan ding nalhin a hmaa awmte chu a thal phawk phawk a. Rumzaliana erawh chuan Kapthanga'n "Tuipang Lalfanu kakpui lawntu kha ka ni e" ti a a han inchhal a hriat rual rual chuan Kapthanga lam pan chuan a tlan nghala Kapthanga paw'n lo hmu vein Rumzaliana chem rawn vai fua rual chuan țhingțhi hnawk in Rumzaliana chem chu a lu chung lawkah a thlawk ri fua a, Kapthanga chuan Rumzaliana kaihza chu inthlep hnawk khawpin a chem bil lam chuan a han sat pawpa Rumzaliana țhingțhi rawp khabeah chuan kuttum hrawl tak chuan a han chhoh dawm leh pawp mai zawng Rumzaliana lu chu a hai kher mai. Chu tih lai tak chuan Runthanga aw ngeiib "Zehtet tlangvalte u in unau Bualthleng tlangval te kan rawn thleng e" tih ri an hre leh bawk nen Zehtet tlangvalte chu ral bei meke ti lo chuan an haw haw pah hluah hluah bawk a, Runthanga chuan tlangvalte chu sem darh zung zungin Hmar ho chu ruang chaicheh an thlak hnan ta siah mai. An hawina lam apiangah chem sen an hmachhawn ta mai si Rumzaliana leh Kapthanga erawh an la in veh thauh thauh renga Rumzaliana, Hmar ho innghahna ni țan der tawh ni mah se, kaihruai tu țha nei hek lo a thinrimna chuan rilru fim put tir thei loin Kapthanga chu a bawh buan buan mai țhin a, Kapthanga pawhin Rumzaliana chu rilru fim tak puin han bei mah se a duh angin a khawih thei hauh lo. Chhaih thinrim hle lo phei se chu a hneh kherin a ring lo bawk.
Hmar tlangvalte chu an tlu tam telh telh a, Kapthanga chan pawh a țha chho hret hret zela Rumzaliana malpui kak duai leh a dar vei lam thi zawih zawih chu pasalțha tak tan pawh tawrh a har viau ta ve ang. Kapthanga pawhin a nak kak hlawih chu na a ti hle. Hmar tlangval ho chu kar loah mi sawm riat vel bak an ding ta hauh lo, tih ngaihna dang awm tawh hek lo Rumzaliana pawh chu a inpe ve ta nge nge a, Lusei tlangval ho pawh an tlu nasa ve hle, tlangval sawm riat bawr vel zet chuan nunna an chan ve bawk. Hmar ho khan tlan chhe chungin bei lo phei se chu lusei lam pawh za chuang fe an inchan ve ngei ang le. Chu tia hmar ho an inpek takah chuan an meichher paihte chu chhar khawmin mei an han nun hluah mai a Hmar ho hmel chu a dur khuih hlawm maia, an nguai hlawm hle.
Khawfing chah a hun țep bawk nen hmar ho chu dim baksak loin Liansanga leh Dammawia chuan an chhawm ta a. Thansanga erawh tirh ngai hauh loa tlan nghal vang vangin nunaute chu khuaa hruai lut turin a kal a. Khua an luh meuh chuan tlangvalte chuan lal tualah chuan mei nun hluahin hmar tlangval ho chu mei engah chuan an din tlar tir put bawk a. Hrilkunga chuan Hmar tlangval pakhat chu a han kek dak awrh a "Lusei fate hi run mai mai chi kan ni hauh hleinem" tih pahin a han beng hawi sawk a "Kan zaidamna avang hian buaina kan tawh phah fo thei tlat a ni" a han ti supa. Silai rawn puak țhuai chuan nunaute chu a ti thlabar leh hle lal tuala Hrilkunga a chal dar kaw phut chunga thal reng an hmuh chuan an rap hlawm hle. A kaptu lam anzu hawi nak chuan mi pakhat lo ding awn bui chu anzu hmu a rang taka chu pa lam pana tlan vatin Thansanga chuan pasalțha Zungțhiala lu chu a la ta hmak a.
Hrilkunga erawh tho chhuak leh tawh ngai lo turin a fam ta der mai. Darchhep khaw ropui pasalțha ni țhin. Tuna Zehtet pasalțha ni ta chu famkhua a lawi ta. Thangkunga chuan Hrilkunga kut chu hmer vawng vawngin "Hrila a va na tak em" a ti vawng vawng a. Lalpa Puithanga pawh chuan Hrilkunga ruang chu a kutah hmer vawng vawngin "Hrila i bawih ni turin i nunna laksaktu che chu i nau Thansanga'n pialralah a rawn thawn liam tawh e" tiin mittui a khap per sak sak a. Kapthanga chuan "Ka mang chu a vaiin thleng dik lo mah se, a thleng dik awm chhun erawh a va na em" a ti vawng vawng a. A tuk zing ni chhuah rual chuan Zehtet khuaah chuan Lalpa Rengliana a rawn lang hlawl mai a, inbeihna ber a zawh tawh miau avangin tumahin an lo khak lem lo a, Rengliana'n Hrilkunga ruang a hmu chiah chu Hmar tlangval ho chu a pan ta chher chher mai. Hmar tlangval ho pawhin mi nunrawng tia an hriat Lal Rengliana an hmu chiah chu an lo ip chawih chawih bawka. Lalpa Puithanga'n "Renga an chung thu i rel tlang phawt teh ang u, khatin awmtur a ni ngai lo e" a rawn tih chuan Lal Rengliana pawh inngaihtuah harh vatin "Ka thiam loh a ni e, Lal in lamah i lut vat teh ang. Pasalțha ho khan min zui rawh u" a tih takah chuan Lal in lamah chuan Zehtet pasalțhate leh Bualthleng pasalțha te chuan ro an rel ta a.
An rel zawh hnuah tukțhuan kil leh sawk sawkin ti chuan Hmar tlangval pahnih chu an hnungkhirhna phelh sakin Kapthanga chuan chempui pakhat pek pahin" In pasalțha chhuanvawr leh in tlangvalte nunna hi in la duh anih chuan siam sawmin mi pakhat zel inrawn tlan tur a ni. Kan Lalte'n zah an ngaia hman a inhriat pasalțha nunrawngte kha ni leh tura min duh loh avangin. Nang ni pawhin hrethiam u la, favang awllen lai ngei hian rawn tlan rawh u, hnathawh a hun meuh chuan in tlangvalte hian sal chhinchhiahna an put bakah a țhen phei hi chu an thi ngei ang"a ti a chu tlangval pahnih pawh chu rang takin an let nghala.Kapthanga pawh an khaw lam a ngaihtuah em avangin Darkawn tlangval nunna chan tate chu an phum sawk sawka a ni la lain an chhuak ve nghala. Zehtet leh Bualthleng tlangvalte pawh chuan an țhian nunna chante chu phumin Hrilkunga pawh lei daiah an zalh ve ta. A chhungte leh a țhiante mittui a ko chhuak hnem malh malh te e, Lianmawia'n pasalțha tuaitirte an nih laiin mual a liam sana, a hnu lawkah an tana mi pawimawh em em Thanhranga'n a liam san leh a, tunah Hrilkunga a ni leh ta, țiau lui kana an chet ho dante, hmar hnam an tih ralțitna kawnga an chet ho dante dawn kirin nunhlui ngaiin luaithil an nul fep fep hlawm a. Zehtet khua chuan a pasalțha chhuanvawr ber zinga mi a chan ta.
Upa Chhuanthanga chu Pasalțha Hrilkunga thlanah chuan ding vang vangin ral hla tak a thlira Hrilkunga naupan lai hmelte Darchhep khuaa hlim taka tual a chai ve țhinlaite mitthlain a mittui chu a dir zawih zawih reng a. Rumzaliana hliam chu a nat em avangin bawlpu chuan enkawlin a buai pui nghal char char a. Khua an thlen ațanga nikhaw hreloa a la awm reng avang chuan a dam chhuah loh mai pawh an ring rum rum hial țhin. Thangkunga hliam pawh a na ve viau tho mai, a ban puam a silai mu tang chu harsa ti taka an phawrh chhuah meuh chuan a na ti lutuk chu a khap per ve sak thei hial a ni.
Lalpa Puithanga ro rel ang ngeiin an mimante chu a zatve vel Bualthleng lamah an haw pui dawn a ni. An kal dawn chuan Rengliana chuan "Lalpa, buaina i tawh apiangin a rang thei ang berin min rawn hriattir zel dawn nia. Nang hi i khua leh tuite tana Lal ni mah la kan tan chuan Pa i ni tih inhre reng la, a dam awmchhun inih tawh hi" a ti a Lalpa Puithanga pawhin Lal Saithanga leh Laldohranga an awm tak lohah chuan pasalțhate tana an pa neih awm chhun chu a ni tawh tih inhriain dik a ti hle. "Renga i sawi ang ngei chuan ka ti ang. Tin Lal i ni tawh tih hi inhre reng la, ral rama khua leh tuite tana Lalpa meuh a rammut chuan Lal huaisen leh ralhrat tak tihna a ni. Mahse chu aia pawimawh zawk chu, hun ralmuan loh laia khua leh tuite uap lum tu Lal nih hi a ni" a ti a Rengliana pawhin dik a ti ve hle mai.
Ti chuan Bualthleng lam pan turin Lal in chu an chhuahsan ta a, Runthanga leh Lal Rengliana chu Hrilkunga thlanah kal kawi zawkin thlan chungah chuan an han ding ren rawna, țawng zai reng rel lova rilru kawma tuibur hmuamda zet an din hnu chuan an țhianpa Hrilkunga chu hreh tak chungin an mangțha ta.
Rengbawk lalpa Chawngzathanga chuan a tlangvalte an hlawhchham tih a hriat meuh chuan a thil tih chu a inchhir hle mai. Chanchin a han hriat chian meuh phei chuan Vungthanga leh Zungțiala te chet dan chu a duh lo hle bawk a. "Sial sawm zela a kan tlangval te zawng zawng tlan chu thil harsa tak a ni" tiin a indawm kun tlawk tlawk a. Mahse a khawnbawl upa pakhatin tim dui chunga "Lalpa Paihte hnam ho puihna i dil mai teh ang u, an pasalțha ralhrat pathum Changzauate , Ginlianate leh Singlawia te khua Sengzau lamah i kal mai teh ang u. Lusei fate hnuaia kan kun leh reng zawngin kan thlah lo kal zel turte'n mi dawih zep min ti palh zawk ange" a han tih chuan Chawngzathanga chuan paihte pasalțha te hming chu a lo ral hriat ve fo tawh a ni bawka. Rengbawk khua ațanga zan sarih lai riaka kal ngaihna Sengzau khua paihte khaw lian ber inzariat nufa hiala inchhal hnenah chuan puihna dil chu a tum ta a. A khawnbawl upa zin veivak tura la chak țha ber pahnih chu tlangval panga nen tir chhuakin, an puia hnehna an chang anih phawt chuan antan engmah a ui loh tur thu leh, a neih zawng anih phawt chuan an duh duh an laksak theih tur thu a chah bawka.
Zehtet lamah erawh Hrilkunga an sunna chu a reh hlei thei lo a ni ber e. Thangkunga phei chuan afanu leh a nupui pawh ngaihsak mang loin Hrilkunga thlanah chuan a va awm leh vang vang țhin. Naupan tet ata inkawm tawh an niin an inngaina dun bawka a tuar hle mai. Chhuahchawnga pawhin Hrilkunga boral mai chu awih har a tiin, nui sung chunga an ina rawn lawi lut leh tur angte'n a suangtuah leh tlat țhin. Favang awllen lai ni mah se sapela chhuah zai pawh an rel țhian dun thei meuh lo, kum danga Hrilkunga tela an ram chhuah țhinte an han mitthla a, ram chhuaka kal lam chu a lang lo hle. Sengzau khaw Lalpa Ginthanga chuan a mikhual hmar tlangval chauh hmel zet zette chu en kualin an thu rawn ken chu a han ngaihtuah vang vang a, a kianga țhu ve a fapa an pasalțha chhuanvawr te zinga mi Ginliana chu mitmeiin a han rawna Ginliana'n "Ka pa i thu vek a ni e" a han tih takah chuan "Bualthleng leh Zehtet pasalțha te chanchin hi chu kan hre ve fo a, kan tana hnawksaka an awm miau loh avangin kan hmelma en ngai lo a, an tan hnawksakin kan awm ngai lo bawk a ni. Pui ta che u i la, hlawhtlinna lo chang pawh ni i la, nunna chan kan awm nual tho ngei ang. Tin, lo hlawhchham ta i la, Hmar hnam hoin Lusei ho inhlauh ang chiah hian kan hlau ve tawh ngei bawk ang. Zan lamah kan lo rel țha leh phawt anga, naktuk lamah kan thurelte kan hrilhhre dawn che u nia" a ti a, Hmar ho chu an bei a dawng hle mai,ngui nghiai chungin Sengzau Lal in lian tak ațang chuan an inzui chhuak dam dam a.
Zan lamah chuan Lal inah chuan ro rel in an han inhnial leh laih laih țhin. Sengzau khaw khawnbawl upa min chu rawn ding chhuakin "Lusei fate hi kan hlau a ni hauh lo. Mahse, kan tana hnawksaka awm lo nanana chu han beih a țulna ka hre hauh lo. Mahse, țanpui ngaite țanpuitu kan nihna hi a ni midang tana nun hlan ngam kan ni tih kan tih lan tirna chu" tiin a țhu leh ta hmaka. A awn lam chu a hriat viau mai pasalțha Singlawia, Lalpa Ginthanga makpa chu rawn ding ve lehin "Kan puihna mamawhtute han hawisan hi ka duh hauh lo, tin hman lawka rawng taka kan puihna dil mektu te chunga an chet dan te kan hria, lusei pasalțhate hian min hmelma en lo mahse kei zawng an chet duhdan khan ka ngeng a chhun riau peka chu vangin beih ngei ka duh a ni. Kei leh U Changzaua hoin tlangval zali chhuak i la Ginliana erawh khaw nghaktuah lo țang thung se. "a han ti a Ginliana chuan kal ve chu duh hle mah se, chutia a makpa berin a rawn sawi takah chuan a pa pawhin khaw hmun nghaka awm turin a duh ngei dawn tih hriain a țhu tum bur maia. A tukah chuan Sengzau tlangvalte chu Lusei khua bei turin mi zali zet in thlang chhuakin khua chu an chhuahsan ta hum hum mai le.
Zan sarih zet an riah hnuah Rengbawk khua chu tukțhuan ei hun lai velah an thleng ta, Hmar mipuiten paihte tlangval leh an pasalțhate pahnih an han hmu chu an lawm hle mai. Lal inchhungah chuan ro an han rel laih laih a, chutih lai tak chuan Lalfanu Chawngpuii thing phur pawh a lo haw ve ta a, Pasalțha Changzaua leh Pasalțha Singlawia'n an han hmu chu hmelțha an ti dun hle mai. Changzaua chuan "Lalpa he rammutna hi nangni leh keini inkara inunauna țha zawk thlenna a nih ngei ka beisei, tin hnehna kan chan hunah i fanu hi kan inunauna ti nghet zual turin kan nau, kan lalfapa kan pasalțha chhuanvawr ni bawk Ginliana tan min pek ngei ka beisei, amaherawh chu Ginliana hmel duh zawng a lo ni lo anih chuan thil dang min pe thung anga"a han ti a, a rilrua Lusei ho thah bak awm thei lo Lal Chawngzathanga chuan Hmar hnam lo awm zel turte, dawih zep tia hriat an nih lohna'n a fanu chu a phal ta hmiah mai le.
Rengbawk khuaa zanhnih an riah hnu chuan an chhuak ta. Darkawn lamah mi zahnih pasalțha Changzaua hoin an kal anga, midang zawng pasalțha Singlawia hoin Zehtet an pan ang. Zehtet an thlen veleh hmar tlangval tang mekte chhanchhuah an lo tum hmasa phawt dawn a ni.
Chhuahchawnga a fapa hruaia sava veh chuan afapa Lianmawia perh thlak sa chu a chhar khawm mawlh mawlha a rilrutetein 'nang zawng min khum ngei dawn e, i kum ang rual ka nih in nang angin ka chhungte sa ka barh hauh lo' tiin a nui vur vur a, a fapa chu a chhuang hle. Mahse a fapa a en apiangin Lianmawia a hre chhuaka a ngaih a zual țhin hle, a pian theihna'na a nunna hlan tu tih theih hial khawp Pasalțha Lianmawia ngei kha la dam se han pawm ve se tiin a țhianpa chu a ngai țhin hle a. Ni a hniam țan tawh bawk nen haw tumin a fapa chu a han au a, mahse a fapa reng reng hmuh tur a awm hauh lo mai, a mang a angin a han aua, chhangtu reng an awm si lo, a fapa dinna hmunah chuan a han kala, a fapa kalna hnu ni awm tak chu zawngin a hmuh rual chuan a chhui zui nghal bawka, unau hmelhai vel zet anih hnu pawh chuan a fapa chu a la hmu hauh lo, a beidawngin hrehawm a ti tawh hle a, au pawh au peih tawh loin akal hnek hnek tawh maia, khuain a thim hnan dawn takngial bawk nen khaw lam pana haw a tum ta a, bei tih dawn nan tal pawh tiin a fapa nen sava an vehna hmun lam chu a han pan leh te te a, a han thlen chhoh meuh chuan a thim tawh hle, a chutia a kal bek bek lai chaun "Apa" tih thawm a hre ta mai, a han hawi chho a Lianmawia lo ding ban lo vaih lauh lauh a hmuh rual chuan rang taka tlan chhoin a han kuah nghal thlawpa, vin țhatin "Khawiah nge i kala? Ka zawn nasat zia che hi i hre lo em ni?" a han ti a Lianmawia chuan "Ih ih" a rawn ti hman chauh tihin Chhuahchawnga chuan "Engmah sawi loin haw nghal ang" a han ti vin leh țhat a,
Lianmawia chu muangchang a kalin a hmaa a pa kal hlawk hlawk chu a um a ni ber zawk awm e. Kawtchhuah an han thlen chuan leng len ar a khuang der tawh maia. Chhuahchawnga chu inngaihtuah fimin "Taite, naupang i la ni a i bo emaw tiin ka mangang hman lutuk alawm, khatiangin min hrilh loin kal bo tawh miah suh ang che" a han ti a Lianmawia chuan "Ka pa,kan thlang kawrkamah khan tlangval inman ho kha ka hmu a, dam lo pawh kha an kuaha a tel ve nghe nghe a, ka enthla chak lutuk a" a ti ta phawng mai. Chu veleh Chhuahchawnga chuan Lianmawia chu pawm lawpin "Taite hmanhmawh a ngai anih chu a va pawi tak em" a han ti a, in an thlen hma deuh chuan Țhasangi khawlaia lo ding reng chu hmuin Chhuahchawnga chuan chanchin a han hrilh sawk sawka "Sangi Thangkunga rang takin va hrilh la, Lal in lamah lo han kal bawk ang che. Hmanhmawh a ngai a ni, Lal in ațanga i let leh velah rang takin insiam la, ral lo thlen thut huna tlanchhuak vat turin inring reng ang che" tih pahin khaw daia rip an siam, an mimante an dahna hmun chu panin a tlan nghal sawk sawk a, an rip siamna hmun a va thlen meuh chuan vengtu atana an dah an khaw tlangval sawm te chu an silai an hum tawh loh țheuh bakah, nunna reng neiloin an lo let reng maia, Chhuahchawnga chu let leh vat vatin Thangkunga a lam pan a rawn tlan nen chuan intawkin an pahnih chuan tlai lama Lianmawia hmuhna lam pan chuan an kal ta nghal a.
Leng hawn ar a khuan meuh chuan Paihte tlangval zahnih rual zette chu an enthla dun reng tawh a. An zinga an mimante an awm ve danah paihte ho chuan an țanpui tih an hre chiang hle bawk. Singlawia rawn ding chhuak chuan "Hei le kan unaute chhanchhuah hna chu kan thawk zo ta. Kan inkhuarna hi khua ațangin a hla lem lo naa hmuh mai mai erawh kan har ve thawkhatin ka ring. Mahse kan fimkhur erawh a ngai hle thung, kawng kan bo sual palh vangin khua kan hnaih hle anih ber hi. Darkawn lama kalte lo thlen hma chu rawlralin kan che dawn a ni. Kan pasalțha hlaim tuar erawh khaw lam panpui vat nise ka duh a, tlawmah la lo turin ka ngen nghal che u a ni. In unaute kan lo thlen ve tawh hi.ka hoin naktukah tlangval sawm hnih kan chhuak anga a rem rem kan that ang, silai tumahin kan hmet puak tawh tur a ni lo. "a han ti a Thangkunga chuan zawi thawp satin" In tum ang chuan inche thei meuh angemaw chu"a han ti a Chhuahchawnga chuan"Kapthanga a va ngaihtuah awm ve le aw, an vanduai hlauh chuan an khua chu khaw ram mai a ni daih tawh dawn si a" a rawn ti vawng vawnga ti chuan khaw lamah an let leh ta a, khua an va luh chuan tlangvalho chu laltualah lo awmkhawmin an lo nghak renga, an tlangvalte ruang pawh khaw chhungah lo seng lut vekin in țhenkhatah chuan nutling țap rawih rawih thawm hriat tur a awm bawka.
Chhuahchawnga chuan an thil hmuh chu a han sawi sawk sawka tlangval pahnih Bualthleng lama kal tur an intir chhuak nghal bawka, ti chuan tlangval zathum rual zette chu paihte ho hup turin an kal ta nghala, Singlawia leh a hote erawh lusei hoin an mimante an tlan chhuak tih an hre tawh dawn tih hre mahse, an duhthusam ang thlapa an chet bakah, an hnuhma pawh an duh ang thlapa thupna hun an neih miau avangin an thla a muang deuh. Mahse khua an hnaih em avangin an hlauhthawnna chu a awm reng tho a khawvar ruala hmun hla zawka insaseng ngei chu tumin an mu hnar ta hlawm bawrh bawrh a.
Zanlai arkhuan hnu lawkah chuan Thangkunga silai ri Chhuahchawnga silai riin a rawn zawm zat takah chuan paihte ho riakbuk chu an kah rawn ta, chu lai ruam chu na tuar țe thawm leh silai puak riin a luah hneh kher mai. Singlawia chu a bula ruang let reng pahnih chu inphennana hmangin insaseng a han tuma mahse lusei ho chuan an lo hual bet vek tawh si. A naute lah an tlu zawih zawih bawk si, han kap let ve mah se Lusei ho chuan țan chhan an nei țha hle bawk si a, an buai kher mai. An vanneihna erawh khua an hnaih em avanga meipui an chhep lo chu a ni. Thla eng ringawt ring chungin lusei ho chuan an rawn kapa eng hnuaia kah nen ngawt chuan a inang loin ngenmu thlawn pawh a tam narawh. Rumzaliana erawh insaseng ve thuai thuai turin a chaknain la tlin hek lo a hun hnuhnung a ni ta anga ngaiin a malpui ruh tliak hmawj khawpa an rawn kah lehna chu hup vawng vawng chungin a hnam pui ho hnenah chuan a rilruin ngaihdam a dil mawlh mawlh reng a. Lusei hoin an silai an sawh leh ta maw tihah chuan Singlawia chuan "Thih țhak thlengin aw, tih pahin chempui nen anmahni hualtute lam chu panin a tlan ta. Paihte tlangval ho pawhin rawn zui ve nghalin Zehtet ho nen chuan chem sen nen an insam ta buan buan mai le. Khaw fing chah hun a pelh meuh phei chuan paihte tlangval ho chu dam an tlem tawh hle mai, mahse a kaw tawpa țang an ni bawka an dehkhirh hlawm hle mai
Zing khua a rawn var meuh phei chuan chulai ruam chu a thang hut hut thei hial a ni. Paihte ho chuan inpek mai an duh tawh hle mahse, "Inunaute kan rawn thleng e lo zam suhu tih ri an hriat rual chuan chu aw neitu chu pasalțha Chawngzaua a ni tih an hre chiang hle, Silai rawn puak țhuai țhuaiin Zehtet lam chu an thal ve zawih zawiha chutab chem sen nen ngei chuan chulai ruamah chuan an inbei ta. Chawngzaua leh Singlawia te hma chu a kaw duak duak a ni ber e. Chawngzaua chuan a piah deuha pa lian takin an mi leh sate a sat fhal zawih zawih chu a hmuhin a pan vata Thangkunga pawh chuan hmu vatin hmu lo angin a lo awm der thunga. An han indinchilh meuh chuan an intiat dun hle mai. Chawngzaua nen chuan an inveh ta den den mai a.
Changzaua chuan a ban bul vei lam kak hlawih chu na a ti tih hriat takin a hup vawng vawnga, a hma zawna Thangkunga a mal pui kak duai vanga pen sawn harsa tawh tak, ding sai hlak hlak chu enin, "Vanglai min ti ngai hle mai naua" tih pahin a han veh leh a, hliam tuar veve an ni bawka an fimkhur dun hle mai, Changzaua chuan a chechang thei zawk a ni tih inhre mah se, a ban dinglam chiah a hmang thei si a, Thangkunga ban bul lian țha tlet tlawt chu enin tha hrui a ngah tawk tih a lan reng bakah a taksa len phu loha a țuan ran zia a hriat tawh avangin a fimkhur zual hle, lei țhila a tawlh lai tak nang fuh lo phei se chu Thangkunga hian hliam tuar ve hauh loin Changzaua hi a that thei ngei ang.
Singlawia pawhin Chhuahchawnga chu fimkhur takin a bei zela Chhuahchawnga awm veilam kak ațanga thisen chhuak chu tawp zai reng a rel si lohah chuan Chhuahchawnga pawh a chau tawh hle mai. Mahse pasalțha naran a ni lo miaua inngaihtuah fim hram hramin Singlawia lakah chuan a inveng thei zela Pasalțha tam tak lo hmachhawn tawh veve an ni bawka an fimkhur dun hle mai. Chhuahchawnga mitmeng dul ruih chu Singlawia chuan nuih sukin zawi sapa "Hnehna chu ka ta a ni e" tih pahin a han zuang kanga, a rin dan chuan Chhuahchawnga chuan a lo dan theih țawk țawk chauh a ring tawh kha a ni a. Mahse Chhuahchawnga'n lem a chang tih reng a hre si lo, chutia Singlawia a rawn zuan rual chiah chuan Chhuahchawnga mitmeng dul lap tawh kha rawn danglam thutin hma lamah an lum phei nghala Singlawia țum leh chiah rual chuan a Chem chu an vai puata Singlawia khup veilam chu a ruh keh vek khawpin an sat siah mai chu Singlawia na tuar inthlahdul lai tak chuan a chem chu a chhuk zawngin an vai thla leh puata Singlawia ke dinglam zungțang chu a rawt mam leh nghal zat bawka. Singlawia chu țhingțhi hnawkin a mitmeng chuan Chhuahchawnga chu țhen sawk sawk chungin a natna ti tawp turin a ngena Chhuahchawnga chuan hrethiam vatin "Nang ang renga beih hautak hi ka la hre ngai lo, ka vanneih vang liau liau a ni e, pasalțha pialralah chuan hmelma ni lo a țhian kan nih ngei ka beisei ka ngaisang hle mai che" tih pahin a lu chu a lak sak ta a. A chau lutuk chu bawkkhawp nghal thlawrhin thisen a hlauh hnem bawk nen nikhaw hreloin a awm zui chu a ni ta mai a.
Paihte ho chu puitu an rawn awm ațang khan an phur na a nasa bawk nen Lusei lamin Thangkunga bak pasalțha an nei tawh lo tih an hriat phei chuan an phur zualin an nawr nasa telh telh a. Thangkunga lah chu awm hmuna inven tawp bak tih theih a nei tawh si lo, a malpui ațanga thisen chhuak chu a reh hleithei bawk si lo a, mahse Changzaua pawh a chau tawh hle mai, an kiangah chuan Zehtet tlangval te leh Sengzau tlangvalte pawh chu an insam nuaih nuaih bawka. Zehtet lam chu Changzaua te'n an rawn kah thluk nual avang khan nunna an inchan nasa a, Singlawia te kha Zehtet ho khan kap mahse mei eng pawh chhi ngam lo Singlawiate annih avangin thimthamah kha chuan silai mu a thlawn hnemin an kap thlu tam em em lo kha a ni si a. Changzaua ten an rawn kah veleh tak siah khan a hma zawnga a nawrtu zawk kha a tawlh zawk an ni țan ta tlat mai. Thangkunga chuan hetiang reng ringawt chuan a tlin rei dawn lo tih inhriain Changzaua'n a rawn bawh leh rual chuan a tha zawng zawng hmangin Changzaua dulah chuan a ke hman tlak lam zawk chuan a lo tlawh zawta amah pawh a let nghal tawp bawka. Changzaua na tuar leia a leh reng lai tak chuan a bula an khaw tlangval ding chu koin "khaw lamah let la, nunaute leh Lal chhungkua ten an vaiin khaw mawng lama puk kha rawh se" a ti a chu tlangval kal hnu lawkah chuan Changzaua pawh rawn tho țuih țuihin Thangkunga chuan "A tawp i thleng law law teh ang" tih pahin a hui lauh lauh a, a ke chu na a ti tawh hle a, han pen pui thei pawh a ni tawh lo a ni. Changzaua pawh chuan rawn veh lehin khawvar țan tir chuan chu lai ruam chu rawn chhun engin a rapawm kher mai, tlangval tam tak ruang a let ruma țhenkhat lu bung, ban bul, ke bul tihte thisen lah a luang nasain a bul lawka kawrte tui pawh a sen zul thei hial a ni. Changzaua chuan Thangkunga lamah chuan a chem chu vai puatin Thangkunga lo indan tum lai tak chuan a chem vai chu la leu thutin a chhuk zawngin a vai puat maia mahse, pasalțha Thangkunga tan chuan chu Changzaua chet dan chu lo dan a harsa lo hle Pasalțha Chhuanthanga hnuaia seilian a ni miau a, a indan rual chiah chuan a kut veilam chuan Changzaua hrawkah chuan rek chatin a theihpatawpa nain a hrawk bawk chu a han hmet ngheng maia, Changzaua na ti chuan a chem thlauhin Thangkunga kut chu lak thlak tumin a han beia chu veleh Thangkunga chuan a chem chu vai puatin Changzaua chu dul thler duai chungin a tlu ta. Thangkunga hawi kual vel chuan an mite tawlh mek chu a hmuhin a rilru a na hle maia, a mittui luang zawih zawih chung chuan inbeihna lam pan a han tuma mahse vawi khat pawh pen hman loin a lu hai lutuk chu a bawk ta thlawp a.
Paihte tlangval ho chuan an hruaitu pahnih te an thi tawh tih an hriatin an thin a rim nasa hle mai, kar loah Zehtet tlangvalte chu an inpe ta mai reng a. Paihte ho chuan an vaia hnungkhirh vekin tlangval inpe sawm riat chuangte chu sala man an tum ta a. An pasalțha pahnihte ruang chu zawnin Zehtet pasalțha pahnih let reng chu an zinga pakhat chuan an lu lak tumin a han hnaih rawka mahse an val upa, an hotu en deuh ber chuan lo khapin an hawn theih dawn chuan loh avangin kal san turin a rawn ti a chu chu nikhaw hre loa let reng Thangkunga leh Chhuahchawnga te vanneihna a ni ta.
Zan sawm zet tumpang chal beiseia ram riak Kapthanga te'n hlawhtlimg taka an khua an han luh meuh chuan an khaw chhungah chuan ruang a tamin a rim a chhe hle tawh lehnghala, Kapthanga chuan rang taka an inlam pan vatin an in kang ral vek tawh bula ama nu ngei lo let reng a hmuh rual chuan pan vat vatin a nu ruang rim chhe tawh tak chu pawm kangin a han țap zawih zawih a. A țhiante'n an thlir reng tih a hriat chuan ngaihdam te dil leh hnuhnawhin ro an han rel a tlangval sawmhnih rual an ni bawka panga chu khaw dai lamah biru an awm leh awm loh enin an kal anga, a dang zawngin ruang an lo phum dawn a ni.
Kapthanga chuan a tumpang chal kah lu chu melh vang vangin a nu ruang chu vuan chungin "Ka nu, tumpang chal chu ka lo hawn a sin mawle aw, ka kah ngei theihna'n duhsakna min hlan a ni lawmni" a han ti vawng vawnga. Tlangval chhuakte chuan an khaw lu lama pukah khan biru hman an awm ring in an pan nghal vata, an han thlen chhoh meuh chuan mipui biru hman chu an rin ai daihin an lo tam mai, an lawmin an han inhmu leh chu an mittui a luanga a țhen an nui bawka. Zikpuii chuan chung tlangvalte chu Kapthanga chanchin a lo zawt nghal mawlh mawlha anni pawhin khaw lamah a awm thu an lo hrilh ve bawka. Ti chuan an khaw lam pan chuan an kal ta, khua an thlen a Kapthanga'n Zikpuii a hmu chu a lungchhe zual hle mai. Zikpuii pawh chuan Kapthanga chu a lainat hle bawka. Kapthanga chuan intihpachan a ngai tih hriain chanchin a han zawta Lalpa awmna a han zawh chuan tuma'n chhan ngaihna an hre hauh lo mai. Kapthanga rilru chu hlauhthawnna in a khat nghala, biru zinga tel ve an khaw tlangval pahnihte chu anmahni runtute a han zawta anni pawhin an hriat ang ang an hrilh hnu chuan Kapthanga chuan Zehtet lam pan vat a țul tih a hre ta. Mipui ho chu puk lamah lo biru rih tur leh amah leh tlangval sawmin Zehtet an pan tur thu leh, an rawn let leh ngei tur thua tiam chungin, an Lalpa zawng pah tura kal anih thu sawiin chumi ni la la chuan an chhuak ta nghal a.
Chhuahchawnga mar chu Runthanga chuan a han zawn ngar ngar hnu chuan a hmu ta hram mai, thaw huaiin "khaw lamah kal pui vat a ngai a ni." a ti a Thangkunga meng dul lap chu panin "Thanga nang pawh khaw lamah lo awm la, i dam hun kan nghah chuan intlangvalte an tang rei lutuk dah ange, Darkawn lam pawh chu dam chhuak an awm tak mialah kan va tlawh kawi bawk ange" a ti a ti chuan tlangval sawmnga chu Thangkunga leh Chhuahchawnga zawn chungin an let leh ta a. Midang zawng chuan ruang chu hmun khata dahkhawmin phumna'n hun an ui bawk nen an hal ral ta ringawta. Bualthleng tlangval khaw nghaka tlangval sawmnga vel an dah tih loh leh Zehtet lama sawmnga vel an let tir leh tiam lohin Paihte ho umzui tur chuan zathum rual zette chu an chhuak ta nghala. Paihte ho chu an hmanhmawh bawka an kal chak phian mai leh nghala an pasalțha an zawnte lah chu Zehtet khaw ram chhung ngeiah chuan an lo phum fel diam tawh bawk si. Zan hnih an umzui hnu pawh chuan an la umpha mai thei lo. A nithumna chhun chaw fak a luite kianga an țhut țhap laiin Runthanga te chuan an piah lawka silai puak ri an hre ta, chuveleh silai dang a rawn puak leh zawt zawt bawk nen Runthangate chuan buaina enge maw tak a thleng tih hriain hmanhmawh takin an va pana, an kal mek lai chuan silai ri pawh a reh ta. An va thlen meuh chuan Kapthanga leh tlangval pariatte chu Paihte ho mi za vel zet chuan an lo hual bet vek tawh a lo ni. Runthanga chuan silai dahin chempui nen a pan ta nghala Chawiliana leh Thansangate țhianthumin a hnung dawlin tlangval dangte chuan umzui nghal bawkin an insam ta nuai nuai mai le, paihte ho chu a tlem zawk annih bakah pasalțha nei tawh lo anni bawka kar loah an chimih ta vek mai renga Kapthanga thinrim chu a inhrosa kuk kuk reng maia, a nu a chana an Lalpa lah an khaw dai lawkah lubungin a let reng bawk nen a rilru a na kher mai. Runthanga chuan khap hram hramin Darkawn lam chu an vaiin an pan leh ta. Darkawn lama mipuite chu Zehtet lam panpui a țul tih hriaiin tlangval sawmhnih nen an pan tir ta a. Midang zawng erawh Darkawn khaw daiah chuan inkulhin ruahmanna an han siam zung zunga Darkawn lam ațang hian pumpelha kalin Sengzau khua chu zan nga lekah an thleng thei dawn a ni. Chu lamah chuan Thansangate țhian thum leh Kapthanga hoin tlangval zahnih an kal anga Rengbawk khua chimih turin Runthanga leh Chawiliana hoin tlangval za an kal ang. Ral khat ațangin Kapthanga chuan a seilenna, fahrah anihna avanga hmuhsitna tinreng a tawrhna leh a neih chhun a nu vanga a lo hlim em em țhinna khua ngei chu thlirin a mittui a tla zawih zawih a, Sengzau khua chu thlen vat a chak kher mai. A rilru chu a fim lo tih hriain Thansanga chuan hma a hruai a, hmanhmawh takin a kalpui bawka.
Zan nga an riah hnu lawk chuan Sengzau khua chu ral khat ațangin an thlir reng tawh maia. Mahse an rin ang ngawt an ni hauh lo, paihte tlangval dam chhuakte kha an lo mawl bik hauh lo mai, khaw lama chanchin thlen turin an lo intir hman tlata pasalțha Ginliana chuan chanchin a hriatin an tlangvalte chu umphak thut an ni thei tih hriain khaw lama tlangval zahnih rual awm te chu ralveng turte ruatin khua chu an lo veng uluk kher mai. Thansanga chuan ralvengte tukdawl phawt anmamawh dawn tih hriain inkhuarna remchang an han zawnga an duh ang an hmuh rual chuan che nghal sawk sawkin Kapthanga chu rilru fim put tir vat a ngai tih hriain engmah a tih phal loin an țhut hahdam tir char chara, buk an han sa zo chu ei relna'n a la hma deuh bawk nen Dammawia leh Liansanga chu sapel tura chhuakin midang zawng chu buk chhungah chuan titi khawchang sawiin an tawm țhapa Kapthanga, a zan mut mang lohna rei tawh leh taksa chau tawngkhawng tawh chu tuar ngang loin rei loteah a muhil ta siai siai a. Zanriah ei dawnah chuan kai thoin a hmel pawh a rawn pangai ta deuha zanriah an eikham meuh chuan ro an rel nghal ta sap sap a.
Kapthanga chuan a ruala kal ve an khaw pasalțha tuaitirte Hmingthanga chu enchhina hun țha a ni tih hriaiin Thansangate chu a hrilh ru a, anni pawhin a țha dawn riaua an hriat takah chuan Liansanga bulah tlangval pahnih dang nen an kal anga khaw chhim lama ralvengte an tukdawl dawn a ni. Silai hmeh puah ngam anih loh avangin fimkhur thiam pawh a ngai hle dawn a ni. Midang ho chuan pawl hran țheuh neiin pawl tinah chuan tlangval panga zel an awm bawka khaw luhkhan pali a awma an indaih chiah bawk tlangval dang zawng chu khawdaiah awmin an lo nghak thung dawn a ni. Leng hawn ar khuan hnu rei vak loah chuan an chhuak ta a, Liansangate'n an bitum turte awmna an va thlen chuan thawm dim takin an han pan țhem țhema ralven buk chhunga paihte tlangval titi ham ham thawm pawh chu an hre chiang sawt hle mai Liansanga chuan Hmingthanga chu enchhin a chak avangin ral ven buka awmte engzat nge annih chian turin a tir ta a, Hmingthanga che vel zei thlarh a hmuh chuan Liansanga pawh chu nui sukin "U Kapa chuan a sawi sual lo e" ti rilru chungin Hmingthanga rawn let leh lam chu a lo chhawn vata a lo rin lawk ang ngeiin mi panga in ral an veng a ni. Liansanga chuan "Țhianteu zam hauh loin aw, silai an hmet puak hman anih vaih chuan kan chan a chhe hle dawn a ni, rang taka kan chet a ngai dawn pahnih saw keiin ka bitum anga, nangni'n pakhat țheuhin aw" tiin hma a hruai nghala. Ralven buk kiang lawkah chuan an vaiin an thleng phei ta maw tihah chuan Liansanga chuan a hruaite chu zaizira biain rang mangkhengin buk chhungah chuan zuang lutin pakhat amah hnungchhawn tu ringruh chu a țhuai tliak nghal rawp a Hmingthanga chuan tlangval pakhat silai chuh mek chu a lu a sah lir sak nghal tawl bawka. Tlangval pahnih rawn lut ve pawh chuan a la dam pahnih chu rei loteah an tuk dawl nghal mai bawka. A la dam awmchhun paihte tlangval pakhat hlau lutuk chu paihte țawng leh lusei țawng pai zet hman pawlh nawk chungin ngaihdam a dil chula, zun a cheh zawih zawih bawka. Hmingthanga chuan paihte țawnga biain khuaa tlangval awm zatte an hriat chian hnu chuan ralven bukah chuan phuar hlawmin khaw dai lam an pan san ta a.
Khaw dai an va thlen chuan midangte pawh lo awm vek tawhin an hlawhtling hlawm hle. Mi an mut reh tawh avangin fimkhur takin khaw chhungah chuan an lut ta dam dama. Zawlbuk lo awm hmasa ber chu an han bel chianga a lian kher mai, a chhung lah chu a ruak huai lehnghal, tlangval awm zawng zawngte chu zawlbuk dangah an riak khawm tih an hre nghal maia ti chuan zawlbuk dang awmna lam chu an pan leh ta a. Zawlbuk chhunga paihte tlangval hnar ri bawrh bawrh thawmte chu an hre ta, Dammawia leh Hmingthanga chu Zawlbukah chuan vawi thum lutin silai tam thei ang ber an rawn la chhuak ta țhin a Tlangval ho chuan a huaisen thlak an tiin thaw dep depin an lo thlir reng ringawt maia silai fung sawmthum zet an la ta maw tihah chuan zawlbuk bawhbelah chuan silai an chhuang ta far mai. Kapthanga chuan tlangval sawmhnih hruaiin Lal in an hual bet hmak bawka. An inpeih ta maw tihah chuan Thansanga silai ri chu a khawk ta rum rum mai, chu veleh silai dang pawh chu rawn rik chhunzawm nghalin Sengzau khua chu a ri rum ruma Thansanga chuan a bula Hmingthanga ding reng chu nghawk zauhin "Hminga tlangval panga hruai la, khua hi hal rawh u" a ti a, Hmingthanga pawhin hmanhmawh takin a bul hnaia mite hrilhin khaw hal turin an kal chhuak ta nghala. Thansanga chu a țhiante'n silai an kah rik rum rum lai chuan tawlh hnungin zawlbuk tuala mei chhehna la khu rum rum chu chhem vam sawk sawkin a alh ta maw tihah chuan Zawlbuk chu a hal ta hmiah maia. Paihte tlangval ho chu a tho hmasa sa an thal phuk phuk a ni mai, mahse kah thluk vek sen ni bik hek suh chem sen nen an rawn bawh ta. Hmingthangate pawhin khua chu veng hrang hrang ațangin an rawn hal alh zuai zuai bawka Sengzau khaw tualah chuan nunau mangang rak thawmte naupang țap ri te leh na tuar thawmte a ri nasa kher mai. Kapthanga'n Lal inkawngka a pawt hawng chiah chu mi pakhatin silaia a lo tinreng chu hmu hmanin a lum lut nghal vata silai puak țhuai erawh chuan a hnunga tlangval ding nunna chu a la chiang hle. Kapthanga chuan silai kengtu tlangval lian țha telh tawlh chu dinchilh thutin a chem fawng chuan a hnarah a chhu bur maia chu pa pawh chu thal nghal țhuaiin nikhaw hre loin a awm zui nghala Kapthanga chuan Sengzau Lalpa Ginthanga chu man vatin a nghawngah chem a chuktuah nghal zat bawka Ginthanga chuan "Pasalțha Lal meuh nunna chu i hlut ngei ka ring" a han ti a Kapthanga ve thung chuan "I tlangvalte i hrilh zawk tur a ni a sin kha thu kha. I tlangvalte'n kan Lalpa lu chu an la a sin" a han ti a Lalpa Ginthanga chuan mak a ti kher mai "Pasalțha khawngaihin ka nun zuah hram rawh" a han ti tham țuaka Kapthanga chuan leihkapui lama hnuk phei sawk sawkin "I khaw kang ral mek hi i thlir dun phawt teh ang" a han ti a Lalpa Ginthanga chuan a khua, paihte ho khuaah chuan khaw lian filawr ber, khaw ropui em em kang mek chu a hmuhin a mittui a far zawih zawih a. A rilru a nain a thil tihah a inchhir kher mai. Tlangval dangte chuan a nupui leh a fanu pasalțha Singlawia nupui, a pasal rammut avanga an inlama awm mek chu an rawn țham chhuak bawka. A fapa Ginliana nikhaw hre lo a mu reng chu an phuar hlawm bawka. Paihte tlangvalte chu an tawlh zela a tawpa tawpah chuan an inpe ta nge nge a. Thansanga chuan khua chu enin inkan dan te chu a han en chianga, paihte tlangval ho hnenah chuan "In khaw kang mek hi țhelhna hun țha ka pe ang che u, hmanhmawh takin che rawh u" a ti a chu veleh paihte tlangval ho chuan hmanhmawh bak lengin mei chu an țhelh ta a. An țhelh zawh meuh chuan khawfing chah hun a thleng lek lek tawha Thansangate chuan khaw mipui ho zawng zawngte chu lal mualah chuan khalh khawm vekin Thansanga chu lal in leihkapuiah chuan lawnin Lal in chhunga lo țhu kun tlawk tlawk Pasalțha Ginliana chu melh zawkin Lalpa leh a nupui leh a fanu chu a han melh leh zauha ti chuan mi pui lam hawiin "Kei hi Pasalțha Thansanga ka ni. Zaninah hian phuba la tura rawn kal kan ni. In pasalțhate ral hrat zia leh ropui zia hi kan lo ral hriat vein kan lo ngaisang ru ve em em țhin. Kan hmelma en ngai hauh lo che u. Mahse nangni erawh chuan ka pa min thahsak avanga nasa taka kan lo tih ralțit tawh Hmar ho puiin hmelma beihin min rawn beia hetiang dinhmun hi kan thleng ta a ni. In pasalțha Changzaua leh Singlawia te chu kan u Zehtet pasalțha Chhuahchawnga leh Thangkunga te hmaah an nunna an hloh tawh a ni. Tin in tlangval rawn tirhte pawh damin inhmu tawh kher lo ang. Kan duh chuan salah hruai cheuin hrehawm takin kan nghaisa thei che u. Mahse, lusei pasalțhate kan ni a, chu vangin khaw var rualin khua hi kan chhuahsan leh nghal ang. "a han ti a Kapthanga chu rawn ding chhuak ve lehin" Darkawn pasalțha Kapthanga ka ni a, fahrah ka ni bawk, ka nu kha ka neih chhun a ni. Intlangvalte khan ka nu kha an thata, kan Lalpa lu pawh an la bawk a ni. He khawvela ka neih chhun ka nu leh, he khawvela ka tana pa nih tlin em em tu kan Lalpa kha nang ni vanga thi hi a ni a sin" tiin mittui far zawih zawih chungin a rawn sawi leh a.
A tuk khawvar rual chuan Sengzau tlangvalte chuan khaw chhunga ruangte chu an thian faia Thansanga te pawh khaw chhuahsan tumin an kal dawn ta. Thansanga chu Ginliana chuan rawn au dingin an han inmelh vang vanga Ginliana chuan "Kan thil tihah kan inchhirin, a pawi kan ti hle. Tunah chuan khaw tenau deuhte thleng pawhin min zuam tawh ngei ang. Kan inrawlhna tur ni miah loha kan inrawlh avanga thil thleng hi a pawi ti hle mah i la ka makpa leh kan pasalțha chhuanvawr thihna hi a thlawn mai a a riral hi ka phal thei ngai lo a ni. Tunah chuan bei let tur cheuin kan chak tawk rih lo a mahse leido kan ni tih erawh kan hre reng dawn nia" tiin a inher san hmaka. Thansanga chuan "I khua leh tui muantu pasalțha lo ni chhunzawm zel la, kan la intawng leh ngei bawk ang" ti sapin a inher ve ta bawka.
Runthanga te kal ta pawh an che na kher mai pasalțha leh tlangval awm mumal lohna Rengbawk khua chu awlsam takin an hneh ta mai renga khua chu hal dar vekin, an tana hnawksaka rawn awm leh ngam tawh hauh lo turin an siam a ni. Anmahni bei let tu apiangte chu an thal mawlh mawlh a, Rengbawk Lalpa chu intiamkamna țha tawk tak neih tirin, an tana hnawksaka a awm leh anih chuan rawng taka an chet leh tur thua voin an kal san a, Rengbawk ho chuan khaw thar an kai ngei a ngai ang, mahse kai turin tlangval an nei si lo, khawchhung thenfaia khaw thar kai kher ngai an ti lo anih pawhin khaw chhung thian faia hna thawk tur ber an tlangvalte an thi deuh vek si. An bei a dawng kher mai.
Innghahkhawmna tura an sawi Darkawn khaw ram china an han inhmu khawm leh chu an hlim dar dar kher mai an hlawhtling bawk nen muang marin khua an pan ta a. Kawng lakah chuan sa pel pahin hlawhtlin pawh an hlawhtling kher mai. Hmingthanga chuan Sakhi chal țha zet mai a kapa, an lawm pui dar dar hle. Thansanga zukchal kah leh Dammawia Sanghal kah te nen an puarin an tlai kawngtluan tlang hle. Zan riat zet an thang hnu chuan unau hmelhai velah khaw kawtchhuah chu an thleng ta. Runthanga chuan bawhhla a han chham vang vanga silai chu a kap puak dur bawka chu veleh midang te chuan rawn kap puak ve nghal dur durin silai ri chu a inlawn ut ut a. Khaw chhung lam mite pawhin rawn chhawn vein, nulate chuan zanriah eikham ațangin arkeziak an buaipui nghal sawk sawka zawlbuk lama tlangvalte pawhin silai inkahsiakna'n chu zan chu hmangin an hlim dar dar hle. A tukah chuan khua chu an lut ta, mi lu hawn lo mahse silai an hawn hnem bawka an hlimin an lawm dar dar hle mai. Thansanga te țhian thum chu nula ho chuan an melh nasain zu tuitling lah tulh tu an tawng tam narawh e, khaw mi leh sate chuan an lo lâwm hle a mahse an tlangval tam takin nunna an chana an pasalțha pahnih Chhuahchawnga leh Thangkunga te lah khum betin an na bawk si nen lawmna ruai țheh zai pawh an rel thei lo a ni.
Runthanga chuan Chhuahchawnga leh Thangkunga te chu tlawk kual vat vatin chanchin a han hrilh kuala Chhuahchawnga te pawhin an lawmpuiin kal ve an chakzia an lo hrilh ve tlut tlut bawka. Lalpa Puithanga inah chuan ro an han rel a, Zehtet lama awm duh zawk Darkawn mi leh sate chu chhungkaw sawmthum zet an ni Lalpa Puithanga pawh a lawm hle mai. Zan lamah Kapthanga chuan Lalpa Puithanga chu a ruka be falin Zikpuii chu a nu leh pate an awm ve tawh loh thu leh an awm loh chhan zawng zawngte hrilhin Lalpa Puithanga hnenah chuan inneih vat mai an duh tih a han hrilh a, Lalpa Puithanga pawh chuan "Bualthleng lam ho va haw phawt se Chawnga te hi han dam țha chho deuh se, rei nghah a ngai lo ang, chu mi hma chu ka inah hian awm rih u la zawlbukah i riak ziah thung tur a ni" nui vur vur chunga tiin a lo phur pui hle a, Kapthanga pawh a lawm kher mai. Runthanga leh Lalpa Puithanga chuan silai te chu insem dan tur an rel fel hnu chuan Kapthanga chungchang chu an han sawi dun leh a, Runthanga pawh chuan țha a tiin chhungkaw dang nei tawh lo veve an ni bawk nen a awm a tiin an inneih hunah pawh rawn kal ngei an tum tur thu sawiin a tuk lamah chuan Bualthleng lamah chuan Darkawn mi leh sa chhungkaw sawm velte nen chuan an haw ta a. Darkawn pasalțha Kapthanga kha tunah chuan Zehtet pasalțha Kapthanga a ni ta. Tin, Darkawn pasalțha tuaitir, theihna nei sang tak Hmingthanga pawh nakin lawka BUALTHLENG MAWITU la ni mai tur niin Bualthleng lamah a chhungte nen an inbengbel ve dawn bawk a ni.
Favang khaw thengthaw nuam tak leh hringfate tana chenfak awm tak zing ni chhuak chuan Zehtet khua chu rawn chhun engin hram thiam va tinrengte'n khumlai zawla zan lama chaw zawng chau chhungkaw pa berte thleng chuan rawn kai thoin, tuala nula buh deng ri leh naupang tlan kawi zawr zawr thawmte nen, inhnuai lamah vawk rilțam an lo ngek rawng rawng bawka. Lalmual lama arpa chal țha tawh tak a siak pawh naupang kut zungte aia sei mah tawh tur pawhin a lalna ram chu fangin a khuang al al bawka.
Zikpuii zing tho chuan tuium khirhin tuikhur lam panin a kal thla nghal vawk vawk a, tuikhurah chuan nula dang pawh lo awm nualin thal pahin titikhawchangte an han sawia an nui nasain an hlim ve hle, chhun lama thing phurh ho intiamin Zikpuii pawh a haw ve hnak hnak a, Lal in a thlen hma deuh chuan Lal in lam pana tlangval pahnih leh nula pakhat lo kal chu ral khat ațanga hmuin a han en vang vanga chutah "Awi ka rei" tih pahin a tui um chu nghat sawk sawkin chung mikhualte lamah chuan a tlan ta vawk vawk a.
Zikpuii leh Darkawn lalfanu Zoliani an han inhmu chu khawlai pawh sawi thei loin an țap dun rawih rawih maia, Kapthanga zawlbuk riak haw lamin chutia khawlaia Zikpuii leh Zoliani inkuah chunga an lo țap a hmuh chuan hmanhmawh taka Lal in lam panpui vat vatin Lalpa Puithanga pawh chuan a ngaihna a hre lo hle. Mipui lah chuan Lal in lamah an beng an rawn chhi ngun bawk si a Kapthanga chu chhuak vatin mipui ho hnenah chuan Zoliani chu Darkawn Lalfanu anih thu leh an khua paihte hoin an rûn hma lawka a pa unaupa te tlawh tura a zin thute chu a va hrilh ta sawk sawka.
An lungchhe zualpui a reh hnu chuan Zoliani chuan "Kan khua an rûn thu leh ka pa thih thu ka hriat rual rual khan rawn haw ka duh nghala mahse ka patea khan ka pa ber a thih takah chuan an khaw lama awm mai tura min duh thu a sawia, mahse kei chuan dam chhuak tlem a zawng an awm ngei ka rin bakah U Kapa avang hian Zehtet leh Bualthleng lamte hian a dam chhuakte inrawn tuamhlawm ngei ka rin avangin ka patea hnenah chuan he lama rawn kal ka dila ka patea chuan phallo hle mah se ka laizawn Zikpuii a dam mial takah tiin ka rawn kal lui a ni. Zikpuii ka hmuh khan ka lawm lutuka ka insum zo hman ngang lo a ni " a han ti a Lalpa Puithanga chuan" E khai fanu thar ka neih belh tihna anih chu, i patea te khaw lama Zikpuii nen haw leh induh anih chuan ka hnial hauh lo che u, mahse hei chen rawn kal tawh inni a he Lal inah hian i tana nu leh pa ni turin kei leh ka nupui hi kan awm reng tih i hre dawn nia"a lo ti ve bawka. Zoliani chuan a patea chu zah hle mah se amah lo ngaina em em țhin tu, an khaw mi leh sa tam tak te bakah unaunu dik tak ang chiaha a ena a lo ngainat tawh Zikpuii kianga awm chu thlangin amah rawn thlahtu tlangvalte chu a haw tir leh ta a.
Hun leh ni a liam zela Zoliani pawh a tlangnelin nuam a ti ve ta hle mai. Zikpuii leh Kapthanga te chungchang a hriat phei chuan a lawmpui ve em em a, chutih rualin Chawiliana chu a hre chhuak nawn zing em em thunga, Lal in lama Pasalțha Chhuahchawnga emaw Thangkunga an rawn lawiluha an titi kal velin Chawiliana hming an han lam rik te hian nuam a tiin a lo hlim ve em em țhin. Mahse, Chawiliana chuan nupui a neih tawh te a ring rum rum țhina han zawh lah tih chi niin a hre bawk si lo. A chang chuan rinawm taka awm intiamna thu Chawiliana'n a haw dawna a sawi kha hre chhuakin a vawn nun ngei ring țhin mah se, pasalțha khual kai Chawiliana te chu an to dan tur zia a hre ve vek bawk si.
Ni a liam a, Chhuahchawnga leh Thangkunga te pahnih pawh hna thawk thei tur khawpin an taksa a chak țha leh ta tihah chuan Bualthleng lamah chuan Lal Puithanga chuan palai tirin Kapthanga leh Zikpuii te chu suih zawm a tum ta. Lal inlama khawsa veve an ni bawka Lalpa Puithanga te nupa lah an fapa neih chhun chàn tawh an ni bawk nen fa ang chiaha an ente an ni bawka an phur dun surh surh hle. Palai a tirh ațanga ni hnih hnu lekah Bualthleng lam ațang chuan mikhual an rawn thleng ta țuk țuk maia. Lalpa Rengliana leh Runthanga hoin an thawm pawh a rawn țha tlang hle mai. Chawiliana hawi kual velin Zoliani a hmu thut chu biak a chak ngei mai, a chanchin hriat zui tur awm ta hauhlo hmu leh a ni miaua, mahse han biak ngawt a chi si loh. A khat tawkin a melh a melha, mak a tiin a lawm bawk si. Zoliani lahin chutia Chawiliana'n maktih hmel taka a rawn melh zuk zuk țhin a hmuh chuan hmeichhe â tih takah a hlauthawng zualin Chawiliana chu nupui nei tawh amah ahmuh leh avanga inthiam lo leh hnuhnawh angah te a rilruin a han puh ringawta, mahse Chawiliana'n a rawn nuih tak vur vurah chuan nuih let seihin a rilru hahna chu tlemin a zia ve ta deuh.
Zan riah kil lai chuan Lalpa Puithanga chuan tun hnai lawka a fa a neih thar pathumte chu zilh malh malhin thu țha tinreng afaha Zoliani pawh nula anihna anga a chanvo hlen tur leh lal fanu anih avanga chapo lo turin a han fuih malh malh bawka. Lal Rengliana chuan "Lalpa, i fanu thar hi i kawl rei hauhin ka ring lo" a han ti vei rawka Zoliani chuan rang zetin "I zak lo U Reng" a lo ti a Lal Rengliana lah chuan "Mi han koh dan chuh" tiin a han fiamthu a Zoliani zak chu a sen țan țan maia. Kapthanga chuan "Ni ngawt mai khaw kar kawng lah a hnai tawh em em mai si a" a han tih chuan Zoliani chuan sei zeta a lei rawn chhuah khumin a kham hmaka Lal nu chuan Kapthanga chu hauin "Puar pawh a puar hman nang, Chemte hawh teh rawn kil țha leh tawh, kan Kapthanga hi zawng a kam a tam mah mah țhina ni" a han ti a Lalpa Puithanga chuan Lal nu chu ngai pawimawh lo zetin "Chu Zotei lungdumtu chu tunge mawni le mi han hrilh ve teh u" a han ti a,Lal Rengliana chuan "E khai Lalpa Zotei lung reu reu kan ti awilo zo vek mai dawn e, tuk țhuan eikham lamah Lal inah ro rel an rawt tak kha maw, in lo chik deuh hlek chuan inhre thei maiin ka ring" a han ti a Zoliani erawh a titau bar thunga.
Lal inlamah chuan khaw hnih pasalțha te chuan ro rel in Lalpa Puithanga sawi tawh ang ngei khan khawtlang hrai an tum a ni. Lalpa Puithanga chuan Chawiliana leh Zoliani inmitmei dan chu man vatin Zoliani en pah chuan a mitko san uk uk chungin a nui vur vura Zoliana titau laklawh lai bawk si nuih hreh si chu a sen tawn tawn maia. An ro rel an zawh hnu lawkah chuan Zehtet tlangvalte chu ko khawmin pawl hnihah an han țhena an hma lawka inbeihna muala nunna chan an tam em avangin rawlthar deuhte nen anvaiin tlangval zahnih chuang awrh chauh an ni bawka ramchhuak tur za thlang chhuakin, a bak zawng khaw hmun nghakin an hnutchhiah dawn thung. Pawl khatah chuan Chhuahchawnga, Runthanga leh Chawiliana bakah Hmingthanga te an awm anga lehlamah Thangkunga hoin Thansangate țhian thum an awm thung dawn a, Lalpa Rengliana leh Kapthanga erawh khaw lamah an lo awm thung ang. Chu mi ni chu inbuatsaihna'na hmangin ram vak turte chuan an mamawh țul ang angte chu lakkhawmnan hun an hmanga, zan lamah chuan Chawiliana leh Zoliani pawh leihkapuiah țhu dunin tawn ni rei lo tawn lohni lah rei si lo ti kur duai duai țhin pahnih chuan an hmangaih tiamthu biahzai nem chu tiam nawn lehin Chawiliana pawhin a rang thei ang bera palai tirh a tum thute tiam vein chu zan chu hlim takin an hmang dun a.
A tukah chuan ram vak turte chu an chhuak ta dum dum a, zan nga hnuah khuaah luh tur tiin nilenga an kal hnu chuan riahbuk sualna tur remchangte an han zawng leh tete a Chhuahchawnga leh Runthanga te chuan Hmingthanga che vel chu chik taka enin a rin tlak an ti hle a, nakin lawkah khual kai hial khawpa pasalțha a la nih ngei pawh an ring dun hle, an ni a uaithla lam an ni ve țan dawn tawha, nakin lawka an hmun ruak rawn luah thei tu tur an han hmuh belh chu an lawm hle mai. A tuk nilenga an vah hnu chuan an tum ang ngawtin thil a kal lem lo hle, Runthanga saza chal kah bak chu sa lian tham lak an la nei tlat lo, mahse ni li chhung hun an la neia an bei erawh a la dawng lutuk lo. Thansanga te erawh a ni khatnaah an hlawhtling nghalin nuam an ti tlang hle maia, Thansanga Sazuk kah chal țha zet a ki pawh hreu bum lehnghal chu a ropui an ti tlang ngei mai. Liansanga Sanghal kah a ngho pawh themtleng chen zeta sei tawh nen chuan an han hung dun rap maia hmuh an nuamin tlangvalte chuan an inchul chhawk chhen maia.
A tukah chuan buk lamah awmin an sa kah te repna hun leh hahchawlhnan hun an hmanga a ni thum ni ațang chuan an vak chhuak leh țan ta a. Chhuahchawnga te erawh sa dang an lak belh leh ta hauh lo maia, an bei pawh a dawng ru rum rum hlawm tawh hiala, mahse an hruaitute tumruhna avang chuan tlangvalte chuan an zui zela, chawhma zet an vah kual hnu chuan sih lian țha tak maiah an chhuak ta hlawl mai Chhuahchawnga chuan mak a tiin chutianga sih lian an khaw ram chhunga lo awm ru khiau mai chu a lawm phah hle nghe nghe. An han bel chianga sa hnu lah chu a chiar dup lehnghal maia. Ro an han rel zung zunga an mahni pahnih bakah Chawiliana leh Hmingthanga leh tlangval pathum dang telin sih chu an chang nghal dawn a ni. Midang zawng buk lamah letin he lam hnaihah buk an rawn sawn phei dawn a ni.
Runthanga chuan a tumpang hnu hmuh chu a han en vang vanga nimin lamah sih a tlawha vawin lamah erawh a la tlawh lo tih a hrethei ta maia, a rawn tlawh leh ngei ring chungin țhangte a han dawh sawk sawka ti chuan an chang ta țhapa, mahse beisei angin thil erawh a thleng tlat lo, mahse luhlul chhuahin an chang lui ve tlat bawka, behliang hmun hun anih meuh chuan an nghah ngat ngat man an hmu ta.
Runthanga chuan Chhuahchawnga channa thlang lawka hnim che leh laih laih țhin chu uluk takin a en khiaua tlip lah an tam narawh. Tuibur hmuamda vel zet an nghah hnu chuan Tumpang chal țha tak mai chu a rawn lang ta, a kiah chuan sar a zam kalh mai lehnghala ngeng ngulha rawn kalin sih chu a rawn intineitu hle mai, sa tenau lo awm ve te pawh chuan an hlau a ni ngei ang le an inthiar fihlim san ta sawk sawk a. Chhuahchawnga chuan Runthanga chu a khup veilama kap turin a han ti a, amah chuan a khup dinglam a tum thung dawn a ni. Tumpang chal sih tui dawt mek chu a khup hmalam a pahnih hniha ngenmuin a rawn den takah chuan a awp rawp maia chutah a tho chhuak leh chiah chu Chawiliana leh Hmingthanga bakah tlangval dangte ngenmuin a lu an rawn verh leh tak siah siah takah chuan tumpang chal meuh pawhin a tuar zo lo hle mai, a awn ruai ruaia chu sih kamah chuan a thal ta tawp maia, an zu kal hnaih chuan a lo la meng kuaua a la khap fuk fuk lehnghal Chhuahchawnga chu a hnuk chhat tura an tih tlat avangin lawm takin chu salian nunna chu a ti tawp ta a, chutah a ke lehlam pang hlangkaiin hlado a han chham vang vanga silai an han inlawn ut ut mai chu an hlim tlang ngang mai.
Tlangval dangte nen an han inhmu khawm chu an lawm dar dar hle mai, nikhat hun an la nei bawka sa tenau deuhte pawh la mah i la a pawi tawh lo ang tiin buk lamah an inthiar phei ta a. A tuk lamah tlangval ho chu an duhna lam panin an chhuak a Chawiliana pawhin Hmingthanga chu hruaiin sih lam bawk chu an va pan leh a, lo sul haw hun vel anih meuh chuan tlangvalte chuan sa tenau deuhte pawh an rawn hawn ve zut mai a, Chawiliana leh Hmingthanga te Zukchal kah mawlh chu an chung enin a mawi an ti tlang hle mai. Sa an han chan ho mawp mawpa an ri hulh hulh maia, zan lamah rep fip leh vekin a tuk lamah chuan khaw lam panin an haw ve ta. An rit tlang bawka an kal sawt lo hle mai, unau hmelhai hun velah kawtchhuah thleng hramin Chhuahchawnga chuan tumpang hlado ngei mai chu a han chham vang vang maia, chutah a silai kap puak durin midangte chuan an lo chhawn ve bawka. Midang chuan hlado rawn inchham chhawk vein an hlawhtling bawka an thawm pawh a na hle mai. Naupang an rawn tlan khawm țak țaka salu chu zawn inchuhin an rawn ri nak nak bawka ti chuan khaw lam panin an kal ta. Lal in an han thlen chuan Liansanga sanghal kah lu leh Thansanga Sazuk lu nen Dammawia Sakhi chal zet lu nen, salu te chu an han hung tlar țhap maia Lalpa Puithanga leh a khuaa kum upa lam ho chuan mawi an tiin an en duh hle, a țhen lah vanglai ngaia lo inhru ru leh zauh zauh țhin an awm nawk bawka.
Kapliana te inneih ni chu a ropuiin Lalpa Puithanga berin fa atana a lak an ni bawka a tluka ropui a awm tawh kher lo ang tih tur hial a ni. Zan lamah chuan Chawiliana chuan Lalpa Rengliana chu kheuh hrang vatin Chhuahchawnga te inlam an pan duna an zu thlen chuan Runthanga leh Chhuahchawnga bakah Thangkunga te chu lo țhu țhapin Chawiliana te an thlen takah chuan Țhasangi chu pawn lamah chhuakin a fapa Lianmawia pawnto chu hmuhnawm ti takin a thlir ta a. Inchhung lamah chuan Chawiliana'n a duh tawk a sawi hnu chuan an ni pawh ruahmanna țha tawk tak siamin an țin darh ta a. Zan hnih an han riah leh renrawn hnu chuan haw a tum ta. An haw dawn zanah chuan leihkapui lamah Chawiliana leh Zoliani te chu insiriala țhu dunin an inngaih tur zia thute an infah tawn mawlh mawlh a, inchhung lamah erawh Lal Rengliana te ho chuan Lalpa Puithanga hnenah chuan Chawiliana tan Zoliani chu an dil ta rawih maia, engkim lo hrethiam sa vek a ni bawka Lalpa Puithanga pawhin ui thei anih loh zia inhre chiangin tun tutuah ni lo chapchar awllen lo thlen hunah tiin thu an dah ta a. Chawiliana pawh a hlim kher mai, Bualthleng an han thleng te chu a nu Țialthangi chuan a mizia chu a dang ta riauin a hriaa a hlim hmel ta lutuk chu a ngaih a țha lo zawk hial a ni. Thansanga leh Thangliani te lah chuan engkim hrethiam sa vek an ni bawka an chhaih awl lo lehnghal vei nen, an unau thum chuan an intin uaih uaih reng fo a ni.
Țialthangin thil awmzia a han hriat chuan a lawmin a fapa in Darkawn lalfanu a han nei thei mai tur chu a chhuang em em a, a mittui tla chu a fate hmuh tir loh tumin a hru ru zauh zauh va, zan riah an han kil lai chuan Chawiliana hnenah chuan, "Hei, taite, nang chu kar lovah lalfanu nupuiah i nei mai dawn a, mahse hre reng la ka duh chu i pa khan a chhungte lakah khan vawi khat mah min chhan ngai hauh lo a nia, hmeichhiate chuan kan pasalte hian min chhan em em se kan ti veka mahse fapa kan han neia kan monu te kan fapa ten kan lakah han chhan ta se kan rilru a na leh hle zel si a, chuvangin i nu dik tak ni lo mah i la, ka thusawi hi i zawm ngei ka beisei a nia, mo sualin chhungkua a țhen hranga mo țhain a huikhawm tih hi hre tlat ang che. I nupui i chhan tlat chuan a huangtau zual zel ang, mahse i nupui laka i chhungte i ngaihpawimawh zia i tihlan chuan i nupui khan lungawi loh chang nei mah se, fapa atana a duh zawng tak a sawi hunah a pa mizia ang nei mi ni rawh se a ti ngei ang. A chhan chu nu kan nihna angin kan fapa te chuan min ngai pawimawh ber se kan ti vek a ni"a ti a Chawiliana chuan, "Ka nu, nu leh pa nei lo kha faah min lo pawma ka naute nena min en dan hi a hran ka hre ngai lo chu vangin ka nu dik tak i ni, sawi tawh reng reng suh kha lam kha, nang hi ka neih ro hlu ber i ni a, nang aia pawimawh an awm ngai dawn lo tih inhre reng ang che, i thusawi ka zawm loh i hre ngai lo va, ka zawm leh ngei bawk ang"a han ti a, Țialthangi pawh a lawmin a mittui chu a tling pam mai a.
Tuk țhuan an han kil zo chu Thansanga chu insiam sawk sawkin a chhuak ta vata Liansanga chul kal tum nen chuan kawt chhuah thlenga kal dunin khaw mawng lama nuthlawi fa pahnih pawm tawh inchhung lama Dammawia titi lar lar an hriat chuan an ngei dunin a in chawpa han hal mai te chu an duh hial ta ve ang, "Dammawia hi zawng țiau ral lama kai a theih mai mai tawh si loha ti hian awm kual mai mai teh se" tih pahin Liansanga chu a nui kur kura chu veleh a tukhum chu ri nghal thlawpin "Mawllian, mi lo rel khanglan le, a fate sairawkherh tur ka siam sak vang chauh va kal ka nih kha" tih pahin chu nuthlawi fapa upa zawk kai chung chuan Dammawia chu a kal liam nghal vawk vawk a.
Thansanga te pahnih chuan ding meuhin an nuih zui char char bawk a. Liansanga chuan au zuiin, "Perh i zir tir nghal dawn em ni?" a han ti a. Dammawia lah chuan "Hmuh țha hmuh duh chuan a ngai miau a ni" tih pahin a miko a rawn san khum uk uk a Thansanga te pahnih chu an nuih a za tawlh tawlh mai leh nghal. Kawt chhuah an va thlen chuan Hmingthanga lo awm reng chu hmuin an va pawh vata Liansanga pawh a kalna tur lam pana kalin Thansanga chuan "Hminga khawi lama vah nge i tum?" a han ti a Hmingthanga chuan "A ka hre bik lo le, ram chin hi ka duh angin ka la bel lo deuh bawk nen han vah kual mai mai ka tuma" a han ti a Thansanga chuan chik zetin "Nghah nei i va ang si ve" a han tih chuan Hmingthanga chuan zah hmel zetin, "Nia, U Sangte thing phurh pui pah tur ka neia, min va kal san rawh ka rawn um mai ang che" te a ti ta nuaih mai.
Thansanga chuan nuih za insum tak chungin, "Kei pawh nghah tur ka neia i nghak dun ang" tih pahin Hmingthanga bulah chuan a țhu ta hmaka. Hmingthanga chu a zah hmel hle mai mahse Thansanga'n, "Hminga, nula lam i ngaihsak anih hlauh chuan mi hrilh hreh suh i tan kan awm reng a nia. Tin, keini aia kum hnih leka nau i ni a min U hi a ngai tawh lo ang, nula te kan la rim ho anga in U țut țut kha ka duh lo a nia" tih pahin a han nui vur vura Hmingthanga chuan zep țitțet loin Lalfanu Biakmawii a nghah thu a sawi ta, Thansanga chuan engmah sawi zawm tawh loin ral hla taka Biakmawii leh Parmawii te rawn kal dun chu kawhhmuhin "kan nghah mekte an lo thleng dawn e" a han ti a Hmingthanga pawh chuan Parmawii leh Thansanga chu hrethiam nghal maiin a nui vur vur a.
Thansanga insum zo lo nui chhuak tur chu Parmawii chuan a hmui hupin rum zetin a han melha, an enthlak mek Biakmawii leh Hmingthanga zei lo lutuk chu a hun leh a hmun chu nise zawng an nui nasa viau ta ve ang le. Hmingthanga chuan sawi chhuah vat duh mah se a ngam ngang si lo thu ho tete sawi puiin an riat dun nuah nuah maia, Hmingthanga țawng tam ngai lo a ni bawk si, Biakmawii lah Dammawia te nen an inkawma a ri ve har har țhin ang ngawt kha a ni thei ta meuh lo. Enthla reng tu an awm tih chu hre phei se an zah a zual hle ta ve ang. Thansanga chuan "Hawh teh en reng lo zawk teh ang" tih pahin Parmawii chu a han kai sawna a hma a kal pian inkhaithli thlarh mai Parmawii chu thlek vang vangin "I va han nalh chung chuang tak em" a han ti sapa Parmawii lo hre pha chuan rawn hawi let thutin "I Zak lo" tih pahin Thansanga hnarah tak chuan a han pen sawk a, a tlanchhiat rualin Thansanga chuan a umzui bawka, an han inman a, phul hmunah chuan tlu dun rialin Thansanga chuan Parmawii sam chu chul sak hliau hliau pahin inneih mai a duh tawh zia te mahse a u nghah a la duh rih thute chu a hrilh ve malh malh bawk a.
Thansanga mipatna chu a hmangaihber bulah chuan tho nasa hle mah se, insumtheihna nei tlat mi a nihna chuan engmah thlen tir loin an țhiante lam chu an pan phei ta, an thlen dawn hnaihah chuan patling nui khek uar uar thawm hriain mak ti takin an tlan phei sawk sawka an va thlen meuh chuan Hmingthanga leh Biakmawii zak lutuk chu an lo kun reng a, an bulah chuan Dammawia chu lo nui khek uar uarin Thansanga te lo thleng a hmuh chuan lo hui vatin, "Țhiana, Hminga zei loh dan hi rawn hmu ve la chuh" tih pahin chhuat beng meuhin a nui uar uara Thansanga chuan, "Damthluakthawla tak hi chu aw" tih pahin a va pawh phei a. Dammawia lah chuan a fiam nasa tulh tulh a, a tawp lamah phei chuan an rawn nui ve ta bawk bawk a. A tir ah zak hle mah se, an inkara inzahna awm tlat an induhthu puan chhuah tir thei lo tu daidanna bang kha Dammawia'n a sut chhiat sak ta bawk a, a țhiangte a kal dunin inpawh takin an titi chho ve ta zawk a.
Hun leh ni a liama Bualthleng khuate chuan lo lam hna te thawkin an țang tlang bawka, an tan chauh ni lo, inbeihna rapthlak tak avanga tlangval tlem em emna Zehtet khuate'n an mamawh thut huna an tana an awm reng theihba'n kum dang zawng aiin an țang nasa zual bik a ni. Chawiliana nupui nei tur pawh a phur surh surh kher mai, a unaute chuan an chhaih reng mai zel a, Țialthangi pawh a pasal a ngaihna te reh hlen lo mah se ziaawm lam a pan chho zela Lal fapa Doliana leh Runthanga fanu Vanthangpuii te rawn kal thei țan tir chu an duhna lam lamah a vah kual pui a ni ber e. Thangliani pawh a hmelțhatna chuan an khaw tlangvalte mai bakah khual khua ațanga rawn rimtu pawh a khat tawkin a nei ve ta zeuh zeuh mai. Mahse a duh zawng tak a la tawng lo nge ni, tumah reng be chhe hauh si loin tumah mitmei a hmuh ngai hauh lo bawk a.
Kar lovah chapchar awllen hun tur chu a lo thleng dawn ta mai, Țialthangi te chhungkua chu an buai em em a. Thansanga te țhian thum chu Hmingthanga'n rawn belhin an pali chuan Chawiliana te inneih huna mipui hrai ngei tumin an chhuak ho reng mai a, pasalțha vek an ni bawka sa an la thei hle mai.
Chawiliana te inneih hma ni riat bâk a awm tawh loh tihah chuan beisei loh khual an nei ta tlat mai. Țhangzing khaw tlangval pawih hnam pali te chu zingkarah rawn thlengin lal inah an luta khaw mipui ho chu an hlauthawngin an thin a phu dep dep hlawma tlangval ho pawh an ralthuam nen an ding khawm țhapa rei loteah Lal inkawngka chu rawn inhawngin tlangaupa a rawn chhuaka Chawiliana te unau koin Liansanga te in a lut leha a hnuah khaw mawng lamah kalin Dammawia nen an rawn inzui chhoh leh takah phei chuan an hlauthawng zual kher mai.
Dammawia chuan pawih tlangval pakhat chu en kalhin "Chu ka farnu Vanzauvi chu a duh lo chung an hruai lui a, ka unaupa pawh thichhawngin an kalsan a maw?" a han ti leh ngat a. Chu pawih tlangval chuan "Ni e, chhan theiin kan awm si lo a ni, min rawn tam hneh em a kan che thei lo a ni. An pasalțha Hrumliana leh a țhiante paruk han khing pha kha kan awm lo a ni. Kan pasalțha neih chhun i nau Neihthanga meuh pawh khan Hrumliana thachhang dawltu Sanghluna kha a khing pha lo a ni" a han ti a. Chawiliana chuan, "Anih leh umzui tumna rilru pawh inpu nange?" a han ti leh a, chu tlangval chuan "Kan umzui ngei alawm. In țhianpa Chhawnsanga kha a ram riah lai a ni a, Hrumliana te'n Vanzauvi an hruai tukah a rawn haw a, a hoin kan umzui a, vanduai thlak takin an khua an lut hman tlat mai a. Keini tlangval sawmnga chuang awrh tan Dimlam khaw zanga nufa run chu tih theih a ni miau si lo va, beidawng takin kan leta keini hi Chhawnsanga'n nangni pun tur cheu in min rawn tir a, khua pawh lut ve loin kan rawn kal a ni" a han ti a.
Dammawia chu tho tharhin, "Lalpa, ka farnu chu ka chhan ngei a ngai a ni, ka kal ngei dawn e" a han ti a, chu veleh Thansanga leh Liansanga chu rawn ding vein, "Lalpa, keini pawh kan kal ange" an rawn ti ve leh a. Chawiliana chuan, "Lalpa ka nupui neih hun tur chu kan sawn rih mai a ni ang chu, ka naute hi ka hruai loh zawngin ka ngaihtuah dâwn e mai" a han ti a.
Mahse Dammawia chuan, "Kan kal anga, ka farnu kan lalet ang a, Dimlam khua chu kan chimih ngei ang. Tin, U Chawi, nang pawh nupui i nei ngei bawk ang. I kal ve ka rem ti hauh lo, khawngaih takin i thu ka hnial vawi khatna ni rawh se" a rawn ti a, a hmelah chuan thinrimna a lang chhuak hial a ni.
Thansanga chuan, "Ni e, ka U. I naute hi min rin ngam hun a ni ve tawh alawm, rawn kalin kan let leh hnuah nupui nei mah la, i neih hnu lawkah keini kan chhuah fo a la ngai leh dawn a, min ho reng thei dawn chuang hleinem. Tun hi i tello a kan kal i phal țan hun a ni e, ngaihngam takin awm rawh"a ti ve leh a.
Lalpa Rengliana chuan, "A dik a ni, Chawia nang leh zel chu kal thei i ni lo a ni. I naute hi hmanhmawh takin chhuak nghal se la. Tuk țhuan eikham lamah kan mikhualte leh Hmingthanga hoin tlangval sawmnga chhuak leh bawk rawh se" a han ti a. Chawiliana chuan dik a tih rualin a rilru erawh a hlim zan lo hle mai a, Doliana chu pawm nulhin "Anih leh tluang takin kal ang che u, nunna chan in awm tur a ni lo" tih pahin an inpawm chhuak ta daih a. Thansanga te chu inlamah hawin hmanhmawh takin an kal chhuak ta nghal a.
Hmanhmawh taka kal an ni bawka Thansangate mi pangai chunga leng an ni bawk nen țiau lui chu zan sarih hnu lekah an thleng mai renga. Hmanhmawhin Țhangzing khua thlen vat duh mah se, khaw en lai ema lui han kan chu a ralmuan loh avangin luikam remchang laiah chuan ei relin kalkawnga Thansanga sakhi kah chu a chek ei tumin an han siam a, Dammawia rilruah chuan eng dang mah a leng hlawl lo a farnu an hruai lui turte a han ngaihtuaha a nau Neihthanga chu a thi tawh ang nge a la dam ang tih te, a thinrim lutuk chu a rilruin Dimlam pasalțha rualte cho anchhia a lawh leh bawrh bawrh țhin.
Zan riah an han kil zo a tuibur hmuamda vel vaibel paka an țhut thlandaih hnu chuan lui chu an kan ta a, riahna tur remchang an han dap leha buk pawh sa buai tawh lem loin changel remchang phahin an mu a, varțianah thoin an kal leh nghala, hmun rem leh tui lak awlsamna hmunah ei an rel leh maia an hmanhmawh bawka kar laka zan nga an riah hnu chuan lo sul haw hun laiin Țhangzing khua chu an lut dawn ta. Kawtchhuaha nu leh pa feh haw lo țhu thlan dai te chuan an lo en duh hle maia anni chuan engah mah ngai loin an kal pel mawp mawp mai a, Dammawia pa te inlam chu Liansanga leh Dammawia chuan an pan ding nghal nalh a Thansanga erawh Lal in lam pan ve thungin chanchin a han zawt chiang ve thung dawn a ni. Dammawia an han hmu chu Pu Mungliana te chhungkua chu an hrilh a haiin an lawm bawk si Dammawia farnu Sialmani chuan rawn kuah thlawpin a țap nghal hawm hawm maia Dammawia pawhin insum har a ti hle mai. Khum lama Neihthanga nikhaw hre lo a let reng kut chu Dammawia chuan a hmer vang vanga Hrilliani lamah hawiin "Ka nu, chanchin min hrilh teh u, eng vanga ka farnu chu hruai lui nge an nih?" a han ti a Hrilliani chuan țap zawih zawih chungin "Hman deuh khan kan khaw lamah hian khual pang zinin an rawn zin a chu mi țum chuan i nau hi Pasalțha Sanghluna khan a lo hmu fuh a, a lo duh em em a. Ti chuan kan inah rawn lengin nupui atan min rawn dil ta chawt maia, mahse, kei leh i pa hian chu tiang ngawta kan fanu han tirh chu kan duh si lo, Zautei lahin a hmel duh zawng a nih loh thu a lo sawi vek tawh bawk si a, i pa hian a hnar fithla ta a ni. Sanghluna thinrim khan an khaw pasalțha dangte hruaia an rawn kal nawn tur thu leh a rawn hruai ngei tur thu sawiin a haw ta a, awllen remchang a rawn awm leh veleh a rawn kal ta reng bawk a ni, Neiha nen hian an inbeia Neiha hi a vanduai ta zawk si a, i farnu khan i unaupa nunna hi zuaha amah hruai turin a ngena an hruai ta a ni. " tiin a mittui tla chu a nuai sawk sawk a. Dammawia bawk chuan" Anih leh Lal leh upate an inrawlh lo em ni? "a han ti leha Hrilliani chuan" Lal in an thuhnuaiah an dah hman bakah kan khaw tlangval i nau chhan tum țhenkhatte pawh an that a ni"a rawn ti leha Dammawia chu a thinrimin a unaupa kut chu a hmer vang vanga "Unaupa i phuba chu ka la mawlh ang" a han ti charh charh a Sialmani chuan "Kan ngai khawp che a sin, Neiha khan 'Pasalțha Dammawia unaupa ka ni ngai e' tiin a inchhal hial a sin, nikhaw hre lo a a awm hma lawk pawhin 'Ka unau pa Bualthleng pasalțha Dammawia'n ka phuba hi a la rawn la ang" a ti nghe nghe a sin, a rawn ti ve leha Dammawia chu inperh tho atin "Liana ka kal dawn e" a han ti rawka mahse Pu Mungliana chuan rawn dang vatin "Dama hetianga awm tur a ni ngai em ni? Fim taka rilru dah tur zawk i ni a sin" a han tih chuan a inthlahdul ve ta deuh a.
Lal in lam ațanga Thansanga rawn let chuan Lal leh upate nen ro an rel dan chu a rawn sawi nghal mawp mawp a, chu mi ni la la chuan Țhangzing tlangval zahnih rualte chu Lusei pasalțha huaisente hona hnuaiah Dimlam khua run turin an chhuak ta. Mahse fimkhur taka an bei lo anih chuan chaurau ek an thai chiang viau ta ve ang. Zan thum lek kala hla a ni bawka an Dimlam khaw ram chhungah chuan buk sakin an chet dan tur an han rel ho nak naka, an duhthusam ang ngeia ro an rel zawh hnu chuan zanriahte kilin an kil zawh chuan bukah chuan awm hahdamin an titi ar ar hlawma, nakin lawka nunna chan thei dinhmuna ding mek an ni tih inhre mahse an zam hauh lo.
Leng hawn ar khuan hun lai vel chuan Dimlam khaw lam pan chuan an kal ta hum hum mai le. Kawtchhuah an thlen meuh chuan zanlai ar khuang al al thawm pawh an hre ta. Kawtchhuah ațang chuan Thansanga chu kal falin khaw lam chu a lo han thlithlaia Dimlam ho chu an ngaih ang ngawtin an bei thei dawn hauh lo tih ralven buk lian tak a hmuh ațang chuan a hre ta, hmanhmawh taka let lehin chanchin a han sawi sawk sawka khaw luh khan pakhat chauh a awma ralven buk a awm bawk si. An buai tlang kher mai. Ralven buka tlangvalte'n thawm an chhuah vaih chuan an chan a chhe thei tlat bawk si a. Chhawnsanga chuan "Chhim lamah sawn kham lawn harsa tur zet mai hi a awma chu lamah chuan tlema zawng hi kal ta i la, ral vengte thlak tur anga kalin kan chimih thei mai lo maw, ralveng chu a li berah paruk aia tam an indah ka ring hauh lo a rawn tih chuan an pawm tlang hle Thansanga chuan "Keini pathum leh in naute mi pahnihin min zui se la, ralveng kan chimih rual rualin pakhat rawn ko tur cheuin kan rawn tir ang, keini erawh Lal inlam kan lo han tuam dawn a ni. Chhawna hoin zawlbuk lam in lo tuam ve thung ang, kan silai ri inhriat hma chu thal inthlah tur a ni lo ang." a han ti a ti chuan kal turte inthlangin chhimlamah chuan an kal ta a. Chhawnsanga kham sawi chu lawn a harsa hrep mai an lawn chhuah kim meuh chuan an hah lutuk chu kham koah chuan an mu thlawrh a an thaw hlawi hlawi maia ti chuan khaw lam pan chuan kal lehin mi kawmthlangah an vak chho ta a. Khaw chhung chu a reh țhuap maia hmanhmawh takin a thim chin belin an kal ta a, lal tual lam ațanga meichher eng de va va kawtchhuah lam pana kal chu Thansanga chuan kawkin "An inthlak hmain an ni saw kan dah țhat phawt a ngai a ni" a han ti a thawm dim takin an pan ta a, an va hmuh chian chuan panga an ni, khaw chhung an han kal pel fel chiah chu an mahni chan insem te țheuh chu hnung lam ațanga bawh thutin kar loah an dah țha ta hmaka ti chuan ralven buk lam chu an pan leh ta. Ralven bukah chuan tlangval pahnih chauh lo meng tawhin midangte chu an lo muthlu veka, Dammawia chu eng khaw sawi set set loin a zuang lut nghal rawka a lo la meng pakhat zawk chu a nghawngah sat siah in lo la meng dang pakhat chu a chem fawng chuan a hnar kawnah tak a chhu leh siah maia midang muthlu lo harhte chu midangte chuan lo tukthlu ve mawp mawpin kar loah an ching fel thei ta.
An tlangval hruai pakhat zawk chu an țhiante ko tura tirin an ni ho chu rang takin Lal in lam an pan ta a. Lal inkawng ka chu dimte a hawngin Thansanga chu a lut nghala khum pui lama Dimlam lalpa zu țhing rim nam zet chunga lo mu hnar bawrh bawrh chu a hrawkah a chempui a chuktuah chungin a han sawi harh a Dimlam Lalpa chu a rawn mengphawk nasa ngei mai. Thansanga chuan thawh tirin tap mei eng lamah chuan a hruai pheia "Tute nge innih, lusei ho hi ka Lal in chhunga ka hmuh chuan ka that țhin a sin" a han ti ve ngiala mahse a chan chhiat zia chu amah chuan a inhre chiang ber thung si. Dammawia chuan "Lalpa ka farnu kha ka rawn la let dawn a ni" a han tih chuan a tlangvalte thusawi Neihthanga'n ka unaupa Dammawia a tih chu hre chhuak uar uarin "Nang ni maw? Ka pasalțha ten an that vek dawn che u tih inhre rawh u" a han ti hrawka a hnar țawk hlur chu tuai vut vutin Lusei pasalțhate leh pawih tlangval pakhat chu huat hmel takin a han melh kual a. Dammawia chuan "Lalpa ka farnu awmna chu min hrilh rawh" a han ti a Dimlam Lalpa chuan lo nuih sukin "Zu lak chu tum ta pauh che ka keite Sanghluna muhil lai i țhawng harh dawn zu nia" tih pahin Sanghluna te inlam chu a han kawhhmuh zui zata Dammawia leh Liansanga chu chhuak vatin an chhuah velah chuan Dimlam lalpa chuan "In va han chak dawn lo rua em" a han ti a. Sanghluna te inzawn an han thlen chuan Dammawia chuan kawngka chu sawiin "U Sang inkhaw tlangval Chhawna ka ni e, Lal inlamah khual duhawm lo tak an awm a nia" a han ti a, a kawt kaia thawm a awm rual ruala harh nghal, silai nena lo inring reng Pasalțha Sanghluna chuan Dammawia chu a aw a țang ringawt chuan dawt a sawi tih hre hek lo, kawng ka chu hawngin a chhuak ta nghala, a chhuak fel chiah tihah chuan a tukhum chu rawn hik mawpin a tlu tur chu Liansanga chuan lo chelhin Lal inlam panin a pu chho ta vuk mai a.
Dammawia chuan afarnu chu dimtea sawi harhin Lal inlam panin a kal pui ta a. Vanzauiin Dammawia a hmu leh chu a lung rawn chhe thar lehin a țap ri kerh kerh maia. Dammawia chuan duat taka kuahin "ka nau kan haw thei țep a nia" tih pahin Lal inlam a pan pui ve ta a. Lal inchhung an thlen hnu lawkah chuan Liansanga chu chhuakin silai a van vawr zawngin a han kap puak dur maia. Zawlbuk lamah ve thung chuan Chhawnsanga chuan hmelma silai a thiar mek chu pawm țun chungin tihngaihna awm tawh hek lo. "ral ral ral" ti a au chungin a tlan chhuaka bawhbel a bawh liam chiah chu bawk khup nghal thlawp in "Tunah" a han ti tuara chu veleh silai rawn puak dur durin pawih tlangval rawn tlan chhuak te chu an thal phawk phawk maia Chhawnsanga pawh bawk vak chunga a awm hmun sawn zelin a țhiante awmna chu a pawh ve ta. A silai lak te chu a hum ve lo te hnenah pe in meichher pakhat chu a la lawka Zawlbuk chungah chuan vawm kaiin zawlbuk chu a alh ta hluah mai. Pawih tlangval ho chuan an silai tam zawk an chan hman bawk si, an chan chhiat zia chu hriain a huhoin an rawn tlan chhuak ta huk mai le, chu veleh silai a rawn ri leh țhuai țhuaia silai an kap puak zo chu rang takin lal mual lam panin Chhawnsanga te chu an tlan chho ta a. Lal mual an han thlen meuh chuan pawih tlangval ho chu an thil hmuh a vang chuan an tawp chiang kher mai.
An Lalpa, Lusei tlangval pakhat pasalțha tih hriat zet a bianga savawm tin hnu ser awm mitmeng fiah kelhkawlhin, a nghawnga chempui a lo chuk tuah reng chu an hmu a,Thansanga chuan "In Lalpa nunna hi inhlut anih ngai chuan inralthuam dah thla rawh u" a han ti tuara pawih tlangval ho chuan an dah thla ta sap sap mai. Thansanga chu hawi kualin thusawi a han tum leh chiah chu Dammawia chuan lo bawh thlu tawpin silai a rawn puak nghal țhuai bawka a thi teuh kher mai, mahse Dimlam Lalpa erawh a chal dar taka ama pasalțha chhuanvawr Hrumliana ngenmu luhna kaw phat chuan a nunna a laksak chiang hle mai. Chu veleh pawih tlangval ho chuan an rawn bawh leh ta Thansanga te pawh Lal tualah chuan țum thlain hmelma lam chu an sam ve ta. Hrumliana leh a naute panga inkawp chu an hma a kaw duai duai mai le, an Lalpa thihna avanga thinrim eng phiara ral bei an nih bakah tlangval an tam em emna chu an chan țhatna a ni. Chhawnsanga te pawhin kap thlu nual mah se Dimlam ho tam zia an hriat avanga Lal mual lama tlan chhoh a inpek tir an tum kha a ni a, mahse Hrumliana thawm hriain a nupui leh a fate hmun him lama a dah zet hnua lal mual lama rawn kala a thim chin ațanga Thansanga kah a tum avanga an Lalpa'n a nunna a chan tak avanga an tum hlawhtling lo an ni. Kar loah Dimlam ho chuan an hual bet ta mai reng a. Dammawia thinrim chu inhrosa kuk kukin "Inmalbeihah ka cho a che, mipa inih chuan rawn chhuak rawh Pasalțha Dammawia, Pasalțha Mungliana fapa ka ni ngai e" a han ti a Pasalțha Hrumliana pawh chu a rawn pen chhuak ve mai bawka, mahse Lal in lam ațanga "U Hrum kha chu ka chan pual a ni e, ka nupui min chhuhsak tumtu chu ka hmelma a ni, ka nupui nuța pa pawh ni mah se" a han ti a Dammawia pawh chuan "Rawn kal ta che, i thi dawn tih hi ka la dam tih tluk zetin ka chiang e" a han ti a Hrumliana nau pakhat Zungbilha chuan Chhawnsanga chu kawkin "Nang kha ka chan pual i ni e" a han ti a Chhawnsanga chuan "Ni ang hmiang" tih pahin a lo nuih suka.
Dammawia sakeiin a sa seh tur zuan tuma a awp hniam ang chiaha kun den den chunga Sanghluna a veh chu hmuhnawm an tiin a che vel chu an en duh hle mai Pasalțha Hrumliana chuan a rilruin "I pu leh kan khaw pasalțha inmalbeih țuma i pu chet dan hlauha i zuk chet chu le, naua ka tum chak zawng i ni hauh lo i pu i chhun anih hlauh chuan khawih fuh hman pawh i nih hrep dawn loh hi" a ti a, a nui suk suk bawka. Hrumliana hi a khua leh tuite tana pasalțha nun ngil tak a ni a, a vanglai a pel țan tawh a, chu vangin pasalțha tam thei ang ber chher chhuah a tuma Sanghluna te Zungbilha te bakah Khamzaua, Lianpua, Zemthanga, Ngunthlira leh Fungliana te ho hi an naupan lai ațanga a hrual te an ni a, an ral hratin insual pawh an thiam hlawm hle. A khua leh tuite tana pasalțha nih a tlin ang bawkin a naute'n an duh zawng an sawi chuan tihsak ngei a duh țhin, chu vanga Vanzauvi pawh a ho a hruai lui an ni reng bawk a. Mahse amah ngei hi a ni. Sanghluna hnenah pawh Vanzauvi chu a mã leh emaw, hlim lo reng renga hringnun a hman tir emaw chuan phuba amah ngeiin a lak tur thu sawitu. "Hmeichhiate hi kan duh ang anga kan mâka kan lakluh tur an ni lo e, hlutna nei ve vek an ni" ti țhintu a ni ve tlat. Sanghluna chuan Dammawia chu Neihthanga ang bawka awlsam taka chhaih kual leh mai a tum a, amah lah mi țuanrang ve pangngai tak a lo ni bawk nen, va hnaih zeuh zeuh in khawih tum ang taka awmin a han insaseng leh țhin a. Dammawia'n tihngaihna hriat loh hmel tak chunga a en reng a hmuh chuan nuih sukin, "Thi tur chu nang hi i ni" a han ti vei rawk a, a hma ang bawka tihțhaih tumin a han hnaih leh vei rawk a, Dammawia rawn dawk zawk chuan a ban dinglam chu a rawn thel țhawt mai a, "Aiah!" tuarin a ban chu en vung vungin na a ti tih a hriat hle. Hrumliana chu lo khi vur vurin, "Ka nau, ka ui hle mai che, pasalțha thih dan tur dik taka i thi tur erawh ka chhuang che" tiin a thlahtu pasalțha Mungliana pa ațanga a lo hriat tawh Dammawia chu chakah a ruat nghal hmiah mai a. Sanghluna chu a zam tawhin Dammawia han beih chu a chak tawh lo hle mai. Mahse pasalțha ral hrat tak a ni a, tlawm ai chuan thih a thlang miau hek Dammawia lamah chuan chak taka tlan pheiin a chem chu a chho zawngin a han vai chho pawp maia, Dammawia chuan Sanghluna chem bumna'na vur zawk pahin Sanghluna tukhumah tak chuan a chem chu a sat bur siah mai a, Sanghluna chu tal khur cher cherin chu lal tualah ngei chuan an Lalpa pialrala zui turin hringfate chenna chu a chhuahsan ve ta. Zungbilha chu rawn pen chhuakin Chhawnsanga nen chuan an han inhmachhawn nghal a.
Ngaihnawm dan hi awww
ReplyDeleteA la ngaihnawm chho zel e
ReplyDelete