BUALTHLENG MAWITU BUNG - 44

Hmingthanga chuan a hmaa en reng renga pasalṭha tih hriat ngawih ngawih pathumte bakah an hnunga tlangval sawm chuang lai te chu melh kual dan danin a farnute pahnih chu a hnungah din tirin "In huaisen tawk anih chuan inmalbeihah ka cho a che u, Bualthleng pasalṭha Hmingthanga hi pawih mawngkhak ho hmaa tlawm mi ka ni lo e" tih pahin inring takin a kut dinglama a silai kengin a vei lamin a chempui a vuan bawka. A farnute pahnih chuan an hlauin an lo ṭap kerh kerh bawka. Hmingthanga erawh thinrim nain a khat thunga a mitmeng sen ram chu tawrh zawh har tak a ni ngei ang. Lal fapa Thanglunga chu rawn pen chhuakin "Naua Bualthleng pasalṭha pawh ni mah la, kan hlau chhe te lo che tih i hre dawn nia" tih pahin a chem a han phawrh a, khua a rawn thim ṭan bawk nen inbeihna'n chuan a duhawm fahran lo kher mai le. Pasalṭha Zawlthanga chuan hun an lak rei vaih chuan khaw mipuite an rawn pungkhawm hman thei tih hriain, "Thanga kiang teh" tih pahin Hmingthanga zawnah chuan a rang a rangin a fei chu khawk chhuah a rual ta. Hmingthanga chu kun nghal zawkin him phah mahse a hnung lawka ding a farnu chuan a tawrh phah ta, a farnu malpuia fei inthil tlang pawk chu en zawkin thinrim takin a silai chu a hmet puak ṭhuai mai a, Pasalṭha Zawlthanga chu a nak dawm vawng vawng pahin a ṭhingṭhi rawp a, "Mi inring lo lai chiah kap ngam em ni inih" tih pahin Lalfapa Thanglunga chuan Hmingthang chu a rawn bawh ta. Pasalṭha Buangliana chuan a unaupa pasalṭha Zawlthanga thih sual mêk chu pawm kang lawpin a han kuah vawng vawng a, pasalṭha Zawlthanga chuan a hmui phunin insaseng turin a ti mawlh mawlh a Pasalṭha Buangliana chuan "Ni love ka u, kan haw anga i ho ngeiin kan kal leh dawn nia" tiin a pu lawpa Lal fapa chu auin Lalfapa chuan an tlangval hruaite hnenah chuan Hmingthangate chu that vek turin a ti a, anni pahnih erawh Pasalṭha Zawlthanga hruaiin an kal kiang thung.

An Pasalṭha te'n kiam san tawh mah se Pawih ho chu sawm chuang lai an la ni ve tlat. Hmingthanga hmelah chuan zamna a awm hauh lo a, pawih tlangval ho chu melh kual den denin amah zawk chuan a bawh ta thut mai, pawih ho mak ti chuan chetna chang pawh hre loin an lo en reng ringawt a, pawih tlangval lo awm hnai ber chem rawn vai chhuak ve mek chu a ban rekah man sak chatin chu pa dul zawnah chuan a vai nghal fua mai chu, chu pawih tlangval chu a thi chiang ngei mai le. Chu veleh midang ho chuan an rawn bawh rawn huk a, Hmingthanga chem vai zuai zuai a reh fel meuh chuan pawih tlangval pahnih chu an thal leh der tawh mai, Hmingthanga pawhin a ban bul kak duai leh a mal pui kak duaite chu na a tiin thisen a chhuak nasa bawk nen a lu a haiin din ngil pawh a harsat hle. Khua lah chu a thim chiang hle tawh a, thla erawh a eng ṭha hle. Pawih tlangval ho chuan Hmingthanga chu bawh mai mai chi a ni lo tih leh a kawlh tawk lekin an hliam tih an hre chianga an bawh mai ngam lo, hual an han tuma mahse ko pang rinchhanin a ding tlat bawk si.

Ral hla taka meichher rawn de chuah chuah Hmingthanga'n a hmuh chuan a lawm hle mai, 'ka ruang tal chuan ka pa hnen a thleng dawn e' ti rilruin "A tawp rât thlengin aw nangni pawih chhe ho lakah hian ka tlawm lo ang" tih pahin amah zawk chuan a zuan leh ta.

Pawih tlangval pakhatin Hmingthanga ṭhingṭhi a lu lak tuma a chem a vai kang chiah chu silai vawi hnih a rawn puak ṭhuai a, pawih tlangval pahnih chu an thal chiang kher mai. Paruk an la ni cheu, Thansanga leh Dammawia te erawhin an huphurh lo kher mai, rang taka chem pui nen pan thlain an hming an han chhal lauh lauh mai zawng pawih tlangval ho chuan ngam leh ngam loin an lo bei vel mai mai niin a lang kar loah an tlu fai ta phiara, thu zawh fiah atan pakhat erawh an dam thung. Hmingthanga bawkkhup reng chu hlauthawng takin an han kuai leta a mar an han zawnga, an rin ai taka a mar an hmuh ṭhat leh si takah chuan a thisen hloh nasat vang a ni tih hrethiamin tlangval dangte nghakin an lo ṭhu a, tlangval dangte an rawn thlen takah chuan pawih tlangvalte chu an lu laksakin an ruang chu khamah an paih vek a, Hmingthanga chu an zawna Hmingthanga farnu upa zawk pawh kal thei zia zang ni hek lo an zawn ve nghal bawk a. Pawih tlangval la dam awm chhun chu a kut hnung khirh sakin an chhawm a, khua an luh meuh chuan zan a rei tawh hle, Dammawia leh tlangval dangte chuan sahlamah milu chu khaiin khua chu an lut ta a. Hmingthanga chu bawlpuin a han buai pui sawk sawk a, a thaw te a rawn pangai tak hnu chuan ṭin sanin Thansanga leh Dammawia pawh zan a rei tawh emai tiin Dammawia te in lama riak dun turin an inzui hnak hnak a. Kha tia tlangvalte hruaia an kal khan Thansanga chuan rem ruatna hran neiin an pahnihin an lo va tlan hmasa vang vang kha a ni a, an tlai teuh hle nghe nghe anih kha.

Bualthleng aṭanga khaw thlang lam panna kawng, khaw mipuite tlawh pawh ngai loh, ram chhengchhia leh kham sang tak tak awm khupna hmuna puk pakhat biru takah chuan Pasalṭha Buangliana chuan a u Pasalṭha Zawlthanga ruang chu kuahin a insut hlawp hlawp reng a. Lalfapa Thanglunga thinrim insehruh hmel chu hmuh a nuam lo kher mai. A tukah chuan an u ruang chu an theih tawka thuka lei lai khuarin an phum a, an haw hmain an tlangvalte chin chang tal ngaihven tumin zan hmasa lama inbeihna hmun chu fimkhur takin an pan leh ta. An va thlen chuan inbeihna a nasa tih hriat takin a thang huam huam mai a, awm reina chi pawh nia an hriat loh avangin an kal kiang leh ta vata. Bualthleng khaw sahlama an tlangvalte lu an tar ṭhut chu hmuh hrehawm an tiin haw vata Bualthleng khua rûn tura si ruk la meuh a chhuah chu an rawt ta a.

Lianmawia sava veh chuan a hnunga thil ri rek rek chu a hriatin enge maw tak chu a awm tih hriain inring takin muangchangin a inhera, a hnunga pawih Pasalṭha pahnih lo ding reng chu a hmu ta. "Ka pu enge in duh a, pui theihna che u ka nei em?" tiin Pasalṭha Buangliana mitah tak chuan a en kal a. Pasalṭha Buangliana chuan chhan ngaihna reng reng a hre lo, hetiang naupang rawlthar chhuak tir awrh a hmel leh mitmenga hlauhna awm hauh lo leh a che ziaa zamna pakhat mah awm lo chu a hmuhin a ngaisang kher mai, 'Eng ang taka Pasalṭha la rawn ni ang che maw' a ti rilru vawng vawng a. Lal fapa Thanglunga zawk chuan "Kan khaw lama haw tur kan ni e, hei zan riah hmeh tur zawnga kan tei kualna lamah i thawm kan hriaa kan rawn pawh rawih mai che anih hi, Bualthleng khaw mi chu i ni lo ang ti raw?" a han ti a Lianmawia chuan Bualthleng lama rawlrala che an awm thu kha hre chhuak thutin Lal fapa Thanglunga en chung chuan a nui saka" Bualthleng mi leh sa ka ni hauh lo, mahse Bualthleng khua erawh ka phatsan ngai lo ang, chu tia zan riah hmeh tur zawnga tei vak innih chuan ka kal san ang che u" tiin a inher hmaka hawi let hauh loin a kal san ta vang vang a, a liam dawn ṭep tihah chuan rawn hawi let lehin "In hlawhtling vak lo a ni ngei ang maw, pahnih chiah innih" a rawn ti leh a Pasalṭha Buangliana chuan nuih suk chungin a lu a bu nghuta, Lianmawia chuan "Zehtet lama rawn che chu ni u la, ka pa'n in lu a la vek ngei ang" tih pahin a kal san leh ta a. A liam fel hnu tuibur hmuamda hnu velah chuan Thanglunga chuan "Buanga a hmel kha i hmu em a mitmeng te kha, min hlau hauh lo nia mawle, lusei Pasalṭha ka u kap tu kha a huaisen ka ti hle a, mahse tuna naupang kha a huaisen ka ti mah zawk" a han ti a Pasalṭha Buangliana pawh chuan "Ni e, naupang danglam tak zawng a nih kha, khuanu vohbik a ni ngei ang. Kan hnam tan pawh a la hnawksak viau ngeiin ka ring. Hawh teh insaseng thuai teh ang" tiin an kal sawn ta a.

Pawih tlangval dam chhuak awm chhun hnen aṭanga an chet dan zawng zawng Lal Rengliana'n a hriat meuh chuan thinrim takin Lal inchhungah chuan a tei kual thauh thauhva a bang laia chem pui inthiat chu pawt phawiin "In phuba lakna hi kan rawn rûl let ngei ang" tih pahin chu pawih pa nghawng chu a sat pawp mai zawng Lal in chhuatah chuan thisen a luang nghal zawih zawih a,Sangzuali leh Parmawii te chuan an râp dunin an lo inpawm bet chawt a, Doliana erawhin a pa mitmeng chu a zir chiang ve nge a en kal thung a. Runthanga rawn lutin thil thlen dan a hmuh chuan chhuak lehnghalin tlangval ṭhenkhat a rawn hruai lut leha ruang chu an la chhuak ta a. Lal Rengliana chuan "Inrûn reng hi zawng a buaithlak anih hi maw, mahse kan kal ngei angai ang. Ka Pasalṭha Thansanga leh Dammawia te kal se, tlangval an duh zat hruai rawh se, midang zawngin khua hi in nghak mai dawn nia" a ti a.

Charpui Lalpa Thangzaliana chuan a fapa te ṭhian dun beidawng leh thinrim eng phiara rawn haw a hmuh chuan, "Ro relna in kutah ka dah e" tiin thuneihna a hlan hmiah maia, anihna takah chuan he indonaah hian chak zawk an nih a ring mawlh lo.

Ṭiau lui an kan hnu zan hnih zet an kal leh ta, tlai khaw thim dawnah chuan Dammawia chu thingkungah lawnin khua a han chuan vang vang a, ral hla taka meikhu chu hmuin a ngaih a ṭha lo hle, chhuk vatin an tlangval hruaite chu mei fimkhur taka nun tur leh a thil hmuh avanga a ngaih ṭhat loh thu te, zan lama va chian a duh thute a sawi ta a. Zan riah eikhamah chuan Thansanga nen kal vatin mei khu a hmuhna lam chu an pan ta a. Pawih ho chu an ram china awm an la ni bawk nen, thawm dim loin lungmuang takin an khaw sa a, an chhak lawk aṭangin Lusei pasalṭha ropui pahnihin an en reng tih reng an hre si lo. Thansanga chuan nui suk chungin Dammawia beng bulah chuan "I pa te khua pawh tlawh kher a ngaih loh hi, khawvar hmain che i la, kan zo fel anga kan haw leh mai aniang chu" a han ti a Dammawia chuan ner nawng pahin "Ka pa tlawh lo a haw leh te zawng ka duh teuh lo" a han tia Thansanga chuan "Lalfanu kha i pa aia i ngaih pawimawh zawk a ni lawm ni" tih pahin a nui vur vura Dammawia sawi tur hre lo pawh a nui ve suk suk tho mai. An inkulhna lamah let lehin an ro rel dan te chu an han sawia, ti chuan zanlai ar khuan hun vela chhuak turin an mu ta a. Pawih ho chu an mutui hle a, an silai Lusei pasalṭha Thansanga'n a khawm sak mek tih reng an hre si lo. Van vawr zawnga silai puak ri ṭhuai chuan pawih ho chu a ti harh chiang hle mai. An han tho chhuak chu Lusei tlangval za rual zetin silaiin an lo tin ṭhup chu an hmu ta

Dammawia chuan mei chu chhawm ṭha sawk sawkin mei pui a han en leh phei chuan Lusei tlangval ho chu an tam hle mai. Pasalṭha Buangliana chuan "Lusei dawihzep ho mi muhil lai silai rûk sakin in bei ngam ṭawk a maw" tih pahin chil a han chhak tuara Thansanga chuan "Kan beih awm che u ka hre hauh lo, thisen a luang tam tawk tawh e, hetah hian i inrem mai teh ang u, anih loh chuan in thi vek ngei ang" a han ti a, Pasalṭha Buangliana chuan nuih uar uar pahin "Ka u phuba la tura rawn kal kan ni, inrem chu a hnai lo hle" a han ti a Thansanga chuan "Anih chuan i chem kha chhar la, i u phuba chu lâk han tum ta pauh che, kan pahnih hian a tawp kan khar ang" a han ti a, Lal fapa Thanglunga chuan "Ka tel ve ngei a ngai ang" a rawn tih takah chuan Dammawia pawh Thansanga bulah chuan a ding ve nghal chata, pawih tlangval dangte chu lusei ho chuan an lo hnungkhirh mawlh mawlh bawka.

Dammawia chuan Thanglunga kut hrawl pui chu enin a vawi khat kut thlak pawhin pawi a khawih thui thei hle dawn tih hrethiamin fimkhur a ngaih zia a hre chiang hle. An han inveh kual a, an inbeia an inṭhena an inbeibleh ṭhin, a chak zawk awm loin an inhneh tawk hle, Dammawia biang kak chu a thi duh ser ser hle a, Thanglunga pawhin Dammawia'n a naka chemfawnga a chhutna chu na a tiin thawk harsa a tih phah hle, Thanglunga ṭuan ran tawk lohna chu Dammawia chuan man thiam vatin rang takin a che kual zawk zawka, Thanglunga taksaah chuan a chem hnuhma a hnutchhiah nasa tawhin Thanglunga beidawng chu a mit a sen ram tawh maia. Dammawia pawh a che fuh reng bik lo tih hriat takin a dar vei lam pang chu a kak duai tho bawka. Tui bur hmuamda vel an inbeih leh hnu chuan Thanglunga chu a tlawm ta, ṭhingṭhi thla rawpin "Lusei pasalṭha ka lu chu la ta che, mahse ka pa hnen erawh thleng rawh se" a han ti a Dammawia chuan "Ka tiam a che" tih pahin a chem chu a han vai dawna mahse "Kan Lalfapa kha i that thei lo ang" rawn ti tuartu Pasalṭha Buangliana lam chu hawi vatin Thanglunga chu a han en leha, 'Lal fapa ni bawk, pasalṭha ni bawk maw' ti rilruin "I nunna chu ka zuah ange" tiin a kal sawn ta a.

Thansanga chuan "Ka hun a thleng e" tiin Pasalṭha Buangliana rawn pen chhuak chu eng khaw sawi set set loin a zuan nghala. Chem leh chem inkhak ri chuan a chhunzawm nghal char char a, Pasalṭha Buangliana chuan Thansanga chem chu dan pahin a tih fo ṭhin ang ngeiin Thansanga dulah chuan a tlawh zawta Thansanga kun hniam chu a khupin a khabeah a do siah mai zawng Thansanga a thal chiang ngei mai, a hnar ruh tliak chu na a tiin a hnar thi zawih zawih chu hre reng mahse, inbeihnaah a rilru dah a ngai tih hriaiin a luhai che thei si lo chu a mu reng ringawta. Buangliana chuan chak theihna remchang a ni tih hriaiin Thansanga mu reng chu nikhua a hre lo emaw tiin a han dinchilh ren rawna a lu lak tumin a han kun hniam dawna. Dammawia erawh a lo nui suk thung. A kun hniam chiah chu Thansanga chuan Buangliana hrawkah chuan rek chawtin a chem fawngin a hnar kawnah a chhuk sak bur mai zawng. Buangliana hnar ruh pawh a tliak ve chiang ngei mai le, Thansanga chu ding chhuak vatin Buangliana'n a hnar aṭanga thisen chhuak a tuai lai mek chuan bei phei nghalin Buangliana lei ṭhila a tawlh thlu chu bawh zui nghalin Buangliana lu chu a khai ta. Lusei ho chu an lo haw haw dur dur maia. Thansanga chuan "Thisen a luang tam tawk ta e, hetah hian i tawp ang u, in vangkhua kan lawi lut ho ang. In Lalpa thu a zirin in vangkhua meivapah a changin a chang lo ang" a ti ta a.