BUALTHLENG MAWITU BUNG - 48

Lal Saingurliana chuan "Sangte nangni pathum hi chu kan hre tawh che u a, in va inlan hi a him lo a ni, Hminga hi kan rin mai angai ang, kan va luh ringawt kha kan tan a him tlat lo" a han ti a Thansanga chuan Hmingthanga chu ngaihtuah hle mah se kawng dang a hre bik si lo. "Hminga fimkhur takin kal la, khaw mawng lama mi rethei te chenna lamah thlen in i zawng dawn nia, khaw chhung thlithlai kha hna pawimawh berah nei la, tin an Lalpa laka hel rilru pu te hriat chhuah i tum hmasa ber dawn nia, zanin leh naktuk nilengin i hna i zo tur a ni, zan lamah kan vaiin khua kan lut ang"a han ti a. Hmingthanga hmelah chuan zamna a lang hauh lo a phurna a lang hial zawk a ni. "Sanga min rin hi a hun ve tawh reng a ni, in thlazar hnuaia ka awm reng zawngin in awm loh thut hunah ka che nawi viau palh anga sin, hlauthawng suh u in duh ang ngeiin engkim tih vek ka tum ang tih ka tiam a che u" tiin a kal ta nghala. Thansanga te chuan a kal liam tur chu an thlir vawng vawng maia an ngaihtuah tlang hle, mahse khuaa an va luh ringawt chuan an tlem si a an chan a chhe thei tlat, chu bakah Lalpa Rolura laka hel rilru lo pu ru mek engzat nge awm tih an hre si lo.

Hmingthanga kal chhuak chu a pheikhai a zang vah maia, huphurhna a nei lo a, a hmaa thil lo thleng tur chu eng pawh ni se huaisen taka hmachhawn turin a rilru a siam fel thlap a ni. Bungtlang kawtchhuaha nula leh tlangval feh haw chawl mekte chu a han pawh ta a, a lan danah chuan inlungrual tak an ang hle, Hmingthanga chu an lo be bawrh bawrh a chawl ve turte'n an han sawma, Hmingthanga pawh ṭhu chawl vein vaibel a han ṭan kaia, a hming leh a khaw hming erawh a phuahchawp daih thung. Tlangval ho chuan Hmingthanga pian zia leh a taksa ser thleh thluahte chu an hmuhin pasalṭha a ni tih an chiang hle a an zah ru hlawm hle, chu tih rualin nula ho mit chu Hmingthanga hmelah chuan a fu chat bawk a. An inlungrual dan em emah chuan Hmingthanga chuan Bungtlang khua chu Lal fel tak rorelna hnuaia awm a ang a ti hle mahse, tuibur hmuamda hnu lekah chuan nula leh tlangval rawn inchhawm haw hnak hnak an rawn lang leh a, chung ho an rawn thlen chuan a lo awmsa te chuan ṭawngkam khat mahin an be hauh lo a, kawtchhuahah pawh chawl khawmuang ve ngam loin khaw chhung lam an pan sap sap a. Hmingthanga te zinga tlangval pakhat chuan rawn haw mekte zinga rawn kal hnuhnung ber rawlthar pakhat chu koin "Kha kan pasalṭha putar kebaia fapa pawh i feh ve a ni maw, hawh teh fathang in awl theih tak loh hnua lo neih hahthlak zia min han hrilh ta che" tiin a han au el a, chu rawlthar chu ding chatin a mah hmusit tu leh a pa hmer tel tu amah aia u fe chu meng sen ram chunga melhin engmah a sawi hauh lo thunga. Tlangval chuan "Naupang tetein mi melh rum ve khanglang elaw" tih paha ben tuma a kut a la kang chiah chu tha chak tak hian lo man bet chatin a han hawi let chu mikhual tlangval pa lo nui sung chu a hmu a"Ṭhiana naupang mai anih hi kal tir mai rawh"a han ti a, chu rawlthar chuan Hmingthanga chu en vang vangin a nui saka a kal san nghala,a hnu lawkah Hmingthanga chuan "Ka lo va lut ange" tiin khaw chhung lam chu a pan san ta a. Kawtchhuaha awm mekte chuan an en duh hle, Hmingthanga erawh chuan retheite dinhmun chu a hmu chiang ta hle a, mak a tiin an khua nen a han tehkhin a, Bungtlang khuaa a awm lo chu vannei a inti hle. A hmaa rawlthar kal chu zui ru zelin chu rawlthar luhna in chu a han melh vang vanga, an sawi ang ngeiin pasalṭha awmba chhungkua a ni tih chu salu intar ṭhahnem tak aṭang chuan a hre thei mai a. "Mikhual in thleng thei angem?" tiin luh a han dila, nu pakhat hian "Thei tuk e, rawn lut rawh" a rawn tih hnu chuan lutin Hmingthanga hmel an han hmuh chuan an chhungkaw pa ber chuan chik zetin a han melh vang vang a "Khawi lam pasalṭha nge ka in meuha thlen mi rawn dil tu chu, khual ṭha tak i nih ngei ka ring e, thil ṭha han hlui tur che kan nei lo a, amaherawh chu kan neih ang ang kan ei za a niang chu" a rawn ti a nu ber chuan Hmingthanga chu in sil thlan dai turin a rawn au zawm zat bawka, Hmingthanga chuan nuam a tiin fel a ti hle. A insil thlandaih hnu chuan chhungkaw pa bulah chuan inhmelhriattirna te a nei a, a hming leh khaw hming erawh a la phuah chawp zel thung. A zin chhanah chuan Zehtet lama chhungkhat hnaivai tlawha a kal thu leh a haw lam Bungtlang khuaa peng a nih thute chu ahan sawia. Chu chhungkaw pa chuan Zehtet hming a han lam ri ri a hriat chuan Hmingthanga chu a en vung vunga "Pasalṭha Chhuahchawngate i zu hmu em?" tiin a zawt tawl maia. Hmingthanga chuan a hmuh thute a sawia, chu chhungkaw pa chuan zawt chik telh telhin Thansanga te chanchin thlengin an sawi dun a, amah Hmingthanga chanchin thleng thleng chuan an sawi kai chho a, Hmingthanga nuih chu a za ru hle mai. Chu chhungkaw pa chuan "Ka hming chu Hratthanga a ni a, he khaw daingul hi ka lo ni ve ṭhin a, kan Lalpa khan min chhuangin ka hming hi uanna'n a hmang ve fo a sin, kei pawhin ka vanglai nanana kha chuan ka inring tawkin huaisen hi ka inti ve ṭhin hle a, Pasalṭha Thanhranga leh Pasalṭha Chhuanthanga te nen khan mi hi an tehkhin nasa ve ṭhin a sin. "tiin a vanglai chanchin a han sawia a mittui tling pam chu Hmingthanga chuan a hmuh hmaih lo kher mai. Pu Hratthanga chuan" Ka nupui hmasa khan nau mi hrin sak thei lo a vawi thum kan chhiat hnu lawkah min boral sana, ka tuar nain ka chempui leh ka silai hi ka ban peih meuh ṭhin lo, mahse zan khat chu pawih ralin min rawn bei thut maia, lo hre ru lawk lo phei i la chu kan chan a chhe viau ang, khaw chhung an rawn luh hmain kan bei hman hram a, an pasalṭha nen inmalbeiha chinfel kan rawta, kan Lal tualah ngei khian kan inbei a hnehna ka chang ka han ding chhuak chu silai rawn puak ṭhuaiin ka khup ruh chu a rawn deng keh chiang hle. Chu veleh pawih la dam awm chhun chu kan khaw mipuite hian an bawr huka kar loah an chimih ta mai renga, mahse kei erawh ka ke ka bai phah ta a ni. Kan Lalpa khan fathang min awl tir a, nupui ka sun hnu lawka ramtui lei lo a ka awm leh si chu na ka tiin thih hi ka chak em em ṭhin hial a ni. Enge maw chen chu ngaihtuahna mumal pawh pu thei lo in ka awm nghe nghe, mahse hei Hrangseipuia nu hi ka tawng leh ta a nih hi"a han ti charh charh a, a fapa rawlthar Hrangseipuia chu a hmuh tawh hnu ni mah se Hmingthanga chuan enin a han nuih saka. "Ka pu, i fapa hian i hnung chu a rawn zui zo em emin ka ring a ni" a han ti a Pu Hratliana chuan "A khai khai, keia fapa ve te zawng engmah va ni suh, nang deuh hi a sin, i pian phung ka en hi chuan Pasalṭha Thansanga te zinga mi ni awm khawp i ni mawle, mahse an ni zingah khan Pasalṭha Hmingthanga chauh hi ka la hmuh loh awm chhun a ni a, Hmingthanga i ni han ti dawn i la i hming min hrilh bawk si" tiin a han nui khut khut a. Zan riah an peih ta bawk nen an ei tlang ta a, zan riah eikhamah chuan Hmingthanga chu leihkapui lamah Pu Hratthanga nen chuan an inzui chhuaka an ti ti chhunzawm leh a. Pu Hratthanga chuan a chanchin a sawi zela a tawp a tawpah chuan Hmingthanga lo nghah reng chu a sawi thleng ta, "Mak tak maka kan Lalpa leh a khawnbawl upa pahnih thih hnu khan kan Lalfapa khan Lal nihna chu a chelh nghala, mahse buaina a rawn inṭan chho dawn chauh a lo ni,mipui te zingah chuah thihna nasa takin thla a rawn zar ta a khaw chhungah hian hri a lêng tiin mipuite chuan an sawi veka mahse kei erawh chuan ka ring hauh lo thung, kan Lal thar chu khaw mipuite chuan an puh ta tlat mai a, a tawp atawpah chuan an paih thla ta nge nge a, a aiah tuna kan Lalpa hi Lal atan kan thlang a ni. Mahse mak tak maiin kan Lal Rolura zia chu a dang chho telh telh a, Lal in khi zu hmunah siamin zu tlanin an ri hut hut reng maia, mi hausa leh neinung apiang a duh sak chho a, retheite hmuhsitna a nasa zual hle, kan Lal Saingurliana leh a ṭhiante khan Lal Rolura chu hneh let an tuma mahse anmahni zawkin an thih phah ta a ni. Mak ka tih em em chu kan Lalpa hian engvanga min that lo nge a nih tih hi a ni, a tirah chuan min zah vangah ka ngaia mahse a lo ni hauh lo, he khaw daingul ka nih lai ata tawh kan Lalpa'n min dah chungnun em em ṭhinna kha phuba lak a lo duh lek a lo ni, khang hun lai khan min lo thik hle ṭhin a lo nih chu. Ti chuan hei khaw mawng lamah min insuanthlak tira, fathang awl tawh loin lo min neih tira, kebai mai ka ni si a Taitea hi kan rin ber a nih mai hi" tiin a mittui chu a khap per sak sak a.

Hmingthanga chuan "Ka pu inbuaina hi a tawp thuai ang, khawngaihin Lal chunga lungawi lo mekte chu ṭan khawm puiah lo sawm ta che, an hnial che anih chuan Bualthleng pasalṭha Thansanga leh a ṭhiante an rawn kal i ti dawn nia, tin in Lalpa Saingurliana pawh ka ṭhiante kiangah a awm e" a han ti chu Pu Hratthanga chu a meng bial kawk kawk a, Hmingthanga mitah tak enin "Hmingthanga maw?" a han ti a, a ni tih lantirna'na Hmingthanga'n a lo a buk khum takah chuan nui vur vurin "Pasalṭha ti tura min tih te kha a harsa hauh lo ang mi rethei ho hian he khua hi kan hne tawh tak zet a ni" a ti a, Hmingthanga chuan "Anih chuan ka pu i fapa hi kan ṭhiante kan koh tir dawn em ni ang" a han ti a Pu Hratthanga chuan naktuk lama koh a ṭha zawk ang, hmanhmawha thil tih chi a ni lo, tin tunah hian kan Lalpa Rolura hian Halkha pasalṭha rothap Duailoa leh a ṭhiante panga a mikhual mek a, in tan an hnawksak deuh mai thei a nia"a han ti a Hmingthanga chuan pasalṭha Duailoa hming chu a lo ral khat hriat ve fo tawh a mahse a huphurh chuang hauh lo. "Ka pu pasalṭha Thansanga leh a ṭhiante hian buaina kan zawng ngai lo a, tin kan hnial ngai hek lo, a ngam fa chu chem sen nen kan insam thi buaih buaih mai ang chu" a han ti a Pu Hratthanga chuan engmah sawi tawh lo mah se Hmingthanga chu a ring tawk hle.

Leng hawn ar khuan hma chuan inzui chhuakin Pu Hratthanga chuan chhungkaw dangte lam ṭanga siam tumin a tlawh kual nghala, Hmingthanga erawh mikhual anihna angin Lal inah a han in lan ve a, Pu Hratthanga in a thleng a ni tih Lalpa Rolura leh a upa te'n an hriat chuan an be ṭha lem lo hle, Hmingthanga pawh awm rei duh loin zawlbuk lam a pana, lawi luh ve dilin hawihawm takin val upate chu a bia a, leng hawn ar khuan takah chuan tlangval ho pawh rawn lut khawmin val upa chuan "Hei zanin chu khual buan tur kan nei tlat mai, a hlimawm leh dawn ngei mai" a han tia tlangval ho chu an lo ri dur dur maia, Hmingthanga chu phur taka ding chhuakin "Kawng kal chau te ka ni si a, min dim thiam a ni ang chu" a han ti a, tlangval pakhat lian ṭha thelh thawlh rawn ding chhuakin "I pian en chuan sakhi tuai pu zo awm tawk vel i nih ve hi, khawnge mipa leh mipa infiam chu kan ri pawp pawp mai tur lah ni" tih pahin Hmingthanga puan chu a rawn chelh nghal chata. A ṭawngkam chu Hmingthanga chuan a ngei ru hle, chu tlangval beng bulah chuan zawi thawp satin "I inchhir dawn" a ti sapa, val upain "Khai le" a rawn tih rual chuan Hmingthanga chu awp hniam thutin a tlangval buanpa chu hnung lamah an bin ṭhuai mai zawng zawlbuk chu a rik hian a ri dur dur mai a, Hmingthanga chuan thlang lam kila tlangval ngawi renga lo awm khawmte a hmuh chuan mi rethei ho, zawlbukah pawh inthlahrung taka nun hmang mekte an ni tih hriain nelawm takin a nuih sak a,

Hmingthanga tlangval bin pa rawn tho chhuak chu a mit mengah tual thah chakna a khat a ni ber e, mahse inbuan leh tur chuan a banin a peih loh san tlat, a ban ruh pelh chu rawn lek langin "I vannei hle mai" a rawn ti sap a. Val upa chuan an khaw buan chak ber chu a ko chhuak ta, a taksa han en mai chuan a huphurhawm fahran lem loh hle, mahse Hmingthanga erawh chuan a dar hlai hlep hlawpte, a ban bul lian tak leh a kawng fek rat te, a mal leh chawn zen thla zaihte a en chuan a chak tawk hle ang tih a hrethiam thung. An han in din chilh chu Hmingthanga chu a lawr deuh zawka, a taksa erawh a ria hlek thung. An puan venah an han inman chata an han inbuan chu tlangval te chuan thawm chhuahin an ri dur dur a. Hmingthanga'n a buanpui hmasa zawk a bin thal tawp lai lo hmu hman tu Halkha pasalṭha Duailoa chuan Hmingthanga pian chu zir chiangin pasalṭha nge nge chuan a pasalṭhat pui chu a hre chiang hle, tuna a buan mek pawh hi a chhaih kual mai mai tih chu chiang takin a hria a ni. Thawh hnihnaah pawh Hmingthanga bawkin a bin leh takah chuan val upa chuan tawp zai rel pui a tum ta, Pasalṭha Duailoa chu rawn pen chhuakin "Kan khual Pasalṭha chu ka lo buan ve ang chu, khual leh khual inbuan a pawi em lo ang chu" a han ti a, Hmingthanga chuan Pasalṭha Duailoa pianzia chu zir chiangin a han nuih saka, an han ṭan chu tha pui chhuah tak meuh meuha inbei an ni bawka, tlangval ho hmuhnawm ti lutuk chu an ngawi kar hlawm mai a. Duailoa chuan a thiam thil tin reng hmangin Hmingthanga chu chawi kan a han tuma, mahse Hmingthanga chuan a bawp seina hmang ṭangkaiin a lo daikhalh hman zel bawk si. Rei fe an inbuan hnu chuan Duailoa chu a kang ta nawlh mai. A thawh hnihnaah pawh an inbei tawk lehpek hle, mahse mi pahnih lo buan tawh Hmingthanga tha chu a zuai zawk ta tlat. Duailoa chuan chawi kang ve lawpin hnehna a chang ve ta. A thawh thumnaah pawh Duailoa bawk chu a chak zawk leh ta, mahse amah ngei pawhin tha thar veve a inbei chu ni se a chak lo zawk ngei ang tih a hre chiang hle. Hmingthanga chu chibai pahin "Pasalṭha nang ang renga chak hi ka la buan lo" a han ti a Hmingthanga pawhin "Ka buan tawhah i la khirh ber ang" tiin a chibai let ve a, a rilruah erawh "Thansanga chu i va khan dawn lo tak em" a ti nauh nauhva.

 A tukah chuan Hmingthanga chu Thansanga te lam panin hmanhmawh takin a kal a, Thansanga te'n Hmingthanga hmel an han hmu chu an hah a dam sawng sawng mai. Chanchin Hmingthanga'n a han hrilh zung zung mek lai chuan "Che tawh suh u" tih thawm a rawn awm ta mai, Thansanga chuan "Mipa inih chuan rawn chhuak ta che" a han ti a mahse aw bawk chuan "Hual beh vek in ni tawh" a han ti a, Hmingthanga chuan chu aw chu a han ngaihtuah vang vanga a hre chhuak ta,"Rawn inlan mai ta che, ka hria che, min hual bet tur khawpin in tam lo tih ka hre bawk e" a han ti a, Pasalṭha Duailoa leh a ṭhiante panga chu an rawn chhuak a, "Khual ṭha emaw tiin ṭha takin khuaah Lal in a awm tir che a, lang lo lam aṭanga inphiarrukna hi ka thil ten zawng tak a ni" a han ti a. Hmingthanga'n chhan let a tum lai tak chuan Lal Saingurliana chuan "Kei hi Bungtlang Lal Saingurliana ka ni e, lang lo lam aṭanga min phiar ru tu te chu Lal phuahchawp Rolura leh a lam ṭangte an ni e" a rawn ti a, Pasalṭha Duailoa chuan Lal Saingurliana ṭawngkam mi dip na tak, fiah kelh kawlh leh thunei tak chu a hriatin dawt a sawi a ring hauh lo, mahse Lalpa Rolura'n Damdep khaw rûn tura a chah te an ni miau a, an rosum hawn turte mitthla chungin Duailoa chuan "I zahawm khawp mai, mahse paih thlak i ni tawh a, Bungtlang Lalpa hi that pawh ni la mipuite hian an pawm dawn chuang lo che" a han ti fak a, Lal Saingurliana rilru chu a na thar hle. Thansanga chuan "Lal Saingurliana do tu a piang chuan Pasalṭha Thansanga an do tih hre rawh se" tih pahin Duailoa lamah chuan a han pen hnai sauh a. Duailoa chuan Pasalṭha Thansanga, a lo ral khat ngaihsan ruk em em a hmu chu a lawm rualin a hmuh dan duhawm lo tak chu ṭha a ti lo hle, mahse Halkha hnam zinga a filawr ber te zinga mi ni pha ve anih na chuan Thansanga huphurhna a neih tir chuang lo a "Anih chuan hna hnih kan nei anih chu, nang ni nena kan buaina kan chin fel zawhah Damdep khua ka rûn leh anga an Lal fanu ka hawn bawk ang" a han ti chu Thansanga te chu an thin a rim kher mai. Thansanga kut khur dar dar leh insehruh ṭun chu Liansanga chuan hmu thiam vatin thil ṭha lo a thlen mai lohna'n "Pasalṭha kan kawng dalin awm lo mai ta che, tin, Damdep khaw Lalnu saw kan Lal fanu a ni e, Pasalṭha Thansanga kha nupui ni mai tur unaunu a nih saw" a han ti a. Dammawia lo ding ngawi reng chuan "Ṭiau ral Pasalṭha Mungliana fapa Pasalṭha Dammawia ka ni e, ka chi puite innihna angin thah che u ka duh lo a ni, chu vangin kan kawng dalin awm suh u" a han ti a. Mahse Duailoa chuan luhlul a la chhuah tlata, a tam zawk an ni bawk nen, "Tunah" tih tuar pahin a chem chu a vai nghal puata, mahse a vai tlang chiang hle, a kaihza tha chat hmawk khawpa Thansanga sahna a vang chuan a ṭhingṭhi nghal rawp bawk a. A mak ti lutuk chu a meng kawk kawk hial a ni. Liansanga Dammawia leh Hmingthangate chuan rei lo te chhungin Duailoa ṭhuihhruaite chu an thal vek bawk a. Pasalṭha Duailoa chuan Thansanga chu enin "An sawi ang ngei chu i ni e, ka nunna hi i kutah a awm e" a han ti a, Thansanga chuan "That tur chein he lai hmunah hian ka rawn kal lo e, i ṭhiante erawh i tana an rinawm manah pialralah an lo hmuak dawn che anih hi" a han ti a Liansanga chuan "Khaw thim hunah khua kan lut dawna, nang hi kan zinga i awm ve rih a ngai ang" a rawn ti ve bawk a.

Pu Hratthanga te inah chuan chhungkaw sawmthum aṭanga pa ber ṭheuhte chu inhmu khawmin Hmingthanga chuan thawm dim takin Thansanga te nena an ro rel dan chu a hrilh hlawm a. Mak tak maiin an zingah chuan khawnbawl upa pakhat a tel ve tlat maia, Pu Hratthanga chuan a rintlak thu leh Lal ro rel dan ṭha a ti lo tak zet tih chu Hmingthanga hnenah chuan a hrilh bawk a. Hmingthanga chuan an ro rel tawh sa tih awlsam nan amahin rem a ruat ta ngawt mai a. A kal fuh meuh angem le. Leng len ar khuan hnu lawkah chuan khawnbawl upa in chu a rawn kang ta hluah hluah mai le, tihpalh thil thu a tihkan a ang hle, mahse a hal ru tu Pu Hratthanga fapa Hrangseipuia erawh a khi vur vur thunga. Tlangvalte chuan ṭhelh tumin in kang lam chu an pan a, Pu Hratthanga lam ṭang chhungkua a tlangvalte erawh zawlbuka silai te chu khawmin Pu Hratthanga te in lamah an thiar chhuak thung a. A khawnbawl upa in kang hluah hluah thlira leihkapuia ding Lal Rolura leh a khawnbawl te chuan in neitu pa hnenah chuan pawi an tih pui zia an hrilh sap sap hlawma. Lalpa Rolura erawh a ngawi kar mai, a tukhuma thir vawtin a rawn nawr lai mek chuan hawi let a han tum a, mah se, "Che tawh suh u" tih riah chuan a phu chiang hle. Khawnbawl upa ho chuan Pasalṭha pakhat sang ṭha thlerh thlawrh hmana an lo hmuh tawh, a bianga savawm hamna ser lang kulhin an Lalpa a tin lai chu en ṭhapin che ngam pawh an awm lo a, Lal in chhung a ṭang chuan mi pahnih rawn chhuak lehin an ni chuan an rawn hnungkhirh nghal mawlh mawlh a. In kang an han ṭhelh zo tlangvalte an ṭhut hahdam lai tak chuan Liansanga silai chu van vawr zawngin a puak ta dur mai. Tlangval ho chu hmanhmawh phelenga tlanin Lal tual an thlen chuan an tawp chat hlawm a. Thansanga chuan "Vawinniah hian mi neinungte hleilenna leh Lal phuahchawp rorelna ti tawp tura rawn kal kan ni" a han ti a tlangval ho chu an ri mur mur maia, Lalpa Rolura hnenah chuan Thansanga chuan khaw mipui zawng zawng ko khawm turin a han ti a, mipui an han kim hnu chuan Thansanga chuan Lal Rolura chu din hma tirin Thansanga chuan a nawr a, a hmel chu thla eng hnuaiah chuan a rawn lang ta riai riai a, mipui ho chu phun sap sapin Thansanga hmel chu an la theihnghilh lo chiang hle. Lalpa Rolura chuan "Engvanga hetianga rawn che nge in nih?" a han ti a Thansanga chuan mipui lam chu kawkin "Lal a lo thleng e" a han ti a mipui zinga ṭang chuan Hmingthanga, silai pu leh chempui keng chunga rawn kal chu a rawn hnai zela "Kiang rawh u, ka chhawnin a hem ang che u" tiin a rawn au lauh lauh a, a hnunga mi pakhat rawn kal ve chu an han en chianga a hmel an han hmu chu mipuite chu mak tiin an phun mur mur a. Lal Saingurliana hmel Rolura'n a hmu chiah chu kawkin khur hlawk hlawk chungin "Enge i duh? He lai hmunah hian neih i nei lo chhuak rawh" a han ti tuara Saingurliana chuan Rolura lu chu kawkin "I lu kha ka duh a ni" a han ti a. Zawi muanga pan chhoin leihkapui aṭang chuan phiar ruka a awm dan zawng zawng chu a sawi ta. Mipuite chu ri mur murin Lal Saingurliana leh Rolura lam ṭangte chu an inṭhen ta phawk mai. Mipui leh mipui buaina chu ṭhelh mai mai chi a ni dawn lo tih hriain Dammawia chuan "Hminga hawh teh tel ve teh ang" tih pahin Lal Saingurliana lam ṭangte awmna lam chu a pan thla nghal a. Lalpa Rolura chuan "Dawt phuahchawp vanga min phatsan tute kha an thi vek tur a ni" a han ti tuar a, Dammawia chuan "Tunah tih pahin Rolura lam ṭangte lamah chuan Hmingthanga nen chuan an tlan ta. Lal Rolura lam ṭangte chu hmanrua pawh hum mang lo an ni a, Lal Saingurliana lam ṭangte erawh ruahmanna nei sa an ni bawk nen chempui nen an rawn chhuak vek a, an tum dan angin kal tlang phei se chu Lal Rolura lam ṭangte chuan ngen mu an dawng ngei ang le, mahse Pu Hratthanga'n "Mahni chenpuite ngei beihna'n chuan silai a rawng lua e" a tih avangin silai an khawm sa pawh an hmang leh ta lo a ni.

 Khaw khat tlangval inbeihna rapthlak tak chu a thleng ta, he inbeihna hian unau ang maia khawsa ho ṭhin hmun khata riak ho a, kut ni a hlim taka lam ho ṭhinte karah chuan hem thlakin mi tam takin an unaupa, an fapa an leh an pate an chan phah a ni, hausakna um avanga Lal Rolura lam ṭangte chuan an hmuhsit leh rilru na taka an lo siam ṭhinte kutthlak chu an dawl lo hle, Dammawia thaza tihrehna hmu pawh a tal na kher mai, Hmingthanga hma pawh a kaw duai duai tho mai a. Nunau mangang chu an ri nuai nuai bawk a. Lal Rolura chu Saingurliana chuan hnai set sawta ṭangin Lal tualah chuan a tlawh thla ṭhuai maia, Liansanga chem pui chu lak sakin a pan thla ta nghala, Rolura'n a lam pana rawn tlan mek Saingurliana chu hmu mah se, inveng turin a rang tawk tlat lo. Rolura chu nunna nei lo tih hriat takin tual charah chuan a mu a Lal Saingurliana chuan Thansanga pan pahin "Phuba chu ka la ta" a ti sap bawka. Rolura lam ṭangte chu kar loah an inpe ta. Dammawia te chuan an hnung khirh nghal mawlh mawlh a, Lal Saingurliana chu rawn ding chhuakin "Phiar rukna leh dawt hmanga hekna avanga inpaihthlak kha ka ni e, ka pa Lalṭhutthleng hi vawin aṭang chuan ka ta a ni ang, min pawm pui lo in awm em" a han ti a mipuite chu rawn au rualin "Lal Saingurliana" an rawn ti dual dual a.

 A tukah chuan Rolura upate leh Rolura lam ṭang la damte chu khua aṭangin an hnawt chhuak ta vek a, Lal Saingurliana chuan Bungtlang khua chu in za tling awrh chungin bul a ṭan pui leh dawn a ni. Lal ina Thangliani leh Saingurliana in melh dan lo hmu daih tawh tu Hmingthanga chuan "Lal nu chiah i mamawh ta" tih pahin a han siai zeuhva, Lal Saingurliana chuan "Hminga mai mai ṭhin che hian" a han ti a, Hmingthanga lah chuan "Sanga i makpa tur a nih hi" tiin a puang nghal veka, an hlim tlang dar dar hle. Thansanga chuan inbeihna muala Hrangseipuia che zia kha a theihnghilh hauh lo a Lal Saingurliana hnenah chuan Pasalṭha huaisen tak a la rawn nih chhoh ngei a rin thu a sawi hial a ni. Tlangval thite ruang buai pui leh a ṭul ṭul thawka khuaa zan hnih an riah hnu chuan Bualthleng lam an pan dawn ta. Lal Saingurliana chuan lawmman pek a han tuma an duh hlawm der si lo, mahse Hmingthanga hnenah chuan Thangliani tan ṭhi fang nalh tak leh thu thlum tak a thawn ta thung. Hmingthanga lah chuan "A u a awm ve renga kei mi thawn daih te'n a dik nang, Sangte hei Thangtei ta tur a nia" tiin ṭhi fang chu a han phawrh a "Chuan Saingura hian" tiin Saingurliana thu thawn chu puan a tum leh ta mai, Lal Saingurliana lah an ni aia u awrh chauh a la niin a la za ve bawk nen Hmingthanga hmui chu hupin an nui uar uar a, khaw khat Lal ni tawh mah se a naupanna a la thlah bik lo hle.