BUALTHLENG MAWITU BUNG - 2

Hun a liam zela Thansanga pawh se en rual vel a lo ni ve ta. A hmelah a nu chhun a, a taksaah a pa a la chhun ang an tih huai huai a ni a. A hmelṭhatna chuan nulate lawm a hlawh em em a, an pawm kual nawk nawk fo mai a. Amah lah naupang nui duh tak a lo ni bawk nen, piai tu pawh a ngah thei hle.

A pian aṭanga kum hnih a liam hnuah a nu chuan fa a hring leh a, hmeichhia a ni tawh thung. A hmingah Thangliani an sa ve ta thung a. Thansanga a lo leikan leh deuh hnu chuan a rualpui ṭhian kawm mumal a nei ngai lo a, amaha awm nuam a ti ber a. A nau nen an awm dun loh chuan amah chauhin a awm mai ṭhin. Zana pawntona-ah te hian a tel ve paw'n rei tel loin a sir aṭangin a nau a lo thlir mai ṭhin.

Ṭum khat chu an khaw ṭhenawm Zehtet aṭangin pem thar an rawn awm a, Zehtet khaw lal nen inhmuhthiam lohna avanga rawn pem an ni. An pa ber chu a vanglaia Pasalṭha khual thang pha ngat niin Zehtet khaw daingul lo ni ṭhin a, vanglaia Pawih pasalṭha huaisen Mungthangliana lu khai tu Pasalṭha Zangaia a ni. Lal Dohranga chuan lal nena an inhmuh thiam loh chhante a hriat hnuah a upa te a rawn kual leh tete a, tichuan ro te relin, a tawpah lawm takin an lo pawm a. Pu Zangaia hi Thanhranga pa Chawnghranga te nen a inrual vel an ni a, fanu hlir panga ngawt a neia a naupang ber, a tar lam fa Thansanga nena kum inrual Liansanga a nei leh bawk. Pu Zangaia te in chu khawtlangin lal in bul hnaihteah Pu Chawnghranga te inbulah an sak sak a, Pu Zangaiate chhungkua chu an lawm hle mai.

An fanu naupang berin Zehtet khaw lalfapa a neih duh loh vanga hnawh chhuah an tawh hnua an lawmna in a tawng san ber a la ni hial ta ve ang. Lal leh upate hnenah an thiam ang tawkin lawmthu an sawi a, Bualthleng khaw tihmingchhetu ni lova ti mawitu nih an tum tur thute nen an sawi a, Lal Dohranga te pawhin lawm taka dawngsawngin, inthlahrung hauh lo tur leh nuam ti taka khawtlanga hun hmang turin duhsakna te an hlan a, buaina leh harsatna an neih hun apianga lal in a pu lut vat zel tura inhrilhin ṭha takin an inthlah a ni.

Zan khat chu naupang pawnto rual hlim em em a an awm lai chuan a ngai te bawkin Thansanga pawh a sirah lo dingin a nau che vel chu hmuhnawm ti takin a lo thlir a, chutia hmun dang hawi lek lo va a nau a thlir lai chuan a bulah Liansanga chu lo dingin, "I tel ve chak vak nange" a rawn tih chuan phu deuk zukin Liansanga lam va hawi pah chuan, "Chak lem lo ve, ka nau che vel hi a hmuhnawm ka ti em a, ka thlir mai zel" a han ti a. Tichuan eng engemaw sawi dunin an ti ti fe hnuah an inlam panin an haw ve ta a, chumi zan aṭang chuan Liansanga nen chuan an inkawp awl lo a, khawi lo vah chhuahnaah pawh an inzuiin unau piang hmun ang maiin an inngaina a, Liansanga farnute pawhin Thansangate unau chu an duatin an nel hle a, an nau ang chiahin an en a. Thangliani phei chuan a nel zualin Liansanga u te hian an paw kual fo a ni.

Hun a liam zela Thansangate pawh zawlbuk thingnawi keuh rual an lo ni ve ta. An pahnihin an keuh dun a, sava an veh pah a, an kut a hmui dun bawk nen an chhungkaw sa barh tu ber an ni chho der mai a. Anni chhung hnih rapah chuan sava rep hian awm loh lai a nei meuh lo a ni. Anni naupang thaza tih takah sava veh chu nuam an tiin, rei tak tak vah avanga chhungte hauh an tawrh chang a tam em em a, mahse an veh tui laklawh ṭum hi chuan hauh tuar tur tih inhre sa chunga an haw chang a awm leh nge nge ṭhin.

Naupang hlim thei tak niin, an khua ni se khaw ralmuang leido nei lo a rei tak awm tawh an ni a, an Lalpa Dohranga leha upate lahin rorel an thiamin an khuaah mi rethei bakberh tak tak an awm an rem ti lovin, chutiang chhungkua apiang chu rang taka chhawm dawl vatin mi pangngai zinga inthlahrung lo taka an awm theihna'n an ngaihven zui reng ṭhin. Chuvangin Bualthleng lal hnuaia ngaihngam taka kun chakin pem thar an nei fo va, in zathum nufa an tling hial tawh a ni. Mahse Lal ngilnei leh hmangaihna ngah tak mah nise; a khawnbawl upate leh a khaw mipuite chuan an lainat em em a, a chhan chu fapa an neih theih loh vang a ni. Fanu pahnih an nei a, a upa zawk Sangliani hian Damdep khaw lalfapa pasalah neiin a naupang zawk Sangzuali erawh tleirawl chhuak tir chauh a la ni a, mahse a hmelṭhatna te leh a mizia nu hnap maite chuan a nulat chhuah meuh chuan khual tual a la deng thleng ngei ang.

Zan khat chu zawlbuk aṭangin tual laia naupang inhau thawm chu val upaten hriain chanchin hriat tumin an va en vat a, hmeichhe naupang lo insut hlawp hlawp bula Pu Zangaia fapa Liansanga leh amah aia u zawk Chhuanmawia, khawnbawl upa Thanga fapa leh a ṭhiante lo inhmachhawn mek chu an va hmu a. Val upa Ruma chuan an inhauh chhan a han zawh chuan rang takin Chhuanmawia chuan Thangliani'n a nau kawi a lo ruksak laklet an tumna lamah Liansanga a lo inrawlh thu a lo sawi a, Valupa chuan Liansanga chu thu chiang zawk hriat tumin an zawt leh a. Liansanga chuan, "U Rum, ka va hmuh zawng chu U Chhuana te ho hian Thangliani samah kekin an lo chhaih kual a, Thangliani a ṭap nasa bawk si a, ka va chhan ta a ni" a lo ti let ve leh a.

Chu velah Chhuanmawia chuan, "Dawt anih kha. U Rum, saw nu sawn ka nau kawi a ru chiang lutuk, a u pawhin a chhan ngam loh midangin a an chhan" a sawi zawh hman hma chuan "Chhan turin ka rawn hmu har deuh a ni e, ka nau khan chhantu tur u chu a nei ve alawm. In ngam ngam ka ngam" rawn ti tu lam chu an va hawi phei a. Thansanga inring taka thingfak keng chunga lo ding kak hah chu an va hmu a, Val upa Ruma chuan thil ṭha lo thleng thei a ni tih hriain, Thangliani chu thu a han zawt a. Thangliani chuan a ruk loh thu leh a kawi chu a u te ngeiin an laksak anih thu leh amah chauh nilovin, a u ten a neih zat thleng a an hriatpui vek thu chu a lo hrilh ve leh a. Val upa Ruma chuan ṭha tete a inkawm tur anih thute, hmeichhe laka kutlek ching mipa chu mipa nep tak an nih thute nen nelawm takin a zilh ta a.

Chutia an kal darh dawn lai chuan Chhuanmawia chuan, "Anih chuan U Rum, thingthunung indah hlat siakah Liansanga leh Thansanga te hian min cho chuan ka cho ve" a rawn ti a. Val upa Ruma'n Thansangate lam a va hawi chuan an ngam tih entitna'n an lu an lo bu nghut nghut a, Zawlbuk kawtah hruai pheiin a kal hmasa zawk turte an thlan fel hnuah chuan thingthunung kengin Bualthleng khaw chhim lam Raicheh ngaw an tih lam pan chuan Chhuanmawia te ṭhianzaho chu an kal tir ta a.

Raicheh ngaw an tih nachhan hi tun hmain an khaw nu raipuar lo lama va kal chu he ngawah hian raichehin a thih vang a ni. He ngawah hian zan lamah phei chuan thawm mak tak tak a tamin kal ngam pawh an awm meuh lo va, pasalṭha tak tan lo chuan zan riahna chi pawh a ni meuh lo a ni. Khua aṭanga tuibur hmuamda vel kalah hian bung lian tak, huai nei a an sawi ṭhin hi a awm a, chu mi kal pel ngam chu thingthunung indah hlat siak zingah an awm ngai meuh lo.

Chhuanmawia te chu an kal vang vanga, a ṭhiante chu hlau lo tura puih pah zelin, amah pasalṭha pangngai ve tak leh khawnbawl upa ni bawk fapa tih takah a huaisen pawh a huaisen ve hle. Bung kung thlen hma deuh chuan thawm mak tak tak a tamin a ṭhiante chuan an hlau tawh hle. Mahse Chhuanmawia chuan bung kung thlen ngei a tum avangin a fuih sauh sauh thung a. Bung kung thlen hma deuha an kal lai chuan an hma zawnah palian tak hi a rawn ding thim ta hmuk mai a. Chhuanmawia ṭhiante hlau lutuk chu ṭawng nachang pawh hre loin an dingkhur hlawk hlawk mai a, a nihna takah pawh Chhuanmawia chuan a hlau ve hle. Mahse a ṭhiante hmuha hlau anga lan a duh loh avangin chu palian thim hmuk lama a thingthunung kena vawm pah chuan a rang a rangin a ṭhiante chu a tlanlet pui ta nghal a.

Zawlbuk kawt an rawn thlen hnu chuan val upa leh tlangvalte an lo kal khawm ṭeuh tawh a lo ni a, tlangval te hian naupang huaisen fiahna anih avangin thingthunung in dah hlat siaka inelna hi an ngai pawimawh hle ṭhin a ni.

Thansanga te hun a lo thleng ve ta, tha tho takin an ṭhiandun chuan an kal a, Thansanga'n thingthu nung kengin Liansanga'n meichher nen a zui bawk a. An kal dawnah chuan huphurhna aiin phurna an hmelah chuan a chhiar theih a ni. Titi paha kal zelin thawm mak tak takte chuan an beng chhung a luh lo nge, an beng a ngawng ta tlat le, hre lo ang hmakin an kal a, a changleh an nui dun bawrh bawrh a. Thui tawk fang an kal hnu chuan bung kung pawh an hmu thei ta. Mahse bung kung chu kal tlang an tum dun chiang hle.

Bung kung thlen hma pen sawm lo liam a awm tawh lo ang tih velah chuan an hmaah palian tak mai. A hmel hmuh theih si loh hi a rawn ding thim hmuk mai a, kal tlang a phal lo a ni tih hriat takin chet pawh che sawn eih loin a ding reng a. Thansanga te lahin let san tum bîk si lo chu an pan phei miah miah mai a, a bul an va thlen dawn hnaihah chuan Thansanga chuan, "Khawngaihin min kal tlang tir hram rawh. Buaina siam kan tum lo ve, kan kal tlang ringawt dawn a ni" a han tih velah chuan chu lai ngaw chu thawm makpui pui, patling au ri ruah ruahte, nutling nui khek ri leh na tuar ri te chuan a rawn luah khat hneh kher mai. Mahse nakin lawka mi hrang val la ni tur, pasalṭha khual kai khawpa hmingchher te thlah kal zel, an thlahtute huaisenna an thisena chhawm nung zeltu te pahnih tan chuan hlauva khurhna tham a va ni lo em.

Liansanga chuan a meichher ken lai vai kual pawp pawp chung chuan chu huai paliana chu a rawn pan siah siah mai a. Thansanga lahin phur tak maiin a rawn zui bawk nen, chu lai bung huai te meuh pawh chuan chung mi huaisente chu bei ngam meuh lovin an kiansan ta a, bung kung an pelh hnu feah pawh chuan duhtawk tih hun an nei thei si lo. Zehtet khua nena an inrina hmunah tak chuan an va dah ta, an let leh lam chu tibuai tu awm lovin tluang takin an haw a, khua an luh meuh chuan leng hawn ar a lo khuang der tawh mai a. Zawlbuk kawtah chuan an chanchin ngaichangin an lo ṭhu ṭhup a. Val upa Ruma phei chuan a lo ngaihtuah tawh takzet tih hriat tak hian a lo tei kual chhen bawk a.

An va thlen a an va dahna hmun an han sawi chuan tlangval ho chu an rawn thum huk a, awih leh awih lo pawl an kat ta nuk mai. Chutah Val upa Ruma chuan tlangval ho chu an khaw rawlthar zawlbuk kaihlim, a naupan tet aṭanga an lo enthlak ruk tawh pasalṭha nunchan zir chho mek Runthanga leh midang pali vel chu thlangin fiah turin a tir ta nghal a. Rei fe an thang hnu chuan Thansanga te ṭhian dun chuan thu dik an sawi thu an rawn hawn ta a. Chu mi hnu chuan Thansanga leh Liansanga te huaisenna chuan Bualthleng khua chu a al chhuak rangin ngaisang tu leh at huai vang titu tam tak an rawn awm chho ta. Itsiktu an tam rualin duh saktu leh an puitlin hun nghakhlel tu pawh an tam hle mai.