BUALTHLENG MAWITU BUNG - 7

Runthanga tlangval tirhte'n Thanhranga te awmna an thlen chuan an lo la inkap nasa mai a, silai keng lo te hnenah an silai ken pakhat zawk theuh chu an han hlanchhawng a, an kah pui ve ta char char a. Thanhranga chuan tlangval sawm chauh rawn let chu mak a ti ang reng hle mai. Mahse inzawh buaina hun a awm loh avangin hmelma lam chu an sai dawp dawp reng a, pawih ho pawhin an rawn sai let ve bawk a. an muhil lai an kah rawn khan mi sawmthum dawn chu an inchan nghal a, mahse mi za dawn an la nih tho avangin leh a tam zawk an la nih tlat avangin Thanhranga te chan chu a chhe hle mai. Pawih ho hian engzat nge anmahni kaptute hi an nih tih hre ngat se chuan bawh hukin rei loteah a chak zawk an ni ngei ang.

Mahse pawih ho awmna chu an hre chiang em em a, pawih ho lahin an rawn hmu ve thei der si lo. Pawih ho vanduaina thuah turin silai lah khawchhung lamah Darchhep tlangval ho thahna'n an lo dah nual bawk si avangin silai fung erawh Thanhranga te nen an kawl zat a inthlau lem lo hle. Thanhranga te chuan pawih ho tlanchhiat theihna tur awm angte an chhinchhiah hman vek avangin han kah thelh chang nei mah se, an ngenmu a thlawn lo khawp thin mai. Pawihho lahin Thanhranga te chu an rin kah vel mai mai bawk a. Mahse kap thlawn bik an ni tlat lo. Thanhrangate lam pawh mi pariat lai an thal ve tlat tawh.

Thanhranga chuan, "Hual beh vek in ni tawh e. Inpe ula, kan nun ang che u," tiin a zu au ta a. Pawih ho chu an bo vek tawh emaw tih tur khawpin an reh thiap mai a, a tawpah an zinga pakhat chuan, "Kan inpe e," a rawn ti ta a. Thanhranga chuan, "Inhmanrua te kha leiah dah thla ula, ka rawn inlan dawn e. Phakar chhuah in awm vaih chuan ka thiante hian an chimih barh ang che u," tiin a zu pen chhuak ta nghal a.

Pawihho silai a lakkhawm zawh hnu chuan an zinga pakhat chu thuzawh fiah tumin an pawt hnai a, chu pawih pain Thanhranga hmel a hmu chiah chu a dang nghal sawp sawp mai. Thanhranga pawhin chu pawihpa chu a lo hre chiang khawp mai. Zehtet lal fapa leh pawihho inthurualin an khua run an tum tuma a nunna an zuah sak an pasaltha Lianuka zawn haw tute zinga mi a ni tih a hre nghal a, thu zawh fiah buai ngai pawhin a hre tawh hek lo. A chhan chu Darchhep runtu hi pasaltha Lianuka ngei a nih a ring nghet tlat a ni.

A thiante chu ko chhuakin pawihho chu an phuar mawlh mawlh a, pawih ho chuan chutia mi tlemte lek laka an han inpe chu an inchhir leh hnuhnawh hle mai a, mahse tihtheih a awm tawh si lo. An hnungkhirh vek hnu chuan khaw chhung lam an pan ta nghal a.

Khawchhung lamah ve thung chuan Runthanga te chu an tal buai kher mai. Thanhranga te leh pawihho an inkah tak dum dumah khan pawih pasaltha pathumte chuan an mi leh sate beitu an awm tih hriain lal inchhung chu an chhuahsan duh hauh lo va, Darchhep mipa ho an phuarbeh te chu an han chhuah fel a, lal in chu an hual a, Pawihho lah chuan lal in atangin silai an rawn kap chhuak chhen leh nghal nen. Panga lai an rawn kahthluk takah chuan lal in luh chhuah a chi bawk si loh an mangang lutuk chu lal in atanga silai kah phak lohna tawk vela hlaah chuan an awm thup ringawt mai a ni.

Thanhranga te an han thlen chhoh chuan Runthanga chuan thil thlen dan zawng zawng a lo hrilh vek bawk a. Chutih lai chuan khua a lo var ve mek bawk a, Thanhranga chuan Darchhep tlangvalte chu an in theuha hawng tur leh nilenga khawlai chhuak lo tura an chhungte hrilh turin a ti a. Lal in atang chuan pasaltha Lianuka chuan Thanhranga chu a lo hmu chiang kher mai. "I lu ka va han la dawn chiang tak em," a ti charh charh a. Darchhep lalpa Saithanga chu a chhip samah thamin kawngka lam pan chuan a kal pui ta a, amah ang bawka pasaltha, a thianpa ber ni bawk, an khaw thenawm lawk a mi Chungkeuva chuan a zui nghal bawk a. Chungkeuva u fapa pasaltha tuai tir, a zui thin Chungkeuva'n a thiam thil tinreng a hlan chhawn ve mek Hungliana chu lalnu bulah chuan thuin a inngaihtuah nasa hle bawk a. Lianuka te khaw lal leh Chungkeuva te khaw lal hi pawih lalah chuan a lar pawl tak an ni a, phir unau an ni nghe nghe. Chawhma kal vel lek a ni, an khaw inhlat zawng hi. An intlawhpawh nasain chhungkhat laina hnai nei pawh an tam hle bawk a ni.

Khaw lian ve pangai tak an ni a, an larna chhan ber chu an tam vang nilovin, Lianuka leh Chungkeuva te'n pasaltha nihna an chelh tirh hian an nun a rawng em em a, tum khat chu an khaw thenawm hnai a mi pawih khaw pakhat chu hmeichhe it vang ringawtin an run a. He an rammutna ah hian an hlawhtling hle a, an che rapthlak hle bawk. An hmeichhe pawngsual apiang chu an that nghal a, an taksa hrangte chu an khaw tlangval leh mipa naupang ho chu an ei luih tir thin vang a ni. He khua hi thlathum dawn an awp hnuah chuan in zanufa anga inchhal thin kha nula an awm mang tawh lo a ni. An chhuahsan dawnah an haldarhsak vek bawk a, an lalnu chu thatin an lalpa chu ramhnuaiah hruaiin khamah an zuanthlak luih tir bawk a ni.

Pawnah chuan Lianuka chuan Thanhranga chu inmal beihah a cho ta. Thanhranga paw'n a rin sa ang tho anih avangin a lo pawm ve bawk a. Chu pasaltha pahnih chu inbeih tumin an inbuatsaih ta. Lianuka chu a tih a mawi lo khawp rangin laltualah chuan a rawn zuang thla a, ngil taka dingin Thanhranga chu a en vah bawk a. Thanhranga'n kal chhuah a tum mek lai chuan "Pawih pasaltha lu khai lo va haw tum lo ka nih hi, nau zawkte kan awm ve hi U Hrang, lo hahdam rawh" Runthanga chuan rawn tih pahin a rawn hmakhalh nghal a, chutah lal in leihkapuia lalpa Saithanga bula ding Pasaltha Chungkeuva chu a nui ta uar uar a, "Hunga, rawn chhuak teh. Infiam pui tur i nei mai thei a nia. I thaza tihrehna tur tha tak a nih ngei ka ring, a ti a"

Hungliana pawh muangchanga rawn chhuakin Runthanga nen chuan an han inmelh ding ngar ngar a. "A va ho si ve, ka pate. Tha za tihrehna tham pawh va ni suh" a ti a. Chu veleh Hrilkunga chuan, "Nang kha ka chan pual i ni e" a rawn ti a. Hungliana pawhin Hrilkunga lam chu hawi nghalin, "I lu i chan dawn tihna zu nia" tih pahin chil a chhak tlawrh a, lal mualah chuan a rawn tum thla ve ta.

Chungkeuva chuan lalpa Saithanga chu hrilhru in, "Pasaltha inbeihnaah hian zahawm loh taka phakar i chhuah loh hram ka beisei," tih pahin lal mualah chuan a chhuk ve ta nghal a. "Tunge rallu sawm chuang khai tawh Chungkeuva hmaah hian ding ve dawn" tih pahin a hawi kual thauh thauh va, Chhuanthanga chuan "Ka nun tawh dawn lo che a nia" tih pahin a pan phei nghal a, Chungkeuva chuan Chhuanthanga hmel a hmu chu a zam rilru hle mai. An lalfapa nupui tur atana Vawngmual lal fanu an rim tumin an haw lamah Chhuanthanga nen hian Darchhep ramriah hian an lo inbei tawh a, Chhuanthanga hi chak zawkin Chungkeuva nunna hi a zuah sak tawh a ni. Mahse, kum thum lai a liam tawh a, khanglai kha chuan Chhuanthanga hi pasaltha vanglai hmang tan mek a ni a, Chungkeuva erawh pasaltha tia an chhiarna a la rei lo hle thung. Tunah chuan Chungkeuva pawh a uaithla lam a hnaih tan tawh a, mahse a huphurhna ti pan tu erawh Chhuanthanga chu a uaithla lam mah mah tawh vangin a ni. Pasaltha ngang ni lo se chuan Chhuanthanga hi chu ram vah leh rammut chawlhsana inlama awm tawh tur awm zawk tak a ni.

Chutah inbeih tan tumin an han inhmachhawn dawn a, mahse Runthanga chuan kal sawn a tum lo hle mai. Thanhranga lah chuan Lianuka hmachhawn a chak bawk si. Chu ta karah Lianmawia chuan Chhuanthanga chu a rawn hma khalh ve tlat bawk. Thangkunga, Chhuahchawnga leh Rengliana te lahin 'Inchuh buai lo khan kan pathum kutah hlan mai rawh u,' an lo ti ve bawk a. Lianuka pawh a zam kher mai. Pasaltha tuaitir, huaisen tak takte huhang leh an mahni uaptu pasaltha phanchang lutuk tawh Thanhranga leh Chhuanthanga huhang chu a zo lo a ni ber mai. Khaw thum infinkhawm an ni bawk nen. Pasaltha an tam khawp mai. Lianuka pawn heng khaw thumte hi run chi an ni hauh lo anih hi a ti rilru hman hial a, mahse inchhirin awmzia a awm tawh si lo. A hmaa thleng tur chu a lo nghak ta zawk a, pasalkha khual kai khawp a nih ve miau avangin a hmelah hlauhna aiin phurna chhiar tur a tam zawk a ni.

Thanhranga te chu an han inhnial nak nak a, an naute an hnial hneh tak ngang lo vah chuan Runthanga'n Lianuka a hmachhawn ang a, Hrilkunga'n Hungliana, Chhuahchawnga'n Chungkeuva a hmachhawn bawk ang. Mihrang val parukte chu an inveh ta a, mipui lam chuan thaw dep depin an lo thlir a. Runthanga leh Chhuahchawnga chu an dam chhuah reng an ring lo a ni. Hrilkunga erawh Darchhep khaw daingul anih chhoh ve tak avang leh a huaisenna te khawtlangin an hriat tawh avangin a chak zawk turah an ring fur a, a then chuan a tumpuipa chu amah ang rual vel lek a nih ve tho avang chauha chak zawk tura an rin thute an sawi ve bawk.

Runthanga chuan Lianuka ke chheh chu a han zir chiang vang vang a, Bualthleng rama a ke an kah sakna avang khan bai pui tham ni lo mah se ngun taka en tan chuan a kal he tih a hriattheih tih a hrethiam thuai a. Chhaih thinrim tum takin "U Hrang, Bualthleng valrualte ngen mu avanga rual banlo ni tawh a ni bawk si a, rang taka thih tir a ngai a nih hi. Ka tha a zat tehlul nen, a ho ngawt mai" tihpahin a nui vur vur a. Lianuka, pasaltha rilru dah no ve ngai lo mi pawh a vawi khatna atana a piansualna miin an hriat an hlauh em em thin hmanga deuhsawhna chu na a ti ngang mai. Rang takin Runthera lamah chuan tlan phei in a chem chu a han vai kual pawp a, Runthera chu lo kun zauh in a dakchhuak tawh loin Lianuka lamah chuan a lum phei a, Lianuka ke piangsual lamah chuan a chem bil lam hmang chuan na lo tein an khawng a, rang taka insaseng leh nghalin "Ke lem a vuah bik hauh lo" a han ti leh a.

Lianuka chuan na a ti kher mai, "Nauva, ka duh vanga piangsual ka ni lo asin. Phuba lak ka tumna hi a rei tawh asin. Hei ka rawn thleng teuh hman khawp mai. I lu kha ka la ang a, i taksa kha ka hlep ral dawn khawp" tih pahin sang takah a zuang a, Runthanga chhipthlak nghek tum chuan a'n vai a. Mahse boruak a vaitlang ruala thil phe zuai a hmuh chuan a lu chu a tlak hran tir ta nawlh mai le.

Chungkeua, Chhuahchawnga'n a pawi tham si lo va a dul leh a nak leh a biang dinglam a a taina avanga thinrim tun tawhin chutia a thianpa nunna nei tawh lo va let reng a hmu chu na a ti kher mai. Ring taka auvin Chhuahchawnga lam pan chuan a tlan a, a chem chu a vaikual pawp pawp mai a. Chhuahchawnga chu a inveng hneh lo lam mah a ni tlat. Chungkeuva lah pasaltha tam takte ang lo takin a ke a hmang thiam nasa mai si, a tlawh thlu leh teuh thin hle mai. Chungkeuva'n zuang paha a chem rawn vai a bul rual chiah chuan Chhuahchawnga chu a khabea Chungkeuva tlawhna avang chuan a thal chiang hle mai a, innemkhalhna a kut vei lam ri thawt chuan a ruh a dik lo tih pawh a hrethiam. Mahse rang taka Chungkeuva lama lum phei pahin a chem chu a theihtawpa nain a vai chho nghal a, Chungkeuva chu ehh thawtin zawimuangin a rawn thingthi a, a puanven Chhuahchawnga'n a vaithlak tel avang chuan a malpui leh a serh thler chho vek leh a dul, a lai thleng dawna tet chho mipuiin an han hmuh chuan a rapthlak kher mai.

Chungkeuva chuan Chhuahchawnga chu a melh kawk kawk mai a, Chhuanthanga lam va hawi phei in, "Ral lu i lak hnuhnun ber a ni tawh hial mai thei a nia, hei pasaltha na tawrh hi tihtawp a hun e" tihpahin a chem chu a theh phei a. Chhuanthanga paw'n Chhuahchawnga duhsakna avanga lawmna mittui khap per sawk sawkin Chungkeuva lu chu a la ta a. "Pialralah ka rawngbawl turin min lo nghak dawn nia" a ti sap a.

A vawikhat inmalbeih a hmachhawnnaah pasaltha khual kai meuh a hneh a, mahse a tlawmngaihna avang chauhin a beihpuipa lu chu ral lu khai leh harsat tura a taksa chakna in a kiansan tan tawh Pasaltha Chhuanthanga tan a hlan a ni.

Hrilkunga leh Hungliana pawhin ngawi rengin an lo en ve bawk a, thaza rual ve ve an ni bawk nen, an hah har dun nangiang mai. An che phet phet bawk a, an inhnehtawk dun hle mai. Mahse Hungliana chuan amah ang rual lek kuta thih ai chuan mipui chil rawn pawh a thlang zawk a niang chu a inpe ta a, a entu te chuan an inhneh tawk, chak zawk an awm lohzia an hrechiang a, a inpe ta mai chu mak an ti kher mai. Hrilkunga pawh chuan Hungliana rin ang ngeiin, 'Inpe tawh hnu ka khawih ngai lo ve' a ti ve ta bawk a. Mipui chuan pawih tlangval ho chu thah vek an chak hle mai an indang zo lo lek lek thin a ni.

Lalpa Saithanga leh a upate leh Khual val pasaltha te zawng chu lal inah chuan an lut khawm a, an mi mante rorel an lo ngai chang a ni. Chutih lai mek chuan pawn lama pawih ho an hnungkhirh tlangvalten an lalpa thupek zawm a tui an tulh kual lai chuan an zinga pakhat chuan a suah sual chhuahin a tuihmuam chuan a tui petu hmai chu a phuh thawt a, tlangvalte thinrim chuan chu pawih pa chu an khawih rawn ta. Mipuiin rawn chim vein pakhat chauh mipui zahnih chuangin khawih rawn thu awm hek suh, pawih tlangval sawm riat vel chu rei loteah an chil hlum titih vek a, la thi lote pawh an damchhuak dawn lo tih a chiang hle mai. Lal in chhunglama awm ho pawh rawn tlan chhuakin mipui sahawk chu thelh ngaihna awm hek suh, nui vur vur chungin an thlir a.

Thanhranga chuan Lianuka te khaw lam ho chu dama chhuak lo vek mai se a duh a, mahse Hungliana erawh a rilru takin dam se a ti em em thung. Lal inhnuaiah a hranpa an phuar avangin a zu en vat a, Hungliana pawhin mipuiin a hnam puite ruang chu mittui tla zawih zawihin a lo thlir ve mek bawk a. Hungliana chil ve tum tuten a hmaa Thanhranga ding an hmuh chuan an chil zui ngam ta lo va, Lalpa Saithanga chuan a kut rawn bengin, "Ti khan kan rel fel a ni mai lawm ni," tihpahin a bula dingte chu a en kual a, anni pawhin an lu an lo bu nghut nghut a. Chutih lai tak chuan, "Thanhrang, mi rawn lam pawh i tum nange?" tihna lam chu an hawi rual thap a. Lalpa Dohranga leh Pu Zangaia leh buk nghaka an tlangval dah pahnihte ding reng chu an va hmu a, rang takin Thanhranga chuan a va pan phei nghal a, an chet dante tukthuan pawh ei hman lo a che an nih thute chu a han sawi sawk sawk a. Lalpa Dohranga lah chuan, "Tukin ka tukthuan ei tluk a ka puar leh ei tui kha ka la hre lo" tih pahin Thanhranga chu a kal pel a, lalpa Saithanga lam chu a pan ta a.

Lalpa Saithanga chuan, "Lalpa Dohranga rawn tel ve dan te chu a han zawt a. Lalpa Dohranga pawh chuan sawiin, buka an awm char char thute chu a han sawi a, an han inkuah lawp lawp bawk a. Chutah leihkapuiah chuan ding dunin Lalpa Saithanga chuan mipui lama a kut phar chhuakin "Fel famkim kan awm lo va, thatna hi kan pumbilh vek bik hek lo. Nunrawnna hian min dam khaw chhuah tir chang a awm ve chawk a ni. Vawin hian ka vawkpa sutnghak hmang ngeiin ruai kan kil za ang. Naktukah ka sechal ka khawng thlu bawk ang" a han ti chu mipui hlim thawm chu a ri hulh hulh mai a, khawnbawl upate chuan an ran an phal ang tawkte an rawn thawh ve zung zung bawk a.

Hungliana erawh a mittuiin far tawp zai reng a rel thei lo thung. An lalpa thupek zawmin pawihho chu ramsa chaw atan em a hnutchhiah chu duh lovin thlan khur thuk tawk tak an lai a, a thenin lalmualah ei an lo rel bawk a, thlan khatah panga te an hnawh a, an phum ta vek a. An mi leh sa nunna chan tlemte erawh zah takin an vui liam vek a, pawihho erawh an tam mai si a, an dim lem lo hle. An inpeih fel meuh chuan tlai lam ei rel a hun der mai a, fatu ho inpeih hun an nghak a ni ber mai. Thanhrangate chuan an tlangvalte riltam dan tur zia a hriat avangin zu fang tam tawk tak lalpa Saithanga chu dilin an chauh chhiat mai loh nan a lo tulh kual zung zung bawk a. Chhuanthanga erawh chuan Hungliana chu hruai hrangin an in lam a pan pui a, eng vanga an khua bei nge an nih tihte a han zawt a. Hungliana pawhin tha takin a chhang ve zel a. Chungkeuva khan Bualthleng tlangvalte ngenmu tuara Lianuka awm kha a hmu thei ngang lo va, a dam that rual rualin an lalpa te pahnih bumin sairam chhuah neih an rel a, tichuan helam hi an vaiin an lo pan pui a lo ni.

Darchhep khua an hmuh hian Bualthleng nen a inhnaih em avang leh Bualthlengin Zehtet an runte an hriat ve tawh tho avangin anni khaw thum hi awlsam te a awp beh theih vek an rin avangin Darchhep lamah hian an lut hmasa a, an awp bet reng bawk a. Mahse Chhuanthanga te awm ve loh avang khan an lo haw hun an ngai chang a, khaw chhung mi leh sate zinga zin vei vak thei tur deuh apiang chu lalmualah an thlung bet a, zin chhuak thei lo tur naupang, hmeichhia te leh tarte chauh in lamah an chen tir a lo ni. Chuvangin Bualthleng lam pawhin Chhuanthangate lan hma kha chuan eng thil thleng mah an hre thei lo a ni.

Hungliana rilru chu a na kher mai. A patea chu a dem em em bawk a, pasaltha tia chhiar ni ve tawh mah se, a patea thu hnial a duh ngai loh avanga tui lo zeta zui ve kha a ni a. A patea te thian dunin nuam an tih em em lai pawhin a ni chu ngaihthat lohna riau neiin a inngaihtuah nasa thei hle a nih kha. Pawi ta ber erawh chu, pawih ho khan Chhuanthanga te awm loh thu kha ni hnih hnuah tlangval ramchhuak lo haw te ka atang chiahin an hria kha a ni a, kha mi hma nihnih zet khaw chhunga an awm vek lai khan Darchhep nulate chu an pawngsual nasa em em mai a, nakin lawka pawih fa pawm tur pawh an awm nualin a rinawm a ni.

Tlai lamah ruai an kil a, zanah chuan Hungliana chu an chhuah zalen ta a. Mahse an khuaa let leh a hreh em avangin a nu unaupa te khaw lamah a kal hmasa phawt ang a, Darchhep lam miten an khuaa chanchin kimchang an thlen hunah a haw chauh dawn a ni. Ni thum a ral meuh chuan lal inchhungah ral an rel mup mup mai a, mahse Lianuka leh Chungkeuva hian an khaw lalte an bum ve ve avangin rel dan thiam a har hle mai. A tawpah thu an ti tlu thei ta hram a, Thanhranga hoin mi sawmthumin an lalpa Dohranga leh Pu Zangaia te nen khaw lam panin an haw ang a, Zehtet lam atanga haw duh apiangin an zui thei ang. Chhuanthanga erawh lalpain kal chhuah a rem tih sak loh avangin khuaah a awm ang a, Runthanga, Thangkunga, Lianmawia leh tlangval sawmhnih in Lianuka te khua Hrianghmun an pan ang. Chhuahchawnga, Hrilkunga, Rengliana hoin tlangval sawmhnihin Chungkeuva te khua Hriangtlang an pan thung ang. Tlangval sawm ve ve inthlang chhuakin khaw chhungah palai hna an thawk ang a, khaw inkarah hian tlangval za vel in awm hmun an khuar thung ang a, khaw chhunga buaina a chhuah palh thuah rang taka khawi lam lam pawh pui thei ve ve turin sawm nga ve vein an inthen hrang bawk dawn a ni.

A tukah chuan haw turte chu an haw ta a. Thanhranga pawhin a naute chu a tluk tawh lo tih a inhriat avangin hahdam takin Tialthangi vanga lungleng tawh nen chak taka hma hruaiin a kal pur pur a, lal phawk Dohranga lahin Thanhranga kal chak lutuk chu a hnungzangah te a vawm leh zawt thin bawk. A tuk leh tukthuan eikham rual chuan Tiau lui kan tur te pawh phei lai an khai ve ta bawk a. Muangchanga kalin lusei khuaahte chuan an lut zel a, Lianuka leh Chungkeuva te hneh loh Runthanga leh Chhuahchawnga chuan zah an hlawh hle thin.

Zan riat zet an thang hnuah chuan Tiau lui chu an kan ve ta. Lianuka leh Chungkeuva te lu chu a nam nasat tawh em avangin paih mai an duh rum rum tawh a, mahse thudik hailan nan an mamawh avangin an ak lui hram hram zel a ni. Ral rama awm an nih avangin thawm an dim em em a, zan khat ramhnuaia an riah leh hnuah chuan chhun chaw fak hun velah Hrianghmun leh Hriangtlang khaw in kal pawhna peng chu an thleng ta. Tlang bawk lian lem lo tak pakhat hian chu kawng chu then hrangin muangchang lo va an kal chuan khaw thim rualin khua an luh hman vel a beisei awm a ni.

Chu kawng peng lai takah chuan chawlin chaw an fak a, an inpeih fel hnu chuan mi sawm hnih ve ve chu an kal chhuak leh ta. Tlangval za rual an hnutchhiah te erawh sawm nga ve vea inthenhrangin an puihtur zawkte kalna lamah tuibur hmuamda vel kal leh ve vein buk an sual ta thung a. Len len ar khuan lai chuan Chhuahchawnga te chu khawdaiah vaibel pakin an thu far tawh a, Chhuahchawnga leh Hrilkunga chuan mi sawm thlang chhuakin khaw chhung an lut ang a, Rengliana leh midang zawngin khaw pawnah an lo nghak ang. Khaw chhunga silai a rik rual rualin Rengliana te zinga pakhat midang pun turin a kal nghal ang a, midang zawngin khaw mawng lam a in awm apiang an hal ang a, an hal zawhah an insaseng ang a, ramhnuai atangin anmahni puitura lo kalte an va pan ang a, ramhnuai atang bawka lo letin a tul danin an lo che ang.

Chhuahchawnga te'n khaw chhung an luh chuan khaw laia tei vak an tlem hle mai a, khaw lian ve pangai tak, in zahnih nufa vel ve siah chuan khaw laia tlangval teivak an awm mang lo chu mak an ti hle a, Mahse pawih tlangval an thah te tam zia an chhut khan Chungkeuva hian an tlangval te hi a lo hruai chhuak deuh vek a nih an ring a. Khawlaia lusei tlangval sawm rual vel ralthuam famkim nena lo kal chu mak an ti hlawm hle an tlangvalte chanchin lah thla khat dawn an hre tawh lo bawk nen an lo hlau hlawm hle maia. Lal in an han thlen chhoh meuh chuan an han hawi let a ralthuam nena an hnunga lo zuitute chu rawlthar te leh patling tak tak te chiah an lo ni a tlangval erawh a hmingin an awm ve pheuh pheuh a ni e. Lal inah chuan luh an han dila tlangaupa lo chhuakin eng ti tura lo kal nge an nih tihte chu a han zawta ?ha taka an chhan hnuah tlangaupa chuan an lalpa Siangthanga chu a va hrilh leha an lalpa pawh chuan hruai lut tura hrilh ve lehin ti chuan an inzui lut ta a. Chung lusei tlangval te chu an lalpa chuan a han en a naupang a ti hlawm hle mai, mahse an naupan ang hu a zuam ngawt chi annih a ring lo a ni an hruaitu pa te pahnih phei chuan inmalbeihah a pasal?ha tuaitir Hungliana an khin phak a ring hle nghe nghe. Chutih rualin mak a tih em em chu an rim chhe lutuk chu a ni. Zawi muanga anmahni ?awnga rawn ?awng chhuakin eng thil titura lo kal nge annih tihte a han zawta Chhuahchawnga chuan muangchangin thil thleng zawng zawng a hrilh hnuah iptepui pathum ngawta an tuam tawh Chungkeuva lu rimchhe lutuk chu a phawrh ta a.