TAWN NI REI LO (THAWNTHU TAWI)

Thingtlang khaw chêngker tak, khaw mawng ping dik takni bawk, luh tawh chuan luhna ngai bawkah chhuah leh a ngai. Zing kâra dai hnâia Sava vehte, chhun lama lui kal, haw paha tumbu, telhawng khawrh chhoh hnuah berh takin mahni in lumah ngei kan han luta, chaw bel zenin a țhing tlang lian tawk nen, tui khur lam panin kan tlan thla vawk vawk a, inbual pahin țhian hoin kan nuia, kan infiama kan ri le lu țhin. Sikul kal țûlna hi ka pa'n a hriat miau loh avangin ka kal lo a, ka țhiante pawh an ni vek tho mai, sikul pakhat chu a awm ve a, paimari sikul an ti maiin ka hria. Ka pa chuan 'thatchhe ho hlimna zawnna hmun' tiin a sawi țhina, sikula kal te rêng rêng chu ka kawm duh loh phah bakah thatchhia ka ti hlawm țhin hle.

Ka hleikân deuh hnu chuan ka pa nen lo lamah kan liam nitin ta ziah maia, kan riah châng phei chuan ka nu ka ngai țhin hle, chhun lamah lo kal ziah mah se, zan a lo thlenga, perhpawng hram thawm leh kan lo mawng kawra uțawk hram thawmte bakah rannung chi hrang hrang thawm ri chuah chuahte bak ngaihthlak tur a awm loh chiah hian, ka nu ka ngaih a zual hle țhin. Kan thlamah chuan lo danga riakte pawh an rawn leng lut ve fo a, a chang leh keini pawh kan pafain kan leng chhuak ve țhin bawk. Kan khaw pa hausa Pu Hrangmana hian țingțang a keng peka perh ve hi ka châk țhin em em maia, ka pa bula ka sawi chuan ka pa chuan 'ka zirtir dawn che nia' a ti ta mauh mai. Ka pa hian a thiam rinna ka nei hauh lo a, a chhan chu a perh lai ka la hmuh ngai loh vang a ni. Ka pu te hian radio țawng tawh tak hi an nei chu ta mizo hla an rawn zai tir te chu ka pa hian ka zawm thiam hle tih chu ka hre thung. Ka rin loh tak maiin ka pa chuan min zirtir thiam ta tlat mai, Pu Hrangmana lah chuan 'kawl rawh u' a ti hmak bawk si, ka lawm zia chu. Kan thlamah chuan zantin ka pa nen chuan kan zai dûn ta ziah maia, ka châk ber erawh haw huna ka țhiante bula perh a ni. Min ngaisang dawn tih chu ka hre chiang ve em bawk a.

Chu tianga ka pa bula kum tin lo lama ka tâl tâkah chuan ka taksa te chu a insiam lian ni berin ka hria a, ka tha a za zek zek renga, hnathawh hah viau pawhin zan lamah hi chuan ka tei chhuak lo ngai lo. Pu Hrangmana te leihkapuiah țhu khawmin țingțang hlui tawh tak, a hrui thi vek tawh chu perhin țhiante nen kan ri ve hluai țhin. Rawlthar te kan ni ve ta bawka, mahni tawka chak inti țheuh țheuh chu inbuan kan hrâtin, kan rual pui kan kawm ngai loh min cho tu awm se insual piap piap mai hi kan châk țhin. Mahse ti buai hmasa tu nih erawh kan duh bik hauh lo. Zantin Pu Hrangmana te inah hian mi leng lut hi an awm nual ziaha, tin Pu Hrangmana hian a khât tawkin pawisa hi a sem țhin nghe nghe, a hausa kan ti thei hle. Ka pa ka zawh chuan ka hre ta kan VCP chu Pu Hrangmana a ni tih rêng ka hre ngai hauh lo, VCP a ni a, inthlan hun a lo thlenin a tla ngai lo a, a ni tluka țha kan khuaah an awm miau lo a ni. Fanu tleirawl kan rual pui vel Fakzuali a nei a, a hmelțha ka tiin ka hmuh hi chuan ka lai thei em em zela. Fakzuali pawh a ni ve thoin ka hria.


Zan khat chu mitthi lumen ngai a awm avangin kan țhian ho chuan kan kala, Pu Hrangmana te in zawn kan thlen lai tak chuan kawngka rawn inhawngin Fakzuali leh a țhiannu mitthi in kal tur chu an rawn chhuak zan zan maia, thla engin a hmel chhun lang mah suh se, an kawngka chung lawka darthlalang mum chhunga thil tereuhte elekțik hmanga an tih ên țhin ngei khan a hmel chu min hmuh tir a ni. Kan kala, anni pawh kan hnung lawkah an rawn kal ve hnak hnak bawk. Mitthi in kan thlen chuan kawtkaiah chuan ding khawmin țhutna kan han melh kual a, Fakzuali te rawn thleng ve pawh chuan an rawn en ve nghe nghe, an hmu a niang chu min rawn kal pêla an lut ta thak mai. Ka țhianpa Mamawia chuan "Min zui r'u" tiin a kal nghala, 'Boss chu a hnung berah' ti rilruin ka han ding data, țhiante ho chu kal hmasak tirin kan inzui ta dam dam a. Kan kal hma peih loh man kan têla a hmasa berah kan țhu a ruang an dahna a țhute nen kan in ep chiah leh nghal.

Ka tukhum ri thlawp ka hriat rual chuan ka harh chiang ngei mai "Muthlu ang huau zel suh ka tih kha" tih pahin Mamawia chuan mi rawn nem bu lawp a, rum zeta melh pahin "Țha takin mi kai tho ve mai rawh aw" tih pahin ka hawi san hmaka, ka kam sîr a huh ni a ka hriata chu ka han khawiha, zopa chil thli ngei mai chu a lo kai luai leh nghal. Ka kawr bân chuan hru fai nawk nawkin, midang zai chu ka ham zâwm a, rin aiin zai a nuam ta phian mai le, ka tui ta lutuk "I lawm ang u, he lei ram mi kan ni lo" han tih lai te phei chuan, tih tak zeta vawi khat pawh la țawngțai ngai eih lo hian vanram ka ngai veng veng hialin ka hria. Ka tukhum chu a ri leh ta thlawp mai, ka harh chiang leh ngei mai le, Mamawia chu rum zetin ka han melha, a ni lah chuan nui sung chungin "I chilthli kha ti fai mai mai rawh, ruang kiltu mikhualte sawn an nuih char char che" a rawn tih chuan zak takin ka chil thli chu ka han ti fai a, ka zak bawk si hnuai lam ka han bih leha chhutah chuan ka chil thli farna val kuau chu ka hmu zawm zat bawk. Ka rap nghal vata engmah hre lo anga han hawi chhuah tumin ka han dâk a, an zai tui ngei mai, ruang awmna lam ka va en chu mikhual nula pakhat hian min lo ena, a bula țhu nu pakhat nen chuan min lo nuih rulh rulh a,zahthlak duh ngei mai, haw ka duh hle bawk. Mitthi lumen zan apianga ka muthlu nasa em em ziah hi a chhan ka hre hauh lo, Krismas lai thum khat zan angah te chuan ka muthlu ngai hauh si lo. Mipa ka ni a, he khaw mi leh sa hi ka ni bawk. Khaw dang hmeichhiate vang mai maiin khaw tual mi hi zakin ka kun tur a ni lo ti rilruin ka hawi chhuak leh a, ruang awmna lam bawk chu ka va en leh a, ka thil hmuh avang chuan nghilh dupin ka inhria, nichin lawka min lo nuih tu nula kiangah khan tleirawl pakhat a țhu tih reng reng ka hre lo a, chu nu chu a țap a ni ngei ang a mit a sen rama, a bula țhu nula nen chuan eng eng emaw sawiin an ti ti a, a hmel chu hmuhnawm ka tiin ka en reng bawka, ka mit la sawn turin chakna ka nei ta lo.

A hawi kuala, a khabe phir taih mai te, a hnar ngul sang vah leh a heh sen no tak te chu a va mawi em, a mithmul te lah chu a dum nalh em em leh nghal. Fakzuali chuan tluk lo vai vai tak a ni. Min rawn en lai pawh chuan ka ngaihtuahna amah vanga ka kawm nasat luatah ka mit lak sawn nachâng ka hre lo a, mak tih hmel taka a mit a lak sawn hnu chuan ka harh chhuak ta hlauh. Ka zak leh rum rum, mahse en nawn loh chi a ni lo, a țha em. Ka en nawn fo a, ka en nawn leh țhin. Min rawn en ve ta zeuh zeuh bawk nen, ka zakin a nuam ka ti hle bawk. Ka mutthluk awm ka hre ta hauh lo a, sawhchiar ei zawh pawn lama mei zu a kan chhuah lai pawhin ka rilruah a châm renga țhiante'n țhutna sawn an rawt chu ka hnial vata a ngaihna an hre lo tlang hle. Ka hmuh ang hmu ve miau hlawm hek lo, an hmu a ni pawhin, an hmuha khan a hmuh ve ka ring lo, hmu ve pawh ni se a en let ve fo kherin ka ring lo.

Thlan kan han laia, ruang la turin țhenkhat an kala keini'n kan lo nghaka thlan kan chhilh zo chu kan lusun chhungkua te chu thlan chungah chuan țhuin an țap hawm hawm a, thihna hi kan chhungkua hian kan la tawng lo a, a nat dan tur zia ka suangtuah phak lo a ka suangtuah ngam bawk hek lo. Haw turin kan han inbuatsaiha khaw lam panin kan kal ta, ral khat ațangin kan lam pana Car var rawn tlan chu kan hmu a, a rawn hnai zêla min rawn tlan pelh dawn laia ka thil hmuh chuan min ti ding chata, car hnung țhutna a țhu chunga min rawn nuih seih lai kha ka hmu chiang em a ni. Ka nuih let ve tak naa an tlan tlang ta daih si.

Zan lamah inlamah ka mu hahdama a tuk lamah țhiante nen inkawm hoin kan țhut ho țhinna kan khaw sikul chung rangva tui ek nasa tawh takah ngei chuan țhuin zo thlifim kan han dawng heuh heuhva a nuam ngei mai. Mahse keimah kha keimah ka ni zo ta hauh lo. Ka ruak huaiin ka inhre tlata, ka ruak lo anih pawhin nau em chu ka pai bîk lo turah ka ngai. Kha mikhual tleirawl te kha hmuh leh ngei ka ngaia ka inhriat tlat avangin zan lamah chuan khawhar inlamah ka kal ta, țhiante erawh khawi lamah nge an lên ka hre hauh lo. Kan zai chhung zawngin mikhual tleirawl chu ka mitin ka thlira, a ni tan erawh hmuh harsa tur khawpin ka țhutna a kil tlat. Hruaituin ban a rawt takah chuan ding chungin tawp hla kan han sa a, chu tah chuan a ni, kei kan khaw rawlthar chu sawi loh mipa ho zinga a ek bathlar sang ber pawlte zinga mi ni pha ve ngat chu kan mikhual tleirawlte chuan min rawn hmu ta chat mai, ka nuih ver vera a ni pawhin min rawn nuih ve leh seih bawka. Ka hlim kher mai. Kan han zai zo a, Lal Biakna kan sawi chhung zawng chuan ka menga ka en renga, a țawngțaina te chu Pathian tan pawh chhan a chak awm viau bîk ngei ang. Fakzuali hi hmelțha ka ti țhin viaua mahse, Fakzuali hi kan khuaa țha ber ni ta se, mikhual tleirawl țha sensiari erawh khawvela țha ber a ni ang.

Ban hma deuha kawngka zawna ka pa ka hmu chu ka lawm ru viau, kan mitthi leh ka pa hi inkawmngeih tak an nih ve a vangin ban hnu lawkah ka pa chu a rawn tei luta kei pawhin ka pa chu ka pan vata, ka pa chuan mikhualte chu chibaiin kei pawhin ka pa tih dan ang chiaha ti vein ka chibai kuala, tleirawl țha sensiari ka chibai lai chuan ka han hmer na deuh salha nuih suk pahin, ka zak ru viau na a ka hlim thung. Ka pa min rawn kohna lamah chuan kal vatin ka muthlu min nuihtu te pahnih bulah chuan ka va kala ka pa'n "ka fapa a nih hi" te min tih hnu chuan in chibai ve lehin nutling zawk chuan "Fapa i nei fel hle mai" ka pa bulah chuan a han ti ve a, ka pa pawh a lawm hmel kher mai, haw tumin ka inher a, ka hmuh tum ber ka hmuh bakah a kut no tak vuan theia ka awm chu ka hlimin ka lawm hle. Mahse ka pa'n "Mama, hei a tawp zan te a ni si a, inchhungkhur hi  han singsak pui ve ta che" mi rawn tih chuan lawm zetin ka lo "aw" vata.


Pawn lama țhutthleng dah chhuak tura ka kal apiang chuan tleirawl țha sensiari hmun phiat chu ka en ziaha hmuh nuam ka ti hle. Pawn lama bawlhhlawh paih tura a kal ka hmuh chuan rang takin țhutthleng pakhat chu la lawkin ka chhuaka, țhutthleng ka dah fel bawlhhlawh bawm lam ka va hawi phei nâk chuan tleirawl țha sensiari chuan bawlhhlawh bawm khat vek tawh chu beng muk tumin a lo bei meka. Ka pui lo phal thlawt lo, ka bialnu ni lo mah se, ka țhen thei thlawt lo bawk. "Khaw ka lo ti ange" tih pahin ka han beng muk sawk sawka, "A tam tawh em anih hi ka va paih ange" tiin lak ka han tuma "A rit awm si, khawi ka lo zawn ve ang" a tih ri chuan ka thinlung hi ka ti nghing lawih thei hial a, mahse "A rit lo, he lamah lo buai zawk rawh" tiin ka han nuiha, nui chung bawkin "A tam em hi khawi" tih pahin min zawn pui ve ta. Bawlhhlawh kan han paih zo chu kan khaw bawlhhlawh paihna kham sang tak koah chuan dingin, tlâk dâlna tura ka pa te hoin an hung pal sang tak kâra thla eng lang chu ka en vang vanga, "A mawi hle mai" ka han ti sapa a ni pawh chuan ka sawi chu hria ni awm takin "Ni e" a rawn ti ve bawka, kan let leh lamah chuan mitthi chhungte nena an inlaichinna bakah kan khaw boruak nuam a tih reuh ziate leh tlangvalte kan tlawmngai a tih thute, an khaw lamah chuan tlangval tlawmngai an tlem zia te a sawi bawrh bawrh a, a dik ka ring, khawpui țhalaite chanchin an sawi hi ka hre fo a ni.

In kan thlen dawn chuan "Ka haw mai ang aw, ka hming chu Lalhruaitluanga a nia, Hruaia tiin min ko țhin, puih in mamawh hunah in rawn sawi zel dawn nia" ka han ti a, a ni chuan "Angela Lalduhsaki ka nia i duh duh danin min ko dawn nia, puih chu kan mamawh ka ring tawh chiah lo, naktukah kan haw dawn a" a han ti chu ka bing mup maia ka tum loh deuhin "Naktukah maw?" ka han ti tham țiaka a ni pawh chuan "Aw School kal kan ngai sia" tih chauhin min chhanga min haw lo tih ka hriat bakah, min ngai ve dawn hlein ka hria. "Anih chuan Angela, Mangțha aw, inhriat rengah kan ti a niang chu" tih pahin Chibai tumin ka kut ka han phar chhuaka "Teh reng mai" tih pahin mi rawn chibaia ka kal sawn tur chu "Lalhruaitluang, muttui aw" tiin mi let san ta zawka. Inchhung a luh dâwn chuan rawn hawi letin a ban a rawn vai lauh lauha, vai let vein ka kal san ve ta. A tuk ațang chuan Angela-i ka hmu tawh ngai lo a, an car pawh. Ka ngai ru veng veng țhin hmu leh chu ni i la ka duh zia ka hrilh tawh ngei ang.

Kum tam a liam ta "Kei Lalhruaitluanga hian nang Lalfakzuali hi Pathian leh Kohhran hriat puinain ka nupuiah ka nei ta che a, a nuamah pawh a hrehawmah pawh....."ti a kan chham ațanga thla sawm pahnih a ral meuh chuan fapa duhawm tak kan nei ta. A hmingah" Lalduhsaka" ka sa nghe nghe a, Angela Lalduhsaka han tih em chu a tih chi niin ka hre lo a ni. Ka nupui hi ka hmangaih tak zeta, ka nupui felna leh țhatna ka hmu tam tial tiala a telloin ka awm thei tawh meuh lo, ka fapa tel lo a awm ngat phei chu harsa ka ti leh zual. Kum a liama ka pa'n mual min liam san ta, thihna kan chunga a vawi khat thlenna a ni bawka ka tuar thiam lo hle. Ka nupui leh ka fapa theihnghilh țhakin ka pa chu ka sûn a, ka ngai thei hle, thla a ral hnuah pawh ka pa thlan chu ka tlawh awl lo va, tlawh loh ka phal bawk hek lo, ka pa hian a fapa neih chhun hi nitin a hmuh ziah ka duh avang a ni. A thlana a kal hian min hmu reng angin ka hre țhin a ka hlim phah veng veng țhin. Ka fapa pawh a lo lian ve ta, ka nu leh ka nupuiin sikul kal tir an duh takah chuan kei pawhin ka pa ngaihdan ang loin ka fapa chu zirna rûnah ka kal tir ve ta. Chu tih mek lai chuan kan khuaah sawrkar tharin midil sikul an tih an rawn din dawn a, ka fapa te kalna ai chuan a sang deuh hret an ti a ni awm e. Sikul tur saknaah chuan kei pawh ka inhlawh nitin ve țhin a, lo lama kal tur ka nu leh ka nupui an awma, keiin pawisa ka thawk chhuak bawka, mahse hna an thawh hah ka phal ngai loh avangin an tih tur ka tuk thlap zel thung. Ka pa ka chan tawha ka pa kha ka eng kim a ni a, ka nunna nen hian ka pa nunna kha ka thleng phal hial ang,mahse a kal tawha chu vangin a la dama te tal hi ka duat an ngai tih ka hria.

Thla ruk zen zawn kan sak hnuah sikul thar tur lian zet mai chu kan sa ta, naupang pawh za vel zet chu an len hial ka ring a ni. Kum thar lama a hawn an tithlu a, ka fapa pawh zirna lam chu a timi phian mai, pawl khat chhiaah pakhatna a rawn ni ziah maia, ka lawm țhin hle. A lehkhazir peih em em ka hmuhte hian ka pa sawi angin sikula kalte hi 'mi thatchhia' an ni lo tih ka hre chiang tulh tulh a, mahse ka pa demna erawh neih ka duh țhak lo thung. Kum a thara sikul hawn zai an rêl ta rup mai, ka nu leh ka nupui pawhin rilru thar an pu nge, dawr kan sa a, kan khuaa dawr lûn ber nih chu ka nu duh dan a ni tawp maia, chu vangin kan țang hle, kum hmasa lama ka lo khawl sa bakah ka nupui pa kan VCP Pu Hrangmana min puihna a zarah kan dawr khat mawi tawkin thil kan hung ve ta reng mai. Ka nupui raipuar mek chuan dawr a nghak nitin ziaha a chang leh ka nuin a nghah pui ve bawk. Chawlh a zo a sikul țan a hun dawnah chuan motor nalh tak tak a rawn lut zut a, sikul thar hawnna chu an nei ta. Khaw mipuite chu kan lawm em em a, kan chhungkaw lawmna ber erawh bat dil lova min dawr tu mi hausa te sum leh pai ui lohna avang chuan a ni.

Sikul țan hma deuh ațang chuan lo lamah ka riak ta a, mahni chauha han riah takah chuan ka lung a lengin ka chhungte ka ngai thei hle, mahse ka ngaih ber erawh ka pa a la ni zel a ni. La dam se ka chhungkua hi min han uap sak se ka ti vawng vawng țhin. Ka pa kha chu pa a ni a, pa a ni tih bak hi sawi fiah dan a awm lo a, ka pa kha pa dik tak a ni. Kar khat hnuah ka haw a, in ka thlen chuan ka nupui leh ka fapa chuan min lo lawm hle, ka nupui rai puar mek dul rawn puar lian ve țan tawh chu chul sakin ka thiam dan tawkin ka han duat ve bawk a. Ka nupui hi awm lo se kan chhungkaw hmabak thim zia ka hria, mahse ka nupui chuan thiam taka ka nu hminin kan khaw eichawp dawr lian ber kan siama kan khuaah chuan sum lama nei pawl kan nih ve phah der mai, zan riah kil lai chuan "sikul thara zirtirtu ni tur nula pakhat a lo kala dawrah i hming min zawta" tiin ka nupui chuan a rawn sawia ka bangbo ang reng hle. Ka nupui zawk chuan "Mamawia hmelhriat a ni anga rawn zawng tur chein a ti che a nih ka ring deuha" a rawn ti leha, a ni viau tak ang Mamawia zawng a nupui te khaw lamah kum hmasa lamah khan a liam ta vuk vuk anih kha. "Khawi laiah nge a chên i hria em, Mamawia hmelhriat te anih ngai chuan țha taka kan lo dawn sawn ve a ngai dawn anih chu" ka han ti a ka nupui chuan "Ka pa te țhenawm inhnuaiah sawn a niin ka hria, nia nang meuh an rawn zawn che chuan kan lo dawn sawn țhat a ngai ang" tih pahin lei mi han chhuah khum zuka, chhan ngaihna vak ka hre lo, insawi theih khum turin ka tlangval laiin ngaihzawng pakhat chiah ka neia chu chu tunah ka nupui a ni tawha, amah pawhin a hre vek, mahse a ni chu mual veng lama mi tlangval siniar Thangliana ngaihzawng hlui a ni thung. Zia lo tak tak a ni.

Thingtlang khaw te tak kan ni a, nulat tlangval laia lerh hi a țha lo hle, nupui pasal neih hnuah ngaihzawng hluite nena inpelh fua fua reng chu a nuam hauh lo ang. Zan lamah chuan ka fapa Duhsaka hruaiin a pu te inlam chu ka pana a pu teinah peng zawkin zirtirtu thar inlamah chuan kan kal thla leha, kawngka kik karh karhin "In awm em?" ka tih hnu rei vak loah chuan nula pakhat hian kawngka chu a rawn hawnga, ka thil hmuh chuan ka kha a ti chih tlata țawng thei zia zang ka ni lo. Kha mikhual tleirawl țha sensiari ngei kha kan khuaah hnathawkin a rawn awm dawn!! "I dam maw" tih pahin a kut a rawn phar chhuaka, a nui hmel chu a la mawi reng. Kei pawhin phar chhuak vein "Ka dam țha e, i dam zawk maw?" tih pahin kan inzui luta. "Dam ve țawk țawk e, ka rawn zawng che a, i riah luh thu i nupuiin min hrilh a" a han tia "Nia, tunlai chu ka țang deuh hlek a ni" tih chauhin ka chhanga. Thingpui min lum sak chu tui ti takin ka in a. "Pasal i la nei nange" ka tih chuan nui sang chungin "Duh tu pawh ka nei ve lo" a ti a "Ka awih lo e mai, in khaw lamah nangmah hêltu che an kat nuk ngeiin ka ring" ka han ti a, mahse min chhang hauh lo a ka va en chuan min lo en meka, ka en tih a hriat ruala a mit la sawn nghalin "Rawn zin leh hi ka chak țhin lutuka" tiin tukverh lam a thlir a, "Hei i rawn awm alawm" ka tih chuan mitthi lumen zan ang chiaha mi rawn melh kalhin a nuih suka "Nia" tih chauhin min chhanga, a banga sona lian pangai tak chhunga sava lem inthen leuh leuh chu ka fapa chuan hmuin "Apa sava lem" tih pahin a ban ta mai "Lalduhsak, a lem anih kha khawih suh i mawl lutuk" tiin ka han pawt leta, Angela-in "Lalduhsaka maw?" a rawn tih riah chuan harh chhuak zawkin, ni e Angela Lalduhsaki ka hriat reng nan ka fapa hmingah Lalduhsaka tih ka sa a ni. Mahse Angelai hmangaihna hi ka nei lo a, ka phu lo bawk, ka nu ka nupui leh ka fapa te hi ka hmangaih ber te an ni a, an ni ka hmangaihna aia nasa hian tumah ka hmangaih thei lo ang,Angelai pawh hi. "Aw ni e, Angela kan haw phawt ange, ka lo la leng țha leh zawk ang" ka ti a ka tho a, kan kal tur chu rawn ding chhuakin "Ka lawm e" a ti sapa "Eng vangin maw?" ka tih chuan "Inhriat rengah kan ti aniang chu i tia, min lo hre reng a" a tih chuan ka lu bu nghutin "A dik alawm" tiin chhuah ka han tuma "Kei pawhin ka hre reng zel che, he khuaa hna ka hmuh tirh khan ka hna hmuh aia ka lawmna chu nangmah i ni, mahse ka rin loh takin nupui i lo neiin fate i lo nei tawh si a, duhsakna ka hlan a che" a tih chuan ka na vawng vawng mai, hmana ka duh thu ka sawi ngam lo kha nep ka inti thar riaua, mahse ka nupui ka hmangaih ber ka hre chhuak vata. "A pawi ka ti, i tlai hlek a ni" tih pahin ka chhuah san a.

A tukah naupang pakhat hian kawta ka țhut laiin lehkha min rawn pe a, "Nangmah chauhin chhiar rawh a ti" tih ringawt sawiin a kala, kei pawh bual inah lutin chu lehkha chu ka hawnga "Lalhruaitluang, ka hmuh hmasak ber zan che kha ka la hre reng, i muthlu nasa si, i chilthli a uai duah duaha, zahna cheng hre lek loin min la rawn en vung vung leh nghal. Mak takin kan haw dawn zanah khan ka ngaina ta em em che a, i haw hnu khan ruak huaiin ka inhria a sin. Kha zanah khan i tan lehkha ka ziak a, zak thei lo min ti ngei ang, mahse ka hun neih awmchhun a ni a ka ti lo thei lo a ni, chu lehkha chu i hnena pe turin ka nutei(hmanna mitthi nupui kha) fanu ka nau khu ka chaha, a pek ngei che ka rin avangin lungdam takin ka haw. He khua ka rawn thlen hlim khan zan hnih ka nutei te inah ka chenga, ka hriat chhuah rual rualin ka zawt nghala mahse ka nau khan a lo pek theihnghilh che tih min hrilha a pawi ka ti vawng vawnga mahse i chungchang zawh zawm duh loin keimah ngeiin ka rawn zawng ta che a, nang ni loin i nupui ka rawn hmu ta a ni. Mahse inti hrehawm duh suh aw, kan awmna a inhlat bakah kan INTAWN NI A REI SI LO a hmangaihna par kan tlan dun thei lo a ni e. Khang hun lai khan min haw bik lo tih ka hria, kan la naupan vangin i sawi duh ang i sawi ngam lo tih pawh Mamawia hnen ațangin ka hria a nia, Mamawia erawh ka dem hle mai i nupui neih thu min hrilh duh lo hi. Eng pawh ni se hlim taka hun hmang turin ka duhsakna sang ber ka hlan a che. I fapa Lalduhsaka kha a hmelṭha tak zet. Anih phawt le - Angela Lalduhsaki" tih chu ka chhiara dah țhat chi ni si lo chu ka pawt sawm veka ka paih darh ta a. Chu mi ni ațang chuan Angelai chu dawra thil a rawn lei paha ka fapa a rawn chhawnchhaih bak ka hmu ngai tawh lo a, min be ngai hauh lo a,ka mupui nen erawh an inmil phian fanu thar ka neih niin a rawn kala min lawm pui thu min hrilh pahin min chibaia chu zawng chu.

Chul lama chawhmeh lak tumin ka kal meka inrinni a ni a, Duhsaka ka hruaia kan hlim pafa hle, Angelai inluah zawn kan pelh dawn chuan tape a hla in play zawma hmeichhe zai rat rat ri ka hria a, ka ding chata ka han ngaithla chianga Angelai aw ngei mai chu ka hre ta "TAWN NI REI LO, tawn loh ni lah rei si, thinlaia'n i cham reng e"