BUALTHLENG MAWITU BUNG - 41

Zungbilha chuan chempui hmang loin fei tliang nalh zet mai, hman țhan tih ena hriat tak mai hi a vilik zauh zauha, Chhawnsanga chu a huphurh hmel loh hle mai. Mahse a rin loh tak maiin Chhawnsanga chuan vei chem a rawn hmang tlat mai, an țhianho inbeih fiamnaah te leh pasalțha dang a lo hmachhawn tawh reng rengah vei chem hmang an la awm ngai miau loh avangin inven uluk a ngai hle dâwn tih a hrethiama mahse huphurhna a nei hauh lo thung. Chhawnsanga erawh Neihthanga a kawp vanga pasalțha ni ve maia an ngaih țhinna chu tihtawpna hun rem chang țha tak a ni tih hriain a phur surh surh hle mai. An han inveh kual dan dan a Zungbilha chu a rangin fei hman chu a zei hle mai, Chhawnsanga chuan a lo bum hman țawk țawk zel a ni ber e. Pasalțha Hrumliana pawhin Sanghluna thihna avanga a mittui tla te chu hru hul sawk sawkin Zungbilha che vel a hmuh chuan a nui suk a, a chhuang hle tih pawh a hriat a ni. "Pasalțha Zungbilha lu hi tu lak tur mah a ni lo e" tih pahin Chhawnsanga thin zawnah chuan a fei chu hawlh zawkin lak let pahin ding lamah a vai nghal puata, chhun fuh lo chiah chiah mah se a vai let lam pang chuan pawi a khawih chiang hle Chhawnsanga awm vei lam pang leh ban bul chu thi nghal zawih zawihin Chhawnsanga pawhin na a ti ru ve hle mai. Mahse ti lang hauh loin "Ka ni ve aw" tih pahin Zungbilha chu a bei ve ta. Vei chem hmang la bei ngai hauh lo Zungbilha chuan bum harsa a ti tulh tulh mai a, mak tak maiin Chhawnsanga chuan a nawr zawk ta tlat mai. Zungbilha mal pui kak duai chu Zungbilha chuan melh zawkin a țhen deuh chak bawk a. Chu veleh Chhawnsanga chuan "Hliam tenau mai mai a nih kha pasalțha tuar zuau pa" a han ti a Zungbilha thinrim chuan "Pialralah kal rawh" tih pahin a han bawha Chhawnsanga chuan vir zawk pahin Zungbilha ban zawnah chuan a han vai thla puat a, Zungbilha fei la let lam pang chuan a ban chu chan em lo mahse a fei erawh a bung chiang hle, mak ti taka a fei bung chu enin Chhawnsanga lam chu a han melh a Chhawnsanga chuan nui sangin "Hmanraw dang pawh i la thei a nia" a lo ti a Zungbilha chuan a iptepui banin a chempui lak a han tuma mahse vei chem hmang thiam em em Chhawnsanga chu hmachhawn chakna hlawl a neih tawh loh bakah a chak dawn lo tih a inhre chiang hle, pasalțha anih vang chauha tlawm lo a ni nghe nghe. Hrumliana chuan "A tawk e" a rawn ti fiak țhaka Zungbilha pawh a chawl chiang hle mai. Hrumliana chuan Dammawia chu pan chhat chhatin "I chona kha ka pawm e, ka hoa i farnu kha hruai kan ni. Kan pahnih hian ching fel i la a țha ange" a han ti a Dammawia pawh lo bu nghutin a chempui a han bana mahse Thansanga chuan "Hei chu ka chan pual a ni e pasalțha Dammawia pawi khawih tu chuan Pasalțha Thansanga pawi an khawih a ni" a han ti a a hnung lawk ațanga "Pasalțha Liansanga pawi pawh a khawih a ni" tih ri a hriat chuan a khi suk bawka.

Mahse rin loh lam thil a rawn thleng tlat. Silai rawn puak țhuaiin Dimlam tlangval pakhat Thansanga lo tin mek tu chu a thal tawpa, Pasalțha Hmingthanga "aw" ngeiin "Hnung lam ațanga mi kap hreh lo tute chu ka hmelma an ni" tih pahin chem nen a rawn tlan chhuak ta. Thansanga chu khi sukin "In lo thleng har mah mah țep a ni" ti rilru niah niah chungin Hrumliana chu a en a " I zo fel vat teh ang" tih pahin a pan ta nghala. A sir lamah Liansanga pawh Khamzaua nen an lo inveh ve mek bawka, Hrumliana'n a chhuk zawnga chem a rawn vai rual chuan Thansanga chu a sir lamah eu zawkin Hrumliana'n chem a lak let hman hma chuan hnaih phei thutin Hrumliana hrawkah chuan a rek nghal chawta chutah a chalin Hrumliana hnar kawnah tak mai chuan a han tauh bur mai a le, Hrumliana chu a thal chiang kher mai, a hnar ruh tliak leh thi zawih zawih chu tuai vutin "Naua leh, vanglai mi va ti ngai ve, i zo fel vat teh ang" tih pahin sang takah a han zuanga Thansanga'n a chem bum nana a kun hniam chu a bekah a han pet ngheng maia Thansanga lu hai pawh a pai ve khat khat mai. Thansanga chuan a beng chhung ațanga thi rawn chhuak chu ngai pawimawh duh hauh loin Hrumliana'n amah rawn bawh paha a dul zawna a chem rawn vai rual chuan tawlh hnung dawrhin Hrumliana kun, a din leh hma chiah chuan hnaih phei nghalin a khupin Hrumliana hmaiah chuan a han tauh ngheng maia, Hrumliana lu hai țhițhi rawp chu a lu lak ngei tumin a han vaia mahse Hrumliana chu a țhingțhit ruala kun nghalin Thansanga ke rek pahnihah chuan manin a han phih ngheng maia Thansanga pawh a chem thlauhin a thal chiang ngei mai. Hrumliana chuan bawh bet nghalin a han hnek siah siah mai a, Thansanga chuan na a tiin a indang țawk țawka he ti reng chuan a daih rei dawn lo tih a in hre chiang hle mai. Hrumlianan amah a rawn hnek a ban a lak let leh rual chiah chuan a ban chu dawk chhuak ve nghal zawkin Hrumliana hmaiah chuan a han țham chawta chutah a theihtawpa nain a mit chu a kawm sak ta. Hrumliana pawhin a beisei loh thil lutuk thleng thut avang chuan na a ti bawk si chu Thansanga kut ben per lawp pahin a mit chu a han nuaia a mit ațang chuan thisen a rawn luang chhuak nghal zawih zawiha a khaw hmuh chu fiah lo vekin a hmu phe ruai bawka Thansanga chuan a nghawngah tak kuah bet thlawpin Hrumliana chu a thih hma chuti chuan a kuah bet ta.

Hrumliana a han chat fel chu a chem lain a ding chhuaka a chauh pawh a chau ve hle. Khamzaua lu bung bul lawka Liansanga leh Hmingthanga ding dun Lianpua Zemthanga leh Ngunthlira ten an beih rawn mek chu a va hmu a, puih tumin a han pena mahse a lu hai lutuk chu țhingțhi thlawpin a khaw hmuh chu fiah lo ruaiin nikhaw hreloin a awm ta. Thansanga chutia a han tlu mai chu a thi emaw tiin Liansanga leh Hmingthanga te thinrim chu an han tal tak tak mai zawng kar loah Lianpua, Zemthanga leh Ngunthlira te chu an that ta mai reng a. Liansanga chuan Thansanga chu pawm lawkin Lal inlam a pan puia Dammawia chuan lo hmu vatin a thi ngeiah a ngai hmiah bawka,thinrim eng phiar in Dimlam tlangvalte a han sam zet zawng khawfing chah rual deuh thaw chuan Dimlam ho chu an inpe ta. Tlangval sawm ruk chuang lai an inchan nghe nghe a, Dammawia te lam erawh Sawm thum vel bak an inchan ve lo thung. Hliam tenau nei erawh an awm nual.

Liansanga chuan Thansanga mar phu an hmuh țhat viau takah chuan nikhaw hreloin a awm tih a hrethiam maia pawn lamah va chhuakin Dimlam tlangval lo inpe te leh khaw mipui tlangval hoin an rawn khalh khawmte chu a han melh kuala, "In pasalțha pakhat hur herh vanga thisen luang zat fakau hi inhmu em, in Lalpa nunna in a tawrh phah nghe nghe a sin. Mi duham ho, in thiltih pawi zia hi hre reng rawh u, kan farnu chunga thil thleng ang hi in fanu, in farnu te hnena thleng ve turin in phal em, in phal anih chuan sawi rawh u, chu nula ngei chu kei hian ka hmei atan ka hawn ang"a han ti a, mipuite chu an reh țhiap maia. Liansanga bawk chuan "In phal si loh chuan eng vanga hetiang thil hi ti nge in nih" a han ti leh hrawk a Dimlam Khawnbawl upa pakhat chu rawn pen chhuakin "Lusei pasalțha min ngaidam rawh kan tih sual a ni e, a pawi kan ti hle mai, khawngaih takin nunna chan awm tawh suh se" a han ti a Liansanga chuan "Awle, nunna chan inawm tawh lo ang, tukțhuan eikhamah kan chhuak dawna, a ngam fa chuan min lo chan emaw, min lo umzui intum thei ang inthihna tur in pan tih inhre rawh u" tih pahin Lal inlamah chuan a lut leh nghala Lal inchhunga Lalnu, a hmel ena nu valai tak la ni  lo țhu khur hlawk hlawk chu enin "Lalnu zahawm a pawi kan ti hle mai. Mahse kan farnu thlavang kan hauh ngei a ngai si a ni" a han ti a. Lal nu chuan Liansanga chu en vang vangin "Pasalțha Zangaia i ni em?" a rawn ti chhuak hlawl maia, Liansanga chuan mak tih hmel takin "Ka pa a ni, engtin nge i hriat?" a han ti a Lal nu chu rawn ding chhuakin vin țhakin "Ka pa Mungthangliana thattu, fahraha min siamtu, a ni sin, ka pa khan i pa hnenah khan a nunna zuah turin a ngen lawm lawm a ni lawm ni? I pa vangin ka pa ka chan tawha tunah nangni vangin ka pasal ka chan leh tak hi, nang ni pafa hi lo piang ve lo ni ula țha tur"tih pahin Liansanga chu a kawk siah siah ta mai. Dammawia chu rawn țawng chhuak vatin "Lalnu i hre dik lo a ni ngei ang, I pa kha Pasalțha Zangaia khan duh tawk mai tur leh nunna chan an awm kher a țul loh thu a hrilha mahse i pa khan a nawr lui tlat a ni" a han ti a mahse Lal nu chuan "Dawt sawi hmang!" ti hrawkin "Ka nuțapa thinrimna dal zo inawm lo ang, Lusei pasalțha te u lo nghak rawh u" tiin a pasal ruang awmna lam chu a pan sak nghal hmaka. Liansanga chu a thinrim kher mai, mahse hmeichhia em kut han thlak chu a duh bik si lo. Hmingthanga chuan "Liana engah mah ngai duh suh. Sanga hi han harh se la, chhuak vat teh ang u, he khua hi awm rengna tlak a nih loh hi" a tih takah chuan Thansanga chu buaipuiin a harh hun an nghak ta țhap a.

Tuibur hmuamda vel hnuah Chhawnsanga chu rawn lutin "Kan tlangvalte chu kan phum fel tawh e, Dimlam ho hian min puih nuam an ti khawp mai, an tlangvalte ruang an buaipui ve mek e" tiin a nui vur vur a. Tuk țhuan kil hun lai a Thansanga kut rawn che țual țual a hmuh chuan Liansanga chuan "Țhiana i harh em?" tiin a han sawi nghal nawk nawk a Thansanga chu rawn meng chhuakin "aw" rawn tih pahin a han țhu chhuaka a hawi kuala Vanzaui leh Dammawia lo nui vur vur a hmuh chuan nuih let sakin an bula Liansanga kianga Chhawnsanga leh Hmingthanga lo ding a hmuh chuan "Ka țha e, ka beih tawhah chuan a ni tluka khirh an la awm hauh lo" tih pahin a han ding chhuaka "Ka țha e, kal chhuak vat teh ang u" a han ti a Liansanga chuan "Inhnawh puar kan mamawh a ni" tih pahin Lal in buh zema buh chu a tam thei ang ber iptepuiah a han la a, Dammawia chuan rapa sarep lo awm chu ban thla nghal zung zungin pawn lamah an chhuaka an tlangval lo țhu khawm țhapte lam chu panin "Khaw daiah sawn ei i rel teh ang u" a han ti a a hnungah midang an lo inzui chhuak ve bawka ti chuan khaw dai lam chu an pan ta a. Liansanga chuan a mitin Lalnu chu a han zawng ru a a hmuh mai tak si lohah chuan a nuțapa te khaw lamah chuan a kal ta angah ngaiin a nui vur vura, kawtchhuah an han thlen chuan Dammawia chu ding chatin "Liana" a han ti sapa Liansanga hawi chhuak chuan Dimlam Lalnu lo ding khur hlawk hlawk chu hmu ve nghalin "I kal san thuai zawk teh ang u" a han ti a hma hruai nghalin Dimlam lal nu chu an kal pel ta a. Dimlam Lalnu chuan engmah sawi lo mah se a haw hle tih a mitmeng ațang chuan a hriat reng mai. Tuk țhuante an han kil zawh hnu chuan Țhangzing lam panin an kal leh ta nghala. Hliam nei an awm ve nual avang leh hmeichhe pakhat an chhawm bawk avangin an kal sawt lo hle.

 Luite tui luang dam dap dawta an han insil thlan daih sang sang lai chuan Vanzaui chuan "Ka u haw leh hi ka va han hreh tak em. Nuthlawi mai ka ni tawh si a, fa ka pawm lo ang tih pawh hriat a ni si lo" a han ti a Dammawia chuan chhan ngaihna a hre lo hle mai. Thansanga chuan "Zaute hrehawm tih phahnan hmang lo la, mahse heng inkhaw tlangval rawn kal zozai te leh nunna chantate kha an rawn kal chhan leh nunna an chan chhan chu nangmah vang chauh a ni a sin. Nang hi hmusitin tuna i rilru a awm ang khan mi en tleu ni ta la an rawn kalin nunna an rawn chan duh dawn em ni. Haw leh lo ta la nangmah vanga nunna chante thlarau kha i chungah an lungawiin i ring em? Eng kim hi a țha leh vek dawn alawm i nuțate kan dam chhung hi chuan tumahin an khawih na tawh ngai lo ang che, Liana kal i siam teh ang u" tih pahin Vanzaui chu a kaia hma hruaiin an kal ta nghal a. Kar lakah zan li an riah hnu chuan  Țhangzing khua chu an thleng ta. Vanzauin a nu leh pa te leh a unaute a han hmu leh chu lawm luat avangin a țap hawm hawma Neihthanga pawh lo harh țha tawh hle maia. Dammawia a han hmu chu a hmelah a lawm zia a hriat hial a ni . Lalpa meuh pawh Vanzaui hmu tura rawn kalin Vanzaui biang tawn tawnah chuan a kut phah hlai hlep hlup chu a han nghata "Chemte min ngaidam ang che tih theih ka nei si lo a, i liamni a țang khan nangmah ngaihtuah reng rengin hun ka hmang a sin, he khuaah hian hlim takin i awm ang, tumahin an hmuhsit che ka phal ngai lo ang" a han ti a Vanzaui chuan mittui luang zawih zawih chungin "Lalpa ka lawm e" a rawn ti a.

 Zan lamah chuan Thansangate chu Lal inlamah leng lutin Lalpa hnenah chuan Hmingthanga hmel hriattirna te an han nei a, leihkapui lamah Lalfanu Țanthangi chuan Dammawia ban bul chelh chunga a dara a lu nghat pah chuan "Haw tawh lo mai la" a han ti sapa Dammawia chuan "Min zui ve zawk mai rawh" a han ti a, an han innuih leh riha Țanthangi chuan "In khaw lamah chuan i to awm si a min hriat chhuah ngai pawh hi ka ring lo" a han ti a Dammawia chuan "Nang pawh khaw dang lalfapa rim tu che an rawn kat nuk reng anga ka hming hi chu a lang vakin ka ring lo" a han ti a Țanthangi chuan "ka sawi angin sawi zel suh misualpa" tihpahin Dammawia ban bul chu a han seh sak chawrh a Dammawia chu aiah tuarin "I va sual tak" tih pahin Țanthangi chu a han tin uaiha Țanthangi hlau inhup a hmuh chuan tawp chatin a han en vawng vawnga Țanthangi chuan chutia engmah a thlen si lohah chuan a kut țang chu ti kauin amah nuih vur vur chunga lo tin uaih rengtu Dammawia chu a hmu a, a kut la thlain a han nuih tlawna, Dammawia chuan chutia Țanthangin a rawn nuih tlawn rual chiah chuan "Phuba" tih pahin Țanthangi chalah chuan a han pen sak a, a duh aiin a pen na tih chu "Aiah" tih paha Țanthangin a hup nghal danah chuan a hriat hle. Dammawia chu nuihza insum tih hriat takin Țanthangi kut chu a han bana "Ka tihpalh" a han ti lawi rut a. Țanthangi chuan "Kal rawh" tih pahin a rawn nghawk sawk a. Țanthangi chal chu a lo sen deuh hlar bawka. Dammawia chuan "Ka tihpalh tak zet" tih pahin Țanthangi chu a awmah a han kuah bei thlawpa Țanthangi chuan tal chhuah tumin han bei mahse a thlamuan berna leh a hmangaih ber tha chu hneh zo loin tuibur hmuamda lekah chuan a bei hle hle tawh a.

Chu zan chu hlim taka hmang dunin lêng hawn ar a khuan takah chuan Zawlbuk lam an pan san ta a. Țhangzingah chuan zan hnih an han riak leh ren rawna haw an tum ta, an chhuah dawnah chuan Liansanga chuan Țhangzing Lalpa hnenah chuan "Lalpa, ralven buk uluk takin siam la, inring rengin awm rawh u, an lo kal harin ka ring lo a ni" a han tia Lalpa pawh chuan "Lusei pasalțha i sawi ang ngei chuan ka lo ti ange" tih pahin a rawn chibai kuala Thansanga chuan "Lalpa min mamawh hun apiangah kan awm zel ang, kan hnam karah inhmelmakna awm mah se nang ni erawh unau ena kan en te in ni tih min lo hriat sak reng dawn nia" a ti a ti chuan kawt chhuah lam panin an kal ta a. Dammawia erawh a ngui bar renga Țanthangi zunzam chuan a kuai lungleng nghal em em a ni ber. Țanthangi pawh chu tia Dammawia te an kal takah chuan ruak huaiin a inhria a, a lungleng nghal rum rum hle bawk a.