BUALTHLENG MAWITU BUNG 11

A tuk zing ni chhuak chuan Zehtet khua chu a rawn chhun eng phut mai a, thing zara sava hram ri te leh, tuala naupang tual chai ri te, a then lo tap rawng rawng tawk lah bo lo. Nute'n an fate, an ran vulh laite leh an ei rel lai te ngaihsak reng rengin an buai a, nula buh deng ri te nen chu khua chu a khat a ni ber mai e. Lalpa Puithanga kiangah chuan Lalpa Dohranga leh Lalpa Saithangate chu an ding a, an hma zawn a Zehtet khaw tlangval sawm riat rual dingte chu thu tha tinreng fahin, thu an insawi chhawk a. Chumi hnuah an val upa ko chhuakin fuihna thu tlem a sawi ve leh hnu chuan Chhuahchawnga chu nupui nei hlim anih avangin in lama awm tura tih zingah a awm ta a. Mahse kal luih a tum nasa bawk si a, an indang zo dawnin an inhre tlat lo. Runthanga chuan a hma a a zawhna ngai bawk chu rawn zawt lehin "Chawnga, kan thih vek chuan tunge kan phuba la ta ang" a rawn ti leh a. Chhuahchawnga pawh chuan dik a tiin, anni thianho zingah lah tumahin fa an la nei bawk si lo nen, ama lam a han inngaihtuah a, a nupui chu han kal san ta se, ral lakah a nunna va chan leh si se a nupui chan tur te a han ngaihtuah a, hreh takin khaw lamah tlangval sawmhnih nen an lo awm thung dawn a ni.

Lalpa Saithanga chuan hma hruaiin, a kiangah Thanhranga leh Chhuanthanga an ding a, an hnungah Runthanga ten zui bawkin an kal ta a. Kawng lakah chuan Thanhranga te chuan an naute chu an fuih char char a, a tlem zawk mah ni se huaisen taka an beih chuan an chak thei tihte hrilh mah se, he inbeihna a hnehna changtu zawk pawh hian nunna tam tak an chan dawn tih chu an hre chiang em em a ni. 

Chawl khaw muang lova kal zelin zan hnih hnuah chuan Darchhep khua chu an thleng ta. Darchhep khua an luh zanah Chhuanthanga leh Thanhranga chu Pawih ho lo kalna lam tura an rin lamah chuan an kal chhuak ta a. Lam bunna remchang an han zawng ngial a, mahse chutiang atan a duhthusam chu an hmu mai si lo. Zan thil mah ni se, Pawih ho chu rawn thleng thutthei an ni tih an hre bawk si an kal zel a. A tawpah chuan riah buk sualna'n a hmuh tha zet, tui hnianghnarna hmun tur tak an va pawh ta. An han ngaihtuah vang vang a, chulai hmun chu Darchhep run tumtute tan pawh riahna'n a aia thlanawm a awm lovin an hria a. Chuvangin chu lai hmun chu an hual theuh chuan an chan a that an ring a, rang takin an let leh ta vang vang a. 

Darchhep val upate nen chuan an thil va hmuh chu an han sawi zung zung a, a tukah chuan Darchhep tlangval mi za leh Zehtet lam atanga kal sawm riat vel chu chu lai hmun lam pan chuan an kal ta. Darchhep tlangvalte chu Runthanga te Pawih ho silai an ruk kha an hum far a, Zehtet tlangval te zingah silai hum lo mi sawm hnih vel an awm ve bawk a. Chuvangin inral saiah na na na chuan an chan a that theih an ring hle a ni. 

An sawina hmun an va thlen chuan bihrukna tur hmun remchang ang te an han zawng a, a thenin thingah te lawnin awlsam taka an awmhmun an sawn zung zung theihna'n thing bungte chu thingkungah chuan rah theih turin an han tawn kual sawk sawk bawk a. Chutianga nilenga an beih hnu chuan an vaiin an let leh a, zanriah eikhamah tlangval pahnih chu an khawram chin an perh tarna hmuna Pawih ho awm leh awm loh lo va thlithlai turin an tir chhuak a, midang zawng erawh an ralthuamte en felin silai zen te chu an han lakhawm sawk sawk bawk a.

Thanhranga chuan Bualthleng tlangvalte rawn thlen hmaa Pawih ho an rawn thlen hman chu a hlau em em mai a. Pawih ho chu an tlemin a ring lo hle a, anni lah mi za sawmriat awrh an ni bawk nen; a mang a ang ru kher mai. A tuk chawhma chhung chanchin an ngaihchan leh hnu chuan Pawih ho enthla tura an dahte chu khua an rawn lut ta. Pawih ho chu mi zathum vel zet an nih thu leh an khaw ramchin an rawn hnaih tawh thu an rawn sawi ta mai. Chu veleh tlangval ral kai thei chin zawng zawng chu chhuak khawmin, Lalpa Saithanga chuan fuihna thu a rawn sawi a, a sawi zawh chuan Pawih ho lam pan chuan an chhuak ta. 

Thawm dim a ngaih avangin leh Pawih ho chuan riah buk sual lo va khua luh an lo tumte anih phei chuan intawhchilh thut awm thei anih avangin Thanhranga leh Chhuanthanga te bakah Runthangate chuan hma an hruai fal a. An kal zel a, Pawih ho riahbuk sualna ,Thanhranga leh Chhuanthanga ten lo lambun an tumna hmun ngeiah chuan Pawih ho chu riahbuk sualin an buai mup mup lai chu an va hmu ta. Tlangval dangte chu khaw lama let tura hrilh turin Hrilkunga chu an tir vat a, anni ho erawh chuan an enthla dawn a ni. 

Chhuanthanga chuan an hruai tupa chu a en vung vung a, "Zapauva" a rawn ti sap a. Hungliana hmel a hmuh chuan Hrilkunga pawh chu hlauh vang ni hauh loin a khur der der mai. "A tawp kan thleng tawh chiang khawp ang" a rawn ti ve bawk a. 

Ti chuan zanriah an eikham thleng an enthla a, a chhan chu mut hmaa khua run an tum nge tum lo tih fiah an duh vang a ni. Zan riah eikhamah chuan Pawih ho chuan mi pali, Darchhep lam enthla turin an tir a. Thangkunga Hrilkunga leh Rengliana te unau chuan an zui ve nghal bawk a. Midang zawng chu thu thapin Zapauva chuan thu a sawi a. 

"Lusei ho hian kan farnu an ruk chhuah man hi kan pek ngei a ngai a, kan farnu hi a nung chungin emaw a ruang tal kan hawn thei lo anih chuan mi zawng zawngin keini hi nep min tiin min hmusit kumkhua tawh ang. Chuvangin pasaltha nunzia intemna hun intan tur anih hi hria ula, huaisen takin bei ang che u. Amaherawh chu Lusei pasaltha te hi ngaihnep chi an ni hauh lo va, chuvangin an pasaltha te inbeih apiangin mi panga velin bawh rawn zel ang che u. Kan tam zawk avang ringawt hian thla tih muan a chi hek lo. Fimkhur takin kan khua leh kan hnam tan kan bei ang a, hnungtawlh lovin hnehna kan chang ngei tur a ni" a rawn ti dap dap a. A hmelah chuan inrintawkna te, huaisenna te leh thuneitu nihna te a lang a ni. Vawmmana chu rawn ding chhuak ve lehin "Kan lalfanu ru chhuaktu ber kha he khaw piah lawk Zehtet khua a an pasaltha Chhuahchawnga a ni a; tin, Zehtet piah leh deuh a mi Bualthleng pasaltha pathum leh he khaw pasaltha pahnih hi kan lalfanu ruk chhuahna kawnga tan la nasa ber tute an ni a, ka nau ngei pawhin Bualthleng pasaltha lakah a nunna a chan a ni. Chu vangin pasaltha an ngah hle a, zuam ngawt chi chu an ni hauh lo tih kan hriat a tha. Chuvangin zanlaiah kan che chhuak anga, zawlbuk leh lalin lamah kalin, he khua hi zing khawvar hma ngeiin kan thuhnuaiah kan dah hman tur a ni. In erawh a theih chuan hal sak loh hram kan tum tur a ni. Amaherawh chu enge maw thil avanga kan chan a chhe palh anih erawh chuan a tam thei ang ber kan hal thung tur a ni" a rawn ti ve bawk a. 

A tawp berah Hungliana chu rawn ding chhuakin, "He khaw pasaltha pakhat vanga nung dama la awm ka ni a, mahse a aihnahphahpuite'n ka patea leh pasaltha Lianuka an that a ni tih kan hriat theuh a tha ang. He khua leh a chhehvel pasaltha te intiam rual hi an ral hrat hlawm hle a. Tin, an huaisenin an huangtau hle tih pawh zan khat thil thua Dapzeh lalfanu an ruk chhuah danah hian a hriat hle a. Chuvangin kan vaiin kan theihtawp kan chhuah ang" a rawn ti ve bawk a. Pawih tlangval ho chu an phur tawh kher mai. 

Chutih lai mek chuan Thangkunga te pawh an lo thleng phei ve tawh a, Pawih ho in enthla tu tura an tirh mi pali te lu chu an rawn khai far tluah tluah bawk a. Tichuan khaw lama tlangval awm te pun turin an intir a, anni pawh Pawih ho thawm hriat phak lohna turah an insaseng leh ta a.

Khaw lama tlangval awmte an rawn thlen hnu chuan Chhuanthanga chuan thu sawiin, "Kan ram chhung ngeiah kan monu lak let tum leh keini khaw thum min chimih vek tumin an rawn riak lut a ni a, hei hi kan en liam mai mai a thiang lo a ni. Dapzeh Lalpa hian a fanu hi a hmangaih takzet anih chuan a fanu pasal te khua hi a runtir phal hauh lo vang. Mahse lal chapo leh sual chuan mi hnuaihnung hmusitin hamthatna an um mai thin a, tunah hian chu lal sual tak thuawih tute ngei chu kan bei dawn a ni. Zathum rual zet an ni a, keinin silai fung kan ngah em em thung. Kan vawi khat kah khan kan tum a fuh vek tur a ni. Tichuan kan inzat thei mai ang. Mahse kan tanhmun a fuh a ngai hle thung dawn a, chhun lama awmna tur inhauh sa ah theuh khan in kal ang a, kei leh Thanhranga hovin tlangval sawm, Pawih ho lo kal tawhna lamah sawn kan awm ang. An rawn tlan let kan lo kap ve thung dawn a ni. Midang zawng pahnih tete a inkawpin in kal anga, hmanhmawh a tih chi a ni lo tih kan hriat a tha. An zingah pasaltha huaisen tak leh fing tak a awm tih kan hriat vek a tul a ni. Keinin hma kan hruai anga, a khat mawi tawka thawm dim taka in awmna tur rawn pan turin ka duh che u. A hnung berah in pasaltha te an rawn kal ang. Anni in thal an thlah hunah chuan in inring vek tawh tur a ni" a han ti charh charh a. 

Thanhranga chuan, "Lusei mipa te hian hlauh kan nei lo va, a tul anih leh Tiau lui kanin Pawih khua kan han run mai tur lah niin. Tiau lui rawn kan a kan sai phak a an lu rawn rawlh ngam te chu kan tan an hnawksak hle tih kan hre tur a ni. Tunah kal ang u le,” a han ti a. Tichuan tlangvalte chu an tan hmun tur chu an pan ta. 

Khaw chhung lamah chuan leng hawn ar a khuang al al a, mi tin mai chu mu lovin, thihna rapthlak tak lo thleng tur chuan eng angin nge a nghawng nasat dawn tih an ngaihtuah mek a ni. 

Tlangval rualte an awmna turah an awm kim ta maw tihah chuan Pawih ho pawh chu mut zai rel tumin an intin tuah ve ta. Zapauva erawh a ngaih a tha thei tlat lo. Buk kawtah chuan dingin ram hnuaiah chuan a mit a len kual ruai ruai a, Vawmmana leh Hungliana chu kovin buk piah deuhah chuan a kal pui a, a ngaihthat loh thute chu a hrilh ta. Anni pawh chu an lo ni ve chiah tho mai. 

Chu zan thawm reh takah chuan boruak chu a tang ru at mai a. Darchhep lamte chuan Runthanga te silai puak har lutuk chu mak an ti tawh zawk a ni. Chutia an nghah mek lai chuan silai a rawn puak ta thuai mai le.

Buk chhungah chuan na tuar rak ri awm nghalin, Lusei fate kan zam ngai lo ve tih rualin silai a rawn puah chhunzawm leh ta. Chu lai ruamah chuan mihring natuar rak ri chu a khat a ni ber mai. Silai a puak thuai thuai reng bawk a, kar lovah mi za vêl chu an inchan ta mai reng a. Zapauva chu harh chhuakin a hote chiai chu khapin an meipui te chu an han thelh mit sawk sawk a, tichuan leiah bawk phekin a then lung hmunah te enge lo thleng dawn tiin an lo nghak tawp mai a ni.

Hrilkunga silai rawn puak thuai chuan Pawih tlangval pakhat chu pialralah a rawn thawn liam nghal a, chutih ruala Zapauva silai puak ri chuan Hrilkunga mal pui ruh chu deng tliak rawpin a awmna thingkung a tang chuan a tla thla ve nghal bawk a. Silai dang chu a khat tawkin a rawn puak reng a, Pawih ho pawh harh chhuakin silai hmet puak chungin an tawlh hla hret hret a, kah fuh pawh an nei ve nual nghe nghe. Mi za sawm riat ai tam mah an la dam ve bawk a, Runthanga te lam pawh mi za sawmruk vel an la dam ve bawk a ni. 

Chutia an hnungtawlh mek lai chuan an hnung lam atangin a rawn puak leh zawt zawt a, Pawih tlangval sawm lai chu an thal leh ta. Che sawn ngam si lovin, thimzingah chuan an thu khawm a, lung remchangah an inphen bawk a. Chutia rei fe an nghah hnu chuan thawm an hre ta. Lusei fateu zam suh u, Bualthleng mihrang kan lo thleng e a rawn ti a. Bualthleng mite chuan Val upa Ruma aw a ni tih an hre chiang kher mai. A hnungah Bualthleng valrualte chu an rawn haw haw phei ta. Runthanga te chuan pawi an va han ti tak em!! 

Pawih ho chuan an silai chu vawi nga lai an kap puak hman ta tlat. Bualthleng tlangval panga, val upa Ruma rawn tlanpel tute chu an meichher chuan tawktarh tha takah siamin an nunna an chan phah a ni. Chu veleh val upa Ruma chuan bawk vek ru tih pahin an meichher chu a paih tir bawk a.

Runthanga te chuan Pawih ho silai sawh mek chu an inrin loh lai tak anih ringin an chem sen nen an bawh ta. Pawih ho lah chuan chutia an mahni hualtute an awm hmun atanga an lo tlan thawm chu hriaiin an hawina lam lamah chuan an silai chu a sawh zo tawh ho chuan an kap puak ta a, tlangval pariat laiin nunna an chan leh ta. Chutah silai kap puak tawh loin an insam ta, pasaltha ngah zawk na na na chu an chan a tha chho telh telh ta mai a. Chu veleh Zapauva chuan thih vek a tul lo ve tiin, "Kan tlawm e" a ti ta hram a. 

Lusei ho pawhin khawih zui lovin an ralthuam an han dah thlak tir a, Zapauva chuan, "Mal leh mala min hmachhawn ngam in awm em? Ka chak anih chuan lal fanu kha min pe ula, in chak anih chuan in sal kan ni ang," a han ti a. Vawmmana pawh chuan, “Ka nau Vungpawrha lu la tu kha ka hmaah hian i ding ngam dawn em le,” a rawn ti ve ta bawk a. 

Hungliana erawh zawn bik a nei tih a hriat hle. A hawi kual hrek hrek danah Runthanga chu rawn chhuakin "Thiante ruang kara ngenmu dawn palh hlauh vanga mu tawm kuk Vungpawrha kha a niang maw i sawi chu. A lu ka lak hma khan a malpui ruh kha ka sat chhe hman a, ram tui lei lo va nun tir em chu tiin ka that anih kha" a rawn ti a. Vawmmana thinrim chuan tlan paha va sah tumin a han insiam rem a, mahse Zapauva chu lo inrawlhin, "I nau hnehtu chu i tan a sang mah mah a ni. Hei hi chu keimah ngeiin kan ching fel ange, ka lo chak lo ta anih leh Hunglian, nangin ka fapa kha rawn enkawl ang che" tih pahin a pen chhuak a. Chu veleh Chhuanthanga chu rawn chhuak ve lehin, "Inhmuh a va khat ve, kan inhmuh dan lah a duhawm loh hle lehnghal" a rawn ti a. Zapauva pawh chuan, "Thanga, i dam thin maw?" a rawn ti ve bawk a. An pasaltha te inbia chu mak ti takin an thlir vek a, a awm lo hran lo ve. 

Chhuanthanga hi a naupan laiin a nu nena an chenna khua, Saichhuah chu Pawih hovin runin a nu nen hian salah an pasaltha Zapauva pa Zalianthanga hian manin, pasaltha nun ngil tak a ni hlauh va, tha takin a enkawl a. Zalianthanga chuan Chhuanthanga chu kawng engkimah a fapa anga enin, Zapauva nen chuan a inzui tir chawt zel a. Chhuanthanga a rawlthar tan tirhah hian khual khuaa a zin chu a thih thu an hre ta thut a. He a thihna hian sawi zui a hlawh hle nghe nghe. 

Zalianthanga nupui chuan Chhuanthanga te nufa chu chhuah zalenin Lusei ramah an let a, Lalsaithanga hi chutih lai chuan Darchhep ram a la zuan hma niin, Tiau lui thlang lawkah a awm a. Chu a khaw hluaiah chuan Chhuanthanga te nufa hi an inbengbel ve ta a ni. Rei lo teah rawlthar chhovin, pasaltha khual kai a ni ta thuai a, chutiang bawkin Zapauva pawh a ni ve bawk. Darchhep ram an luh hma hi chuan vawi tam tak an la intlawh pawh fo a ni.

Chhuanthanga chuan, "Kir leh zawk rawh. Nang pawh keimah ang bawkin vanglai hmang tan mekte tan chuan i tha te kha a uaithla lam ve tawh a ni" a han ti a. Zapauva chuan, "Ni lo ve, he inbeihnaah hian ka chak lo anih chuan ka lu hi kan inah nangmah ngeiin min thlen sak ang che. Ka nu pawh a tar tawhin i hmel hmuh leh a chak thu a sawi fo a nia" tih pahin Runthanga lam hawi chuan a han insiam rem nghal a. An taksa engkim an han inzirchian sak hnu chuan an han inveh ta theuh theuh mai le. 

Runthanga chu a phur hmel surh surh kher mai a. Zapauva erawh a hmelah danglamna a awm lo va, ngun takin Runthanga chu a en reng bawk a. Chu tah a hmel en ang mai a nih lohzia lantirin, rang taka rawn tlan thutin a chempui chu a chho zawngin a rawn vai tleu ta phut a, Runthanga chu lo indang ve hman mahse a awm atang chuan thisen a rawn chhuak nghal zawih zawih a. Zapauva lah chuan kil tin atangin rang takin a chem chu a rawn thlawh zawm bawk si. Runthanga chuan inven bak chu tih theih a nei meuh lo a ni. 

Mahse Zapauva vanduaina a thleng palh kan ti dawn nge, Runthanga ngawt a ngaihtuah luatah a rahna tur a en ta lo chu a tan a pawi ta. Lung rap hrualin Runthanga chu a va bawh ta, chu veleh a khabeah a khupin Runthanga chuan lo do sak sawkin a rawn dak chhuak leh chu a bekah a chem fawng chuan a han chhut sak leh bur mai a. Pasaltha mah nise a na bawk a niang, a thal tawp mai a, a chem lah a thlauh tawh bawk nen. Runthanga chuan a chem chu paih vein kut lawng chuan a va bawh ta. Pasaltha uaithla tawh leh vanglai hmang mek chu an inkhan lo lam hret chu a ni. Runthanga chuan a hnek vung ber bur tawh a, a naka a kiu va a nghawk sakna avang chuan a thaw tha thei lo chu a meng kawk kawk mai a. Runthanga hnenah chuan, "Pasaltha, ka lu hi la ta che. Mahse ka unaupa sawn ka nu hnen a thlen tur a ni" a rawn ti ta a. Runthanga chuan a chempui chu humin a han inngaihtuah vang vang a, Chhuanthanga lam a va hawi chuan Chhuanthanga hmelah chuan hrehawm tihna nasa tak chu a va hmu bawk nen, a chem chu paih thlain Zapauva chu a kaitho ta a. 

Chu veleh silai rawn puak thuaiin Runthanga chu a thal nghal tawp a, silai dang lo puak zawt zawtin Lusei tlangval te chu an thal zawt zawt mai a. An silai kap zo chu chem sen nen an rawn bawh leh ta. Mahse an hruaitu Zapauva ber leiah a mu hlawm reng tawh bawk si, Thangkunga leh Rengliana te unau thinrim lah chu an che na kher mai. Chhuanthanga leh Thanhranga hma pawh a kaw duai duai mai a. Pawih tlangval te chu tam zawk ni tawh mah se pasaltha ngah zawk na na na chu Lusei lam chan chu a tha leh ta hret hret a. Rengliana chuan Hungliana’n Val upa Ruma lu chhawk a tum lai chu va hmuin rang takin a tlan phei nghal a, Hungliana’n a chem a vai thlak dawn lai tak chuan Rengliana chuan rawn su thal tawpin, "I nun zuah nachhan tur a awm tawh lo ve,” tih pahin a ke vei lam rekah chuan man lawkin a bula lungpui vuak nan chuan a hmang ta. Hungliana dar ruh chu ri rawpin, Lianmawia chuan a ke dinglam chu a khupah a rawn sah sak ve leh bawk a, a bung teuh hle mai. Hungliana na ti chu a rak nasa kher mai. Val upa Ruma rawn tho chhuak chuan a chem ngei chuan a nghawng chu a zai ngatin a rawn zai sak ta a ni. Pawih pasaltha, inmalbeihah pawh duai lo tak chu mi chak Rengliana te unau thinrim hmaah chuan eng vak a lo ni lo ve. 

Mahse chutih lai tak chuan silai rawn puakin Lianmawia chu duh loh paih ang thlawrhin leiah chuan a tlu ve leh ta. Rengliana hawi chuan Vawmmana tlan chhiat tum chu va hmuin, a bula lung, lu tiat vela lian chu chharin a tha tawpin a vawm ta a. Vawmmana hnungzangah tak chuan va vawmin a bawkkhup thlawrh a, va pan phei nghalin a hrawkah chuan a va rek ta. Vawmmana chuan thei leh thei lovin, “Mipa chu inring leh inringin in hmachhawn ang hmiang,” a rawn ti chhuak tawk a. 

"Ka nau kha a inring bik lo,” tih pah chuan a lung vawm bawk chu chhar lehin Vawmmana lu chu mitmu chhuak pur khawpin a deng ta siah siah mai. Tichuan midang inbeihnaah kal kual leh nghal zung zungin, an lam chu mi sawm li vel an la dam a, Pawih ho pawh chutiang vel tho chu an ni. Rengliana chuan Vawmmana chem chu la in chem pahnih hum chungin hmelma lamah chuan a tlan phei ta. 

A va thlen meuh chuan hmelma lam chu an hek heuh heuh kher mai. Rei loteah an chimih thei ta. Anni lam pawh sawmhnih vel chauh an ding ve tho a ni. An han inbeih fel meuh chuan khawfing a chat dawn ta reng mai le.

Rengliana chuan a nau chu a va en a, a awmah tak silai mu lo lutin a marphute chu a han zawng kual zung zung a, mahse hmuh tur a awm si lo. A nau hmui duk cher churte chu duat taka chul sakin a kuah vawng vawng a. Mahse intipachang hram hramin midang bawihsawm tur chuan a kal leh ta a. Runthanga erawh silai mu khan a luah a thawi feih chauh a ni a, a luhai tlu mai a lo ni zawk a. A tlukna lamah a tukhum a zu sawh pawp leh bawk nen, thisen a chhuak nasa kher mai. Silai rik hma khan a lu kha lo ti che hlek lo se zawng hmel hmuh tlak pawh a nei tawh hauh lo ang.

 Hrilkunga chu a mal pui ruh tliak avangin kal thei zia zang ni hek lo, a awm hmun atangin a thiante inbei lai chu a lo thlir ringawt mai a ni. Thanhranga chuan a mal pui hliam chu na lo ang maiin a bai kual pui char char a. Chhuanthanga pawh a ban bul ding lam leh a nak kak duai chu hre lo angin midang chu a bawihsawm ve bawk a.

Khatia Pawih ho finkherek chhuahin silai an hmehpuah leh thut takah khan Lusei lam chu sawm thum dawn an tlu hman tlat mai a, an chan tha lai chu chengrang mu chuan a rawn ti chhe chho ta thuai a. Mahse pasaltha ralhrat an ngah zawk miau va, a tawpah hnehna an chang hram a ni. Hliam neite chu mi sawm ruk dawn an lo ni a, a tam zawk chu silai muin a pawi lo lai a den fuh loh avanga che sawn thei si lo va an thiante inbei lai lo thlir ngawt ngawt an ni a. Tlangval za sawm riat zet a hnua Bualthleng lam mite nen zahnih sawm ruk dawnte zingah chuan mi sawm riat vel bak an dam khaw chhuak lo a ni. 

Pawih ho erawh Zapauva tih loh chu an thi vek a. An han en kual a, hliam neite chu dam chhuah ring mah se an hmelma an nih avangin an that zel bawk a. Chutia an han inbuaipui fel meuh chuan an awmna hmun chu a thang ta kher mai. Tlangval thenkhat chu khaw lamah chuan zualkovin an lo han kal a. Runthanga pawh rawn harhin a rawn che ve nghal sawk sawk a, a lu erawh a la hai hle. Lianmawia ruang bula Rengliana lo thu reng a hmuh chuan a va pan vat a. Lianmawia ruang chu a kut a han vawn sak vawng vawng a, sawi tur a haihchham kher mai. Rengliana lah a mittui a sur tawp hlei thei si lo. Runthanga pawh a khap per ve sak sak reng a. An khua te a han ngaihtuah a, Lianmawia nen Rengliana nen an pathum a an tualchaina thinte a han ngaihtuah a, a rilru a na vawng vawng kher mai.

Darchhep tlangval khuaa awmte rawn thlen hnu chuan an vaiin khua chu zawi muangin an pan a, hliamna zual deuhte chu an zawn bawk a. Zapauva erawh Chhuanthanga leh Thanhranga inkarah chuan a kal ve bek bek a. An thiante ruang chu phum sen chi ni hek suh, an lu vun chu hik vekin an ruang chu Pawih ho ruang nen chuan dahkhawmin an hal ta ringawt a. Mittui tla zawih zawih chungin an en a ni. Lianmawia erawh pasaltha anihna avangin a ruang chu an zawn haw dawn a ni. 

Khua an va luh chuan tukthuan ei a hun der tawh mai a, hlim thawm aiin tap thawm hriat tur a tam a. Chhungte chan ve lemlo te pawhin Lianmawia ruang chu an tah bawk a. Lal inah nghatin Lalpa pawh chuan Lianmawia ruang en chung chuan a khap per sak sak bawk a. Rem an han ruat zung zung a, a tukah Zehtet lam pana chhuah nghal ni se, hliam na zual erawh he lamah inenkawl rih mai se an ti ta a ni. 

Lalpa Saithanga chuan, “Ka pasaltha ruang hi a khua thleng ka zui dawn a ni,” a rawn ti ve bawk a, Zapauva chungchang erawh Lalpa let leh vel a relah an ti a ni. A tuk vartianah chuan chhuakin Zehtet lam chu an pan ta. Lalpa Saithanga chuan hma a hruai a, a hnungah an zui dam dam bawk a. Lianmawia ruang zawnna chu Runthanga, Thangkunga, Chhuanthanga leh Thanhrangate chuan an thlah duh hauh lo a ni. Ni hnih hnuah Zehtet khua chu ngui nghiaiin an thleng a, zualko an intirh lawk tawh avangin kawt chhuahah lal leh upate an lo awm thap a. Khua an han luh meuh chuan Zehtet pawh tap thawmin a khat leh ta. Lianmawia ruang chu Chhuahchawnga chuan a kalsan thei lo a ni. "Kal ve ila, i aia thih hi ka hnial lo asin, a va han pawi tak em" a ti rilru vawng vawng a, a khat tawkin a mittui a tla leh thin bawk a. Thasangi inthlahrung taka lalin kawngka bula a ding chu Lalpa Puithanga chuan hmuin, lut turin a han ko a, inthlahrung hauh lo turin a hrilh a. Thanhranga pawh chuan amah vanga thleng anih loh thute a hrilhin a hnem ve mawlh mawlh bawk a. A tukah chuan Bualthleng lam chu Lalpa Saithanga leh Puithanga hoin an pan dawn ta. Thasangi pawh chuan zui ve a duh avangin a hla lem lo bawk a tiin an hruai ve ta a. 

Chhuahchawnga chu Runthanga takngial pawn a be tawng zo lo a ni. Tiau lui an kan a Pawih rama an chettlat ho dante, Thasangi an ruk chhuah zan te, an inneih zan haw a tum lai taka a khuh rite thlengin a ngaihtuah chhuak zel a, a khat tawkin a mittui a rawn luang reng bawk a. Amah vanga thil thleng a ni a, pawi a ti vawng vawng hle mai. Rengliana erawh biak chi ziazang a ni lo tih a mitmeng a phut atang chuan a lang reng a. An chawlh apiangin Lianmawia ruang nam tan deuh tawh chu a lu chawi kangin a mal puiah a nghat a, a sam chu duat takin a chulsak leh thin. 

Leng len ar khuan rual chuan kawt chhuahah an awm ta. Zualko te an tir sa tawh bawk nen, lal leh upate bakah Lianmawia nu leh pate chu lo ding tlarin mipui an lo zi nuai nuai bawk a. Lianmawia ruangin a vangkhua a lawi luh meuh chuan Bualthleng khua chu a ngui ruai mai a. An pasaltha vanglai hmang mek, Tiau chhak lama Lusei pasaltha hmingthang berte zinga mi, (Lusei ram lam aia Tiau lui chhak lam leh Pawihho laka an lo chet tawh dan a nat zawk avangin khi lamah chuan an hming a thang tawh hle kan tih tawh kha) mi tlawmngai leh huaisen an chan chu a na an ti kher mai. Mahse Chhuahchawnga demna thu chhak chhuak an awm loh bakah patlingte chuan an fate chu Lianmawia anga thiante tana nun hlan ngam ni tur chuan an fuih sauh sauh thung a ni. Lianmawia pa, an khaw thir deng pawhin Chhuahchawnga te nupa chu a hnem mawlh mawlh a, inthlahrunna tur a awm loh thute, a fapa thih dan chu a chhuanzia te a sawi mawlh mawlh a. Dawt a sawi lo tih erawh a chiang hle mai. Mahse Chhuahchawnga chuan na a tih em avangin tu amah a be rei peih hek lo. 

A ruang an thlak atanga ni thum a liam leh hnu chuan Runthanga te thianzaho chu Runthanga te leikapuiah chuan an thu thap a, a tu amah inbe lemlo mah se an rilru erawh a inang tlang hle. A tawpah Chhuahchawnga chu rawn tawng chhuakin, "Min dang thei tawh lo vang. Keimah ngei hian hma ka hruai ve tawh tur a ni. Thih a tul anih chuan ka thi hmasa ber ang. Lianmawia pawhin pialralah kawm tur a nei lo lutuk palh ange. Hrilkunga chu han dam fel se la, chet chhuah ka duh a ni. Amaherawh chu in rilruk zawngte a lo ni lo anih chuan keimah ngei hi ka kal anga, ka nupui hringtu pa Hrangthanmunga lu ka lak hma chu ka chawl lo vang" a rawn ti charh charh a. Rengliana chu rawn tawng chhuak ve lehin, "Ka nau thihna hi a thlawn dawn reng reng lo. Mi hrang val rual te kan che chhuak ang chu mawle" a rawn ti ve bawk a. 

Chhuanthanga leh Thanhranga chuan an lo an lo bu nghut nghut a, "Hotu in mamawh ngei ang. Kan pahnih hian min rin lut ve teh u'n" tiin Thanhranga chuan a rawn sawi ve bawk a. Tichuan ro an han rel ta mam mam a. Hrilkunga dam that veleh Dapzeh lam an pan anga, tlangval dang erawh hruai kher tul an ti tawh lo a ni. Rawl ralin an che hmasa phawt anga, a hnuah a tul dan a zirin an che chhuak dawn a ni.

Dapzeh Lalpa Hrangthanmunga chuan a fanu an ruk chhuaksak avanga a thil tih chuan nunna tam tak a suat a, chhungkaw tam tak tahna a thlen ,a a pawi vawng vawng kher mai. Mahse a pawi ber zawk erawh a dawl zawh miah loh tur, Lusei pasaltha rualte thinrimna, an thianpa Lianmawia BUALTHLENG KHAW MAWITU thihna avanga kaih harha awm chu a ni. 

A tukah chuan mikhualte chu an haw ta a, Hrilkunga dam veleh Zehtet leh Bualthleng lamah chanchin an rawn sawi anga, tichuan mi hrangval paruk ni thin, tuna panga ni tate chuan Chhuanthanga leh Thanhranga kaihhruaina hnuaiah an thianpa thihna a mawhphurtu Hrangthanmunga vangkhua chu an lawi lut dawn a ni. He inthahna rapthlak tak a vang hian Lusei ramah chuan Runthanga te thian zaho chu an lar tawh hle mai. Ngaisangtu leh thiktu pawh an tam khawp mai a.

Enge an hmachhawn zel tak ang le? Hrangthanmunga hian a lo chimih vek dawn nge, anni hian Dapzeh khua chu an tluk chhiat tir dawn le?