BUALTHLENG MAWITU BUNG - 50
Thansanga chuan Lalpa Rengliana chu biaiin Damdep khaw lama kal ngei a duh thu chu a sawia kut a thawh dawn loh thu leh Lianmawia khawih tute hmuh ve hrim hrim a duh thute chu a sawia, Lalpa Rengliana pawhin a hrethiam hle, anihna takah chuan Lalpa Rengliana thinlungah hian Damdep ho huatna chu a so bulh bulh mai a ni, a nau Lianmawia thih hlima a tawrh zia te, Chhuahchawnga'n a fapa hmingah Lianmawia a sak avanga fapa ang tak taka a en dan te ngaihtuah chuan a awm lo hran hauh lo. Thansanga kal chu a phal sak ta a, Lalnu Sangzuali chuan "Sangte ka u kha mi lo biak dawn nia, a pawi ka ti hle mai he thil thleng hi, tawhsual te a tawh ve lohna'n veng tlat rawh aw" a rawn ti a. Thansanga kal chhuak chu haw vatin a nau chu a mamawh tur angte a siam tir sawk sawk a, "Ka nu ka u lo haw hunah ka kal thu lo hrilh mai ta che min ngaihtuah suh se, kut ka thawh ve hauh dawn lo a nia a ṭul fe anih loh chuan" a ti a, Pi Ṭialthangi chuan "Kal chu i duh tlat si a maw, Sangte Damdep Lalnu saw a naupan laia ka kianga tap nileng ṭhin nau ang tak taka ka en anih saw theihnghilh reng reng suh ang che" a rawn ti muang ban charh bawka. Thangliani'n amamawh tur ang a siam mek lai chuan Hmingthanga rawn lang hlawlin Thangliani chet danah chuan thil thlen dan a man thiam a ni chek ang chu engmah sawi lo a chhuak leh nghalin Thansanga kawtchhuah a va thlen meuh chuan inpeih ata Hmingthanga lo ding chu a va hmu a, nuih sukin "Kal ve lo turin ka duh che a sin" a han ti a Hmingthanga chuan "I kal chuan ka kal ngei a ngai tihna a ni" a rawn ti ve bawka hnar haw chi ni tawh hek lo an kal dun ta a.
Zehtet Lal inah chuan Chhuahchawnga thinrim chu a ang leh tawn tawn ṭhina pasalṭha insumtheihna nasa tak nei ni lo phei se chu a che chhuak hial tawh ang mahse Lalpa Puithanga thu lo chuan engmah a ti duh hauh lo a ni. Chhuanthanga te thu rawn hawnin indona dar a rawn vuak rik takah chuan a phur surh surh kher mai, a fapa khati taka lo nghaisa tute kha hmuh ngei a kut zal ngeia fam khua lawi tir chu a duhthusam a ni. Lalpa Puithanga ho chuan ral an rel ta mup mup mai le, Chhuanthanga chuan "Lalpa tun tut tutah chuan kan va kal nghal an ring hauhin ka ring lo, inbuatsaihna'n ni enge maw zat hmang tura min rin ngei ka ring, chu vangin naktuk varṭianah chhuak nghal i la, tlangval za kal i la a tawk viauin ka ring a ni" a rawn tih takah chuan a aia ṭha zawk awm hek suh tlangaupa chu tir chhuakin tlangvalte chu a ko khawm a, Chhuanthanga bawk chuan a kal turte thlangin chung tlangval ho chu an mamawh turte la khawm turin in lam an pan sap sap a. Lianmawia an leihka a ding chunga Lal thu chhuak lo ngaithla ve kar tu chuan kal ve a chakin amah nghaisa tute pahnih han hmachhawn nawn leh chu a chak kher mai, mahse, ral ram chu sawi lo an in aṭanga Lal in kal thlen pawh a tan chuan theihloh tluk a la ni tlat bawk si. A pa insiam mek lai chu en karin "Ka pa dawt an sawi tih an Lalin a hriat ka ring hauh lo, inpuan tir a theih chuan a ṭha khawp ang" a han ti a Chhuahchawnga chuan a fapa dara ben thak thak pahin "Ka kutah engkim dah rawh ka fapa, i nu leh i nau hi ṭha takin lo enkawl ang che" tiin a insiam chhunzawm leh mawlh mawlh a.
Damdep Lal inah pawh Lalnu Sangliani leh a fapa tleirawl ve ṭan ik ek tawh Sainguri chu ṭhu dunin leihkapui lama Lal leh upate thu rel chu an lo ngaithla ru ve kar bawka. Sainguri chuan "Ka nu ka u a a kal ve angem?" a han tia Sangliani chuan "A kal ve ngei ka ring" tiin a fapa Ramliana a ngaihtuahna chu a hmelah hlauhthawnna hmangin a lang chhuak hial a ni. Lal leh upate leh pasalṭha te thu rel chu an zo fel ta, Zehtet lam ho rin dan ang chiahin Zehtet ho chuan inbuatsaihna'n ni thum tal an hman an rin avangin ni hnih inbuatsaihna'n hman phawta a ni thum naa chhuah chu an rêl ve bawka, a tlem zawk an nih dawn avangin va lan hmasak chu an tum a mahse fimkhur thu hlaah ralven buk thawm ṭhat zaite an rela ralveng pawh an indah nghal bawk a. A tukah chuan rammu tur ho chuan zen te phoin thirdengpa pawhin silai mu a deng ri tlut tlut reng bawka, a ṭhen in an chempui te tat hriamin hnehna chan ngei tumin an bei nasa hle, chhun chawfak hunlai vel chuan tlangval pahnih Lal inlam pana an kal mek an hmuh chuan an han en chianga Thansanga an hmuh chuan mak an ti tlang kher mai, an inringru nghal ṭhap bawka Thansanga leh Hmingthanga chuan Damdep tlangval ho chu kal pel zelin Lal in thlen hmaa Pasalṭha Roliana leh Lianneka lo ding dun chu Thansanga chuan va hmu fuh chatin a pan din nghal nal nala, an zawnah chuan ding datin a han en vang vanga, Lianmawia khawihtute an nih chu a ring nghal hmiah bawk. Za lo takin a han nuih saka Lal inlam a pan san leh ta a, Hmingthanga pawh chuan zui lut ve nghalin Lalpa Ngurthana'n Thansanga hmel a hmu chu mak a ti hle mai "Pasalṭha Thansangate lah ni rengin, enge he lai thleng thlenga inrawn kal chhan hi le?" a han ti a Thansanga chuan "Lalpa eng ni lo ve, kan naua chunga thil thlengah hian a ṭha zawnga thil sawi fel dan a awm lawmni tiin kan rawn kal ve rawih anih hi, Zehtet Lalpa tirh pawh kan ni chuang lo a, zin khawthawn pahin kan rawn tei phei ve a ni e." a han ti a, Lianmawia te chungchang an han sawi chuan Thansanga chuan Lalpa Ngurthana hian a pasalṭha te pahnih chu a ring tawk ve hle tih a hrethiama, a chhan tlat pawh hi awm a tih pui viau, a thinrim zawnga engmah sawi pui duh loin ṭha takin a be zela an khaw lam chanchinte chu hrilhin an titi ho dar dara. Lalpa Ngurthana'n an ral rel dan a han sawi thawi rual chuan Thansanga chu a nuih a za ru kher mai, Zehtet khua an chet khalh theih rinna a neih loh bakah Zehtet ho chu an rawn hnai hle tawh zawkin a ring a. A ring dik reng bawk, Zehtet tlangval za rual zet chuan Damdep khaw ram chin chu an thleng tawh reng a, zanlaia khua beih tumin an inbuatsaihna sa tawh hle.
Zanriah kil zawh lamah chuan Thansangate pahnih chu Lal fanu kiangah chuan ṭhuin an titi ho ve nak nak a, Thansangate chuan chu Lal fanu la naupang tak mai chu a puitling an ti rilruin an ngaisang dun hle. An khaw boruak an sawi luh lai chuan Lalfanu Sainguri hmelah chuan hlauhna nasa tak a rawn lang chhuaka "U Sangte kei chuan U Lianneka te hian ka pa hi dawt an hrilh anih ka ring tlat, ka pa hian a ring bawk si a, a buaithlak anih hi" a rawn ti chhuak phawnga Thansanga chuan "E dawt sawitu chu a rawn lang chhuak thuai ang, tunah chuan thudik sawi tu zawk hriat a la har deuh anih hi, i pa pawh hian a pasalṭha te hi ring tur a ni reng a ni" tiin a rawn chhang ve bawk a. Thansanga chu zawlbuk lamah kalin Lal fapa Ramliana a hmuh velah chuan kheuh falin "Ramte rammutnaa kal rual i ni ve der tawh a, tunah pawh hian i kal ngeiin ka ring, ka chah duh che chu Pasalṭha Chhuahchawnga, Thangkunga leh Kapthangate hel hram hram zel ang che" tiin a hrilh a.
Thansanga chuan chu zan chu Lal ina riah ṭha a ti zawk tlat maia, a chhan pawh khua an thlen hlim a ṭanga hlauthawng ngaihṭha lo reng renga a awm reng vang a ni. Leng hawn ar a khuan takah chuan khaw chhunga thawm awn te pawh zawi zawiin a tlem tial tial a, zanlai ar khuan anih meuj chuan ar khuang ri bak thawmdang hriat tur a vang tawh kher mai Thansanga erawh nghate rep ang kar a la ni a, a rilru ngaihtuahna kawmin Zehtet ho chet dan tur a suangtuah lai tak chuan Zawlbuk lamah silai a puak ta zawt zawt mai. Thansanga leh Hmingthanga chu inperh tho atin khumpui lama Lalpa leh Lalnu chu Hmingthanga chuan a va hruai chhuak sawk sawk a Thansanga chuan Lalfanu chu kaiin "Lalpa hetah kan lo awm ange, i nupui leh i fanu hi hruai chhuak rawh" a han ti a Lalpa Ngurthana chuan "Ni lo e ka khua leh tuite tawrhna tawrhpui turin hetah hian ka awm dawn e, ka nupui leh ka fanu erawh lo va hruai chhuak u la, ka fapa Ramtea lo haw hun ka nghak ange" tiin a ṭhu thak mai a. Thansanga chuan "Hminga lo va hruai chhuak mai ta che, kan Lalnu'n a laizawnnu veng tur hian min duh a ni, lo va hruai mai ta che, Lalnu kal rawh u le, Saite Hminga kha zui rawh u le" tiin a nam chhuak rawk rawk a.
An chhuah fel hnu lawkah chuan Pasalṭha Roliana chu rawn lutin "Lalpa kan tlangvalte mu lai an rawn that hman nuala kan chan a chhe tlat" tih pahin Thansanga chu a en zawka "Bualthleng khaw ho hian tih tur in nei ve lo tih i lo hre dawn nia" a han ti vawt raih a, Thansanga chuan engah mah ngai loin "Lalpa Lal in an rawn luh hunah hian engmah ka tih a thiang lo a, chu vangin an kutah ka hlan mai che a ngai ang. Lalpa i pasalṭha te bumin i awm tih hi Zehtet pasalṭha ho hian an hmuh tir dawn che a ni" tiin Roliana chu ngeiawm takin a nuih saka , Leikapui lamah kal chhuakin Damdep tlangval ho Zehtet tlangvalte'n an bawh mek chu a en vang vang a, khua an hal sak lo chu a lawm rilru hle. Damdep tlangval ho chu an rawn tawlh chho zela, lal tual an thlen chuan an inpe ta nge nge a. Tlangval ho chuan khaw mipui ho chu an rawn khalhkhawm a, zan thim a ni bawk nen Kapthanga chuan meichher pakhat chu la lawkin Zawlbuk chu a hal ta hluah maia Lal tual chu a lang chiang ta kher mai.
Thangkunga chuan Lianneka chu ṭham kang lawpin "Nang nen sawi fel tur kan nei e" tih pahin a nam her sawka, chempui phawrhin a veh ta nghal a. Lianneka pawhin a chet ve ngei a ngai tih inhriaiin a chempui chu chharin a veh ve ta a. Thangkunga ṭuan fum tawh che sual zeuh lai chu nangfuhin Lianneka chuan a hnungzang chu a tai kak sak ta hlawih mai, Lianneka chu a phur ta hle bawka, a chak ngei ringin a hma aia phur zawkin a han veha, a zuang pah thauh thauh bawka. "Pasalṭha ropui Thangkunga chu a aia ropui Lianneka hmaah a tlawm dawn a ni" tiin a han chhaih a, Thangkunga chuan "Rawlthar mai mai pawh mahnia hmachhawn ngam lo pawnfen feng tlak pasalṭha lakah ka tlawm ngai lo ang" a han ti ve saka, chu tia Lianmawia an beih rawn tih khaw mipuite hmaa Thangkunga'n a rawn sawi chhuak chu a haw hle mai, "I lu ka la dawn khawp" tih pahin a tlan phut a, Thangkunga pawh rawn tlan ve nghalin an inkarah hlam hnih bak a awm tawh lo ang tihah Lianneka chu a zuang kang zawka Thangkunga pawh a hma zawnga lum pahin a chem chu a vai chhuak nghal puat a, Lianneka chuan a malpui kak hlawh chu hupin a ding sai hlak hlak a, ding ngil turin a theihna in a tlin thlawt lo a ni ber. Thangkunga chuan hnaih phei leh nghal thutin a chem chu a han lek kanga Lianneka'n dan tuma a chem a lo lekkan ve lai tak chuan tawp thutin a kut veilam zawk chuan Lianneka hnar ruh ri rawp khawpin a'n hnek mai zawng Lianneka chu hnar thi zawih zawih chungin a thal der mai a nikhaw hre loin a awm chhunzawm nghal bawka. Thangkunga chuan "Nep lutuk" tih pahin a kal kiang sana, a dinna lam a pan mek lai tak chuan silai lo puak ṭhuaiin Thangkunga chu a ding dawta, zawi muanga ṭhingṭhiin leiah chuan a bawk thlawpa. Pasalṭha Roliana a silai keng chunga Lal in leihkaa lo ding reng chu Chhuahchawnga chuan a pan chho nghal a, Roliana pawh a chempui nen Lal tualah chuan rawm ṭum thla chhakin Chhuahchawnga lo tlan mek chu a lo nghaka. Chhuahchawnga chuan hnaih phei zelin a thlen dawn hnaihah chuan a chempui chu a kut veilama la thutin Roliana rin lohna lam pang aṭangin a nakah a chempui an thun lut pawk mai zawng Roliana chu khur zawih zawih chungin a ṭhingṭhi rawpa, Chhuahchawnga chuan "Ka fapa leh ka unaupa phuba" tih pahin a nghawng chu bung lek lek khawpin a sat nghal sawk maia. Lianneka nikhaw hre lo rawn harh leh mek lam chu panin a ring chu a kuai dak nghal awrh a, "Duh tawk rawh" rawn ti tuartu lam chu hawiin Lalpa Ngurthana leh Thansanga lo dingdun chu hmuin a nuih saka "Ka fapa leh ka unaupa chunga thil thleng hi ka pawmzam mai maiin i ring a maw? I thuneihna hmanga mi dan i tum a maw? Lal mawl tak i ni" tih pahin sah a han tuma, mah se, "Thu dik ka hre duh a ni" Lalpa Ngurthana'n a rawn tih leh takah chuan Lianneka chu ṭham kang lawpin "Sawi ta che" a han ti leh hrawka Lianneka hlau chuan thil thlen dan zawng zawng chu a hrilh ta vek maia. Lalpa Ngurthana chuan "I Lal i bum ngam a maw?" a han ti a Lianneka inchhir chu Roliana ruang en chung chuan a kun tlawk tlawk maia. Chhuahchawnga'n a rawn pawh dak awrh ruala chem rawn thlawk chu a thil hmuh tawp ber a ni ta.
Thangkunga lam chu pan hlawk hlawkin tlangval hoin an lo bawr laih laih chu a vin nghal tuar tuar a, Kapthanga'n "U Chawng silai mu hi a darah a tanga, kan lak chhuah vat a ngai a ni, a la thaw e" a rawn tih rual chuan "Lal in lamah hmanhmawh rawh u" tiin Thangkunga lu chu a dawm nghala. Lal inchhungah chuan zawn lutin Thangkunga hliam chu bawlpu koin an enkawl tir nghala, Chhuahchawnga chuan Thangkunga kianga awm chu duh hle mah se, tlangval hoin an ngaichang ṭhup tih a hriat miau avangin pawn lamah a chhuak a "Khaw mipui inhmuh ang angte kha rawn hruai khawm u la, Lal fapa Kapthanga hoin tukṭhuan eikhamah kan khaw lamah in hruai haw vek ang, kan Lalpa'n sal ni tura a duh anih chuan kan sal an ni anga, a ngaidam anih erawh chuan an khuaah bawk hian kan let tir leh ang. Khua hi tumahin hal loh tur, Thangkunga dam hunah kan lo haw ve nghal ang, chu mi hmain ruang zawng zawng hi senghawi hna kan thawk hmasa phawt ang"a rawn ti a, Damdep khaw ho chu an mang a angin a ṭhen te phei chu an ṭap hawm hawm bawka, an fapa, an unaupa, an pate an chana chutachhapaha an ni leh zel sal ni thei dinhmunah an ding mek bawk si, Zehtet Lalpa hi Lal sual tak a lo nih hlauh phei chuan an chhawr hlum ṭhak dawn tih chiang takin an hre bawk nen an lungngai hlawm kher mai.
Thansanga chuan Chhuahchawnga rorel dan chu ṭha ti lem lo mahse amah hi hotupa dinhmuna ding ni ta se a tih ve tho a rin avangin Hmingthanga te zawngin khawdai lam a pan vata, an han inhmuha chanchin a han hrilh chuan Lalnu Sangliani leh a fanu Sainguri chu an ṭap nghal pura Thansanga chuan an Lalpain a hruai haw nghal a rinthu a hnemin khaw lamah a chhawm lut a. Lal fapa Ramliana'n a nu leh a nau a hmu leh chu kuah thlawpin nute hmaah chuan tlangval pawh insum a lo har a ni ange, an khaw tlangval nunna chan tamtakte thihna chu Lalfapa, hotu ena an en te zinga mi anih ve avang chuan mawh inphurhtirna chen a nei nasa em em a, hrehawm a ti hle. Chhuahchawnga chuan "Sangte in lo awm hlauh chu a tihzia hle mai, Lal nu mawlh kha mi ti hlauthawng tu a ni a, kan kut a tuar anih vaih chuan in Lalpa Rengliana ka hmu ngam tawh dawn der si lo a, ti hian Kapthanga rualin haw u la, Lal chhungkua hi nangni hian min chhawm sak ta che u"a rawn ti a Thansanga chuan a lu lo bu nghut nghutin Thangkunga lam chu a va pan a, Thangkunga rawn meng diar diarin Thansanga a hmuh chuan nuih sakin, ngaihtuah awm a ni lo tih lan tirna'n a ban a han la kang zeuh a, Thansanga pawh chuan nuih let sakin haw turte zingah chuan a inbuatsaih ve ta zawk a.
Lalpa Rengliana'n Lal chhungkua thlenga an rawn hruai haw thu a hriat rual rual chuan Chawiliana koh tir nghalin Zehtet lamah chuan Runthanga te nen an phei nghal chuk chuk a, Thansanga leh Hmingthanga erawh khaw lamah lo awm hahchawl turin a ti ve thung a. Lalpa Puithanga chuan Damdep Lal chhungkua chu ṭha takin a dawngsawnga a inah a dah a, mipui ho erawh Lal tualah an thlung khawm thunga. Chhuahchawnga te ber an la rawn haw miau loh avangin ro rel dan thiam a har a ti a, chu vangin lo nghah rih phawt a duh a. An mimante chu phiar reng chi ni bik hek suh tlangval ho chu rip lian tawk sak siam tirin chutah chuan an khung khawm ta vek a. Zan lamah chuan Lalpa Puithanga chuan Lalpa Ngurthana chu titipui a tum a, mahse Ngurthana erawh buma a awm avanga a tawrhna te a nasat em avangin biak ṭawng a har hle mai, "Lalpa min hrethiam la, ka pa awm loh hnua inrûn ka vawi khat hmachhawnna a ni a, dawta bum ka nih vangin. Ka tuar thiam lo em a ni" a ti ta tawpa Lal Puithanga pawhin hrethiam vekin a nupui leh a fanu ni bawk a mo ni bawk Zikpuii chu koin an mutna tur siam sak turin a ti ta a.
Lalpa Rengliana te hmel chu Lal Puithanga lo rin lawk ang ngeiin an hmu ta a, Lalnu Sangliani pawh a makpa hmel a hmuh takah chuan a hahdam huai nghe nghe. Lal Rengliana chuan "Lalpa i thuhnuaia awm ni mahse Lal chhungkua tal hi chu hruai haw min phal sak ta che, an man a tan chuan eng pawh ka neih zawng anih phawt chuan ka pe ang che" a han ti a Lalpa Puithanga chuan "Ekhai Renga tawhsual an tawh palh ka hlauh vanga he lama awm tir ka ni alawm, kan kut te hi tuar palh ta se, i nupui kan hmu ngam tawh nang, chu bakah kei ngat phei chuan pialrala min nghak rengtu ka ṭhian Dohranga leh Saithanga te ka hmu ngam dawn lo asin, a man atan engmah a ngai lo, ti khan hruai haw la, hlim takin va awm tir rawh, mipuite erawh i unaupa Chawnga leh Thangkunga rawn haw hma chu ka chhuah thei lo a ni infapa Lianmawia vanga he thil hi thleng a ni si a, thutlukna siam mai ka duh lo a ni"tiin a pasalṭha chhuanvawr ni kum hlun ṭhin pahnihte chu an kum lamin a uai rih ṭan tawh hnuah pawh a la dah pawimawh zia a ti lang a, Lalpa Rengliana chuan lawm thu te hrilhin zu te an han khawn dun te te a, a chhan chu Chawiliana tan hun an pek duh vang a ni.
Zochawisangi muhil chu Chawiliana chuan hmuhnawm ti takin a en renga, Zikpuii chuan "U Chawi hawn tawh lo mah la ka pawi ti hauh lo a nia, kei aia hmangaihtu an awmin ka ring bîk lo" a han ti a Chawiliana pawhin dik a ti viau mai, han chhawn chhaih chu chak hle mah se, a mutthilh lai taka kal an nih avangin ti harh duh loin a muhil lai chu a thlir reng ringawta. Lal Rengliana'n kal chhuah a rawt takah chuan Lal in chu an chhuahsan ta a, Chhuahchawnga te in an kal pelh dawn lai taka "Ka pa" rawn ti tu Lianmawia rawn bai chhuak auh auh chu Lal Rengliana chuan a lo nghaka "Ka fapa in dim i la mamawh hle anih kha" a han ti a Lianmawia chuan "Ka pa dam vat dan hi a awm lo e maw ni le" tiin a han nui suk suk a, "Ka dam velah ka lo zin dawn a nia" a rawn tih chuan Lalpa Rengliana chuan "Teh reng mai i nau Doliana leh Vanthangpuii te pawh i rawn hmu ve ang chu, i u Liansanga leh Dammawia te nupuite pawhin nau an nei har tawh hauh lo ang" a han ti a, an inmangṭha fel hnu chuan an kal ta a.
Lalpa Rengliana leh Lianmawia inbiak laia a nuṭapa buan vuana a phena lo ding reng Lal fanu Sainguri hawi chhuakin amah lo en ve chiah chu Lianmawia hmel a hmu chu, a hriat ngai loh leh tawn ngai hauh loh a taksaah a tawng ta tlat. A lungphu chu a ri dup dup a, a zak chem chem bawk a, inbeihna avanga a hmai pan khir nei nuai kara a hmel pa tak leh,a hringtu Pawih Lal fanu hmelṭha Ṭhasangi hnen aṭanga a chhawm hmelṭhatna chu Sainguri chuan theihnghilh harsa a ti hle. Lianmawia pawh a ni ve chiah tho mai, Sainguri mimeng fim kak leh a hnar ngul sang vah te, a heh sen no chek mai te, a bahsam sei mawi tak, a kawng vaw hnap te a mawng bawr lian si lo te si lo a ria lam chi duhte tana mawi tawk em em mai te leh, a mal aṭanga a ke rek thleng zuih zen thla zaih mai te chu a mitthlaah a cham nghal vek thei tlat. A lai lutuk chu kal kian tumin a han pen pawka, pen chhunzawm thei loin a tlu nghal thlawrh a, a nu Ṭhasangi hlauthawng taka rawn tlan chhuak chu nuih sakin a mal kak rawn thi ṭuam ṭuam chu a melh zawka, hmei a kara chhiate vanga tawrh na hi a lo va han nasa ṭhin tak em.
khamawm loh țhin ve
ReplyDeleteA ngaihnawm e
ReplyDeleteChhiar zawmnleh vat teh ang
ReplyDeleteChhiar zawm leh vat teh ang
ReplyDelete