BUALTHLENG MAWITU BUNG - 3

 Bualthleng khua chu ni dang ang bawkin naupang tual chai ri te vawk rilṭam ngek rawng rawng thawmte leh nula ho buh deng ri chuan a khat leh tawh a, thirdengpa pawh a awl lo a ni tih hriat zetin a rawn ri leh pawp ṭhin. Pûmah pa hoin pui pahin titi an vawrh a, vanglai chanchin sepin an hlim hle mai. Chutih lai mek chuan lalinah pawh Lal Dohranga leh a khawnbawl upate chu titi in, eng eng emaw an sawi nak nak a, Lalnu Chhingpuii leh lalfanu Sangzuali chuan ei an lo rel ve mawp mawp bawk a. Lalpa chuan, "Hranga pa, enge kan dinhmun ni dawn le, kan ram bawh lah a ṭhain buh pawh a ṭha viau turah ka ngai ringawt a, 'kham khawp thar lo kan awm lo ang chu' ka lo ti deuhva" a han ti a, Thangranga pa pawh chuan, "E, Lalpa i khua leh tuite hian Lal ṭha tak an nei che a, khamkhawp chu kan thar vek turah ka ngai. Pachhe zual deuh an awm anih paw'n nangin fel takin i khai chhuak leh ang a, khaw inkungrual kan nihna hi kan chhawmnung zel ang chu le" tih pahin lalnu tuibur al chu an hmuam vei parh bawk a, Lalpa chuan, "Ekhai khai! Nangni ka upa te tello hian hetiang tihna chang hi ka hre ngai dawn hauh lo zu nia, khatin keimahah vek burbun reng reng suh u, kan vaia tih a ni. Mite reu reu vin an hre palh ang a, a hming mai mai a khawnbawl upa an ti palh che u. Roreltute kan nih angin kan thu chhuak hi kan vaia rel tia sawi tur kan ni ngai e" a ti charh charh bawk a.

Hun leh ni a liam a, buh seng hun a thlen meuh chuan chhungtinte an hlim kher mai. Khamkhawp aia tam thar vek turah an inngai a, nula leh tlangvalte'n seng zawh thuai thuai a, awllen laia hun nuam tak hman an chak tawh a, an ṭang em em vek mai a ni. An thawhrim rah an seng dawn avangin tumah peih lo hmelpu awm lovin an phur em em a, zau hla deuh a mite phei chu an riak lut a, leido nei lo an nih avangin hlauhthawnna an nei lem lo hle.

Thanhranga te nupa pawh an ṭang kher mai. Kum hmasa lama an seng, an la ei loh zawng zawngte nena dah chuan kum thum vel lai daih tur an seng theih an ring a, Pu Zangaia te'n lo an la neih ve loh avangin Pu Zangaia fanu naupang ber leh a dawttu Niliani leh Biakliani te chu an lo vah an hruai ṭhin a, an ute pathum erawh chu lo dangah an kal ṭhin thung. Chutianga mipanga laiin inhlawh a midang buhseng an puih takah chuan lal buhzem a mi pawh rei tak zen loin an awmthei dawn tih an hria a. Amaherawhchu lo an la neih ve miau loh avangin khamkhawp an lalut ve thei ṭawk mai thei a ni. Pu Zangaia rilruah erawh Zehtet khuaa buh an thar tam ṭhinzia te, mi te pawhin an awh ve ṭhinzia te a fanu te panga to ṭhin ziate a ngaihtuah a, tunah chuan a upa lam pali phei chu pasal nei rual vek an lo ni ve ta. A upa lam pathum hi a kum zawn vekin an piang a, a naupang pahnih erawh an inkarah kum khat a tla thung. Liansanga leh a u chiah hi kum sarih laiin an inthlau a ni.

Zehtet lalfapa khan Liansanga u chiah Niliani hi a ngaizawng tlat mai a, ani tlangval chapo lutuk chu a lo duh bik si lo. Chuta karah Niliani nise, tleirawl mai a la ni bawk nen, mipa ṭha tak lakah pawh Pu Zangaiate chuan kal tir phal lo vin a upat hun la nghah an duh zawk ang tih tur chauh a la ni bawk si nen. Lalpa meuhin a ngenna Pu Zangaian a hnawl takah chuan khua aṭangin hnawhchhuah an ni ta a nih kha.

Tlai lam losul haw hun a lo nih chuan lungdawhah naupang infiam ri nak nak thawm a awm a, rawlthar leh tleirawl rualte lah inbe zak deuh si inbe chak si in an lo tei kual an lo tei kual ve bawk a. Liansanga leh Thansanga te thingpu pawh an rawn chawl ve bawk ta bawk a. Tichuan an chhungte lo haw hun chu nghakhlel takin an thlir a. Nakinah chuan haw hmasa lam te pawh lo langin an fate chu an lo rak chel chul a. An rawn kal zel a, thim hma deuh vin Thansanga chhungte pawh an lo lang ve ta a. Tichuan hlim taka inzui hawin Thansanga chuan lova kal ve a chak tawh thute chu a pa bulah chuan a lo sawi char char bawk a.

Zanriah an han ei kham hnu chuan Thanhranga leh Pu Chawnghranga chuan Thansanga chu thuṭha tinreng an fah a, aia upa zah tur, rukruk hmang nih loh tur, khawi lo vah chhuah niah hlauhawm a lo thlenin chhan ngai nih loh tur, ṭhiante chhan tu nih zawk tur tihthute chu an fah char char a. Thansanga pawhin ngun taka ngaithlain a rilru chuan zawm a tum nghet em em bawk a.

Chhawrthla pui pawh van lai zawlah a lo eng paw leh pheu bawk a, arsi te pawh lo langin an de neuh neuh bawk a. Liansanga pawhin Thansanga te ina luh pahin a va hruai chhuak a, tichuan naupang dang ho awmna lamah chuan an va kal ve ta a. Chutia hlim taka an inkawm khawm lai chuan mipa naupang rual khat hi an lam panin chak takin an rawn tlan chho va. Thansanga te bul an thlen chuan an hah lutuk hi an thaw hlawi hlawi mai a, an zinga pakhat chuan, "Sakei in Danmawia a la" thaw hlawi hlawi pahin a rawn ti ṭawk a, chu veleh Liansanga te pahnih chu rang takin mipa naupang rual lo kalna lamah chuan an va tlan a, kawtchhuah an va thlen pawh chuan engmah an la hmu lo. Mahse an kal lui zel a, an khaw dai se tlatna mual an va chuang chhuak ta. Inring taka an kal lai chuan an piah deuhah thil ri sun sun an hre ta.

Thla eng hnuaia an va en chuan keipui pakhat hian Danmawia chu a lo ṭhutbet run mai a, a rum chhur chhur bawk a. Thansanga te lahin hriam engmah an keng si lo tihngaihna hre lo chu an en tlawk tlawk ringawt a. Danmawia chu a la damtih hriat takin a la thaw tih a dul awm danah a lang bawk a. Thansanga tihngaihna hre lo chuan pen hnaih pahin,"Khawngaihin kan naua kha min pe let rawh" tih pahin Danmawia chu va ban a tum a, chu keipui lah chuan a lo phal bik si lo. A lo rum chhur chhur mai a, Danmawia bulah chuan a tei kual theuh theuh mai a. Thansanga kal hnai leh chu a hmuh veleh thinrim taka inhrosa chungin a awp hniam ta ruai ruai a, Thansanga chuan, "Liana, tawlhhnung rawh" tih pahin chu keipui zuan rual chuan a hma lamah a lum ve ta thung a, keipui zuang chuan a tua mah a zuan fuh loh bakah lei a thlen rualin a mit veilam chuan Liansanga kuttum a dawng chiang kher mai. Ben a tum lahin a lo awmsawn leh hman tawh si.

Thansanga lahin khatia keipui rawn zuang hnuaia a lum luh hnu khan a dinchhuah rualin keipui mei chu a vuan chat bawk a. Mahse chu keipui chu a chiai rei tlat lo. A meia pawttu chu benthlak tumin a rawn inher a, mahse a hawisawn a piangin Liansanga chuan a lo vaw leh pawp pawp ṭhin bawk si. Mahse rei an inchai thei dawn lo tih chu a lang chiang khawp mai. Anni naupang mai tan chuan sakei beih chu a har deuh hlek chu a ni e.

Mahse tlangvalte thawm a rawn lang ta, Thansanga pa in chutia a fapain keipui meia a chaih lai leh Liansanga'n a rem lai laia a lo vaw zawt zawt lai thla eng hnuaia a va hmuh chuan lawm bawk si, hlauthawng bawk si chu a silai chuan a han tin a, midang pawh chuan an lo tin ve bawk a. Mahse an naute kah palh an hlau si. Chutah Val upa Ruma chuan a chempui phawrh chhuakin, "Kan fate nun chhan nan" tih pahin keipui leh Thansanga te lamah chuan a tlan phei ve ta. Midang pawh chuan silai dahin chempui leh fei nen an va bawh ve ta bawk a.

Chutia tlangval sawmhnih rualin kut an han thlak takah chuan keipui pawh chu a zal der mai a ni. Thanhranga chu rang takin a fate lamah chuan a va phei vat a, Liansanga awm thisung leh a fapa ban bul dinglam kak a va hmuh chuan a thinrim ta hle mai a, "Vawikhat mah sakei bei turin ka thu lo vin kal tawh suh ang che u, nunna hi a hlu tih hriat tur" a han ti a. Thansanga te chuan ngawi rengin hnuai lam an bih ngur ngur bawka.

Thanhranga erawh chuan a ruk takin a fapa te chu a chhuang kher mai. Sapui meia chaih ngam an nih bakah hriam keng lo vin an bei a, an nunna pawh an chan lek lek hial a ni. Tlangvalte'n hlang an han siam a, sakei chu an zawn ta. Danmawia pawh a ṭhenin an lo zawn ve bawk a. Khawchhung lam pan chuan a ri hulh hulh mai a ni. Lalmualah sakei chu an han nghat ri dup bawk a, chutah khawnbawl upate chu leihkapuiah chuan an rawn inzui chhuak dam dam a, a hnuhnung berah lal chhungkua an lo chhuak bawk a. Lalpa chuan, "Zanin zet chu a va ropui em!! Kan tlangvalten min hum leh ta, he khaw tana kan beihna hi a thlawn ngai dawn lo va, intuchhuan lo awm zel turte tan he khua hi kan din a ni tih hre rengin, theihtawp chhuah zel turin ka ngen a che u. Tunah sapui inbeihdan chanchin sawi turin Pasalṭha Thanhranga ka sawm e" a han ti bawk a.

Zawi muanga leihkapui a chuan kai hnu chuan sakei an beihdan chu a sawi ta a, mahse a fate chanchin erawh a sawi duh lo thung. Valupa Ruma chu hriam nena kutthlak hmasa tu anih avangin leh tlangvalte chempui nena bei tura cho chhuak tu anih angin, Valupa Ruma chu a fak char char bawk a. A sawi zawh hnu chuan mipuiin kut an lo beng dur dur bawk a. Lalpa chuan Valupa Ruma lam hawi pah chuan "Tunah kan val upa Ruma kha lo chhuak se ka nopuiin a nghak e" a han ti a.

Valupa Ruma pawh chu a rawn chho ve mai bawk a, mahse Lalpa nopui dawm mai lo chuan mipuite chu bengchheng lo turin an kut an phar chhuak a. Tichuan, "He chawimawina nopui hi ka phu lo va, kei aia phu an awm a ni. Chumite chu kan naupang huaisen, thingthu nung pawh Darchhep nena kan inrina thleng rawk a va dah ngamtu kan Pasalṭha, Thanhranga fapa Thansanga leh Pasalṭha Zangaia fapa Liansanga te an ni e" a han tih chuan mipui chu mak ti takin an ka hau bawk a. Val upa Ruma chuan sakei an lo va beih dante chu chipchiar takin a sawi ta vek a. Mipui makti chu an ri mur mur a, awih loh dawnin a hmutu in a sawi chiang bawk si a, Liansanga leh Thansangate ṭhian dun zawlbuk thingnawi fawm rual lekin a sapui an lo va bei ngam te, a meia an chaih ngamte chu mak ti takin an awm a.

Lalpa Dohranga chuan a kut rawn ohar chhuakin mipui ri mur mur chu a zap dai a, "Khawnge kan khawdaingul lo la ni mai tur te chu an awm a?" a han ti a mipuite chu an reh ṭhiap a, an hawi kuala an hmu zo bawk si lo. A tawpah Val upa Ruma chuan, "Lalpa hliam tenau deuh an nei ve a, an haw ta mai anih ka ring" a rawn ti a. Chu veleh Lalpa Dohranga chuan, "Naktukah tumah ram chhuah emaw zin chhuah loh tur a ni. He sakei kan thah lawmna ruai kan ṭheh ang. Ka sechal ngei hi kan vawthlu tur a ni" a rawn ti ta a, mipuite chu lawm avangin an au dur dur a, upa te chuan an ran an phal ang tawk tawkin an rawn do ve tliar tliar bawk a.

A tukah chuan nilengin lal mualah nula tlangvalte an lam mup mup a, Liansanga pawh a awm tuam chungin, Thansanga pawh a ban bul tuam chungin, Dammawia pawh bai auh auh chung leh a awm vel tuam bur chungin a lo kal ve bawk a. Khatia lungdawh lama tlai lama an ipte theihnghilh la tura an kal kha sakei chuan kawng chhak lam aṭangin a lo zuan thlu tawp mai a, a theih angin insaseng tum mah se sakei chuan a keah chuan rawn sehin a hnuk ta char char a. Kha tia Thansanga ten an va hmuh lai khan seh hlum duh lawk si loin a lo chhaih kual mek a, a awm velah pawh a lo ham sak hman nual a ni. Tlai lamah khaw nawtin hlim takin ruai an kil a, zan lamah pawh engdang tih zai rel lo vin, nula tlangval te chu lalmualah an chai a lo inkheuh fal tawk pawh an awm nuk reng a.

Lalna thlang lova Zehtet khua aṭanga amah vanga an chhungkua an pemna chhan tih hre lo lekin Liansanga u Niliani pawh pasalṭha tuaitir Runthanga nen tuikhur lamah an inzui thla hna hna bawk a. Rei tawk fang an awm hnu chuan hlim hmel taka rawn chho lehin mi zingah mi mit ti kham lo tawk a awmin hlim takin an su ve ta hluau hluau a. Khuan hmasa thleng rawk an chai hnu chuan an ṭin ve ta. Liansanga te inah chuan lutin midang chu an lo awm kim ṭhap tawh a. Pu Zangaia chuan, "Kan pasalthate pahnih chu nuam inti em?" a han tih chuan rang takin Thansanga chuan, "Tuikhur lama kal pui tur pawh kan nei ve lo a, nuam ka ti chiah lo" tih pahin Niliani chu a melh zauh va. Liansanga lahin, "Ni e, a mipa kha ni ta ngat ila chu ka kuah ve ngam khawp ang mawle. Zanin a mi kha chu a mipa zawkin sawi tur pawh a hre lo va, a hmeichhia zawk khan 'U Run' tiin a biak hmasak nghe nghe kha mawle" a ti ve nghal zat a.

Chutah a pa lam a va hawi leh chuan an thil sawi pawizia a hre ta. Pu Zangaia chuan rum taka Niliani melh pah chuan aw nem thlap si, a phena mi dip na tak si chuan, "Chemte, i naute'n an hmu hlauh che chu ka va lawm em, inchesual lo a ni tih hre chiang tu an awm a, a tih zia hle mai. Tun chinah chuan a fala mipa nena awm hi sim hmak ang che. Thing phurh ni khuaah te pawh inveng tlat la, zawlpuan an phah pui theih tur khawpa derdep i nih chuan i pa hi mi hmangaih lovin engah mah min ngai lo angah ka ngai ang" a han ti a. Niliani pawh chuan, "Ka pa, ka tihpalh a ni, i thusawi chu ka zawm tlat tawh ang" tih pahin hnuai lam bihin a kun ta ngur ngur a, a pa lahin engmah sawi chhunzawm tawh si lo an reh ṭhiap ta mai a. Thansanga zak bawk si chu haw maite a duh rum rum a, mahse Pu Zangaia thinrim chu a hlau ve bawk si. Haw hreh si, chhuak ngam si lo chuan Liansanga phenah chuan a ding ta reng ringawt a, Pu Zangaia nupui Pi Rithangi chuan lo hrethiam vatin, "Thante, ṭhu ta che u. Kha tia din reng tur a ni ngai hleinem"a rawn tih takah chuan a thawveng huai a, an han ṭhut hnu rei vak loah chuan eng engemaw an sawi tak zeuh zeuhah chuan hlim takin an ti ti thei ta a.

Bualthleng khuaah chuan mitin titi ah Thansanga leh Liansanga hming a lang reng mai a, huaisen an tiin tluklo an inti hlawm hle mai. An hliam a dam hnu rei vak loah an chhanchhuah Dammawia pawh rawn dam ṭha leh tawhin, a ṭhianhluite a thlah hmak a, Liansanga te bulah chuan a tap ve ta chawt reng a. Thirdengpa pawhin Thansanga te ṭhian thum tan tiin chem, naupang tana hman nuam tur tak ṭha tak si chu a chhersak bawk a. An chem neih thar hmang chuan insual te zirin, an pathum chuan an tlei ve em em a, midang ngai loin an hlim tawk em em mai a ni.

Zing thawh hlimah Thansanga emaw Liansanga te inah chuan awm khawmin, nilenga an thiltih tur an rel ve laih laih a, nilenga an chakna lam pana an vah chauh hnap hnuah hawin zanriah eikhamah tawi khawmuang loin an inpankhawm leh chawt bawk a. Chu chu an nitin nun hman dan a ni. Thansanga leh Liansanga te chu Chhungkaw zahawm tak aṭanga seilian an ni a, Dammawia erawh hmeithai fa a ni thung. Mahse enhrang loin an kawm zel a, an kalna apiangah hruai vein an tih ang an tih tir ve zel bawk a, val upa leh pasalṭha te chuan anni pathum ṭhanlen hun tur chu an nghakhlel hlawm hle mai, mahse,hma hun an hre si lo.

Ṭum dang ang bawkin Thansanga te pathum pawh zawlbuk thing tur pu paha sava veh turin an vakchhuak leh a, an kalna lam hi Bualthleng khaw hmar lam niin, lo a tan an la bawh loh ram chang ṭha tak a ni a, lal leh upate pawhin bawh hun tur sawiin an hisap nasa ṭhin hle. Mahse an vannei a, tuna an lo bawh ram an khua aṭanga thlang lama awm pawh hi khamkhawp aia tam tharna tur khawp a ram ṭha anih zia chu an thar tawh ṭhin aṭangin an hrechiang a, an khaw vanneihna ber a ni. Chu mai bakah an tuitlan a ṭha in an hnianghnar em em a, tuikhur kang ve mai mai ngai lo hi hmun nga ah lai an nei nghe nghe a ni. Khaw thar kai lam pawh an rilru chuan a la tinzawn eih ngai lo a ni.

Chumi ni an thingfawm zawh hnua sava veh a an vakkual chu Dammawia chuan sava lian pangai tak, ṭum dang pawha a la hmuh ngai reng reng loh mawi em em si, a hmui zum sei nalh em em leh a taksa a vutbuak rawng lampang leh a chang dum sei ṭha tak nei chu a hmu a, perh tuma a tin vang vang lai chuan a thlawk sawn a, hla taka insawn duh si loin a perh tum apiangin a insawn zel a, a zui ve zel bawk a. Thansanga leh Liansanga chuan Dammawia a reh rei tak em avangin an han zawng kual a, an hmu mai si lo chu an mangang tawh hle mai.

A kalna awma an rinah chuan kal ve zelin tlai lam losul haw hun thleng pawn an la hmu si lo, an mangang takzet tawh a, a thi anih an ring bur tawh nghe nghe. Mahse a ruang tal hmuh tumin an kal ve zel a, nakinah chuan luikawr ruam an thleng ta a. Thlang lamah zawh thla zelin an han au leh ringawt ṭhin, chhanna dawn tur a awm si lo. Beidawng takin an chhuk thla zel a, tuibur hmuamda vel an kal leh hnu chuan mihring ṭawng nawk nawk thawm an hre ta.

Rang takin an zu pan thla a, an awmna an zu thlen dawn hnaihah chuan hnimbuk kar aṭangin Dammawia ngei chu a rawn chhuak thut a, an phu chiang kher mai, Mahse Dammawia chuan ṭawng lo tura hrilhin an thlang lam chu a kawk a, chumi lam pan tur chuan a hui lauh lauh bawk a. Thui lo te an kal leh hnu chuan an lui zawh lai kam hmun rem nuam em em a buk lian pui pui pathum lo inzar leh mi ṭhahnem tak lo awmkhawm hi an zu hmu ta. Thingkung leh hnimbuk vela inphen chungin an enthla ta a, an thusawiah chuan Bualthleng tihte Pasalṭha Zangaia fanu tihte a ri nawk nawk bawk a.

Chutia rei fe an en hnu chuan Liansanga chuan chumite zingah chuan an khaw hlui Zehtet lalfapa a hmu ta. Mahse midang ho chu a hre ngai si lo; chubakah an sam zial dan a danglam daih bawk si, an let leh hnu a an sawikhawm lai chuan Thansanga chuan pawih an nih a rin thu a lo sawi bawk a. Tichuan eng ti tura lo kal nge an nih tih pawh hre lem lo chuan an inzui haw ta hnak hnak a.

Kalkawngah chuan Dammawia chu an han hau leh rih bawk a, tlailam zanriah ei hun dawnah chuan khua an lut ta. Rang takin mahni inlam an pan nghal ṭheuh va, an thil tawn erawh sawi chhuah nachang pawh an hre lem hlei lo bawk a. Mi ram vakin Pu Zangaia fanu leh an khaw chungchang an sawi mai maiah an ngai bawk nen. Zanah pawnto tura chhuakin, Thansanga chuan Liansanga te in a va pan a, tichuan Dammawia lo lan hun nghakin inah chuan an lo awm a. Rei vak lo hnuah Dammawia pawh hnar thi phungin a lo lang a, chutia hnar thi phunga a lo lut chu Thansanga te pahnih chuan mak an ti hle. Chanchin an han zawt a, a hnar thi chu Liansanga farnu te chuan an han bawihsawm bawk a. A tawpah chuan a rawn kalkawnga an khaw rawlthar huaibak, aia naupangte velh ching em em leh aia u te tlawn thiam zet, an hausakna chhuang em em, a pa aṭanga chapo chhungkua Chalngenga'n mi artui ru tura a tirhna a hnial avanga an insual thu chu a rawn sawi ta. Chuveleh rang taka pawnah chhuak nghalin Chalngenga chu an zawng ta. An aia u daih mah ni se, an ṭhianpa phuba lak chu an tum ruh hle mai.

Rei fe an zawn hnuah chuan Vengsang lam in pakhatah Chalngenga ti ti lar lar ri chu an hre ta, chu inah chuan a tlangnel hmel hle bawk nen, luh tawp a va cho chi nge, a lo chhuah hun nghah chu an han sawi nak nak a. Liansanga chuan a lo chhuah hun kan nghah chuan keini aia upa leh keini aia tam an ni dawn a, chuvangin Chalngenga hi thlem chhuah a ngai a ni. Ka u a rawn rim ve fo va, mahse ka u hian naupang chei bawla a lo chei ṭhin avangin a lo leng ngai ta miah lo va. Mahse ka va lut ang a, ka lo va sawi fel vek mai ang. Tikhan kal ula, lungdawhah lo awm ang che u," a ti ta a.

Thansangate pawh chuan ihe lovin rang takin an kal liamsan nghal a, rei tawk fang a nghah hnuah Liansanga chu a va lut ve ta. Chutia naupang mai inchhunga a rawn lut chu maktiin an lo en ṭhup a. Liansanga chu hawi kual hrak hrakin Chalngenga a hmuh velah chuan, "U Ngeng, min pui lawk hman em? Lo kal lawk teh, nangmah khan" tih pahin a nuih vei ang sun sun bawk a. Ngaihṭhat lohna tur awm hek lo, Chalngenga pawh chuan, "Enge ni ta," tih pahin rang takin a rawn zui chhuak ve ta nghal a.

Kawtah chuan Liansanga chuan, "U Ngeng, Dammawia khan insual puiah a cho nawn leh che a, lungdawhah a lo nghak ang che. Mipa inih chuan nangmah khan rawn kal ang che" tih pahin a kal san ta nghal a. Chalngenga lah chuan chutia nichin lawk a a hneh tawhin a rawn cho nawn lehna chu a pawmsak tih hriat tak hian, "Hmeithai fain min cho ve khanglan chu le," tih pahin lungdawh lam chu a pan ve ta nghal bawk a.

Lungdawh a va thlen chuan Thansanga leh Liansanga chauh chu a va hmu a, Chalngenga chuan thinrim tih hriat takin, "Khawnge kan hmeithai fapa huaisen chu a awm a?" a han ti a Thansanga chuan, "Ka ṭhianpa kha chu theihnghilh la, keimah hi min rawn hmachhawn ta che" a ti ve ta salh bawk a. Chalngenga chuan nuih uar uar pahin, "Naupang mai maiin min cho ve a maw, khawnbawl upa fa inih avang leh tun hnaia i thil tih ṭhat avanga huai berah i inngaih khanglan chu le. Ka khawih hrep mai tur che a nia. Mahse nang chu min lo nghak la, hmeithai fapa kha ka sawisa phawt duh e" a han ti a.

Thansanga pawh chuan "I duh tlat te chuan ni ang hmiang" tih leh "tunah" a han ti nghal ṭhawt a, chu veleh Chalngenga vei lampang sir hnim pik aṭang chuan Dammawia chu rawn per chhuak zawkin Chalngenga'n a lam a rawn hawi phei lai tak hmaiah chuan a theihtawpa nain an han hnek siah mai a. Chalngenga'n hnek let ve a tum lai chuan a hnungah Liansanga chu rawn uai bet nghalin, Thansanga chuan a kaihza inthlep hnawk khawpin a lo pet ve bawk a. Chutah an pathum chuan duh tawkin an han khawih rawn ta a, pasalṭha zialo hle mahse; an unaupa tawrhna an hnem theihdan aawm chhun nia an hriat miau avangin an ti lo thei si lo. Chalngenga luhai chhuata bawk chunga ṭawngkam chhe tinrenga rawn vau ṭawk ṭawk tu chu hawi sanin, khaw lam an pan leh ta vang vang a, khawiah mah kal kual tawh loin an inṭheuhah an haw ta a.

Mut dawnah chuan Thansanga chuan chhuna an thil hmuh kha hre chhuak zawkin, apa bulah chuan "Ka pa, pawih tam deuh kan khaw piah lawkah sawn kan hmu a sin. Zehtet khaw lalfapa pawh a tel nghe nghe"a ti ta a.