BUALTHLENG MAWITU BUNG - 47

Chawiliana chu a ni telin a in enkawl uluk chho mawlh mawlh a, a fapa chu hmuh a chak em em a, a pian phung leh hmelte chu a lo va hmu chhuaktu Kapthanga chu a zawt chhen reng mai a ni. Kapthanga lah chuan chhang ṭha duh loin "Han in enkawl ṭha la i hmu mai ang" tiin nui ṭut ṭut chungin a han chhang ṭhina, Chawiliana hmel pawr fip fep te pawh a ni têla rawn danglamin Kapthanga te nupa pawh an lawm hle mai. Thangkunga leh Chhuahchawnga lah chuan Chawiliana chu a engahmah a hmain an phur pui em em maia, ni rei tak nun mumala nung tawh lo chu tia afapa vanga a rawn harh chhuak chu hmuh nuam an tiin an lawm pui hle a ni. Ni hnih zet Tuipang khua chu an enthla ta, a hma ang chu nise ngam pa taka lutin an duh danin an va che leh ngei ang. Mahse, tunah erawh a dan a dangin an luha an duh dan anga an va chet ringawt chuan an tan a ṭha lo thei tlat.

Dammawia chuan "Khuaah hian ka lut anga enge chanchin thlithlai ka va tum ang, nang erawhin min lo veng reng thung dawn nia" a han ti a Thansanga chuan a lo phal awkawng bik si lo. An pahniha luh dun chu an rêl thlu ta. Leng len ar khuan hma chuan khaw chhungah chuan lutin Lal in lam chu an pan ding nghal nalh a, Thansanga chuan luh a han dila, Lal in chhunga chengte'n Lusei aw phawi an han hre ta thut chu an meng phawk nasa hle, Lalpa Hrumthangvunga chuan lut turin a han ti a Thansanga te hmel a hmuh phei chuan a hmelah chuan a ngaih a ṭha loin a hlauthawng hle tih a hriat a. Ṭha taka biain Thansanga chuan an kal chhan dik tak erawh a sawi duh lo thung. Chhuat laia a u fapa Lal nu nena inchhaih nui ar ar a hmuh chuan a en tlawk tlawka Lalpa Hrumthangvunga pawh chuan a lo hrethiam hle, Lalfanu Parzaliani erawh a hlauhthawn hmel hle. Leng len ar khuan hnu lawkah chuan khawnbawl upate rawn chuangkaiin Thansanga te erawh chhuah mai an tum hauh lo Lalfanu chu a fala biak an duh tlat. Lal fanu thing seng tura a chhuah rual chuan Dammawia chuan a zui chhuak nghala Lalpa hmela hlauhthawnna leh thinrimna lo lang chu Thansanga chuan "Lalpa i fanu hian na engmah a tuar dawn lo, kan fapa chungchangah hian biak kan duh mai a ni. Min ring hram rawh" tiin Chawiliana chanchin chu a sawi ta veka.

Pawn lamah Dammawia chuan Lalfanu Parzaliani hnenah chuan Chawiliana chanchin chu a lo sawi ve mek bawka. Tuipang Lal chhungkaw rilru chu a buai hle, an hlimna an tupa neih chhun, a pain a rawn zawng dawn tih an hre miau a ni. Thansanga te'n Parzaliani a la thlawi reng tih thu an thlen rual chuan Chawiliana mitmeng chu danglam nghal vekin "A ni chanchin chu engatana min hrilh nge in nih? Pasal lo nei pawh ni se ka fapa chu ka hruai dawn tho tho" a ti ta hmaka chhan ngaihna an hre lo tlang hle. A taksa a chak ṭha tawh bawk nen Tuipang khaw lam pan chuan Kapthanga hoin an kal ta, Lianmawia pawh a pa phalna ngeiin an hruai ve bawka.


 Bualthleng khaw lamah erawh Thangliani leh Parmawii te thing phur chu hlauthawng takin an haw a, an tlan hlawk hlawka a chang leh an inchhuih tlu leh khut ṭhin, an thil hmuh kha a rapawmin an tán chuan a vawi khatna a ni bawk nen an tirilah manin an tlan khur hlawk hlawka. Chu tia Thangliani leh Parmawii te rawn tlan hlawp hlawp Hmingthanga'na hmuh chuan pan vatin an ni pawh chuan rawn hmu ve thuaiin Thangliani chuan "Hminga kan thing phurhnaah tlangval pakhat a thi ṭep" tiin a thaw hlawi hlawia, Hmingthanga chuan ngaihthah mai mai chi a ni lo tih hriaiin "Thangte Mawitei hi zui haw la in thil hmuh zawng zawng Lal hnenah han thlen u la, ka lo va en chiang ange" a ti a. Thangliani te chu kal sanin Hmingthanga chu silai nen a kal chhuak ta a, an khaw dai hnai lawka tlangval hleitling tak hmel hmuh tlak a lawi pawh awm lo a vung nasa leh thisen in a buah hneh em em mai lo tlu reng a hmuh chuan Hmingthanga chuan zo taka pu lawpin khaw lam a pan pui nghala tlangval dang rawn kalte nen an in tawh chuan a zawnna tur siamin a ṭhenin Thangliani te rawn tlansan an em leh hrei puite la turin an kal leh a. Chu tlangval chu Lal inah dahin bawlpu chuan a han en chianga, a naka silai mu tang a han hmuh chhuah chuan a chek tlak tlak a, tuar chhel a tiin eng tiang khawpa pasalṭha nge anih ang aw a ti rilru vawng vawng hial a ni. A hmaite chu silfai sakin a hliamah chuan damdawi te an han hnawih a, Lalpa Rengliana chuan fimkhur thu hlaah Hmingthanga chu Lal in lam rawn ngaihven reng turin a chah a. Chu mikhual chanchin chuan khua a deng chhuak rang kher mai, Lal inah chuan a harh hun nghakin an awm ṭhapa, leng len ar khuan hnu lawkah chuan a rawn harh ta, Parmawii chuan hmu vatin chu mikhual chuan tui a han lama Parmawii'n tulh a tum chu Sangzuali chuan lo lak sakin tlem te tein a kaah chuan a far tir keuh keuh a, rei loteah chuan chu mikhual pawh chu a rawn harh chiang ta, mahse a chanchin sawi thei zia zang a la ni lo a rei lo te hnuah chuan a muhil zui leh ta a. A tukah erawh a hma aiin tlemin a rawn kang ta deuha, mahse a la che sawn thei lo thung. Parmawii te unau chuan buai puiin a hmai vung lek luk te chu tui lumin an deh sak a, Thangliani pawhin a rawn tlawh ve fo bawka. Lalpa Saingurliana hmel rawn pangai chho chu a hmelah Lal thlah dik tak hmel a lang chiang hle, Chawiliana te rual vel a ni a, mahse a rilru erawh a fingin a rorel a thiam hle bawk. Chu tia a han ṭhat chhoh tak hnu chuan zan khat chu leihkapui a Hmingthanga leh Lal fanu te titi chu a zawm ve a, Thangliani rawn kal ve leh Lal Saingurliana mit chu a intawng chiang kher mai.

 Lalpa Rengliana chu pasalṭha tih takah chu tlangval chu a enin khawi lam mi neinung fapa emaw chu a ni ngei ang tih rinna a nei tlat a. A taksa chu chik takin a zir chianga, pasalṭha anih rinna a nei hauh lo a mahse mi tuarchhel tak leh hna hram thawk ngai lo a ni tih erawh a hre chiang hle. Ni nga a ral leh hnu chuan chu mikhual pawh chu a rawn ṭawng chhuak peih ta, a thu rawn sawi hmasak ber chu "Ka ṭhian Thansanga hmuh ka duh a ni" tih chu a ni a, mak an ti kher mai, Lalpa Rengliana chuan Thansanga te an awm loh thu leh Hmingthanga a awm thu a han hrilha mahse chu mikhual chuan Pasalṭha Hmingthanga chu a hming chauha hriat thu leh Thansanga te pathum erawh a ṭhiante an nih thu a sawi thung a. Lalpa Rengliana chuan a chanchin te zawh pahin Thansanga te zin bo chhan te chu a hrilha chu mikhual chuan zawi muangin a chanchin chu a sawi ta a, "Bungtlang khaw Lal Saingurliana ka ni a, ni enge maw zat liam taah khan ka pa, kan Lalpa chuan pialral lam min pan sana, a thih danah erawh ka lung a awi lo hle, ka pa chauh niloin ka pa rualin a khawnbawl upa pahnih a mi rin berte chu an thi ve nghal bawka, an pathum hian kan inah zu khawnin an titi nghe nghe, khawnbawl dang erawh rawn chuangkai an awm hauh lo thung. Ka pa te pathum chu a rualin an pum a rawn na thut maia tuibur hmuamda hnu lekah an thi ta maia, ka pa te chah fel hma deuh chuan ka pa rin ber te zinga mi pahnih an rawn lut ve bawk. An ni chuan mak ti takin min han en a, kei phei chuan mak ka tih leh zual em avangin chhan ngaihna pawh hre loin ka ding reng ringawt a ni. Ka pa thih hnuah chuan Lal nihna ka chelh a ngai ta, Lal ka nih a ṭang hian ka khuaah chuan hri a leng a, chhungkua kua a mang ṭhak pawh an tam hle, Bungtlang in zathum nufa ni ṭhin kha in zahnih kan pelhna a tam lo tawh hle, ka mangang chuan khaw thar kai ka rel ta a, mahse ka upa te ngei chuan an vaiin khawthar kai ka rel chu an pawm ta tlat lo, ka pa leh a upate pahnih thihdan nen khan inzawmna nei tlata ka hriat a vangin ka fimkhur zual hle, ka pa khawnbawl te zinga ka nel ber Upa Rothanga hnenah ka manganna te chu ka hrilh nasa ṭhin hle. Hun a kal zela mak tak maiin ka khaw mipuite chuan hri len chhanah chuan min puh ta tlat mai, keiin ka hmangaih em em laia dawta min puh ta mai chu ka lungawi lo hle, mahse ka inphah hniam hram hram a ni. Mahse ka rin loh tak maiin Lal aṭang chuan min paihthla ta tlat, ka aiawha Lal chu Upa Rolura a ni ta, Lal in aṭanga kan han insawn chhuak chu ka mittui a tla nasa hle mai. Ka naupan tet ata ka pa nena kan lo chen dun tawhna ngei han chhuahsan chu ka hreh a ni, mahse tih loh theih ni hek lo. Kan Lalthar Rolura chuan a tirah min ngaihven viau angin lang mahse a rei telh telh a min hlat telh telh a, kan khuaah chuan hausa leh inkar a zau sawt hle, kei phei chu an paihthlak ka nih avangin min hmusit hlawm hle mai. Mahse min lainat tu te nen ṭang hoin Lal in chu neih let leh tumin ka bei ta a, chuta ka hriat chhuah chu Pu Rolura khan Lal nih hi a tum ber a ni a chuvanga ka pa pawh turin a hrai a ni, mi neinung tak a ni bawk si a lam ṭang a siam awl sam hle. Chu tianga Lal nihna neih let ka tum chu Lal Roliana'na hriat rual chuan ka ṭhiante chu an that veka kei pawh min sawisak hrep hnuah silai in min kapa mahse he lama rawn kala ka ṭhiante nen ngeia phuba lak ka duh vangin ka rawn pan che u a ni" a han ti chuai raih a, a taksa a la chak loh bakah Thansanga te an awm lo bawk nen Bungtlang Lal la valai tak chu Bualthleng Lal inah chuan a cheng ve ta rih a.

 Chawiliana chuan a fapa chu en vang vangin "Lal fanu a hming min hrilh thei em?" a han ti a Lal fanu Parzaliani chuan lai tak chungin "Hrangvunga" a han ti sap a. Chawiliana chuan hruai tum mahse Lalpa Hrumthangvunga chuan a phal teuh si lo Chawiliana thin a thawk phut ṭep ṭep ṭhin chu a ni ber e. Kapthanga chuan "Chawia rei lo te emaw i tih chhung hi a rei tawh a sin. Zochawisangi hian nu a mamawh a ni" a han ti a Chawiliana pawhin dik a ti ve hle mahse Zoliani erawh a theihnghilh hauh lo thung. Kapthanga'n a thiam ang tawka a dil leh takah chuan Lalpa Hrumthangvunga a phal sak ta nge nge a, anihna takah chuan heng ho tih thinrim nawn leh hi a hlau tak zet tawh a ni. Chuta chin chu Kapthanga chuan Chawiliana leh Parzaliani chu a rukin hun a pe ta zeuh zeuh a, Parzaliani hi a hmelchhe hauh lo, hmar ho zingah chuan a hmelṭhatna hi a lar pui ve hat tlat a ni. Parzaliani chuan a fa neihna pa chu kar loah a hmangaih nghal mai renga mahse Chawiliana erawh chuan Zoliani bak a rilruah a dah hauh lo thung.

Zan khat chu Chawiliana muhil chuan mumang mak tak neiin tlang thengthaw nuam takah hian a lo dinga chu tih mek lai chuan a fapa Hrangvunga leh Zochawisangi inum zawr zawr thawm a hre leh ta, nuam ti takin a han ngaithla vang vanga mahse Zotei aw ngeiin "U Chawi i fanu hian nu a mamawh a ni, Hrangvunga nu kha kei chuan ka ring tawk a nia" a han tih chuan "Zote kal bo tawh suh" a han ti nghal rawk bawka. Mahse Zotei chumittui tla zawih zawih chungin a ral ta riai riai a. Chawiliana harh chuan a mumang chu mak a ti kher mai, "Zote hmeichhe rilru ṭha tak i ni a sin a ti rilru vawng vawnga a ngaih a zualin a mittui rawn hnam chu a khap per sak sak aChawiliana pawh nitin deuhthaw Parzaliani kianga a tap chat takah chuan an inngaina chho ve hle. A tawp atawpah chuan man leh mualte inhlanin an inhruai haw thei ta hram a

Bualthleng khua an luh hnu lawka an thil hriat avangin Thansanga te pathum chu Lal in lam an pan nghal sawk sawka, Khum lama Lal Saingurliana mu reng an han hmuh chuan mak an ti tlang kher mai.Chanchin an hriat chian meuh phei chuan Phuba lak sak ngei tumin an intiam charh charh hlawm bawka. Ni a liama Lal Saingurliana a rawn chak ṭha ta maw tihah chuan phur takin phuba la turin Bungtlang khaw lam panin an kal ta a.

Chawiliana erawh a fapa leh a nu chu Lal hnenah inhmelhriattirna te neiin Lal Rengliana duhdan ang ngeiin Lal imah an cheng rih dawn a ni. He tia LalRengliana'n a tih nachhan ber chu Chawiliana'n nupui a neih nghal mai chuan sawi sep a kai dawn tih a hria a, tin Zotei thlarau pawh a zahawm a ti a ni chu mai bakah man leh mual inhlan tawh mah se Chawiliana hi a hmangaih loh hmeichhia nupui atan neih tir a tum hauh lo bawk. Mahse Lal Rengliana hian he rilru hi pu lo pawh ni se Chawiliana rilruah erawh Zotei chiah a awm thung a, Parzaliani hi ngaina tawh hle mah se hmangaih tur chuan hun a la duh rei dawn a chu mai bakah Chawiliana hian Zoliani a hmangaih anga hmangaih theih tur hmeichhia hi a hmu hauh lo a ni.