BUALTHLENG MAWITU BUNG - 43

Khaw daiah chuan ding khawmin Dimlam lama kal nge țha anga, khaw lama haw tih chu an han sawi ho nak naka. Dimlam lamah kal an awm tho avang leh Runthanga te an chet sual an rin loh bur bawk avangin khaw lam panin an haw ta zawka. Runthanga te rin lawk ang ngeiin Lal Rengliana pawhin Dimlam lama kal te an hlawhchham rinna a nei lo bawk nen phuba lakna'n tiin Lalnu Hratzaui tlangval tirh te lu chu a tlangvalte a lo lak tir hmiah bawka. Kawtchhuah lama an han inhmu khawm leh chu an lawm hle maia Pi Țialthangi leh a fanu Thangliani chu inkuahin an țawp dun hlawp hlawp a, an bul lawkah Sangzuali chuan a nau Biakmawii leh Parmawii te chu kuahin an lawm avanga an mittui sur chu dan rêng tum lovin an țap hawm hawma, Lal Rengliana chuan "I haw teh ang u" a rawn tih takah chuan khaw lam panin an inzui phei ta hnak hnak a. Thansangate pawh zan khat hnuah rawn thlengin Sengzau khuaa an chet dan chu Lal Rengliana chuan ngaihthlak nuam a tiin, kal ve a chak zek zek maia, a rilru tetein "Lal ni lo i la chu ka ho ngeiin kan kal ang maw le" a ti rilru vawng vawng a.

 Dimlam Lalnu Hratzaui erawh a thil tihah inchhir hle mahse Liansanga leh a pa Pu Zangaia te a huatna chu a reh thei tlat lo, a tlangval te chu tirin Pasalțha Chhawnlinga te khaw lamah a tir ta vat maia. Pasalțha Chhawnlinga te khaw Lal Thangzaliana'n a pasalțha thih thu a hriat chuan a thinrim hle mai, mahse a pasalțha hian tlem lai deuh ațang khan chhan nei loin Dimlam lamah hian kal vang vang a ching tih a hre tlat, a thih chhan bul pui ber pawh hi Dimlam khaw ho thil tih anih a ring tlat bawka. Dimlam tlangvalte chu chik zeta melh pahin "Anih leh ka pasalțha lu la tu chu tunge anih le?" a han ti a tlangval pakhat chuan "Lalpa zan thimah a ni a, an inbei lai hmutu pawh kan awm lo a ni, kan Lalnu pawhin a hriat zawng chu Lusei pasalțhate an ni tih a ni" a han ti a, Lalpa Thangzaliana chuan "Lusei pasalțha tiin nangni hian min bum intum a ni em lo maw?" a han ti leha tlangval bawk chuan "Lalpa kan thusawi chu awih hram rawh, lusei ho nen kan inkar i hriat ka ringa, Lusei pasalțhate ngei an ni e" a han tih leh takah chuan Lalpa Thangzaliana pawhin ngaihtuahna sen thiam har ati ngei mai. "Anih chu Lusei pasalțha chu a chenna khua inhria em" a han ti a, a chhanna dawn chu ni lo hram se a tih rilruk vawng vawng a ni tlat. Bualthleng pasalțhate do hlauhawm zia a ralkhat hriat ve tlat bakah Bualthleng mai ni lo Zehtet pawh an la awm ve bawk tihte chu a hre chiang ve hle. Mahse Lal fing tih takah a pasalțha thih chhan dik takah chuan zep engemaw a awm tih chu a hre tlat. A zawn chhuah hma chu phuba lak a tum hauh lo, tlangvalte chu pangai taka chhangin lungawi lohna tur awm lo, beisei tur awm chuang hauh si loin a thlah ta zawk a.

Dimlam tlangvalte an kal chhuah hnu lawkah chuan tlangaupa chu tir vatin "Zawlthanga leh Buangliana te unau zu ko vat teh" tiin a tupa neih chhun leihkapuia saihlum hrual mek chu ko lutin "Taite i u zu ko tawh, hmanhmawh takin rawn kal rawh se" a ti bawk a. Charpui Lal inah chuan Pasalțha Buangliana chuan "Lalpa ka aihnahphahpui pa lu la tu chu ka hmachhawn chak hle mai, Bualthleng khua pawh ni raw sek sek, i bei mai ang u" a han ti sak a. A u Zawlthanga chuan "Chhawna awm dan kha kan hre vek a Dimlam lamah va awm bo vang vang a ching riau a, a va awm chhan leh a thih chhan dik tak kan hriat phawt a ngai a ni" a rawn ti ve bawka. Lal fapa Pasalțha ni bawk Thanglunga chu rawn țawng chhuakin "Chuti U Zawl nang lo awl ve tawh la, kei leh Buanga te'n kan va ching fel ang e, chhungkua lo uap lum rawh" a rawn ti a, tu chuan Dimlam lama va kal turin tlangval dang pahnih a zuanzang deuh an han ko a, an pali chuan an chhuak ta a. Dimlam khua chu lut nghal mai loin khaw daiah chuan zan riah eikhama daikal tura rawn chhhuakte lo chângin thu zawh fiah an tum dawn a ni. An han nghak fan fan a, tlangval pahnih rawn nui thla bawk bawk chu an hmu ta. Chu mite lam pan chuan Buangliana chu kal vatin Thanglunga chuan a zui ve nghal bawka, chu tlangval pahnihte pawh chuan lo hmu ve vatin mak tih hmel takin an en a Buangliana chuan "Vala te u Charpui khaw pasalțha Buangliana ka ni e, buaina siam tuma rawn kal kan ni lo a, kan aihnahphah pui Chhawnlinga thih chhan dik tak kha kan hre duh a ni" a han ti a, tlangval pakhat zawk chuan "A ni maw, kan hriat chhun chu zing khaw var ruala Lalnuin a lu bung kenga inkhaw lama kan țhiante an rawn tirh kha a ni. Kan Lalnu berin Lusei pasalțha thah a ni a ti si a, kan awih vek mai a ni" a rawn ti a Buangliana chuan "Lusei pasalțhate chuan he lai thleng thlenga rawn kal chhan tur an nei em ni?" a han ti leha Tlangval chuan "Nei teh reng e Bualthleng Lalfanu leh a țhiannu thing phur kan man peka lawm mawle, Pasalțha Chhawnlinga remruatna vek a ni a, amah berin a nun a chan phah ta a ni a pawi hle mai" a rawn tih takah chuan kal sanin Lal in lam an pan ta a.

Lalnu Hratzaui chu an be leh ta. An duh ang an hriat meuh chuan an rilru a buai ta map mai, Lusei nula pawngsual a tum vanga thi a ni tih chu an Lalpa'n hre ta se phuba a la duh kher angem tih chu an rilruah a awm țheuh maia. Eng pawh ni se haw zai rêl phawt chu an ti tlu ta a. Zan khat riakin an khaw lamah chuan an let leh ta a. Pasalțha Zawlthanga chuan "Lalpa, Chhawna thih chhan chu kan hre ta i thu pek kan nghak e" a han ti a, a hmelah chuan phurna teh chiam lang lo mahse Lal thu pek zawm zawnga chet a inpeih at tih chu a lang reng a. Lal Thangzaliana chuan "Zawla Bualthleng khua chu rûn i huphurh lo anih chuan kan kal ang. Mahse ka naute khaw lamah lam kal kan intir anga Bualthleng kan run hian khaw hnih kan rûn dawn tih inhriat a țha, chu vangin kei ni pawh kan inpuahchah nasat a ngai a ni" a han ti a Pasalțha Zawlthanga chuan "Chhawna chet dan hi demawm viau mah se a thlavang hauh hi a kaihruaitu ka nih angin ka tih makmawh a niin ka hria, mahse i ro relna kha ka pawm thei lo a ni. Rawlrala chet phawt hi kei ka ngaihdan a ni e" a han ti a. Lalpa Thangzaliana chuan a han ngaihtuah vang vanga, a tawpah chuan "A țha zawk ngei ang. I hoin in kal a niang chu ka fapa leh i nau hi i kutah an awm leh dawn anih chu an kiangah awm reng la kal hlat san ngai suh" a han ti a Pasalțha Zawlthanga pawh chu bu nghut nghutin rawl rala chet phawt tum chuan an in buatsaih ta a.

 Bualthleng lamah erawh Liansanga palai te thu hawn a țha bawk nen Liansanga chu nupui nei turin a inbuatsaih ta tlut tlut maia. Thansanga te pawhin an pui deuh reng bawka Zoliani rai no chu ei a duhin a taksa in a ngeih bawka a chum buang maia. Chawiliana nen chuan an hlim dun ve hle mai. Liansanga nupui neih ni chuan khaw mi puite an tlai in nuam an ti tlâng hle a,hmun hrang hrang aṭangin an inneih rawn chhim tu pawh an awm hial a ni. Parmawii leh Thansanga te pawhin tih ve thuai an chak hle a, mi hmuh loh laka inkiai suk suk bâk tih theih la nei miau si hek lo le. Lal Rengliana lah Chhuahchawnga fapa Lianmawia nen inzui chawtin Lianmawia rawlthar ṭan ve ik ek tawh chu zan lama a chet dan tur a hrilh ru lawk vek bawk a. Ramtei pawh a hmelṭha in a duhawm bawka, Liansanga chu a vannei an ti hlawm hle. Lawi ṭan zan a thleng ta, leng hawn ar khuan hnu lawkah chuan Ramtei chuan a bula a pasal rawn mu chu mak a tiin a ringhlel rum rum hiala, zan thimah a hmuh theih si loh. Liansanga lah chu vawi khat te mah ṭawng loin a hnar nghal bawrh bawrh mai si. Ramtei chuan mak a tiin a rilru a na zawk hiala, Liansanga hian nupa nun hman pui tlakah a ngai lo niin a ngai hman hial a ni. Rilru na takin mittui nen a mu ve a, mutthilh tumin a han bei ngiala a theih der mai si loh. Mak takin Zawlbuk lam aṭangin thawm a rawn chhuak ta, thawm chuan an in rawn hnaih zelin Ramtein mak a ti tulh tulha, an inchhunga thil ri dup a hriat rual chuan tlangval ho pawn lama haw haw dur dur ri a hre leh ta nghal bawk si. "Ramte mi rawn phelh teh" ti a Liansanga aw ngeiin a rawn auhna ri chu mak a tiin a bula mu chu a rap telh telh mai a, Liansanga lah chuan a rawn ko zing bawk si, hlauthawng taka va tho chhuakin tap mei engin a chhun phak china an phuar hlawm Liansanga a va hmuh chuan a phu deuh zawka, a bula mu chungchang hrilh tumin a va pan vata mahse tlangval ho chuan a lo au el dur dur bawk si, tlangval ho thawm a reh fel ta maw tihah chuan phelh sawk sawkin aw khur dar dar chungin a sawi ta. Liansanga chuan chempui ban vatin khum lam a pan phei ta. A thil va hmuh chu a ngei kher mai, Lianmawia lo nui ṭhen ṭhaw chu hmuin a phih tho lawpa Lianmawia lah chu a la nui uar uar zui leh nghal. Liansanga pawh chuan tih ngaihna vak hre hek lo a nuih let ve ta ringawt a. Lianmawia Lal in lam pana a haw hnu chuan Liansanga chuan Ramtei chu duat taka chul hliau hliauin a chul ril telh telh a, chul mai a duhtawk ta lo. (Ka duh tawk zawk mai ange😂)

Upa Zangaia lu nei lo chunga ram palai lenga lo mu reng Thansanga'n a hmuh chuan na a ti kher mai, a ṭhingṭhi nghal rawpa, pa a neih loh hnua an chhungkua dawm kang tlat tu a thi ta mai chu tawrh thiam har a ti hle. Ruma chuan Thansanga rilru tur chu man thiam vatin Liansanga te leh Dammawia te kalna lama kal tur tlangval a tir vata mi dang zawngin ruang zawnna tur hlang an lo siam bawk a. Liansanga'n a pa ruang a hmu chu na a tiin an tar lam fa an duat em em a lo ni bawk nen tawrh thiam har a ti hle. Thansanga kiangah chuan ṭhu thlain a pa kut chu a vuan chata an mittui sur chu dan zai reng an rel thei lo. Dammawia an sira khaw dang hawi lek lo a lo ding mitmeng sen ram chuan a mittui chu nuai sawk sawkin, "Mi panga in min zui u la,an hnuhma kan zawng nghal ang" a han ti a rei fe an zawn hnu pawh chuan an hmu mai si lo, an beidawng hle mai. Khaw lam panin an haw ta,

Bualthleng khua chuan an upa thihna chu na an tiin an rap hle bawka, tunah chuan an leido te'n phuba an rawn la ṭan tih pawh an hre chiang hle. Ral ven buk thuam ṭhat chu hna hmasa berah an nei a, tlangvalte pawh ralveng indahin an fimkhur nghal hle. Upa Zangaia thattu te zingah pasalṭha fing tak an tel tih chu an hnuhma hmuh tur engmah a awm loh danah a chiang hle mai. Liansanga chuan a tuar nain a nupui neih hlim hlawta a pa a thi mai. chu a hrethiam loin chaw a ei duh lo a, a inkhung bo chawt reng mai a ni. Lalpa Rengliana chuan thu chhuahin khaw mipuite chu fimkhur tur leh, ram kal tur pawh a huho zela kal tur thu te a chhuaha, mipuite pawh an mang a angin an fimkhur tlang hle a. Hmingthanga chuan a farnute hlauhthawnna chu hriatthiam puiin a hna thawh lai dahin a haw pui ta a, silai nen hma hruaiin eng pawh thleng thut se a inring hle, a farnute inbe zeuh zeuh thawm a hriatin an hlau tih a hria a, nidangah chuan haw tlai pui lui tawh lo i la a ṭha ang a ti rilru a. An khaw kawtchhuah thlenna'n khawi hnih bak a awm tawh lo tihah chuan Hmingthanga chu ding datin a farnu te chu bengchheng lo turin a han khapa, a tiril khur der der chuan hlauhawm a hnai tih a hrilh chiang hle, a han hawi kuala hmuh a nei mai si lo, kal leh tuma ke a pen chiah chu a farnu te rak ṭhawk ri chu hriain a kun hniam nghal zawt bawka, a lu chunga fei thlawk tlang fua chuan a nau Rothangliani malpuiah chuan a thil tlang nghal zawt bawka, Hmingthanga chuan an mahni hual zawnga rawn chhuak pawih ho chu melh kual dan danin pasalṭha tih hriat tak pathum te chu a melh ding bik hle a, "Eng vanga hetianga che hi nge in nih? Mipa innih chuan inmalbeih in min bei ngam em" a han ti saka. Mahse pawih pasalṭha pakhat chu rawn nui vur vurin "I thi ngei ang" tiin an rawn bawh rawn ta mai. Hmingthanga nu leh pa chu an mangang tawhin an fate haw thei lo chu an lo lan tawh takah tiin pawn lam chu an thlir chhena lan tik ni an nei thei si lo. Lêng len ar a khuan hnuah pawh an la lang si lo, Hmingthanga pa chuan "Lal hnenah chanchin ka han thlen ange" ti a kal a tum mêk lai chuan Dammawia leh Thansabga rawn lang hlawlin Thansanga chuan"Ka pa Hminga hi a va reh ve a dam sam nange" a rawn ti hlawl mai a. Hmingthanga nu leh pa chuan chanchin an lo hrilh nghal zung zung a. Dammawiate chu rang taka chhuak leh vatin Lal in lam panin a tlan nghal vawk vawka, Lal inlama chanchin a thlen zawh hnuah Zawlbuk lamah kal lehin tlangval dangte nen meichher nen an chhuak ta.