BUALTHLENG MAWITU BUNG 31-35

Chhumring Lalpa leh a pasalțhate rel anga an bawh zui dan tur chu an sawi khawm leh ta. A țhenin kawtchhuah ațanga thui lo teah lo chân ruk a, an lo thlen vela lo kah thluk phiar an rawt laiin a țhenin khua lo lut phawt se, lal tualah ngei thah an rawt bawk a. An ngaihdan a hrang nuai ta mai le.

Chu tih lai tak chuan Lal inhnuai lamah ve thung chuan Dammawia chuan "An va han chak dawn lo tak em, mipa chu an inti ve si a maw" a ti charh charh a. Thansanga chuan "An pasalțha chhuanvawrte chu kan infiam pui dawn khawp e. I kal teh ang u, khawfing chah rualin Lal in hi kan thunun hman chuan a tawk viau e" a ti a.

Tichuan khaw dai lamah let lehin riahna tur rem chang an han melh a, an duh ang hmuh an inrin lem loh sa tho avangin thingkung remchang nghengin an țhu muhil ta hlawm a.

Khawfing chah hun lai vel chuan Chhumring Lal in kawngka chu a rawn inhawng ta riai riai a. Thansanga chu khumpui lamah kal vatin Chhumring Lalpa muhil lai chu a samah kek tho lawpin a nghawngah chempui a chuk tuah nghal zat a. Lal nu rawn harh chu Liansanga chuan a hmui hup betin tap lamah an hruai phei ta a. Dammawia'n mei a han nun zo, Chhumring Lalpa'n an hmel a hmu chiah chu a meng kawk kawk mai a. Thansanga chu kawk in "Khawngaihin ka nun zuah hram rawh khawngaihin" a han ti a. Thansanga chuan chhan pawh chhang lovin a nui suk a.

Kawl a rawn eng țan ta maw tihah chuan Chhumring khaw mipuite'n an lal ina silai vawi hnih lai puak thawm an hriat chuan an thla barin an hlauthawng hlawm hle a, mipa ho chu an ralthuam neih ang angte nen Lal tual lamah chuan an kal chho va. Pasalțha Aikhama pawh rawn thleng vatin "Kan lal in chhunga silai hmet puak ngam tur khawpa huaisen chu rawn chhuak ta che" a han ti hrawk a. Mahse chhanna reng a awm thei lo.

Aikhama thinrim chu lal in lam panin chak takin a tlan a, leihkapui a zuang chho zawkin Lal in kawngkhar chu a phih hawng nghal lawp a. Mahse chu mi rual deuh thaw chuan lal tualah chuan a rawn let thla leh nghal tawp a.

A hnungah chuan tlangval la naupang tak mai. Mahse a awm ser kual nuai leh a biang dinglam a savawm hamna ser pathum inrin thla kalh avanga pasalțha ani tih ti chiang em em tu chu a rawn chhuak a, a hnungah chuan amah aia palian zawk mah hmel fai veng mai leh mitmeng zim san mai, a hmel ena la naupang tak tur tho ni si rawn chhuakin Chhumring Lalpa chu a rawn hruai chhuak bawk a. A hnung berah chuan a hmaa mite aia te zawk leh sa pan zawk, mahse a taksa fip țang leh a pian zen thlarh ațanga pasalțha a ni tih ti chiang em em tu, nuisanga an lal nu kek chunga a rawn chhuak an hmuh chuan mipui te chu an thum huk a.

Aikhama na tuar zi awl awl chu tlangval hote chuan rawn pui vat vatin Thansanga chuan "Vawin niah hian buaina siam tuma rawn kal kan ni lo a, buaina hi kan duh bawk hek lo. In khaw monu, Kawnzau lalfanu te khua Kawnzaua zin kan ni a, mah se he lai hmuna kan rawn kal chhan chu Kawnzau khaw nula Dengliani vang a ni. In lal fapa hian Dengliani nupuia neih a tum a, mahse Denglianin a duh si lo a, chu vangin in Lalpa hova rawn hruai luih an tum a, chu chu keini Bualthleng Tlangval Thansanga leh a țhiante hian kan hmu thei lo a ni. In Lalpa hovin kan rawn let tir a, vawin niah hian Kawnzau lal fanu te chhungkua hi kan hruai dawn a, a ngam chuan min lo dang dawn nia. He khua hi a ding leh tawh ngai lo vang"a han ti charh charh a.

Mipuite'n Pasalțha Thansangate an ni tih an hriat meuh chuan an ri mur mur maia. Chutih lai tak chuan patling aw țeng zetin "In mal beihah ka cho a che u, kan vangkhuaah hian kan lal chauh lo chuan ro a rel lo vang" a rawn tihna lam an va hawi chuan pasalțha Aikhama bulah chuan pasalțha tih hriat zet pakhat lo dingin Aikhama pawh a bulah chuan thinrim hmel zetin a lo ding ve bawk a.

Thansanga chuan, "I chona chu ka pawm e" tih pahin lal tualah chuan a țum thla chhak a, lei a thlen rual deuh thaw chuan "Pasalțha Aizama hmachhawn chu thihna a ni e" tih pahin chu pasalțha chuan a rawn bawh nghal buan buan ta mai. Mahse, Thansanga a lo inveng hman hlauh va, hnung tawlh chungin a inveng zel a, Aizama kutthlak chu a na ve hle mai. A sahna lo dan ringawt pawh a hautak ve hle mai.

Thansanga vanduaina ni a thleng ta nge ni, lungte rap hrual palhin a thal ta huang mai. Aizama chuan bawh zui tumin a han hnaiha, mahse a rin loh lutuk maiin Thansanga chu rawn tho chhuak thutin a chem chu a vai nghal puat a. Aizama malpui chu thler phei hawkin a thi nghal zawih zawih bawk a. Thansanga chu nghalin a din rual chiaha Aizama chem rawn thlawk chu a dang kim seng bik lo, a dar chu thip ve zawkin, a thi nghal zar zar a, chu veleh Thansanga chuan "Pasalțha Thanhranga fapa thisen chhuah chu thihna a ni a sin" tih pahin a bawh ve ta.

Aizama hnung tawlh zawt zawt leh a mitmeng tlanchhe tak chu Thansanga chuan a hmuh hmaih hauh lo bawh zelin Aizama nghawng zawna a chem vai chu a thlen hma deuhin hnuai lamah a la leu puat a. Aizama chu țhingțhi rawpin a han bul ațanga a kiu thlenga a vun tla thla hlawk chu na a ti tih hriat zetin a țhen chak chaka thil engemawni lo phe leh zuai chu hmu hman mahse a hmuh tawpna a ni thung.

Aizama lu chu tla hrang nghal nawlhin Thansanga chu a han khaia Pasalțha Aikhama kawh pahin "A dawt leh in awm em" a han ti a Aikhama pawh pasalțha ve tawk tak a lo ni bawk nen muang changa rawn pen chhuakin Thansanga chu a rawn hma chhawn ve ta.

Mahse Dammawia chu rawn chhukin "Kawnzau khaw tana mi lu khai lo nih bik ka duh lo e, Sanga chawl tawh hei chu ka chan pual a ni tlat" tih pahin a tih țhin dan ang ngeiin sakeiin a sa seh tur zuan tuma a awp hniam ang maia kun hniam dan dan chungin a veh kual leh ta. Thansanga pawh leihkapui lamah chuan chhoin Dammawia inmalbeihnaa a chet țhin dan zia chu hmuhnawm ti takin a en ve a.

Aikhama chuan a hmaa tlangval chu a pian a enin a hneh a ring deuh nge a zuam hle. A sah phak loh tawkna vela dina insaseng paha na lo tea hliam zeuh zeuha chhaih tumin a rilru a siam ta. An inveh lai tak chuan Aikhama chu che phutin a tum dan ang ngei chuan Dammawia sah phak lohna velah chuan a ding chat a, insaseng lehnghal a tum chu mi țuan rang Dammawia chem rawn chhuak chuan a hnungzang chu a vai kak ta duai a. Mipuite chuan Dammawia insual thiam zia chu mak an tiin an ri mur mur bawk a. An han inveh leh ta, Aikhama hmelah chuan a zamna a hmuh theih a, Dammawia lah a phur tawlh tawlh bawk si. A veh den den a, a va hnaih leh phut țhin. Aikhama chu a insaseng hman vek lo chiang hle mai. A taksa hmun hran hran chu a na țhem țhum tawh ngei ang.

A tawpna'n ti niawm hrimin Aikhama chuan a chem chu a chhuk zawngin an vai thla puat a, Dammawia lo eu zawk chuan Aikhama ban chu a kiu ațangin an thel zawt mai a. Aikhama na ti lutuk chu a rak tuar thei hial a ni. Dammawia hmaah chuan țhingțhi rawpin a inpe a Dammawia paw'n rang thei ang berin Aikhama na tawrh chu a tih reh sak ta a. A sir a lo ding khur hlawk hlawk Chhumring Lal fapa chu kawk in "I duham vanga thisen luang hi han en teh. Hmeichhe pakhat aiin khaw muantu pasalțha pakhat hi an hlu zawk a sin" a ti a Lal in lamah chuan a chho leh ta a.

Liansanga chuan "Kawnzau lalfanu te chhungkua nen he lai hmun hi kan chhuahsan dawn a, a ngam chuan min lo dang thei ang. Tin, Kawnzau khaw lama phuba lak tumna rilru in pu anih vaih chuan khawi hmunah pawh awm i la kan lo let leh ang" a ti a.

Tichuan Kawnzau lalfanu upa zawk Zamliani te chhungkua nen chuan khua chu an chhuahsan ta a. An chhuah hnu tuibur hmuam da velah lal fapa chu rawn țawng chhuakin "Ka pa, um i la, hnung lam ațangin va that phiar ang u" a rawn ti tawn tawn a, mahse engtin mah chhanna a dawng thei si lo, a ngaihna hre lo chuan "Tlangval sawmthum insiam u la, kan umzui anga, kan that phiar ang" a ti hman chiah, ama pa ngei chuan a hmaiah chuan beng siahin "Lal emaw i inti em ni? He khuaah hian ka dam chhung chu thu neitu ka ni ang. Nangmah avanga ka pasalțha chhuanvawr pahnih ka channa hi i hmu em? I la zak chai nange? Kan ngam loh chalah chil kan hnawm a ni. Tun hnuah Kawnzau khaw lam hawiin tuma'n hriam an lek ka rem ti lo tih hre rawh u"a ti ta a.

Lalfapa chu zak hle mah se tih theih aneih loh bakah a han hawi kual a, amah huat hmel tak tak a hmu bawk si. Phur lo zetin inchhungah chuan a lut ve ta hnu hnu a.

Kawng lakah chuan Zamliani te chhungkua chu an țawng tlem hle a, an nupa bakah an fate pahnih Chungnunga te unau nen a kal an ni a. An khua chhuahsan chu nuam an ti lem lo hle. Mahse an lal chhungkuain Zamliani pa khua a zah loh dan an hriain an tan Chhumring khuaa cham reng chu thil tih chi a ni si lo a. Kawnzau lam pan chuan an kal ve hna hna a. Dammawia titi vawrh chu an lo nuih pui ve lek hak țhin. Rei loteah chuan an inpawh em em nghal mai reng bawk a.

Nilenga an kal hnu chuan an khaw kar kawng a hla lem lo bawka a tuk chhun chaw fak hun laia khua an luh hman an inbeisei hle a, riahbuk sualin an han buai nak nak a Dammawia sakhi kah chu a chek te sawngbawlin a țhenin a sa an lo rep bawka. Zanriah an han eikham meuh chuan an puar tlang bawka bukah titi hoin an nui dar dar reng a.

Zamliani chuan Thansanga te en vang vangin "In khua chu ka pate khua ațanga hla tak a ni si a, eng vanga rawn lang hlawl nge in nih?" a han ti a Dammawia chuan nuih vur vur pahin "Hei pui hi mawle, a pawttu an awm tlat a. Favang awllen lai chuhin kan rawn zin rawih mai a ni" tih pahin Liansanga hnung chu a beng ri dap dap a. Zamliani chuan "Ka pa chu a va vannei em, Kawnzau makpa chu Pasalțha Liansanga a nih hlauh chuan" a han ti a, Thansanga chuan "U Zam, Kawnzau makpa han tihah i makpa pawh a ni thut thei a nia" a han ti a, chu veleh Zamliani pasal chuan "Ramtei maw, a nulat a hun ve tawh reng a ni, Chungnunga nu kan farnu chu a vannei dawn hle mai a" a han ti a, Zamliani paw'n "Chemtei chu a mawl si a, engtin tak inchhai thlu ve che u ni maw" a han ti a Thansanga chuan "U Zam a mawl mawl hi an intawng duhin an inkawp rem duh viauin ka hria a ni" tih pahin a nui suk suk a, mahse a thawm hriat ruk erawh a rawn hnai zel tih hriaiin a silai chu a ban ru da da a, Dammawia chu kheuh zeuhin "Ka va inthiar lawk ange" tih pahin a tho tharh a.

Pawn a va thleng chiah chu mei engin a chhun phak loh chin a Sakei lo bawk thim run chu a hmu thei ruai ruai a. Sakeiin Thansanga a hmu chiah chu ding chhuakin mei eng lamah chuan rum chhur chhur chungin a rawn kal ta mai. Dammawia rawn chhuak ve chuan "A va lian ve" a rawn ti phawng bawk a. Buk chhunga awmte pawhin sakei rumri chu hre mah se, Zamliani te nufa in an hlauh a hlauh avangin Liansanga chu ring thei ang berin a titi ta lawng lawng a. Zamliani pasal pawhin Liansanga thil tum chu a man kher mai. Hmun ralți takah awm mah se an rilru put dan chu a mawi a tiin chhuanawm a ti em em a, a nupui chu kuah pahin a rilru tetein "An sawi anga nunrawng chu in ni lo tih ka hre ta, nang ni tluka nun ngil hi awm tak ang maw?" a ti rilru vawng vawng a.

Zamliani pawhin sakei rum thawm chu hre lo a ni lo, mahse Liansanga hre hauh lo anga a la titi char char avangin a hlauhna tilanglo turin a inthup hram hram a ni ber mai. Thansanga leh Dammawia pawh bukah rawn lut lehin Liansanga chuan a lo en he haw a, zawhna mitmeng nen. Dammawia chuan "I chhe lutuk" tih pahin a mitmei hmangin an chingfel tawh tih a hrilh nghal a tuibur hmuamda vel lekah saruh khel ri bawp bawp thawm an hre ta Zamliani meng phawk hru chu Thansanga chuan "U Zam hlauthawng suh kan sarep beiseia rawn kal a ni e, a duh kan pe tawha a kal leh mai ang" tiin a hnem ta a.

Thansanga sawi ang ngei chuan zing khawvar thlenga ti buai loin tui takin zan mu an chhing a. Kawl a rawn en rual chuan ei an rel sawk sawka, ei nghal mai loa funin an kal chhuak ta zawk a, hmun remchang deuh an hmuhnaah eiin vaibelte zuin an han chawl khawmuang leh tete a.

Ti chuan tluang taka kalin Chhumring khua chu chaw fak hun laiin an lut ta. Chhumring Lalpa'n Thansanga'n a hnena a intiam ang ngeia an buaina a chingfel tih a hmuh chuan Thansanga chungah chuan a lawm hle mai. A fanu te chhungkua a hmu lehte chu a lawm zualin a tupate pahnih chu a chawi lawp lawp reng a. Thansanga hnenah chuan "Sangte in duh duh min dil rawh u, ka neih zawng anih phawt chuan ka pe em em ang che u" a han ti rawih a Thansanga chuan "Lalpa, phut let neia thil ti kan ni hleinem, tunah chuan kan rawn kal chhan ang ngeia i khuaa ni rei lote cham zawka haw leh hi kan duh awm chhun chu a ni mai e" a han ti a Chhumring Lalpa chuan pek luih tum pawh ni se an la duha a rin chuan loh avangin titikhawchang sawi puiin zan riah lal ina a kil tir hnu chuan an thlenin lam panin Thansanga leh Dammawia chu an chhuak ve ta thunga.

Liansanga erawh a hmangaih Ramtei bula hun hman a thlakhlelh ve avangin leng chhuak lem loin Ramtei kiangah chuan a tap chawt a. Ramtei chuan Liansanga te an kal thut avanga a hlauhthawn zia te a sawi sep sep a Liansanga paw'n ngaihdam te dil țha in hlim takin an inkawm a, Zamliani'n leihkapui lama a naute inkawm chu a mitmei hmanga a pa a hrilh chuan a pa pawh chu nui vur vurin "A hla bawk si a, mah se nangni inrawn haw tal a a zia alawm" a ti chhuak phawnga Zamliani chuan "Ka pa țhin hi, innei rual em an la nih loh saw, bakah pasalțha a nih saw, a to dawn lutuk" a han ti a.

Chhumring Lalpa pawh chuan Liansanga chu a to dan tur zia a hrethiama a fanu sawi chu dik a ti hle a ni. Dengliani te inlamah pawh Dammawia titi kotlanga dak tlangvalte chu an ri leh hak țhin Thansanga erawh nuam a ti chiah lo, Dengliani'n ngaihzawng ena a en deuh tlat chu hriatthiam har a ti hle mai.

Leng hawn ar a khuan hnu chuan tlangval te chu an țin sap sap a Dengliani pa'n Thansanga te țhian dun erawh a la chelh rih a. Tlangvalte an chhuah zawh hnu chuan Dengliani pa chuan lawmthu sawiin lawmman a tan thil pek a duh thute a han sawia mahse Thansanga te chuan mawi hnai taka hnar zelin a tawp atawpah chuan an hnar fithla thei ta hram a. Zawlbuk lam pana an kal tur chu Dengliani chuan "Ka pa, daikal ka duh riau mai U Dama te rual hian ka va chhuak phei lawk a nge" tiin a zui chhuak ve ta a. Zawlbuk an thlen dawn hnaihah chuan Dengliani chuan "U Sangte min va hruai lawk mai teh, ka hlau deuh" a han ti a Thansanga chuan hreh hle mah se kal lohna chi a ni si lo. Dammawia lah chuan "Ni e, Dengi a chak zawng tak a lawm" tih pahin a kalsan ta vawk vawk mai si. Hnambei lo zetin an kal dun ta a.

Dai an thlen chuan Dengliani chu la kal hla leh deuhin Thansanga pawh chuan a zui ve zela "Dengi hei laiah hian ka lo nghak mai ang che" a han tih chuan Dengliani pawh chuan lo aw vein a kal fal ta hleka Thansanga pawh thingkung pakhat nghengin a țhu thluang duaia, Dengliani rawn let leh thuai a hmuh chuan kal pui nghal mai a han tum a mah se Dengliani'n "u Sangte thil sawi pui lawk duh che ka nei" tih paha a pawh tlat takah chuan pasalțha huaisen chakna te kha khawnge an awm tak? Hmeichhe chak lo takin a pawt țhu ta riai riai a. An țhu fel chiah tihah chuan Dengliani chuan Thansanga chu kuah thlawpin a duh zia te chu a hrilh ta vek a. Thansanga tih ngaihna hre lo chu a insehruh vak vak ringawt mai a. Dengliani lah chuan thlem dan chitin renga thlemin a puante chu a bih uluk lo sawt hle mai. Thla engin a mal no a rawn chhun fuhte chu Thansanga tan hmuhnawm tham a va ni teh lul em. Dengliani lah a hma aiin ațang nasa sauh sauh mai si.

Thansanga chuan Dengliani chu bawhthlu țhuaiin a awma Dengliani hnute per bawih chu țham sak tawn tawnin a puan bih chu a phelh sak ta vat vat a. Dengliani lahin Thansanga chu chan a hlauh em avangin a khawih ang ang chuan a awm tawp mai si. Thansanga tlangval naupang leh thaza tak, tan chuan a hnuaia khawkhat nula chhuanvawr ni pha ve saruak ngal ngata awm chu chhuah phal chi ni mawlh hek lo le, a mipatna khawng luah chu Dengliani taksa a luh tir tumin a chuktuah ta ran mai. A han nawr a Dengliani na ti rum deuh kawk a vang chuan chawl detin nula thianghlim taksa chu a han nul kual leh tete a chutah han insangmar lehin a han nawr leh dawna mahse a bengah Parmawii aw ngeiin "Rinawm takin ka lo nghak reng ang che" a tih kha a rawn ri ta tlat mai.

Chu veleh rang taka thoin Dengliani chu a puan bih țhat tir sawk sawkin "Dengi, ka thei lo a ni. Ka chak lo a ni hauh lo. Mahse hmangaih ka nei tawh a ni, ka hmangaih loh hmeichhia ka khawih chhe thei lo a ni. Min hrethiam a ni ang chu, i let zawk teh ang" tih pahin Dengliani chu a kuaha khaw lam a pan pui ta a. Dengliani te in an thlen dawn chuan Dengliani chuan "U Sangte i hmangaih chu a vannei hle mai. Kei zawng ka van a duai a ni e, ka tawng tlai em che a, eng pawh ni se fanau mal tluan chawia hlim taka leng dun turin ka duhsakna sang ber ka hlan a che u" tih pahin a mittui chu a hru sawk sawk a inchhung lamah a lut ta a. Thansanga pawh Zawlbukah lutin a han mu ve a, Dammawia'n "Nep lutuk" tih paha a rawn tlawh zawt chuan Dammawia'n a lo enthla vek tih a hrethiam ta Liansanga lah a lo nui khur hlawk hlawk bawk si Thansanga lah zak bawk si a țhiante chu a tlawh sawk sawk reng a.

A hnu nithum chhung chu an han cham leh ren rawn a, an tlangnelin a nuam an ti ve hle mai. Dengliani erawh a rilru na chu a hmel hmaiah a langa a cher nghal duk a, a taksa chu a tla hniam rawih rawih a ni ber e. Thansanga tih ngaihna hre lo chuan a hnem leh ringawt țhin. Mahse a biak a piangin Dengliani hnuk chu rawn no zualin a țap leh ringawt zel si a a mangang chuan Dammawia chu a pur ta ringawta Dammawia pawhin hrethiamin Dengliani chu thing phurhnaah te chhawm zelin khaw tual mite ngaihdanah phei chuan an inkawp ang hialin an ngai a ni. Mahse an inkawp loa Dammawia chuan Dengliani chu tihhlim hram hram a tum a ni ber mai. Ramtei leh Liansangate hmangaihna chuan par a chhuan chhunzawm zela Lal chhungkaw mi leh sate pawhin an hriat pui veka Ramtei chu an chhaih zui nasa thei hle. Liansanga lah Lal ina thleng anih miau avangin Ramtei an fiamna te chu lai zetin a lo nuih pui mai mai țhin bawk a. Ni thum hnuah chuan an khaw lam pan a haw an tum ta a.

An haw dawn zanah Thansanga chuan Dengliani chu titipuiin duh lo a nih loh thute leh hmangaih a neih hman tawh avanga hmangaih thei lo anih thute thiam taka a hrilh takah chuan Dengliani pawhin hrethiamin hlim takin an inkawm ve ta zawk a. Ramtei mittui tla erawh Liansanga chuan a hru zing mawlh mawlh teh e. Nupui pasal nei atan em chuan an la naupang deuh si a, mah se a rang thei ang bera palai tir tura inchah mawlh mawlh chungin an inmangțha ve ta a. A ni lina zingkarah chuan Lal inah awm țhapin Lalpa chuan an iptepui chu laksakin an ah zawh tawk tur buhfai a ah tir țheuh a, khaw dang tlawh miah lo pawhin an khua thlennan a daih mai hmela an lawm hle mai. Ti chuan kawtchhuah lam panin an kal ta a. Liansanga chuan Ramtei tui chawi rawn haw chu hmuh duh viau mah se a theih hmelin a lang si lo a rilru nuam lo zetin a țhiante chu a zui hnak hnak a.

Dammawia'n "Saw tunge" a han tih chuan kawtchhuaha Ramtei lo ding reng a hmuh chuan pan vat vatin an han inkuah vawng vawnga ti chuan rinawmna thute tiam țha lehin a tawpna'n an han inkuah leh vawng vawng a, Liansanga chu a kal ta a.

Ramtei chuan a theih chhung zawng chu thlirin a mittui tla chu hruk zai reng rel loin a hmangaih kal liam mek chu insut hlawp hlawp chungin a thlir liam ta a. "U Lian, nang zawng pasalțha i ni a, nakin lawkah kei aia țha i la tawng anga, kan karlah a hla tham si a, kan tan chuan kawng hi a kaw lo em a ni ti raw. Hmangaih tak tawk la fanau mal tluan chawi a tar kun khup bih thlenga dam turin duhsakna ka hlan a che. Mahse kei zawng i lo lan leh tak mialah tiin, ka lo nghak reng ang che" tiin khaw lam pan tumin a han inher ta a.

Mahse a hnung lawka a u te nupa a hmuh chuan phu zawkin a han insiam țha sawk sawk a, Zamliani pasal chuan "Chemte pasalțha te chuan an thutiam an bawhchhe mai mai ngai hleinem. A rawn lang leh ang tih ka hria a ni" a han ti a Zamliani pawh chuan "khatianga indawm kun loin a lo lan leh hun nghaka i inbuatsaih a ngai a nia, a thi anih loh chuan a rawn lang leh em em ang tih ka tiam a che" a han ti a. Ramtei insum zo lo chu a u awmah chuan bei thlawpin a țap hawm hawm a, Zamliani pasal pawh chuan lo kuahin an nau, nula tuaitir kar hla di hmangaihna avanga khawhar em em chu khawngaih leh duat takin an chhawm haw ta a.

Silai puak țhuai țhuai a reh fel ta maw tihah chuan pasalțha vanglai hun hmang mek tihtih hriat tak pakhat chu rawn ding chhuakin "Darkawn tlangvalte u, zam suh u, pawih mawngbal ho chu chimih vek ang aw, Pasalțha Kapthanga ka lo kal e" tih pahin pawih ho lam pan chuan chemsen nen a tlan ta. Tlangvalte pawhin zui ve nghalin pawih ho chu tam hle mah se Kapthanga hma zawn chu an hek hiau hiau hle mai. Pawih pasalțha pakhat chuan Kapthanga chu thlurbingin a lam a pan a, Kapthanga pawhin lo hmu vatin chu pawih pasalțha lam pan chuan a tlan ta.

An intlan pel zawk a, mitkhap kar lek mah ni se Pawih pasalțha lu chu a lirthla tawl mai a. Pawih tlangval ho chuan mak an tiin an zam hle mai. Mahse a tam zawk an nih miau avangin Darkawn ho chu an tawlh zel a. Chutih lai mek chuan Thansangte haw ta pawhin Darkawn lama kal kuala Kapthanga hmuh zuaia a tuk lama haw leh tumin Darkawn ram chin chu an lut ve chiaha zan khat an riah leh hnuah Darkawn khua an luh hman chu an beisei a ni. Eng tak thleng ang maw.

Thansangate chuan ei relna tur hmun remchang leh riahna tur an han zawng sawk sawka, an duh ang an hmuh ruala che sang sangin an inpeih fel meuh chuan zanriah kil a hun der mai. An han kil leh sawk sawka ti chuan bukah mu chunga titi hoin chung mi huaisen pathum te chu zanthim chuan a ti buai lo a, thawm riva mak sak tak tak leh hlauhawm tak takte pawh chuan an titi khawchang sawi a ti bahlah hek lo. Darkawn lamah erawh lal mualah chuan Kapthanga chu ni khaw hre loin a let renga Darkawn tlangvalte chu an hnung khirh vek bawka. Khua chu pawih pasalțhate'n an awp bet hmak tawh a.

Inbeihna muala nunna chan tam takte ruang pawh chu seng hawi loin chu zan chu pawih tlangval ho chuan nuam tawlna'n a hmangin lusei nula rei lo tea pawih fa pai mai tur an awm nuk hial ang le. Darkawn lalpa thinrim insehruh țun chu pawih pasalțha pakhat chuan beng thal tawpin "Lungțuan pasalțha Zakhama thusawi i hnial ngam a maw? I fanu hi min hlan la, ti chuan khua hi kan chhuah san ang. Anih loh chuan ni thum hnuah i fanu hi hruai luiin i khua hi kan hal ral vek ang" a han ti a Darkawn Lalpa thinrim lutuk chu a mittui a luang zawih zawih thei hial a ni. Chu zan chu Darkawn khaw tan chuan manganna leh lungngaihna thlentu a ni a Lungțuan tlangvalte tan erawh hlawhtlinna a ni thung.

Zing ni chhuak chuan Darkawn khua chu a ngai ang bawka rawn chhun lehin a chhunga chengte erawh lungngaia indawmkunin, nutling țhenkhat țap leh rawih rawih thawm nen khaw mite tan chuan a va rapthlak tak em. Thansangate pawh kal chhuak vatin, Darkawn khua chu a hma thei ang bera luh a, khaw chhung ngeia zan mutmu han tuah an chak ve tawh a ni chek ang chu an pheikhai a zang tlang hle. Darkawn khaw lal inah erawh Lungțuan pasalțha Zakhama leh a aihnah phahpui Pasalțha Tinchhawna te chuan Darkawn lalpa thla thum zu chu chawi thlain an tlan dun tlut tlut mai a. Tuk țhuan ei khamah chuan Darkawn lalpa chu lu kai deuh chhelh chhulhin an nawr leh ta. Mahse lungtum biak ang hlauhin a chhan pawh a chhang eih lo a, mahse pawih pasalțha pahnih chuan lal fanu chu a pa phalna ngeia lak ve an duh tlat si. Lungțuan khua hi Darkawn ațang chuan zan enge maw zat riah ngai a ni a. An khaw lal hi lal duham leh nunrawng tak a ni nghe nghe. Lal huaisen tak anihna chuan a khua inza nufa vel lek chu an hnaih khuate tlawn rawn a nih tir thei tlat. A pasalțhate pahnih lah țiau ralah chuan a ber kai ni chho mek vanglai hmang mek an ni bawk nen a khua chu te hle mah se an vel khuate chuan an hmelma nih an chak lem lo hle a ni.

Darkawn khua an rawn run teh daih chhan hi favang awllen lai, rammu turte tana ram mut hun tak a ni bawk nen. Darkawn khua lusei khua te zinga pasalțha nei tlem ber chu an rawn bitum a, mahse enthla tura an tirhte'n Lalfanu Zoliani hmel țhat zia an sawi avangin Zakhama chuan khua awp beh phawta lal fanu chu hawn a tum a ni. An inbei nasa hle a Darkawn lam chu mi sawm sarih zen zawn, hliam tuar nen, an dam khaw chhuak ve hrama, pawih ho pawh chu tiang zat vel tho chu an ni awm e. Lal huaisen leh ral hrat tak khuaa awm an ni a an tlangvalte pawh tlem hle mah se an feiin ral beihah hi chuan an inchhuang ve țhin hle a ni. Chaw fak a rawn hun meuh chuan lal tuala mi pakhat ang hlawih hlawih thawm an hre ta Tinchhawna chu va chhuakin Kapthanga rawn harhin inmalbeiha tlangvalte a cho kual chu a zu hmu a. An inbeih lai khan Kapthanga ralhrat zia an hre chianga a hnung lam ațanga beiin nikhaw hre loin an siam kha a ni a, inmalbeiha hmachhawn chu an chak lem lo hlawm hle. Tinchhawna chuan "Naua i bengchheng hle mai, i lu kha ka lak i duh anih loh chuan ngawi hle hle rawh" a han ti a Kapthanga chuan Tinchhawna mitah tak en chungin "Anih a hnu lak chu han tum ta pauh che, pasalțha Kapthanga hi min hneh ange maw chu. Ngawi tak rawh u phuba chu ka țhiante nen kan rawn la ang, ngaihdam min dil ula chhuak zawk mai rawh u" a han ti a, Tinchhawna thinrim lutuk chuan "I țhiante kha anih kha i tluk ruala inpe te chu, khang sazu ho nen khan phuba in rawn la anga maw" tih pahin a han nui uar uar a. Mahse a lu a thir rawn innghat a hriat chuan han hawi let a tum a "Dam i duh em? Che hauh suh?" tih ri avang chuan che loa ding ngawi rengin Kapthanga chuan "In lo kal a ni maw? Ka rilruin ka au nasa che u a sin" a han ti a Thansanga chuan Tinchhawna chu lal muala tlawh thla țhuaiin "U Kap han infiam pui ve la mawle" tih pahin Kapthanga hma zawnah chuan a chempui chu a theh thla nghal bawka. Liansanga pawh Zakhama silaia tin chungin a rawn chhuak ve bawka. Dammawia leh lal chhungkua leh upate'n rawn zui bawkin. Kapthanga leh Tinchhawna inveh mek lai chu an en ta a.

Tinchhawna chu pasalțha ral hrat tak mah ni se, Thansangate ang thoa hmar ho țih khai em em ni ve Kapthanga tan chuan a nem mah mah a ni. Tinchhawna hah lutuk chu a thaw hlawi hlawi tawh a, Kapthanga lah chu a phur telh telh lehnghal. "Pasalțha Kapthanga lu hi a duh duh tan a lak ngawt theih hleinem" tih pahin a chho zawngin a chem chu an vai puata Tinchhawna khabe chu ri rawpin a țhingțhi nghal rawp bawk a. A khabe ruh bal leh hêk huam chu hupin a thaw hrawk hrawk a Kapthanga chuan a chem chu vai leh pawpin Tinchhawna lu chu a la ta. Pawih tlangval chet thawh rawn tumte chu Dammawia leh Thansanga chuan an vau bet hmak bawka. Zakhama thinrim lutuk chu rawn au chhuakin "Nangni nen hian buaina kan nei em ni? Eng vanga rawn inrawlh nge in nih? Lo ngawi tak rawh u, a fawng chelhtu ni lo ula zawng, in lu ka lak vek loh atakah" a han ti phiar phiar a. Liansanga chuan "I tum chhin thei alawm" tihpahin leihkapui ațang chuan a hnuk ta. Zakhama paw'n Liansanga chak zia a hriatin a thu sawi chu a inchhir leh rum rum hial a, Liansanga lahin a hnuk dawr dawr bawk si Zakhama chu a meng phar nasa ngei mai. Kapthanga'n an khaw tlangval ho a han phelh zo chu intiam rual ang hrimin rawn bawh rawn an tum ta mai. Liansanga'n "Hei hi chu ka chan pual a ni e, kiang rawh u" a han ti a tlangval pakhat chuan "Kan khaw buaina a ni a, kan chinfel turah dah rawh, min puihna avangin lawmthu erawh kan sawi e" a rawn ti a. Liansanga thinrim chu a mitmeng rawn thlak hlawkin Zakhama bulah chuan dingin "A ngam chuan rawn khawih rawh u le, inhneh loh hnu leh inhneh ngai loh tur hi kan țang rual dawn e" a han ti a, Darkawn tlangvalte chuan an bawh ngam mai si lo, an ri nuai nuai maia chu tih lai tak chuan silai lo puak țhuaiin Kapthanga silai hmawr khu vung vung chunga lo ding chu an en țhapa "In zak lo emni? Anni hi awm lo se kan thi vek ang tih in hria a ni lawm ni? A mala bei ngam inawm anih loh chuan ngawi rawh u" a rawn tih takah chuan ngawi țhapin Liansanga chuan Zakhama lam hawi chuan a chem chu a vilik zauh zauh a, Zakhama erawh chuan a hreh hmel kher mai. Khati khawpa hnuk phar nasa thei tu beih chu a hreh viau a ni chek ang chu țhing țhi rawpin ngaihdam a dil ta a.

Liansanga chuan lal hnenah hlanin kal san a han tuma mahse mipuite chu dan rual lohin an rawn tleh huk ta mai. Kar loah Zakhama leh pawih tlangval la dam zawng zawngte chu an chimih ta phiar mai a. Liansanga chu nui vur vurin "Ka lo that nghal lo a aw, thi tur tho tho" tih pahin Darkawn lal in lamah chuan a kal chho a. Darkawn lalpa chuan lo chibaiin lawm thu a lo hrilh mawlh mawlh a. Inbeihna a tlangval thi an awm nual avangin khaw dai lama ruang senghawi turin an kal ta hlawm a, an khaw tlangvalte chu zah taka phumin pawih ho erawh hmun khatah dah khawmin an hal ta hmiah a. Inpek hnua hnehna chang leh ni mah se lusun khawharnaten an chiah piah em avangin a lawmna pawh siam lem loin ni chu an hmang liam ta a. Lalpa ber chuan hmun danga thlen phal hek lo, Darkawn lal inah chuan thleng khawmin zanriah puar el euha an ei hnu chuan Zoliani hoin leihkapui lamah țhuin an titi a. Dammawia phawk rawn chhuak chuan "U Zo pasal neih i hun ve tawh a nih hi, i faten U Chawia fate an rual pha lo lutuk a nge" a han ti a Zoliani meng phawk hru chu an hmuh hmaih lo tlang hle an inkheuh ru sap sap hlawm a, Zoliani chuan "Sangte in monu chu eng ang mi nge?" a han ti a Thansanga chuan "Zehtet lam nula a nia, khaw inpawh ngang kan ni bawka ka u zinin a lo va hmu a ni awm e" a han ti a, Zoliani chuan aw zangkhai lo zetin "Anih leh fa chu an nei tawh tihna em ni." a han ti leh a Thansanga chuan "Aw kan zin chhuah hma deuh lawk khan mipa chu an neih ve kha mawle" a han ti a Zoliani chuan "Ka lawm pui lutuk tih lo hrilh rawh u aw" tiin hnuai lam chu a bih ta ngar ngar a.

Chawiliana Darkawn khuaa a kal ve țuma an inmelh dante, nula tlangval tuaitir mai mah la ni mahse Chawiliana lo chu a thinlung chhungril luah zo tu an awm tak tak lo tih a hre chiang ber tu a ni. Chuti maia nupui a nei chu tawrh har a ti hle mai. Mahse, Dammawia'n "U zo kan han fiam mai mai che anih kha, kan u ve hi zawng nula lam reng reng ngaihsak pawh a tum lo anih hi" a han tih chuan "Ehee in va han sual tak em?" tihpahin a chum ri awng awng a Dammawia te lah chu an nui nasa em em lehnghala Zoliani mittui tling pam chunga a nui her her ri chuan Chawiliana beng thleng pha tak ang maw.

Darkawn khuaah chuan zan hnih riakin Kapthanga te inlamah emaw lal inah chuan an tap chawt reng a. A nithum naah chuan kal chhuakin Chawiliana tana Zoliani thuchah nen chuan an khaw lam panin an kal ta a. Kal chak lem loin kawng lakah an chawl zeuh zeuh reng bawka hmanhmawh a ngai lem chuang lo bawk nen zan sarih an riah hnuah Zehtet an thleng ta hram a. Zehtet an luh meuh chuan ni suk chen vel awrh chauh a ni tawh a, Biakliani te inlam pan vatin an va thlen chuan Biakliani chuan lo be lumlam vat vatin an zinna chanchin te a lo zawt sawk sawk bawka. Thansangate paw'n țha tete a chhangin zanriah te chu an kil tlang ta nghala. Zanriah killai chuan Dammawia chuan "U Biak u Thangkunga te hi an ram vak em ni?" a han ti a Bialiani paw'n "Ee ni tak ka lo mangnghilh daih peka lawm mawle, aw kan lal leh upaten sai ram chhuah an rawt a, an kal ta hlawm anih kha" a rawn ti ve bawka. Biakliani fanu chu zanriah an eikham chuan pawm kualin an chhaih nui har har renga. Leng len ar a khuan hnu chuan lal inlamah kalin, an chanchinte an han thlen sawk sawka ti chuan Chhuahchawngate in lam panin an inzui chhuak leh ta a. Inchhung an va luh chuan Țhasangi leh a nute pahnih lo awmin, Thansanga te chu an lo chiau au thuai thuaia eng emaw chen titi hoin an nui dar dar țhin bawka. Lianmawia pawnto hawin Thansanga te a hmu chu bawh kual nghal chung chungin "U Sangte apa'n ramah min hruai ve duh si lo a inkhuaah ka lo awm ve dawn, a pa Renga chuan min hruai duh hrim hrim ang" a han ti a Thansanga chuan "E khai, i la naupang rih deuha chu vang mai mai alawm. Rawn lian leh deuh la keimah ni ngeiin kan hruai ziah ang che. Pasalțha Lianmawia i nih kha" a han ti a Lianmawia pawh pasalțha tia an han koh chuan nuam a tiin "Pasalțha Lianmawia ka nih hi" a han ti vela mahse a sawitu Thansangate pathum bakah Țhathangi mitthlaah erawh tlangval la naupang tak, hlim hmel pu reng, leh țawng tam lem lo mahse huaisen tak leh țhiante tana nun hlan tu Pasalțha Lianmawia kha a lang tlat si a ni.

A tuk zing ni chhuah rual chuan Bualthleng lam pana kal lehin, an khaw luh hun tur suangtuahna nen an kal chak tlang hle mai. Chawhnu her a nih meuh phei chuan Bualthleng chu an hnaih tawh hle a, an kal chak tlang bawka lo sul haw hmaa luh theih an inring bawka an inrin ang ngeiin hma takah khua an lut ta. Dammawia te in a awm hmasak ber avangin lut khawm nghalin Dammawia nu chu chanchin te hrilh pahin an insil thlan dai hlawma. Ti chuan lal mual lamah chhoin Thansanga te in an va luh meuh chuan Thansanga nu chuan lo kuah vawng vawngin an thang rei a tih thu leh a ngaihtuah zia a lo hrilh nghal char char a Thansanga paw'n hnem ve malh malhin rei tak pawh awm loin Liansanga te in lam an pan leh ta a. Liansanga te ina tuibur hmuam da vel an țhut leh hnu chuan Lal in lamah an han kal ta a. Lalpa Dohranga'n a pasalțha tuaitir pathumte a han hmu chu lo chiau au vat vatin, zu te a lo zuk a, an zinna chanchinte an thil tawnte a han zawta anni paw'n chapo hauh si loin țanpui ngaite țanpui tura buainaa an inhnuhluh dan te chu an hrilh vek bawka. Lalpa Dohranga chuan an ni pathum chu en vang vangin "Ka vangkhaw mawitu, kan BUALTHLENG MAWITU ngei inni ve ta. In u te chuan chhungkua dinin ral ramah phei chuan kal tam lo se ka duh tawha, Sangtea pa thihna avang khan in ute hi chu nupui an neih takah chuan in lamah tal tam se ka duh tawh a ni. Nang ni hian in ute inkhum tawh tih ka hria a, ka ring tawk che uin ka chhuang takzet che u a ni"a han ti charh charh a. Thansanga chuan tap lama lalfanu Parmawii eirel mek chu nuih var varin Parmawii pawhin a lo nuih ve seih bawk a. Ti chuan zan lama leng leh tura inchahin an țin ta hlawm a. Zan riah eilai chuan Chawiliana chuan an zinna chanchin te chu a zawta, a zawt chipchiar hneh bawka Thansanga paw'n zawhna a piang chu țha taka chhang vekin, an chet dan a sawi te chu Thangliani ngaihnawm ti lutuk chuan chaw bar theihnghilh țhak țhak khawpin a lo ngaithla a Chawiliana'n "Thangte bar rawh" a rawn tih chuan nui chhuak hukin a bar ve leh malh malh a. An eikham hnu chuan chhuak leh vatin Runthanga tein lamah chanchin an va hrilh ve a, Runthanga ho chuan chhuakin Rengliana an va sawm leh bawka lal in lamah chuan an kal ta a. Lal in an han luh hnu lawkah lal fanute pathum leh Thansangate chu leihkapui lamah an chhuak ta diak a Runthanga leh Rengliana te erawh lalpa kiangah awmin upa hote nen an titi hlawm bawka. Thansanga chuan Parmawii kut chu hmer vang vangin "Ka ngai hman lutuk che a sin" a han ti a Parmawii chuan ner nang nang chungin "A niang inthang rei danah" a han tia Thansanga chuan an thil va tawn zawng zawngte chu hrilhin Dengliani nen an inkar erawh a sawi lang duh lo thunga Parmawii paw'n ngaihnawm ti taka lo ngai thlain midang an bul lawka nui dar dar te chu an hre lo emaw tih mai tur an ni. Parmawii chuan Thansanga chu a chhuang ru hle mai a, a nupui han nih a, tlangnel taka a bula han awm ve pawh a chak hle a ni. Lal inah awmin lalfanu ni mahse, fa lak an nihna chu an theihnghilh thei bik si lo a inthlahrunna chen tam tak an la nei tho a ni.

Thansanga paw'n inneih thuai thuai chu duh hle mah se, a u Chawiliana han hmakhalh em chu dik a ti si lo. Leng hawn ar khuan thlenga inkawmin leng hawn ar a khuan takah chuan Zawlbuk lam an pan ta a. Zawlbuk an zuk thlen chuan mu vat vatin, an zin kual rei tawh bawka an mahni khua ngeia an han riak leh thei chu nuam an tiin tui takin an chhing ta siai siai hlawm a. Zingah hma takah Thansanga chu thoin a țhiante chu tiharh lem loin a haw ta a. Leihkapuiah țhuin a u rawn haw ve hun chu a lo nghaka, tuibur hmuamda vel lekah Chawiliana pawh rawn hawin Thansanga chuan Zoliani thuchah chu a hrilh ta zung zunga Chawiliana pawh nui suk sukin a hlim hmel hle. Lo lam hna khawih a la hun lem lo bawka mitin nun chu a nuamin, nula tlangvalte tan chuan am taka hun hman dunna rem chang, awllen lai a la ni ve tlat. Thansanga leh Parmawii pawh thingphur dunin zan lamah an inkawm leh bawka an inhmangaihna chu nasa zual zelin, a hlim pawh an hlim dun țhin hle. Chawiliana pawh a mize dang ta lutuk chu a nu chuan mak a tiin a zawt fo bawka, Chawiliana lahin chhang ta'nge pawh ti loin a nuih liam mai mai tawp zela. Chutia a zawh fo takah chuan Zoliani thuchah chu Chawiliana chuan a sawi ta veka Țialthangi chu a hlim kher mai. A fapa te pahnihin lalfanu an han kawp mak chu awih pawh har a ti hial reng a ni.

Chawiliana chuan Darkawn lama zin ve ngei chu a duh tak tlatah chuan phal sakin Rengliana nen an va zin ve leh ta nge nge a. Ni enge maw zat an thang hnuah rawn hawin a hma aiin Chawiliana chu a rawn hlim haw ta mai reng a. A ni lah taka Chawiliana an khuaa nula ngaihsak ngai hauh lo khan, ngaihsak theih tlat loh chhan a lo nei ve reng chu lo niin, tunah chuan chu a hmangaih nen chuan hmangaihna thutiam hlen ngei tur siamin rinawm tura inchahna nen an rawn haw ve bawk a.

Favang awllen hun nuam tak chu thlahlel tlang hle mah se, chelh din theih a ni si lo. Kar lovah a liam ve leh ta mai reng a. Lo lam hna țulah an han buai leh nak nak hlawm a. Thansanga te pawh a tu-a-mah inkawm hman loin anmahni tawka țhahnemngai tak chungin an thawk tlauh tlauh reng a. Parmawii nen an inhmangaihna chu a ni telin a zual zel emaw tih mai tur a ni a, Lalpa Dohranga lahin Thansangate unau sa hleh an hmeh apiangin "Makpa chhuanawm tak neih zawng a nihlawhthlak teh mange tiraw, Chemte" tiin Parmawii chu a han fiam zauh zauh țhin a.

Zan khat chu khawnbawl upate an țin fel ta maw tihah Lalpa chuan a fanu te pathum chu kai thovin, Herliani chu Rengliana te nupa ko turin a ti nghal bawk a, midangte chuan a ngaihna an hre lo tlang hle. Lalpa ber lah engmah a sawi tawh si lo.

Rei loteah Herliani chu rawn lutin, Rengliana leh Sangzuali rai puar luah tawh nen chuan an rawn inzui luta. Zan zana lalpa berin a koh takah chuan hmanhmawh takin an rawn kal nghal a. Rengliana chuan "Lalpa, enge min koh chhan ni ta le?" a han ti a.

Lalpa Dohranga chuan vaibel pak khuk tual tual pahin "Renga, tu hmel hmuh ka chak hle tawh mai. Sangliani te lahin hmuh tik ni a awm thei tawh si lo a" a han ti te te a, a tuibur hmuam chu dap keua pik chhuak puatin "Hei kan chhungkaw chungchang hi sawi lawk ka duh a. Renga, nang pawh ka makpa inih anga ko che ka ni"a han ti te te a. Parmawii lam chu hawiin" Chemte, he inah hian nang leh i unaute hi mikhual awma han awm chang in nei leh țhin. I nu bulah hian pangchang viau chang nei mah ula, ka bula han tim leh dui changte hi in nei tlat mai a. Kan fate inni lo tih chu kan hria, mah se kei leh i nu aia hmangaih tu che u hi an awm bikin ka ring lo a ni. In lo nula ve ta a, nakin lawkah pasal te in la nei duh dawn a. Mawite, Thansangate țhian thum hi makpa a tana ka duh berte zinga mi an ni. Amaherawh chu pasalțha an ni a, an nun hi engtik lai pawhin a derthawng tih hria ula ka duh. Amaherawhchu nei suh u ka ti hauh lo. Ka fate in ni a, rilru fim tak nen duh thlang tur che u in ka duh a. Khaw dang lalfapa in duh anih loh chuan ka khaw mi leh sate ngei hi nei u la ka duh a ni."

"Fapa kan nei lo va, chuvangin Renga, nakin lawkah chuan ka lal țhutthleng hi i luah a la ngai mahna. I naute hi i huikhawm tlat tur a ni. Khual khuaa an lawi anih ngat phei chuan an chanchin ngaichang reng renga hun i hman a ngai dawn tih hre reng ang che"a han ti charh charh a.

Sangzuali chuan "Ka pa, chutiang thute i sawi tak mai. Min dam pui reng dawn alawm, tu hmel i hmu thuai dawn tih inhre reng la, hlim takin i hun hmang zawk teh" a rawn ti a. Lalpa chuan, "Chemte, min thlahtute thlarau hian min ko tawh a ni. Ka taksa a chak lo chho em em a, hrilh lo thei che u ka ni lo a ni. U Chawnghranga khan kei chauh hi a chak loh telh telh thu kha mi hrilh a, mual min liamsan ni khan a chhungte'n an tuar thiam lo hle anih kha. Khatiang tur khan ka duh ve lo che u a ni. Runthanga pa Runthera pawhin U Chawnghranga bulah min nghak reng tawh a ni. Runthanga pian hma lawk hian ral kutah Runthera kha a thi a, pasalțha nun ngil tak a ni a sin"a han ti leh charh charh a, Parmawii te unau leh lal nu chu an lo inkuah khawma an lo insut ri leh hlawp hlawp țhin.

Lalpa chuan "Min thlahtute hnena ka kalsan hun che u hi a la thleng dawn a. Mahse tih tur pakhat ka la nei a ni. Hei zawng hmeichhe tana hriat chi pawh a ni love, ka thutiam ka hlen ngei ngei ngai ala awm a, ka hlen zawhah chuan pialral lama kal turin ka inpeih tawh ang. Chumi hma chu ka intih chak luih hram hram a ngai a ni. Renga zuk haw tawh u, keini pawh kan mu ange" a tih takah chuan engmah zawt zui tawh lem loin an in mangtha ta a.

Mut hmunah chuan Lalnu chuan Lalpa chu kuahin "Sangi pa, i thutiam hlen loh i la neih hi tih kher a ngai em ni?" a han ti a Lalpa chuan, "E khai, ka tih ngei a ngai a ni." tih ringawta chhangin zan mu an chhing ta a.

Thlasik thli a rawn thaw a, naupang tualchaite pawh chaw țhing tlang nen khur beuh beuh chungin an ri ve nak nak a, zawlbuk lama tlangval riakte pawhin vawt an ti țanin puan sin tur an ken belh sap sap hlawm bawka. Zan khat chu Dammawia chu zanriah eikham velah Liansanga te inlam panin Liansanga nen Thansanga leh Chawiliana chu an va sawm leh bawka khaw lai dunga an kal lai chuan Dammawia chuan "Ka nu'n min hmuh lawk a duh a, kan in lam i pan teh ang u" tiin hma a hruaia midang pawh chuan zui vein Dammawia te in an zu luh chuan Dammawia nu chuan "Ti rawh u le min zui phawt teh u" a han ti a, a hmelah chuan a rilru a hah hmel hle mai. Engmah pawh zawt lem loin kawtchhuah lam pan chuan Dammawia nu chu an zui phei ta a.

Kawtchhuah an va thlen chuan Dammawia nu chu hawi kual ruaiin a hnu deuhah chuan kal hla leh deuhin mitthi an phumna hmun an va thlen chuan Thansanga pu Chawnghranga an phumna chunga mi pakhat lo țhu reng an hmu a. Thansanga chuan han biak tumin a han pan a, mahse Dammawia nu'n "Lalpa" a tih riah chuan ding chawtin Lalpa Dohranga ngei chu rawn tho chhuak vatin "Ka tlawh khat em a, ka kal zuai anih hi hawh teh u" tiin an let leh a.

Kawtchhuah lamah chuan țhuin Lalpa Dohranga chu zawi muangin a rawn țawng chhuak a "He thu hi khuaa awm keini rual ho leh inpate rual ho hian kan zep veka, sawichhuah phal a ni hek lo. In u Rengliana te pawh hian an hre hman lo a ni. Ka fanu upa zawk pian hnu lawk thil a ni a, chu mi hmain ka tlangval lai ațanga sawi a ngaia ni.

"Ka pa hunlai, he kan khaw ram kan kai hma, chhak lam țiau lui ațanga zan thum kal hleka hlaa kan awm lai khan pasalțha ti a chhiar ka ni ve a, in u Runthanga pa Runthera nen hian khual kai hial khawpin U Chawnghranga zarah khan kan hming kan chher ve a ni. Runthera erawh ral kutah a boral ta hlauha kei pawh Lal fapa ka nih vang chauha thi lo ka ni nghe nghe. Zanina ka sawi duh tak zawka chu țum khat chu kan khua ațanga zan nga kal a hla Chhunkhum khaw mi leh saten kan tlangval an lo thata, sa lu an inchuh avangin.

"Ka pa rilru na chuan chawi turte tukin palai a tir vata, mahse Chhunkhum Lalpa chuan palaite chu pakhat chiah rawn let tirin midang pahnih chu amah ngeiin a lo that leh ta si. Ka pa thinrim chuan U Chawnghranga hoin Chhunkhum chimih tur chuan min tir ta a. Kan va thlen chuan Chhunkhum ho chu an lo ralmuang hle mai. Tlangval thaza lai kan ni bawka Runthera nen phei chuan kan phur dun hle bawk a. Khawfing chah ruala khua bei nghalin kar loah khua chu kan haldarh veka, rallu pawh kan khai hnem hle. Chhunkhum Lalpa zu rui thil tih anih thu sawiin Upa țhen khat chuan ngaihdam min dil nasa em em a. Mahse U Chawnghranga thinrimna berhbu an tawn darh chiang em a, kan ngaidam thei bik tlat lo.

Mipa la dam ho chu tihluihna nen an mahni Lal in ngei chu kan hal tir ta a, khuaa chengte zawng zawng chu a ni la lain kan chhuah tir nghal vek bawka. Keini pawh awm khawmuang loin kan let leha, khua kan pelh dawna in awm hla ber zawnah chuan țap ri kan hre ta tlat. "Chhuak duh lo kan that ang kan ti a ni lawmni?" tih pahin kawngka chu ka phih hawng rawpa, mahse ka thil va hmuh chuan min ngawih tir chiang hle mai.

"Hmeichhe pakhat, la naupang tak hian a fanu nausen a pianna a la rei lo tih hriat ngawih ngawih pawm chungin a nu ruang bawhin a lo țap mek a lo ni. U Chawnghranga'n a rawn hmu ve chu a khawngaih hle maia. "Dova, i hruai haw mai teh ang" a tih chuan kei pawhin lo pawmin kan hruai haw ve ta a, kawng lakah chuan tih tlangnel tumin kan be renga an ni pawhin min nel ve tawh hle mai. U Chawnghranga khan a farnu ang chiaha inngai turin chu nu chu a chah mawlh mawlh a.

"Khua kan thlen pawhin ka pa pawhin a khawngaih ve hle. An in tur sakna tur duh a thlantir a, mahse mak takin khaw mawng lama awm a duh tlat maia, hmeithai, a fanu nen chauha khawsa tur an ni a, ngaihtuah viau mah i la an duh ang chuan kan sak sak ta a. Hun a kal zela ka pa thih hnua tuna kan khua kan rawn kai hnu lawk hian chu nu chuan a fanu tleirawl țan ve mek chu a thihsan hlauh mai a. Kei chuan kan inah la lutin, nupui ka neih hnuah pawh a la awm zela. Sangliani phei kha chu a awm hman nghe nghe.

"Țum khat chu pawih hoin min rawn run thut maia. Thanhrang kha ral rama a kal țum khatna mah ni se, vanglai hmang mek a ni bawka, pawih ho khan an khan lo teh a sin. Mahse kan nula kawl kha a bo ta tlat mai. Khaw dai lama ka nupui leh ka fanu nena kal an ni a zanthim hnuaiah an inhloh palh hlauh maia. Hnehna changtu mah ni i la lawmna pawh nei loin chu nula chu kan zawng ta a, ni thum kan zawn hnuah kham hnuai puk pakhatah phuar hlawma an lo dah kan va hmu a, an pawngsual nasa hle niin a lang.

"Hruai haw vatin in lama kan inenkawl hnu chuan a rawn zia hlek hleka a sawi dan chuan khatia khaw pawn lama a tlan chhia kha mi pakhatin a hmuiah hup sakin kha pukah khan a hruaia zan hnih ngawt a riah pui hnuah a lo kal san a lo ni a kal dawnah "Pasalțha Mungliana" a nih thu a lo hrilh nghe nghe a, mak kan ti tlâng hle.

"Pasalțha Mungliana kha khatih hun lai khan pasalțha tuaitir te a la ni a, pawih ho zingah erawh a ber te zinga mi ni hial a ni. Eng vanga rawn tel ve lo nge anih tih chu kan inzawt nasa hle nghe nghe. Vanduai thlak takin kan nula chuan Mungliana fa chu a pai ta hlauh maia. Kei chuan khaw mipuite hnenah chuan nau lo piang tur hi pawih fa anih a inhre tur a ni lo, a sawi chhuak tu apiang an thi ang tih thu ka chhuah a. Thanhranga khan phuba lak tum viau mah se Mungliana chu a rawn lang leh thuaia, ka farnu chu neihah min rawn dil nghe nghe. Mahse Mungliana khan nupui a nei a, ka farnu a neih chuan a nupui chu a țhen dawn a ni. A lehlamah chuan ka farnu hmangaih tu a ni tih ka hai lo hle. Mahse ka farnu avanga a nupui hmeithai a a siam kha ka duh loa ka lo hnar fithla țhak a. A thin pawh a rim hle Thanhranga nen khan inmalbeihah an incho riap maia, Mungliana kha a chak lo zawk ta si a mahse a nun erawh kan zuah sak ta anih kha. Ka farnu chuan fapa a hringa, Lal inlama cham reng a duh tlat loh avangin an in lamah chuan kan haw tir leh ta a. Chung hun lai chu Sangte, i pian hunlai kha a ni nghe nghe. Tin, chu nau lo piang chu Dammawi nangmah ngei hi i ni.

"I nuin 'I pa a thi tawh' a tihțhin kha ka ruahmanna a ni e. Ka dam rei pui tawh dawn lo che u a, thu dik hi inhriat a hun tawh a ni, ka farnu ti a ka sawi kha Dama i nu hi a ni e, khaw mipuite hian min zah thiama tuma'n an fate bulah pawh an sawi loh avangin i hre lo a ni. Pawih pasalțha fapa i ni a, mahse lusei rama awm i ni thung. I pa chu a la dam a, i hmu duh anih pawhin ka dal hauh lo ang che, lo lam hna pawh khawtlangin kan thawh sak vek ang che u. Mahse i pa khan i nu hi pawngsual mah se neih hial a duh a ni tih kha hre reng rawh" a han ti a.

Dammawia chuan mak a ti hle mai. A nu chu a va en a, a nu lo țap pur hmel a hmuh chuan sawi tur a van kher mai. Lusei pasalțha tiin mi tam takin an hria, mahse pawih fa a lo ni reng si chu a rilru a na hle mai. Mahse tih theih a awm tawh lo, a nuin a pa chu a thi tawh tiin a hrilh țhin a, tunah a pa chu a lo la dam reng si. Hmuh ngei a duh a, unau a nei nge nei lo tih pawh a hre chak hle a ni.

"Lalpa kal ka duh e, ka pa te khua chu mi hrilh thei angem? Ka nu i lo enkawl na zawng zawngah i lakah bat ka ngah hle mai. Lalpa ka lawm e" a han ti a Lalpa Dohranga chuan "Dama, i pian hlim khan i lu dawm chungin thu ka tiam a, i pa dik tak hi la hrilh ngei tur chein ka intiama tunah chuan ka ti hlawhtling ta, i unaute nen hian kal u la, i pa chu Țhangzing khuaah a awm e" a rawn ti a ti chuan khaw lamah let lehin Dammawia chu zawlbuk lama kal lovin an inah chuan a nu nen an inzui lut a. Dammawia nu chuan țap chungin ngaihdam a dil mawlh mawlh mai a. Dammawia chuan, "Ka nu, i duh reng vanga piang pawh ka ni lo chunga heti khawpa min hmangaih hi ka va lawm em. Ka pa chu ka zawng chhuak anga, i retheih phahzia hi ka hrilh ngei ang ka nu" a ti charh charh a.

A tuk nilenga inbuatsaihin a tuk lehah chuan an inzui chhuak ta. Buaina eng pawh tawk thut thei annih avangin silai mu pawh an am hle a. Runthanga chuan fimkhur tura chah mawlh mawlhin țiau lui lam pan chuan an kal ta.

Chu tia an chhuah hnu lawkah chuan Lalpa Dohranga chuan khaw mipui zawng zawng chu ko khawm vatin lal muala mipui pungkhawm chu bengchheng lo tura zap daiin "Ka thusawi tur hi kum upa lam chuan inhre fur ngei ang" tiin Dammawia pi ațanga Dammawia thleng chuan a sawi ta a, a hre pha ho, a hun laia Dammawia nu khawngaih avanga mittui lo seng tawh ho hnuk rawn no thar lehin mittui an hru leh sap sap hlawm a.

Dammawia te pawh kal zelin mi pangai chung lama leng vek an ni bawka an kal chak hle mai. Zan sarih an riah hnuah țiau lui chu an thleng der maia. Țiau lui kamah riakin zan ruk zet an kal leh hnu unau hmelhai velah Țhangzing khaw ram chin chu an lut ta. Fimkhur taka kal zelin buk pawh sual loin ei an han rel mawp mawp a, kal leh nghal zelin Țhangzing khaw dai chu zanlai ar khuan hun vela thlengin thingkung remchangah lawnin an mu ta hlawma. Zing khawvar rualin ei relna remchang dapin an vak chhuak leha an duh ang an hmuh velah che leh nghal sawk sawkin an ei fel hnu chuan khaw dai lam chu an pan leh ta.

Chawiliana chu thingkungah lawnin Țhangzing khaw mi lo lama kal tur inzui dul dul chu a hmu a, an kal liam fel ta maw tihah chuan chhuk a han tum a. Mahse tlangval pahnih lo kal a hmuh takah chuan man a, chanchin zawh chian phawt țhaa a hriat avangin an kalna tur lam a han en a, chhuk thla vatin a ruahman ang chuan an che chhuak ta a.

An kalna tura an rin ngeiah chuan silai nen inring takin an lo chang ta kar a, tuibur hmuamda velah chuan an rawn lang ta. An channa zawn an thlen veleh Chawiliana chu chhuak vatin "Che tawh suh u hualbeh vek in ni tawh" a han ti a pawih tlangval pahnih te pawh chuan chung lamah ban pharin Dammawia te chuan an va phuar sawk sawka hmun biru lam an pan pui leh ta vat a.

Chawiliana chuan an tlangval man pakhat chu a enin mak tihna riau a nei tlat maia, a kun tlat avangin a hmel duh angin a hmuh chian theih bawk si loh. Hmun rem chang an thlen hnu chuan țhut tirin Chawiliana chuan "Pasalțha Mungliana hmuh kan duh a, inhriat angin Lusei mi kan ni a khuaa rawn luh tawp hi kan tan a him lo a ni. Min puih theih chuan in nunna kan zuah ang" a han tia chu veleh tlangval pakhat chu rawn țawng chhuakin "Ka pa chu engatan nge in tih?" a rawn ti ta mai.

Chu pa khabe chu Dammawia chuan kuai dak awrhin an han inmelh vang vanga. Dammawia nen chuan an hmel inanna lai pawh a awm ve nual, an mitmeng erawh a in ang dun hle a dawihzep mitmeng an pu lo dun hle. Dammawia chuan, "I pa hnenah chuan min hruai thei angem? "a han ti a chu tlangval chuan" Ka pa chuan a khing pha kher lo ang che u,a kum lamin a uai rit tawh si a, keimah nen ngei hian i ching fel zawk teh ang u. Min phelh u la chem sen nen pahnih leh pali pawhin kan hlau lo che u"a han ti siah siah a Dammawia chuan inpuan mai duh hle mah se, a pa hmuh phawt a duh bawk si. Chawiliana chuan "Zanah khua kan lut ang, i pa hi kan that dawn lo, biak ringawt kan duh a min dan buai loh hram kan beisei" a han ti a

Chu tlangval chuan chhan pawh chhang loin hnuai lam a bih san leh daih a, Dammawia chuan a unaupa chu han kawm a chak hle mai. Mahse a la hun miau loh avangin khua chu an nghak thim ta a.

Zanlai ar khuan rualin khaw chhung lamah lutin Dammawia pa te in lam chu an pan zela an in an va thlen meuh chuan pasalțha in a ni tih hriat takin salu a intar thluah a, a chhungah chuan an fapa lo haw thei lo chu an nghak a ni tih hriat takin mei a la eng bawka. Mungliana pawh pasalțha tih takah a kawtlaia thawm awm chu en thla vatin a fapa leh a țhianpa an lo hnungkhirh a hmuh chuan silai nen inring takin a nupui bulah chuan a țhu kar bawka.

Dammawiate'n inchhung an va luh chuan Mungliana chuan lo tin vatin a lo vau chher chher maia. Mei eng lama awm a ni bawka Mungliana chu Dammawia nen pawh an inang ve hle mai. Chawiliana chuan "Ka pu kan thu i ngaichang phawt thei lo em ni? Biak che kan duh chauh mai a ni e" a han tih takah chuan țhu lehin Mungliana chuan "Lusei tlangval pali laiin min biak in duh tlat nachhan hi a țha tawk hle ang maw?" a han ti a.

Chawiliana chuan zep sit set a țul ti loin "Ni e, i fapa hi a vawi khat nan hmu ve la kan duh a ni." tih pahin Dammawia chu mei engah chuan a din tira. Mungliana chuan ding meuhin Dammawia chu a en vang vanga a tawpah "Ka fapa maw, i nu i ang hle mai" a ti ta a. Mungliana nupui pawh chuan Dammawia nu leh a pasal chanchin chu hre chhuak lehin mak ti takin Dammawia chu a en tlawk tlawka. Mungliana chuan khum lama a fanu te pahnih mu chu kai tho vatin nu nen an intawn dan chanchin chu a sawi chhuak ta vek a. Chawiliana pawhin Bualthleng pasalțhate an nih thute chu a sawi ve ta a.

Mungliana te chhungkua chuan Bualthleng pasalțha ralhrat leh huaisen em em, hmar hnam ho țihkhai te zinga Dammawia a tel ve chu mak an ti tlang hle mai. Dammawia chu a unaute ho chuan an hua nge, an lo lawm tih pawh hriat theih lohin an en tlawk tlawk a. Zan a rei tawh bawk nen Mungliana fapa țhianpa chu an in lamah Chawiliana chuan va hruai hawin Mungliana te inah chuan an riak ta a. Khua a var meuh chuan Lusei tlangval pali Mungliana'n mikhual a nei tih chu a khaw khahin a khat nghal veka Lalpa beng pawh thleng vatin Lalpa chuan Mungliana chu a rawn ko vat renga.

Țhangzing Lalpa'n Mungliana mikhual te zingah Mungliana fapa a tel bakah an ni ho chu Bualthleng pasalțha te anni tih a hriat meuh chuan amah ngeiin Mungliana fapa chu hmuh a duh avangin Lal in chhuahsan meuhin Mungliana te in chu a pan ta vawk vawk a. Dammawiate chuan chutia Lalpa meuh a rawn kal chu nuam lo an ti rilru hle mai a. Țha taka inbiain tuk țhuan eikhama Lal in lama leng phei ve tura insawmin Lalpa chuan a țin san leh ta a. Tuk țhuan eikhamah chuan Lalpa sawm ang ngei chuan Chawliana rualin Thansanga leh Liansanga te chu lal in lam an pana Dammawia erawh a pa leh a unaute bulah chuan a awm thunga.

Dammawia chuan Lalpa Dohranga'n a pi chanchin ațanga amah a pian dan thleng a sawi chu sawi chhawng leh vekin Mungliana te chhungkua chuan an lo ngaithla kar bawka. A sawi zawh meuh chuan khuavang kallai ang maiin a reh țhuap a. Mungliana fanute chuan an nuța pa chu an lainat hle mai.

Mungliana fapa chu rawn țawng chhuakin "Unaupa neih hi ka chak țhin em em a, ka lo nei reng che hi ka lawm rualin kan intawn dan erawh a lungawi thlak loh hle mai. Pasalțha Neihthanga ka ni e. Tun hnuah chuan Hmar hnam ho ngam loh Pasalțha Dammawia unaupa tiin ka hming ka chhal tawh ngei ang, ka u hi Sialmani a ni a ka nau hi Vanzaui a ni e" tih pahin a rawn chibaia Mungliana nupui chuan rawn chibai pahin "Hrilliani ka ni e, ka fapa" a rawn ti bawka Dammawia pawh a tlangnel ve ta hle mai.

Mungliana chuan pasalțha anihna chu a ngaihsan ziate sawiin duh nise inpuang hauh loa phuba laa that nghal thei ni reng chunga thu lai la zawnga an rawn che te chu chhuanawm a tihthute sawiin a fapa chu a fak char char a. Dammawia pawhin nuam a tiin a pa chu a nel nghal hle maia. A unaute lahin an nel chho telh telh bawka a hlim ve hle mai. Lo lamah pawh tumah kal loin nileng țhakin an inkawma Thansangate lah Țhangzing Lalpa chuan chelh tlatin "In țhianpa hun pek rih a ngai e, zanriah eikhamah in haw thla a niang chu" tiin a hrilh a Thansangate pawn a dik an tiin Lal in lamah chuan an awm ni leng ta a.

Dammawia tlangnel chho chu a pa a anna an hmu chho telh telh maia, a fiamthu thawh peih em em te chu a pa fa anih ti chiangtu a ni. Tlai lam ei rel a hun meuh phei chuan a phawk a chhuak zual hle mai a nu Hrilliani beng bulah chuan "Ka nu, ka pa'n țhen che huama ka nu rawn hruai a tum lai chuan i rilru a hah awm, Lal in lamah ka han inlan ve ange ka rei lo vang" tih pahin tlan chhuah a tuma, mahse Hrilliani chuan "Engtin maw" tih paha a bana chelhin a dek nui zui uar uar a, "I pa te zawngin min duh em mai i hre lo anih kha" a han ti a. Dammawia paw'n nuam a ti hle. A nihna takah chuan a nu dik tak leh pa hi lo innei ta ni se, an in hmangaih tak tak loh avangin chhungkaw hlim tak an din dawn chuang lo tih a hriaa,a pa hian a nu kha rawn hruai chu tum mah se, a nu khan a pa hi a hmangaih ve si lo, tunah erawh a chungah an țha em em bawka nuam a tiin a hlim hle, mahse a rilruah erawh chawi liana enkawl seiliantu a nu dik tak chu a dah lian ber thung a ni.

Zan riah eikham hnu lawkah chuan Dammawia chu lal in lam panin a chhuak vata Lal in a han luh chuan an lo eikham ve chiah bawka Lalpa chuan lo be sawk sawkin Dammawia pawh chuan țha takin a chhang ve zel bawka. Tap lama Lalfanu ei rel mek chu Thansanga'n a rawn mitmei zuk zukah chuan va en phei in chu nula tleirawl Dammawian a hmu chiah chu nghilh dupin a inhre hial a ni. A ni lah taka Țhangzing Lalfanu Țanthangi hi țiau ral pawih khuaah chuan hmeltha tia khual kai pha a ni tlat.

Țanthangi lah chuan chutia Dammawian a rawn melh zeuh a hmuh chuan lai ru tak chungin a rawn melh leh zauh țhin bawka. Lalpa chuan tlangaupa tirin khaw mipuite chu a ko khawm ta a, inzathum nufa an tling ve bawka mipui pawh an tam hle mai. Chung mipuite hmaah chuan Dammawia chanchin chu a sawi bakah Țhangzing khuaa a tana hmun a awm reng thute a sawi chuan pawih hnam fing leh lungrual tih takah an au dur dur a, an khaw dai ngul ber ni țhin fapa chu an lo lawm hle.

Mungliana te in an luh chuan Dammawia chuan "Ka pa, lal makpa ni ta i la min chhuang awm" a han ti lut rawka a unaute chuan lo hrethiam thuaiin an lo chhaih zui awr awr a. Thansanga te chuan "Engtin tak hma la ang maw, kan Damthluakthawla chu" ti ruin an nui ru kur kur a.

Mahse Dammawia zawng a phawk ang ngawt a ni bik tlat lo, ruahmanna a nei fel sa diam a ni chek ang chu a tuk ațang chuan a țhiante nen a unaute nen a pate lo lamah chuan an liam nitin a, Silai a pu chhuak ziah lehnghal a, a farnute'n lal sa tur han pek an tum lahin a phal ngai hauh lo a, tlai lama pek theih reng te hi zanriah eikham hmasa ber ziahin a unaupa leh a țhiante ei laiin amahin a kal hmaka Lal in lamah chuan hun a han hmang hrep ta ziah mai. Mungliana te chhungkua leh Thansangate nuih a ti za ngang mai. Khuaah lah a tlangnel hmain țhian a chhar thar zut bawka. Mungliana fapa a nihna chu an zah hlawm hle a, an lo ralkhat ngaihsan ruk em em Bualthleng pasalțhate zinga mi anih bakah an pasalțha chhuanvawr ber Neihthanga unaupa a ni zui bawk nen tuman an be chhe lo tlang hle. Pawih ho an ni bawk a, lusei te anga rilru hran pu leh mahni hnam pui hmelma en duh an ni lo a an inlungrual tlangin Dammawia te țhianho pawhin nuam an ti ve hle mai a ni.

Țhangzing khuaa cham reng chu chak hlawm hle mah se, an khaw lam an ngaihtuah lo thei bîk bawk si lo a, Dammawia pate lo lama theihtawp chhuaha an beih fe hnu chuan midang zawng aia lo zo hma an ni dawn tih a lang chiang hle mai. Dammawia pawhin ngaihngam leh inthlahrung lo takin haw an duh thu zanriah kil laiin a sawi ta a. A chhungte pawh chuan an hrethiam hle maia, apa pawhin zin leh thuai turin a chah nghe nghe. Chu zan chu a tumah leng chhuak loin Dammawia unaute nen chuan leihkapuiah țhu khawmin an titi a Sialmani lawmpa ni kumhlun țhin Chhawnsanga pawh rawn leng ve bawkin an hlim dar dar hle mai.

Dammawia erawh a unaute titi tui hun châng karin an titi tui ta maw tihah chuan a ruk thei ang berin a chhuak zal zal a. Mahse lo hmu ru rengtu Chawiliana chuan Liansanga chu kheuh zeuhin inthiar chhuanlamin an kal ve nghal bawka. Chhuanlam tur hre ve tawh si lo Thansanga chuan a u leh Liansanga chu a melh rum nghek nghek ringawta, tui lo zetin Dammawia unaute bulah chuan a titi ve ta ringawt a. Khaw dai lamah ve thung chuan thlasik khaw vawt tak hnuaiah Dammawia chuan Țanthangi chu a thiam ang tawka thlem vein a zin leh thuai tur thute a hrilh malh malh a, a rang thei ang bera palai tir turte'n a intiam bawka, chhak lam ațanga lo enthla rengtu Liansanga chuan "A va che muang ve mawle kan Dameka chu" a ti ru su su a Chawiliana pawh lo nui kur kurin Dammawia kakpui lawn lai hmuh tum khan an titi bak an ngaithla ta si lo.

Dammawia erawh Țanthangi bulah titiin a kakpui lawn lam reng a rilruah a lang hauh lo, nupui atana neih ngei a duhna chuan a rilruah Țanthangi chu thianghlim taka dah duh tlatna a nei a ni. Daikal tura chhuak a ni bawka Țanthangi chuan Dammawia chu a tawpnan ti ni awm hrimin a kuah thlawp a "U Dam ka hmangaih che. Ka lo nghak reng ang che. Dam takin haw la, a hma thei ang berah lo zin leh ang che" a ti a Dammawia paw'n "rinawm takin ka awm reng ang. Ka nupui i nih thuai theih nan theihpatawpin țan ka la ang, i pa'n kan chungchang a hre tawha khiangawi tura a tirh luih che ka ring hauh lo. Ngaihngam takin lo awm reng rawh" tiin an inthlah ta a.

Zawlbuk lamah pawh riak loin Dammawia pa teinah chuan an riak a, zing khawvar a nih meuh chuan an inpeih tawh hle. Dammawia nu leh pate chuan rawn chibai diat diatin, a farnu te erawh an mittui a tling pam thunga. Neihthanga leh Chhawnsanga chuan thlah an tum tlat avangin an kal ho ta a. Dammawia chu a pa chuan a lan theih chhung zawng a thlir a, Dammawia paw'n a pa chu a rawn thlir ve leh zeuh țhin. An liam dawn meuh chuan Dammawia chu ding meuhvin a hawi let vang vanga, leihkapuia Mungliana leh a nupui bakah a fanute pahnih ban lo vai lauh lauh chu en vang vangin,a mittui a sur zung zung mai a, mahse inti pachang vatin a innuai fai sawk sawk a,"Neiha ka lo zin leh thuai ang ka farnu te leh ka nu leh pate hi lo enkawl țha rawh aw" tiin a kal liam ta a.

An liam fel takah chuan Mungliana te pawh in chhung lamah chuan lutin Mungliana chu a thaw halh halh a, a nupui Hrilliani hnenah chuan "Sialmani nu, ka tih sual pawi zia kan tel hrep hnuah ka tih sual khan rah țha tak a lo chhuah a ni. Ka chhuang hle mai. Nang pawh ka fak hle mai che" a han ti charh charh a Hrilliani chuan "I fapa a nia, ka fapa a ni ve tho alawm, he lai thleng thleng nang vanga rawn kal chu, lo pawm lo thei ka ni lo a ni. A hringtunu nen chuan an dam khua sei mawlh rawh se" a rawn ti ve bawka.

Dammawiate kal chu an kal lam anga hmanhmawh vut vuta kal tawh loin zawi muang in pawih khua te tlawh pahin an kala Neihthanga chu țiau ral khaw ho chuan an lo hre țha hle mai Dammawia a unaupa a ni tih an hriatte chuan an lo be țhain Dammawia pawh a hnam pui diktakte zingah chuan a hahdam huaiin a inhre nghe nghe. Mahse, lusei rama seilian leh lusei rilru țhanhnan tu anih avangin buaina chhuah palh thut hunah erawh lusei lamah bawk a țang lo thei dawn lo a ni. Mahse buaina engmah tawk lem loin an kala zan sarih hnuah țiau lui chu nau rilțam hun velah an thleng ta. Dammawia te chuan lui chu kan nghalin Neihthanga te erawh an let leh ta zawka. Dammawia chu ruak deuh huaiin a inhriaa a chhungkaw pangai taka han khawsak ve chu nuam a ti hle. Mahse, chhungkaw hung pangai tak aiin a nu dik tak chu a thlang zawk a ni. Țanthangi pawh a ngaiin hmuh leh thuai a chakna chu a nasa kher mai.

Zan riat zet an riah hnu chuan an khua chu Thansanga Zukchal kahnen chuan an lut ta. Dammawia nuin an chanchin a hriat chuan a lawm hle maia, mahse Dammawia'n a pem bo san mai chu a hlau em em thung. Dammawia'n a nu hmel dik lo chu chik taka enin a zawt ta phawnga a nu pawh chuan zep lem loin a sawi ta veka Dammawia chuan nuih vur vur pahin "ka nu nang tluka pawimawh an awm hleinem ka kal bo dawn lo tih i hre tlat dawn nia" a tih takah chuan a zia ve leh ta a.

Zan lamah chuan lal in lamah lengin an zinna chanchinte chu an hrilh ta vek a, leng len ar a khuan takah chuan leihkapui lamah Parmawii te unau nen chuan inkawm turin an chhuak a. Chawiliana erawh a la țhu thung a,Lal leh upate kiangah chuan titi vein Thansanga erawh Parmawii titau thlemin a zin tawh rih mai mai loh tur thute a hrilh a duat takin a kuah hle hle a, midangin ho erawh a hma ang bawka nui leh bawk bawkin an hlim tlang leh hle a.

Ni khat chu Bualthleng khua chuan mikhual an thleng tlat maia, Ramrikawn khaw lal fapa leh a țhiante niin ranngo zawnga rawn kal an ni a. Lalpa Dohranga paw'n khual țha thlena thlengin a inah Lalfapa chu a thlen tir nghe nghe a ni. Zan riah ei lai chuan Lalpa Dohranga chuan "Ranngo zawnga tun anga i vah chhuah chuan i pain nei turin a tur nasa hle tawh che a ni maw" a han tia Lalfapa pawh chuan "Ni e, ka pa hian tu hmel hmuh hman loh hi a hlau em a min tur nasa takzet tawh a ni. Ka țhiante lo lam hna hi ka zawh pui phawt anga ka chhuak ange ka tih lahin khawtlangin an thawh sak mai tur a lawm tiin mi rawn chhuah tir rawih a nih ber hi" a han ti ve charh charh bawk a. Zan riah eikham hnu lawkah chuan Parmawii te unau nen Lalfapa chu leihkapui lamah an inkawm ta a Herliani nen chuan an innel hmain an inmil hle a, Lalfapa inngaitlawm leh fel tak a ni bawk nen an nel tlâng hle. Leng len ar khuan hnu lawkah chuan Thansanga rawn lang hlawlin an zingah chuan a țhu ve ta a, Ramrikawn Lalfapain Thansanga a ni tih a hre chiah chu "Pasalțha Thansang, kan khuaah chuan i hming hre lo an awm hauh lo a sin, i țhiante hming pawh kan bel viau. Ramrikawn Lalfapa Lianchhunga ka ni e" tiin a han chibaia Thansanga chuan "E khai, lal fapa kan hming in khua thleng thlenga a thang pha anih ngat zawngin kan nihna bak bak an belh țeuh ngei ang le. I hmuh ang hian tlangval naran ve mai ka ni e" a han ti a Lalfapa chuan Thansanga inngaihtlawm zia a hmuh chuan a ngaisang zual hle "Lalfapa ti loin ka hmingin min ko thei angem?" a han ti a Thansanga pawh chuan awm a tih puiin a lo pawm saka ti chuan an inkawm ho ta a.

Ramrikawn lalfapa leh a țhiante chu zan nga ngawt an riah hnu chuan an tlangnel tawh hle mai. Lalfapa fing tak a ni bawka a țhian hruaite nen chuan Thansangate țhianthum zinga a tu emaw chu chu chhun lamah pui vein zan lamah Lal inah an inkawm khawm leh țhin bawka nuam an ti dar dar țhin hle a. Herliani leh Lianchhungate pawh an inhmel duhna chu hmangaihna thinlung inhlan tawn chungin an puang zar ta a. Chapchar awllen a rawn thlen ruala inhruai nghal mai an duh avangin Ramrikawn Lalfapa te chu an haw leh ta a. An haw ațanga zan ruknaah chuan Palai hmel an hmu nghal ta mai reng a. Khaw chhak lama khaw lian ve pawl tak Ramrikawn in zanga nufa te chuan an Lalfapa, nula aia țhiante bula tap chawt rengin Bualthleng Lal fanu a nei mai thei tih an hriat meuh chuan lawm pui lo an awm lo. Lianchhunga pa Lalpa Lianthanga lah chu a lawm zual hle "Ka kalsan hunah pawh, ka fapa chu Lusei khaw ropui berte zinga mi Bualthleng pasalțhate venhimna hnuaiah a awm theih ngei ka beisei a ni" tiin a sawi hial a ni. Lalpa Dohranga paw'n palaite thu a hriat hnuah Herliani chu a fala titi puiin Herliani pawhin neih a lo hnial bik tak loah chuan Palai te chu thu țha tak a hawn tir ta a.

Lalpa Dohranga chuan palaite haw hnu chuan a khaw mipuite chu a hma thei ang berah ko khawmin Ramrikawn lama laina hnai nei an awm leh awm loh a han zawt kuala, chhungkaw pakhat chuan Ramrikawn khuaa laina hnai an neih thu leh an pa ber pawh upa anih nghe nghe thu an rawn sawi takah chuan Lalpa Dohranga pawh a thaw huai mai, a upa te zinga a rin ber Upa Zangaia hnenah chuan "Ka ngaih a ngam ta huai mai, chemtei tal hi chu ka la thlahliam thei em ang chu" a ti a. Pu Zangaia chuan Lalpa Dohranga chu engtin mah chhang lo mah se pasalțha ralhrat anih țhin bakah mi fing tak anihna hmang chuan Lalpa Dohranga chuan a nitelin a nunna chu a thlah hret hret tih a hre ru renga a mang pawh a ang țhin hle.

Herliani pasal nei tur chu a unaute chuan an buai pui char chara, lalpa Dohranga te nupa chuan mona ina awm dan mawi an hrilh awl lo bawk. Tuk khat chu Dammawia tuikhur kal chuan kawng laka hmeichhe lo mu reng a hmuh chuan pan vatin a zu thlen thlak chuan Sangzuali tui chawi turin nau a lo vei reng mai. Hmanhmawh taka buaipui sawk sawkin a pum dawm sak chungin a hruai let a tum ringawt a, tih ngaihna vak a hre si lo. Nau vei chunga kal chu a lo theih teuh mai si loh, a mang ang lutuk chu khaw lamah let lehin nula a tawh ang ang chu chanchin a hrilh chho zela Lal inlamah a țhen an lo han kal bawka. Rei loteah tuikhur kawngah chuan Lal chhungkua bakah Runthanga leh Rengliana chu an rawn thleng vata. An nau chhar thiam a rawn thlen takah chuan an han din hliah sawk sawka, chu lai tuikhur kawng ngeiah chuan Lal tupa, Pasalțha Rengliana fapa ni bawk chu a piang ta. A rang thei ang bera in lama in haw pui vatin mipui lah an pungkhawm nasa na rawh. Lalpa Dohranga chuan a tupa chu en vang vangin "Ka hming leh i pa hming chawi la Doliana ni ang che" a tih chuan kut an lo beng dur dur a. Rengliana pawh a hlim ve hle mai. Runthanga lah chuan Rengliana fa a piang hmasa zawk chu a thik riaua "Renglulian lo nghak mah rawh ni rei a rial loang i fapa ngam tu tur fapa ka nei ve thuai dawn "a han ti rawka.

Sangzuali nau neih hnu chuan Parmawii chu Renglianate inlamah chuan awm pheiin a pui chawt renga. Rengliana nu leh pa lah an lawmin an tupa hmuh hmasak ber chu pawm an inchuh kual reng bawka. Ni nga a ral meuh chuan Niliani pawhin nau a vei ve ta tlat. Tukțhuan kil lai a ni a. Sangzuali erawh a taksa a la chak loh deuh avangin khum lamah a awma an kawngka chu rawn inphih hawng rawpin Runthanga chu a rawn lut hlawl mai a "Renga, a vei der a nia rawn chhuk rang rawh" tih pahin a tlan chhuak lehnghal a Rengliana pawh chuan a chaw pawh bar zawm tawh loin a fapa Parmawiin a awih mut chu a chalah fawp zeuhin "Bawihte i nau a piang dawn e" tih pahin rang takin Runthanga te inlam chu a pan ve ta a. A zu thlen chuan Pu Zangaia leh Runthanga chu an lo tei kual chhen a, Thansanga te țhianthum pawh leihkapuiah ngawi renga lo țhuin Rengliana inchhung zu lut pawh chu tuman an lo be lem lo a Rengliana pawh chuan Niliani nau vei chu nghakin bang ngheng in a ding renga.

Niliani chuan nau a har ve reuh hle mai lehnghal. Mahse a beih țang țang hnu chuan naute țap thawm a rawn chhuak ta. Runthanga chuan fanu duhawm tak a nei ta a, fapa awt viau mah se a fanu chu enin a lawm lutuk chu a mittui a far hial a ni. Rengliana chuan Runthanga awm dan chu hrethiam vatin a rawn țawng chhuak thuaia "Runa kan fanu chu a hming tunge sa dawn le" a han tih chuan Runthanga pawh harh chhuak vatin Pu Zangaia lam chu hawiin "I tunu hming chu sa rawh le" a han tia Pu Zangaia chu rawn kal hnaiin a tunu chu a en vang vang hnu chuan "Vanthangpuii ni rawh se" a ti ta a. Tuibur hmuamda hnu lekah chuan Thansanga te bakah Lalpa Dohranga leh a fanu te thleng thleng chuan Runthanga fanu en chuan an rawn luta, Țialthangi chuan Vanthangpuii chu pawm chuh vatin midang lak reng a phal lo nghal a. Lalpa Dohranga chuan Vanthangpuii chala dawm vang vang chungin "Tupa ka neih hnu lawkah tunu ka nei leh thei hi ka va lawm em, khuanu malsawmna ka dawn zozai hi a va nasa em" a han ti charh charh a Pu Zangaia lam hawi chuan a khi suk suk a "Hawh teh Zathangi pa Lal in lamah i chho teh ang" tiin an inzui chhuak ta a.

Runthanga leh Rengliana te chu tunah chuan pa tak tak an ni ve ta. An lawmna chu sang hle mah se lo lam hna an kal san mai mai thei si lo a, theihpatawpa thawkin kawla ni chhuak chhiarin an bei tlauh tlauh reng mai a ni. Țialthangi chuan Runthanga fanu leh Rengliana fapa te chu a tu emaw zawk zawk an in lamah a la phei fo a. Rengliana leh Runthanga lahin anmahni engkim zirtira kaihruaitu Thanhranga nupui anihna chu an zah sakin a thu an hnial ngam teuh si lo. An fate chu an hnathawh loh lai tala han pawm ve chak teh mah se Țialthangin a chuh tawh chuan an phal sak leh nge nge țhin. Zan khat chu Runthanga chu leihkapuiah țhuin van a han thlir a, ni pui khaw rawn lum țan chuan boruak a rawn ti uap chho țan viau mai. A tlangval laite ngaihtuahin Chhuahchawnga te ho nen an inhmuh lohna pawh a rei ve ta hle mai, han hmuh a chakin han tal ho leh chu.a chak hle a, Thanhranga pawh a ngaih a zual hle, la dam se a fate han awm sak ve se a ti hle mai. "Chawnga fapa zawng U Thanhranga ngeiin a pian hlimah a dawm bika a vannei teh e, keini zawngin kan chang pha ve si lo" ti rilru nauh nauhin a rilru chhungrila Thanhranga a dah san zia chu a hriat theih hial awm e. Pa nei lo a seilian a ni a, Thanhranga kha a pa ang anih bakah a u ang a ni bawka a țhian ang a la ni cheu bawk Runthanga tan phei chuan a hlu zual hle nghe nghe a ni.

Sangzuali leh Niliani taksa a rawn chak leh takah chuan lo lamah an pasalte rualin an feh nitin ta a Vanthangpuii leh Doliana te chu Țialthangi hnenah dahin an pi tu chuan an inawm chawt renga nau fel tak niin an țap khat hle mai. Țialthangi a buai zual deuh chang chuan Parmawii te unau tu emaw berin Lal in lamah naute pahnih chu la chhoin Țialthangi'n a hman velah a han la leh mai țhin. Parmawii te unau chuan naute tharte chu han awm ve chak viau mah se Țialthangi a hman ik chuan an chang lo ziah mai si, Lalpa bulah chuan an phun nang nang țhina Lalpa Dohranga lah chuan "Thanhranga nupui kha a ni miaua, inawm mai mai ang hmiang, zilh teh mah i la a duhnaah chuan kan thusawi a zawm chuang hleilawng e. A lunglen hnem tu an nih ve khu" a ti mai zela Lalpa Dohranga chuan a pasalțhate fa lo piang laka inti thunei tu tur ber te zingah Țialthangi chu a tel ve tih a hre renga pasal sun tawh lungleng reng renga hun hmang a ni bawk nen a lunglen an hnem thei chu a lawm hle zawk a ni.

Lalpa Dohranga hi lal fing leh fel anih bakah a inngaitlawmin a khua leh tuite lakah a inphahhniam thiam em em a, a hunah chuan a khaw mipuite duh ang zelin a awm a, thu a chhuah ve thung erawh chuan zawm lo an awm ngai loh bakah zawm ngei duhna thinlung a khaw mipuite hian an pu vek a ni.

Nitinin lo lam hnaah mipui tam zawkte chu an liam nitin zela Parmawii te pawh a tu emaw ber chu nau awm turin Thansangate inlamah chuan an kal chawt reng zel bawka. Țialthangi chuan a tute ang chiaha enin "Ka tute an nih hi, pasalțha ropui tak la ni tur leh, khual kai khawpa nula hmelṭha la ni tur an nih hi" tiin a uan pui fo a, a duhthawh deuh nge Pu Zangaia'n a hriat fuh meuh chuan Țialthangi chu a zilh ta erh a "Mi ngaihah pawh a mawi lo, mi tam takin fa an neia mi ngaihah an uan pui vak vak ngai lo a nia" a han ti a Țialthangi lah chuan "Kei chuan ka uan pui duh alawm, lo ngai reng rawh u ka thusawi hi a thleng dik dawn tih ka hria a ni" a lo tih khum leh et mai si. Pu Zangaia paw'n "eng tin tak țhan len tir ang che maw" tih pahin Lal in lamah a kal ta a. Lalpa Dohranga hnenah Țialthangi nen an inchhan dan a han sawi chuan Lalpa Dohranga chuan nui vur vur chungin "A lunglen hnemtu an rawn awm thara a awm thiam lo a nih khu, en liam mai mai zawk teh ang" a lo tih san leh hmak bawk si. Pu Zangaia chu a lai rut maia.

Zan lamah naute te chu an inlamah an nute'n an hawn ve țhina Thansanga te chu a khawi emaw zawk zawkah kalin an nute hmuh loh hlanin an han sik țap țhina an invin nasa thei hle.

Zan khat chu Liansanga Runthanga te inlama a len laiin Thansanga chu Rengliana te leihkapuiah a țhua a bulah Doliana pawm chungin Parmawii a țhu ve bawka. Thil chi hrang hrang sawiin an hlim dun hle. Thansanga chuan Parmawii chu a han en a a beng bulah chuan "Nupa kan ang hle mai a" a han ti rawka Parmawii pawh chuan "Nia, mahse kan la hlat hmel emai keini zawng" a han ti a, a thusawi awm zia chu Thansanga chuan a hre chiang hle mai, mahse, "Nia kan la hlat deuh chu a ngai anih hi. I u Heri kan thlah liam hun nghah a ngai dawn si a, tin, ka u hi nghah rih ka duh a ni." a han ti a Parmawii pawh chuan "Ni e, a dik alawm, kan la naupanga hun kan la ngah em hi keini zawng" a lo ti ve bawka ti chuan thil chi hrang hrang an sawi kuala. Thansanga chuan "Lung pui chunga kan țhut dun lai kha i la hria em, kan man zan che u kha" a han ti a Parmawii chuan "hria e" a lo ti a Thansanga chuan "kha zan thla engin i hmel a chhun mawi zia kha aw, nang lah chuan min haw em em bawk si" a han tia Parmawii chuan nui vur vur chungin "Tunge haw lo ang che, ramhnuaia rei tak vak tawh, ral bei zo hlim. Taksa bal si, rimchhe bawk si, hmel pawr fep fup leh nghal" a han ti a Thansanga chuan "A teuh lo" tih pahin a lei a chhuah put a. "Kei te zawng ka zin dawna i țah ziah nachhan te hi ka hria a sin, tlang kamah phei chuan Thansanga hi Pasalțha ni lo pawh nise a hmel vang hian nula lakah chuan a to viau tho ngei ang, an ti fo a sin" tiin a han fiamthu a Parmawii chuan vin hlarin "I duh duh hunah i zin thei alawm" a han ti a Thansanga chuan nuih kur kur pahin Parmawii chu a han thlema, chutia hmangaih berin a han thlem leh tak hliau hliauah chuan lungawi ve leh maiin an nui dun leh ta bawk bawk a. Sangzuali'n nau a rawn lak hnu pawh chuan la țhu rengin inchhung lam ațangin an titi chu Rengliana te nupa chuan lo ngaithlain an lo nui ve suk suk bawka.

Hun a kal zela Herliani chuan an khua chu chhuahsan hreh telh telh mah se, a phur ru viau lawi thung si. Chapchar awllen pawh kar loah a lo thleng ta. Rei loteah Ramrikawn lam ațang chuan mo hruai tur chu an rawn thleng ta khup maia Lalpa Dohranga chuan a fanu thlahnan chuan khawtlang a hraia Ramrikawn mikhualte chuan Bualthleng khaw len zia leh ropui zia chu an hmuhin han chen ve nan pawh an it hle. Lalpa Dohranga chah ang ngeiin Zehtet Lal leh a pasalțhate pawh an rawn kal ve hiala Hrilkunga a tlangval awm chhun chu an tir kual nasa ngei mai. Doliana leh Vanthangpuii chu Chhuahchawnga leh Thangkunga chuan an pawm deuh chawt reng maia. Hrilkunga erawh a țul țul tiin a phe vat vat reng maia "ka va han nei ve dawn chiang em" a ti chhuak phawng hial a ni.

A tuk lamah chuan Herliani chu Ramrikawn lamah a kal dawn ta. Lalpa Dohranga ngei chuan kal puiin Pu Zangaia'n dan tum hle mah se, a tum luih tlat avang chuan a zui ve ta zawka. Zehtet Lal Puithanga erawh a khaw lamah hawin Lalpa Dohranga chuan a khua chu Chhuanthanga kutah a dah avangin Chhuanthanga pawh Bualthleng lamah chuan a cham ta rih a. Lalpa Dohranga leh Pu Zangaia bakah Thangsangate țhianthum, Parmawii te unau thum, Rengliana leh Runthanga bakah Chhuahchawnga te, Hrilkunga te Thangkungate bakah khaw mipui țhenkhat chuan Herliani chu thlah turin an zui bawka.

Kar lakah zan li an riah hnu chuan Ramrikawn khua chu an thleng ta. A khaw thleng a pharh zau țhain a rem hle maia. Kawtchhuahah Ramrikawn Lalpa Lianthanga leh a upate bakah khaw mipuite chuan lo hmuakin an lo lawm hle. Lalpa Dohranga leh Lalpa Lianthanga chu an han inchibaia ti chuan khaw lamah an lut ta a. Herliani leh Lianchhunga te inneih ni chu a ropui ngei mai, Lalpa Lianthanga leh Lalpa Dohranga chu leihkapuiah țhu dunin khaw mipuite ruai kil lai chu hmuhnawm titaka thlirin an vanglai chanchin te an sep rawtui nasa hle mai Lalpa Dohranga chuan Lianthanga chu mi rin tlak tak a ni tih a hre chhuak ta thuaia a fanu a ngaihtuahna pawh a nep leh deuh ta sawt a.

Zan lamah chuan Lal pahnih te rawt ang ngeiin inbuanna ropui an nei dawn ta. Tlangaupa chuan inbuanna a tel turte chu a han ko chhuak ta a Ramrikawn tlangval lian țha thelh thawlh leh Hrilkunga chu an han inbuan ta a Ramrikawn khaw ho chuan pasalțha Hrilkunga chu mak an ti ngei mai, an buan chak ve pawl awlsam taka a hneh mai thei chu an en țhup ringawt a midangte phei chu eng tiang fakaua chak nge an nih ang tih an inrin siak sap sap a. Runthanga leh Chhuahchawnga rawn chhuak ve phei chu an lo huphurh tawh hle, an huphurh ang ngeiin an rawn chak ta thuai mai reng a. Rengliana leh Thangkunga mipui zinga lawr vun pahnihte phei chu an buan chak hmel hlawm loh hle mai. Lalpa Dohranga pawn hrethiam vatin Thansanga chu a ko chhuak ta a. Ramrikawn lam paw'n Thansanga a ni tih an hriatin an buan chak ber an rawn thawh chhuak ve ta bawka. An han inbuan chu an țang dun bawka mipui chu an ri hulh hulh maia Ramrikawn buan chak chuan Thansanga chu a țang ve mang lo tih a hrethiam thuaia, mahse Thansanga zawk chu a kang ta tlat mai, a rilru tetein "Pasalțha dik tak chu i nih hi mawle" tiin a thawh hnihna an han bei leh a Ramrikawn buan chak chu a tlawm ve leh ta. A thawh thumna erawh rei tak an inbuana Ramrikawn buan chak leh Runthanga te ho tih loh chuan inhneh tawk tak angin an hmu a hmuhnawm pawh an ti hle mai. Thansanga chuan Ramrikawn buan chak chu hneh țawk țawk anga langin a chak ta hram a. Mipui chu an lo au dur dur bawka an mit pawh a tlai hle. Mahse, an sawi tui ber erawh Bualthleng leh Zehtet pasalțha te chak zia chu a ni.

Ti chuan mipuite chu an țin darh ta a. Lalpa Dohranga chuan Lal chhungkaw ho bulah chuan thu a sawi ta a "Kei putar taksa chak tawh lo tak he lai hmuna ka rawn kal chhan chu hei hi a ni a" ti tetein Herliani te unau fa atana a lak dan zawng zawng chu a sawi ta veka, chutianga mahni fa tak tak pawh ni lo nasa taka a hmangaih thei mai chu Lalpa Lianthanga chuan a ngaisang hle mai. Lalpa Dohranga chuan Herliani chu enin "Chemte, pa i nei tawh a, i pasal ta i ni tih inhre reng la, ka sawi tawh ang khan ka taksa hi a chak lo zual zel a ni. Chu vangin mual ka lo liam ta anih pawhin kawng hla tak i rawn kal kha a țul lem lo a, chu vangin i pa hnenah hian ngaihngam takin awm tawh ang che. Ka hmangaih che tih hi i hre reng dawn nia"a han ti a Herliani chuan mittui luang zawih zawih chungin a pa chu a en kalh a engmah reng a sawi thei lo a ni.

Zan hnih an riah leh hnu chuan mikhualte chu an haw dawn ta a. Lalpa Lianthanga chuan "I Fanu hi rawn ngaihtuah lo la, a pa hnen a lo thlen tawh hi hmangaih takin ka lo enkawl ang tih ka tiam a che" a ti charh charh a. Lalpa Dohranga chuan chibai țha lehin Herliani a sira mittui lo hru mek lam chu hawiin "Chemte" a han ti a Herliani chuan rang lutuka rawn kuah thlawp in a țap nghal hawm hawm a, a awm viau e, a pa hi a hmuh tawpna ber a ni dawn tlat si a. Herliani chuan a pa chu thlah reng a tum si lo Lalpa Dohranga chuan "Chemte a tawk tawh e, kan kal tawh ange" a han tih takah chuan Herliani pawhin thlah vein "Ka pa, ka hmangaih che" a rawn ti chhuak țawka ti chuan an inthlah liam ta. Bualthleng khua an luh hnu lawk chuan Lalpa Dohranga chuan khaw mipuite hnenah a chanchin chu hrilhin a Lal țhutthleng luah turin Rengliana chu a ruat ta nghala. Khaw mipuite chuan hrethiam lo hle mahse an Lalpa chuan a dam rei pui dawn tawh lo tih an hriatin an mittui an hru ru sap sap hlawma. Rengliana'n lalna a chelh ațanga zan riat a ral hnu a ni kuana nau rilțam hun a thlen meuh chuan Lalpa Dohranga chuan a nunna chu a chelh zo ta lo. Ama ka ațang ngeia hre lawk vek mah ni se an tuar thiam lo tlang hle. Rengliana pawhin a tuarin be țawng zo tumah an awm tak loah chuan Pu Zangaia leh Runthanga chuan khawnbawl upa dang ho nen ro an rel ta ringawt a Runthanga chuan Liansanga chu tlangval țhenkhat nen Zehtet lamah a tir ta nghala, Thansanga leh Dammawia pawh Lal fanu upa zawk Sangliani te khaw lamah tlangval dang panga nen tir nghalin. Chawiliana rualin tlangval pahnih Ramrikawn lamah chanchin hrilh hre turin a tir nghal bawka. Lalnu duhdan ang ngeiin Lalpa Dohranga ruang chu an ur dawn a ni.

Herliani'n a pa thih thu a hriat meuh chuan mo thar zah zum lai mah nise a țap rawih rawih a Chawiliana awmah chuan beiin a mittui chu a sur zung zunga Chawiliana pawhin hnem ngaihna a hre lo hle, a mittui chu dan hram hram tumin a insehruh nasa hle maia Lalpa Lianthanga chuan Herliani chu kal tir mai chu duh mah se Herliani chuan "Ka pa duhdan ang ngeiin ka awm zawk ange, a ruang ka hmu thei tawh dawn loa an ur mek tawh ngei dawn si a"a tih takah chuan Chawiliana pawhin Herliani hruai tur ni loa hrilhhre tur ringawta kal an nih thute chu an sawi ve bawk a.

Lalpa Dohranga an ur chhung chu hun a duh rei ngang mai,a hah pawh an hah narawh, mahse an Lalpa chu an zahin an ngaina tlang bawka tumah phunnawi an awm lo. Lalpa Puithanga chuan thu sawiin "Ka țhian Dohranga ruang chu kan ur zo ta. Lal thar Rengliana Dam reng rawh se" a tih rual chuan mipui te chuan "Lalpa Rengliana dam reng rawh se" tiin an lo au rual dual dual bawk a.

Bualthleng khaw mi leh sate chu an lo lam hna țulah te buai leh mawp mawp tawh mah se, an khua chuan a hma a ang thei lo a, an hlim thei hek lo. Mi țha ber ațanga a pachhe ber thlenga hmangaih taka enkawl țhintu Lal Dohranga thihna chuan khaw mipuite chu a nghawng nasa in Rengliana chu an Lal a tan pawh mah se, Lalpa Dohranga erawh an thinlungah a thi thei mawlh si lo.Lal ropui tak a ni a, Bualthleng khaw ropui awptu a ni a, a thihna chuan Lusei khua mai bakah țiau ral leh hmar lam thlengin a deng hial a ni.

Lalpa Dohranga thih san a nupui chuan Lalnu nihna chu a chelh chhunzawm zela Rengliana te pawh Lal in lamah insuan lut vein Lal nihna chu a han chelh ve țan ta. Lalpa Dohranga an sunna a la reh fel si lo nen Lal dinhmun chu a khirhin a har a ti hle mai. U Thanhranga la dam ni se chu min pui leh ngei awm si a a ti rilru vawng vawng fo a, Runthanga hnenah a rilru hahna te thlen fo mah se an pahnih ringawta thutlukna han siam chu a har an ti hle țhin.

Mahse, hun a kal bek beka Rengliana pawh khawnbawl upate puihna zarah Lal dinhmun chelh chu a thiam chho ve ta zela. A fapa Doliana chu Lal inah chuan a lal kher mai. Țawng pawh la thiam lo kal pawh la kal thei lo mah ni se, a țah hlek chuan hmeichhe ho chu an buai nghal chuk chuk mai zela, Parmawii te unau chuan Vanthangpuii pawh la chho foin an awm dun fo a. Țialthangi pawhin a la awl lo dun hle.

Thansangate țhian thum pawh lo lam zawh thuai thuai an chakin favang awllen hun an nghakhlel tawh hle. Mahse nghah rei erawh a la ngai dawn hle thung. An țhian thum bakah Thansanga nau Thangliani țhiante nen Chawiliana leh tlangval dang pahnih nen inlawm tawnin an hlim ve thei hle a, nipui khaw lum tak hnuaiah thlan tui far zawih zawih chunga hna thawkin a khat tawka thlifim rawn thaw dawng paha lawm rual zinga nula te nui ri her herte leh Rengchal kiu vawng vawng ri te nen, an thawhrah seng tur an ni tih inhre ran chungin hah pawh sawi loin an thawk tlauh tlauh reng mai a ni.

Thangliani pawh a rawn nula chho ve ta, zawlbuk titi lailum luahtu a ni deuh ber ta mai a, tlangval mai bakah pathlawi te thleng pawha an thlir rawn a ni tlat. Thau lam ai chuan a cher lam mah tih theih ni mah se a vun ngo sen no suah te leh, a awm bawr poh lah te, a kawng fek rat hnuaia a mawng mum bial malh te, a chawih mawi tawk tura a malpui leh a bawp zuih thlate chu hmuhnawm titu tan chuan thlir nin a har ngang țhin a ni ange, amah lah lusei nulaah chuan a sang țhain a hleitling em em bawk si. Thansanga te unau hian khuahkhirh viau lo phei se chu tlangval tam tak chuan a kakpui lawn tumin tharum nen pawh an bei hreh hauh lo vang. Mahse Thansanga te unau khing ngam awm hek suh, inlêng te chu an in khat deuh thaw nei zantin ziah mah se, a tu a mahin an kawm fal lem lo va, Thangliani lahin a thinlung lalpa a hmu lo nge tumah be chhe chuang loin tumah mitmei a hmuh lo bawk.

Zan khat chu Chawiliana chu leng chhuak loin inah a awm a, chhun lama a hna thawhnaa a hling rahna a na riau mai a, pasalțha tak niin hnathawh a țhulh duh hauh loh bakah an inthleng rawn bai haw țhak mah se, zan lamah chuan tei pui chi zia zang ni tawh loin a vung nasa tawh hle a, a hmutute phei chuan tuarchhel an tiin an sawi nasa hle mai. Leng len ar a khuan hnu lawk chuan tlangvalte pawh Thangliani rim turin an rawn lut sap sap a, an han țhu fel ta maw tihah chuan tlangval pakhat chuan titi rawn vawrhin hmar pasalțha tuaitir chungchang a rawn sawi ta. Chawiliana beng chu a verh nghal hle maia, engmah zawt lemloin a lo ngaithla kara, mahse chu tlangval chuan Hmar pasalțha tuaitir hming chu a sawi lan har tak em avang chuan insum zo loin a zawt ta nge nge a, chu tlangval pawh chuan "ka lo mangnghilh pek a ni e, a hming chu Rumzaliana a ni an tih tak kha maw," a han ti a.

Chawiliana chuan a hming a hriat theihna a han zawt leha chu pa pawh chuan a pu dam loin a rawn chah vanga a zinna lama a hriat anih thu leh, a lo hawna pawh a la rei loh thu te chu a han sawi leh ta a. Chawiliana pawhin duhtawk vein mahse a rilru ah erawh Rumzaliana tih ringawt chu a lang reng maia, a ri nawn tlut tlut bawka. Enge maw tak chu a thlen ngei a ring nghet nghal bur bawk a.

A tuk zing ni chhuak chuan Bualthleng khua chu a ngai ang bawka chhun eng surin tlangvalte chuan an hmanrua te tat hriamin chhun lama an hna turte suangtuah chungin an ri ve rawt rawt a. Rengliana pa pawh a ngai te bawkin pumah thir dengin a ri thum leh dut dut țhin bawk. Runthanga pawh a fanu Vanthangpuii pawm chungin leihkapuiah chuan a țhu a, a fanu nuih rawn duh thar em em chu lawmin a chhaih nui har har renga a nupui Niliani tui chawi rawn haw chu lo pui sawk sawkin a nupui ei rel lai chu a fanu pawm chungin hmuhnawm ti takin a thlir dauh dauhva.

Thansanga te unau pawh an lawmte aia tlai bik nih hlauin an intur chhen a Țialthangi leh Thangliani pawhin hmanhmawh takin ei an rel mawp mawp bawka. Chawiliana erawh a nuin feh a phal sak tak tlat lohah chuan ke vung bur chungin tap bulah chuan a țhu tum vung bawk a. Tuk țhuan kil sawk sawkin Thansanga leh Thangliani te chu an chhuak ta nghal a. Țialthangi pawh Runthanga fanu la turin a kal vawk vawk bawka. Vanthangpuii pawm chunga Țialthangi a rawn luh takah chuan Chawiliana pawh tiang hawl chungin Lal in lam a pan ta auh auh a, Țialthangi chuan en vang vangin "A țawng lah hi i țawng mawh si a, i luhlul bawk si, chhuak loa tawm lah hi inthei unau bawk si lo a, mipa nih vanga awm awl hreh tlat reng mai, nat hunah te chuan indim ve tur mawle" a ti hlak hlak a. Chawiliana pawhin a nu thusawi chu hre pha mah se, nui liam puatin Lal in chu a inbai thleng ve ta hram a.

Lal inchhungah chuan khawnbawl upa țhenkhatte bakah Runthanga pawh lo awm vein chhuat laia Biakmawii leh Parmawii te unauin Doliana an chhaihna kiangah chuan lo țhuin a lo pawt zuah zuah a, chu tia Chawiliana rawn bai lut auh auh an hmuh chuan lo pui sawk sawkin, Runthanga chuan a ke chuan hnai a la ngei dawn tih hriain, "hnimhnah i lo, damdawia hman tur ka lo ngaihtuah sak ang che. Chawia tlawmah la lo la, i ute kan nih hi" a han ti charh charh a Chawiliana paw'n lo hrethiamin a lo aw ve mai bawk a. Chawiliana chuan a ute pahnih titi chu rei tawk fang a zawm hnu chuan Parmawii leh Biakmawii bakah Sangzuali chu a melh kual ta zuk zuk a, Sangzuali chuan lo hrethiam thuaiin Doliana lak sawn pahin a naute pahnih chu a chhuah pui ta daih a. Chu veleh Chawiliana chuan Lalnu leh Lal Rengliana bakah Runthanga te leh Upate kiangah chuan "Hei ka farnu inleng, khual pang zin rawn haw hlim titiin ka beng a verh hle maia, ka zawh chian leh hnu phei chuan ka rilruah a riak rengin ka ngaih a țha vak lo a ni. Kan Lalpa thihna khan khawi khua tak thleng ang maw tih tur khawpin Lal dang tam tak hnena țangin tawrhpuina thute pawh kan dawng hial anih kha. Hmar pasalțha tuaitir Rumzaliana hming hi hmar hnam ho zingah chuan a ri nasa hle maia, Lusei khua hial a rawn thleng pha tawh a ni. Hmar hnam ho tan chuan keini ho aia hmelma lian tur chuang an awm lo a, tin, țiau ral pawih ho tan pawh, kan Lalpa thihna hi remchangah lain kan zuamawm lai tak anih beisei a min rawn run thut ka hlau hlel love. Favang awllen la hla deuh mah se, hmelma tan erawh inbuatsaihna hun a tam ting a ni mai a, min run tum tute tan chuan a lawmawm zawk mah hialin a ni ka rin ni. Kan chan a chhiat hlauh chuan a tuamah hi min zuah duh hauhin ka ring lo"a han ti charh charh a. Chu tia an khaw daingul berte zinga mi ngaihțhat lohna chu an ngaih thah lo tlang hle. Lalpa Rengliana chuan "Chawia, a dik a ni. Kan Lalpa thihna avanga kan lusun khawhar lai tak hi kan hmelma te tan chuan hun remchang tak a ni miau a ni. Hmar ho leh pawih ho chu a țang dun hauhin ka ring lo na a, kan Lalpa thih thu an hriat ruala min run tura ral rel duh nghal rum rum tur khawpa min haw tute ve ve an ni tlat a ni. Eng pawh ni se Khawnbawl fel leh fing tak tak ka nei a, an ni zarah hian ka thla a muangin an thutluknaah ka innghat e"a han tih takah chuan Upa Zangaia chu rawn țawng chhuakin "Lalpa tun tutuah chuan min rawn run kherin ka ring hauh lo. Amaherawh chu buaina erawh kan tawh thuai ngei ka ringa. Chu vangin tlangvalte pawh a ruka khaw mipuite hriattir lo thei tur ang bera lo inbuatsaih chho tura kan hrilh a ngaiin ka hria. Mahse, i sawi hnial duh ka neih erawh pawih ho chuan min rawn run duh meuh angem tih hi a ni Dammawia han zin khan boruak țha a rawn hawn viau mai si a. Mahse pawih pasalțha tam tak an awm tih erawh kan hriat a țha" a han ti ve charh charh bawka.

Khawnbawl upa dangte chuan Upa Zangaia sawi ang ngei a tlangval ho a ruka inbuatsaih tir țan chu țha an ti tlangin zawlbuk lama thu thlen turin Runthanga chu an ruat nghal bawk a. Ti chuan zu te khawnin Lal in lamah chuan nileng hun an hmang ta a. Ni thum chhung thawk loa a awm takah chuan Chawiliana ke hnai la pawh a hil ta duak mai. Ni khat a han chawl hahdam leh deuh a, a bak chu lo lamah kal ve leh tawhin lawm rual te zingah chuan a bung ve ta tlauh tlauh zela.

Nipui boruak a han liam fela fur ruahtui a rawn tla țan ta. Hna țul kalsan thei annih miau loh avangin an kal diak pur mai zela. Lalpa Rengliana chuan sapui chet duh hunlai anih avangin mipuite chu fimkhur turin a chah awl lo hle. Mahse vanneih thlak takin sapui vanga nunna chan an awm loin a hlim pawh an hlim hle mai. Fur khaw nelawm loh zet chuan a kian san ve țan ta. Favang thli rawn thaw țan tir chuan boruak nuam tak lo thleng tur chu a hriat lawk tir emaw tih mai khawpa nasain nula tlangval te chu a thawk tlauh tlauh reng mai a ni. Kar loah Bualthleng khua chuan sapui vanga nunna chan awm lo chungin favang awllen chu an thleng dawn ta reng mai. An lo lam hna țul te pawh a zo har bik nih hlauin an țang em em vek a, mahse khuanu zarah khawtlang mipuite indawm tawn zelin a tumah zo har bîk tih tur awm loin an țang rual țha a, a hlim pawh an hlim hle mai.Favang khaw rawn thaw țan tir chuan mitinte tan hlim leh lawmna a rawn thlen a ni ber e.

Rengbawk khaw Lal tualah chuan tlangval tam tak an pung khawm a, an Lalpa chuan thu rawn sawiin "Khai le, kan unau khaw hran hran ațanga lo kal khawmte u, vawinniah hian kan lo rel lawk tawh ang ngeiin in che chhuak dawn ta a ni a. Hman kum lawka thil thleng kha kan la hre țheuh awm e, Lusei pasalțhate khan kan pawi an sawi bakah kan nulate chungah tak ngial pawh zahngaihna an lan tir duh lo anih kha. An pasalțha Thanhranga kan thah sak vanga thleng ni mah se, khatiang khawpa an rawn che rawva duh khan kan hnam tlang hrang hranga chengte min ti thlabarin tun thleng hian nunaute phei chu thin thiin an la mu thei lo a ni. Chu vangin kan pasalțha Rumzaliana hoin kan thawk chhuak dawn a ni. Kan hriat reng tur chu Lusei ho hi an țang rual vek dawn lo a chu vangin kan beih duh khua chu awlsam taka kan thlen theih i inbei sei ang. Zan riat kala hla Darkawn khuaa an pasalțha Kapthanga kha kan pawi sawi tute zing a mi anih avangin Darkawn khua chu kan chimih hmasa ber dawn a ni. A dawt lehah Zehtet leh Bualthleng khuate kan bei leh ang. Zehtet khua chuan tunah hian pasalțha tih tur an neih chu Hrilkunga chauh a ni ta. A aihnahphahpui Chhuahchawnga leh Thangkunga te erawh kan enthlatute hmuh danin chhungkaw pa an ni ve ta a, a hma ang ngawta huphurh awm chu an ni tawh hauh dawn lo a ni. Hrilkunga bitum turin kan pasalțha Rumzaliana hi a țha mah mah hialin a ni ka rin ni" tiin a nui zui huah huah a. Sawi zawm lehin "Bualthleng khua erawh kan beih danah fimkhur a ngai hle dawn a. Thanhranga fate pahnih bakah Liansanga leh Dammawia an la awm cheu bawk. Anni pali ringawt pawh hian khaw tenau pakhat lek chu an run hneh viau ta ve ang. Chuvangin in fimkhur hle tur a ni" a rawn ti a. Hmar pasalțha pakhat Vungthanga chuang a bula ding Zungțiala beng bulah chuan "Kan lalte hian kan fahrah satliah hi an dah chungnung mah mah a ni"a ti su su a, Zungțiala pawh a lo bu ve nghut nghut bawk a.

Ti chuan Lusei khaw pathum run tur chuan Hmar tlangval zanga chuang zet chu an chhuak ta hum hum mai a. Lusei khuate erawh an thla a muangin awllen hun nuam tak an hmang chho țan mek bawk a. Darkawn khaw ram chin an thlen hma deuh luiteah chuan Hmar tlangval ho chu chawlin an insil thlan daia chawhnu her a ni tawh bawk nen Rumzaliana chu ding chhuakin "U Țiala leh u Vunga te'n rem intih chuan he lai hnaiah hian inkulh i la Darkawn khua bei turin tlangval zahnih inthlang chhuak i la a țha mai law'ng maw" a han ti a Vungthanga chuan "Ni e, a țha ang Darkawn ho chuan tunge ka nih an hre dawn e, Țiala kan naua kiangah hian lo awm la, Zehtet khua i bei ve thung a ni ang chu. Bualthleng erawh an pasalțha te kan khin phak kan Lalten an ring lo deuh nge kan naua ngei hian that vek teh se" tiin meinei zetin a han țawnga Rumzaliana pawhin hrethiam vek mah se upa zawk anih avang chuan engtin maha chhang let loin "Hei khua kan hnaih tawha, thawm i chhuah vak tawh lo hlawm i la a țha ange. Sa chang emaw ram vak hoin min hmuh palh a hlauhawm tawh e' a han ti a Zungțiala chuan" Mai maia, naua dawih aw i chhuah tak mai le, thawm kan chhuah nasa hle tur a ni. Vunga nang ni pawh kal u la khaw thim rualin khua chu han bei rawh u, kan beih hmaa kan thawm an lo hriat leh an thlabar nasa ting a ni mai"a ti a Vungthanga pawhin "chuti chu tlangval zahnih rual kha rawn kal ru le. Khaw thim rualin khuaah kan lut ang. A ruala lut loin a khaw mi leh sa ang tur takin a fal mawi tawkin kan lut anga a thim lai zel kan bel bawk ang. Kan lut kim ta maw tihah Lusei tawh phawt chu kan kap țhuai țhuai zel ang" a ti a,an kal ta nghala thawm pawh an dim lo hle Rumzaliana chuan a rilruin "U Vung huaisenah hian chin tawk a awm a sin." tiin ngaih țha lo takin a en liam vung vung a Zungțiala chuan a darah rawn beng thuk thukin ngeiawm zetin "ka nau pasalțha nun i tem chho mek chauh a, i hrethiam lo a ni ange. Pasalțha dik tak chuan kan ti riap riap mai zel tur a ni" a ti a Rumzaliana erawh chuan engtin mah a chhang lo a Vungthanga te hlawhtlin rinna chu rinna pakhat mah a nei lo bawk a ni.

Khaw thim rual chuan Darkawn khaw mipui khaw dai lama biru te chuan khaw chhunga silai puak țhuai țhuai thawm chu thaw dep dep chungin an ngaithla a, a barakhaih zawktu Darkawn tlangvalte chu an phur telh telh bawka. Tlangval zahnih rual vel an ni ve bawk nen Hmar ho lah an tlu nasa bawk si, Hmar ho chu an tawm telh telh mai a. Mi za sawmhnih vel bak an dam ta lo, Darkawn tlangvalte erawh pali bak nunna chan an la awm tlat lo. Kapthanga'n "Darkawn tlangval te zam loin aw" tih paha chempui nena a bawh takah chuan Darkawn tlangvalte pawhin an bei ve ta nghala kar loah Hmar tlangvalte chu an tlu zo vek dawn ta mai. Vungthanga chuan "Inmalbeihah in pasalțha Kapthanga ka cho e, ka chak anih chuan min chhuah ang. Ka chak lo anih erawh chuan in salah kan țang thung ang" a han ti a Kapthanga chu Vungthanga lama chak taka tlan pahin "Kapthanga ka lo kal e, kha aw" tih pahin a chem chu a vai de nghal zawr zawr mai zawng. Pasalțha naran chapo leh inla huaisen chawp tih takah Vungthanga chu a bet nghal rawk rawk maia kar loah Vungthanga lu chu Kapthanga chuan a la ta.

Hmar tlangval la dam sawm hnih te chu inpe sap sapin Kapthanga chuan an zinga pakhat chu kek dak awrhin midang ho awmna te chu a han zawt a. Kapthanga'n a duh ang a hriat takah chuan an vai chuan phuar khawm vekin an kal tir ta a. Kawng rual rem lo leh awih pang deuhah te engtin kal tak ang maw.

Kapthanga chuan tlangval sawmhnih tirin nunaute chu an khaw awmna chhak lawka Puk lian tak pali lai awmna hmuna hruai turin a ti a, an lo let hma lo awm tur leh an ni chu an țhiante ruang an senghawi zawh velah Zehtet lam an pan tur thu a sawi a. Leng hawn ar a khuan meuh chuan an tlangval nunna chan sawmnga dawn chu an phum fel ta. An tam bawka an hmanhmawh bawk nen an han zo chu Kapthanga chuan silai nei țhah tlangval sawmhnih tir chhuak lehin khuaa ei tur awm ang ang te a tam thei ang ber a phurh tir a ti chuan nunau veng turin a kal tir leh a.Anni erawh Zehtet lam panin an kal ta a.

Zing khawvar anih meuh chuan Zungțiala chu buk kawtah tei kualin a phun bul bul reng mai a. An țhiante rawn haw thei tlat lo chu a mangang tawh hle mai. Tuk țhuan an han eite chu an rilruah vei an nei ran bawk nen an ei tui lo tlang hlawm hle mai. Tuk țhuan an eikham hnu lawk chuan Rumzaliana chuan tlangval panga hruaiin khaw lamah chuan a kal pui ve ta. An awmna ațanga kawng pangai an pawh chho chiah chu an mi leh sa an phuar hlawm vekte chu an hmu ta. Rumzaliana chuan a han phelh thuai thuai a, chanchin a han hria chu Rumzaliana mitmeng chu inthlak nghal hlawkin. "U Zungțiala te mi pahnihin zu ko rang rawh u" tih leh khaw lam pan a rual ta a. An tlangvalte ruang Darkawn khuaa let reng chu Rumzaliana chuan kal san ngawt a thei si lo a. Vungthanga ruang chu pawmin "U Vung a va han pawi tak em, ka lo kal zawk lo a ni" a han ti vawng vawng a, a hnung lawka ding reng Zungțiala chuan "Vunga i phuba chu keimah ngei hian ka la dawn a ni, i sawi ang ngei khan Zehtet khua chu ka chimih ve ngei ang" tih paha kalsawnin khua chu an hal ta hluah mai a. Nilenga an insingsak hnu chuan an bukah bawk let lehin ro an rel ta a. A țhen phei chuan let leh mai pawh an duh hiala mahse, Rumzaliana chuan "Let thei kan ni tawh lo e, let leh ai chuan ka nunna chan ka thlang zawk e, let leh duh erawh ka dang hauh lo che u" a ti a, tlangval dawih zep zual pangate chu an let leh ta hnu hnu a. Zungțiala chuan silai la lawkin chung tlangval let leh mekte chu kah a han tuma mahse Rumzaliana chuan "U Țial an ni saw chu lo kal pawh ni se inbeihna muala kan chet ti bahlah tu an ni mai dawnin ka hria," a rawn tih takah chuan silai chu dahthlain Rumzaliana chu rum zetin a melh vung vung a,"Naua mi lu khai chak reng renga nun hmang ka nih hi, Zehtet khua chu i pan vat teh ang" a han ti rum nghuta Rumzaliana pawhin Vungthanga thihna avanga thinrim rilru na a ni tih hriain "Aia upa thu ka zawm lo ngai lo e" tiin tlangval ho bulah chuan "Naktuk zingkarah kan chhuak nghal ang. Zan lamah pawh kan kal zel tawh anga kan chauh tawpkhawkah chiah kan mu tawh ang. Kan unaute leh kan pasalțha Vungthanga phuba hi kan la ngei tur a ni. In rilru kha ti hnual mai loin vawi khat chet fuh loh chu a awm chawk a ni tih kha hre reng rawh u" a han ti a Hmar tlangval te pawh an rawn phur thar leh ta hle mai.

Chhun leh zan mu mang loa an kal takah chuan ni nga na unau hmelhai velah Zehtet khaw ram chin chu an lut der mai a Rumzaliana chuan "U Țial khawfing chah ruala khua lut hman turin, zanriah kil zawhah i mu phawt ang u hmiang i rem tih chuan" a han ti a Zungțiala chuan ngei hmel zeta lo melhin chhan pawh chhang loin a mutna tur a siam san hmaka. Rumzaliana pawh nui maiin ei rel turte puiin am chet dan tur chu tlangval te a hrilh hlawm a. Vungthanga leh Zungțiala te'n an er zia hi a hre lo a ni hauh lo mah se upa zawkte an nih avangin a khing duh lo a ni zawk.

Zehtet khaw lamah ve thung chuan Hmar tlangval ho an lo kal dawn tih hre mah se an la rawn thlen mai an ring lo bawk a, an thla a la muang hle. Kapthanga pawh Thangkunga fanu pawmin Chhuahchawnga fapa Lianmawia a kai bawka, chu ti chuan khaw laiah tei kualin an inchhaih nui her her reng a. Leng len ar a khuan takah chuan an inlamah veve dahin Chhuanthanga te in lam a pan ta zawk a. Chhuanthanga te in a va luh chuan Chhuanthanga chuan "Kapa nula te hi rim ve teh. I țhianpa Chawiliana khualzin veivakin an sawi ang deuh hi i ni tlat mai a, a ni pawh saw nula lam reng reng a ngaihsak hauh lo an ti saw"a han ti a Kapthanga chuan" Mai maia ka pa Chhuan, kan Chawiliana te chuan ngaihsak reng nang, kan Lal Fanu Zoliani ngaiin a rum vung vung reng hial ang chu" tih pahin a nui uar uar a. Kapthanga bawk chuan "Sawi chhuah takah chuan naktuk lamah hi chuan an hmel kan hmuh tawh hmel a, anni kianga ral do theia ka awm leh tur hi ka phur hle mai. Hmar ho pawh an rawn hnai ve țan tawhin ka ring a ni" a ti a. Chu tih lai tak chuan Hrilkunga pawh lo lutin Chhuanthanga chuan "hei pawh nupui hmu zo lo bawk anih hi" tih pahin a lo nuih zui tlawrh tlawrh a. Ti chuan titikhawchang sawiin leng hawn ar a khuan hnu rei tawk fang an titi leh hnu chuan zawlbuk lam an pan ta a. Zawlbuk dang pakhat sa thar hlim an ni bawka Kapthanga chu a thar zawkah riakin Hrilkunga chu a hlui zawkah a riak thung a. Tlangvalte chuan tawnmang țha tak man ngei tumin zanmu an chhing ta siai siai a.

Zanlai ar khuan pelh hretah chuan Zehtet zawlbuk hlui zawk chu silai riin a luah khat ta mai. Hmar tlangval zathum rual rawn lutte chuan Zehtet khua chu an hal alh nghal pup pup bawka a khat tawka silai puak reng chu na tuar thawm aw rawlin a zui nghal zat ziah bawk a. Zawlbuk pahnih nei an ni hlauha an vannei hle. Zawlbuk pakhat zawka riak Kapthanga chuan a rilruin Hrilkunga a ngaihtuah renga a dam khaw chhuak zingah a tel em tih chu hriat vat a duh ngei mai.Hrilkunga erawh Hmar hoin an kah rawn hmasak zawk Zawlbuka a riah bakah a zan leng haw har midang tihharh a duh loh vanga bawhbel bul lawka a mu chu a pawi zo ta. Silai mu a dul nem leh a nghawnga lut chuan a nunna laksakin Zawlbukah chuan pasalțha ropui Hrilkunga chu a țhiante leh a chhungte dawm hlum lohin tho chhuak leh ngai tawh lo turin a zal ta a. Kapthanga chuan a bula an khaw tlangval pahnih awm ve chu hrilhin "Bualthleng khuaah kal vat u la, kan țhiante va pun rang rawh u. Hmanhmawh takin kal ang che u" a ti a.